Ezekiel - యెహెఙ్కేలు 34 | View All

1. మరియయెహోవా వాక్కు నాకు ప్రత్యక్షమై యీలాగు సెలవిచ్చెను

2. నరపుత్రుడా, ఇశ్రాయేలీయుల కాపరులనుగూర్చి ఈ మాట ప్రవచింపుము, ఆ కాపరులతో ఇట్లనుము ప్రభువగు యెహోవా సెలవిచ్చున దేమనగా తమ కడుపు నింపుకొను ఇశ్రాయేలీయుల కాపరులకు శ్రమ; కాపరులు గొఱ్ఱెలను మేపవలెను గదా.
యోహాను 10:8

3. మీరు క్రొవ్విన గొఱ్ఱెలను వధించి క్రొవ్వును తిని బొచ్చును కప్పుకొందురు గాని గొఱ్ఱ లను మేపరు,
యోహాను 10:8

4. బలహీనమైనవాటిని మీరు బలపరచరు, రోగముగలవాటిని స్వస్థపరచరు, గాయపడిన వాటికి కట్టుకట్టరు, తోలివేసిన వాటిని మరల తోలుకొనిరారు, తప్పిపోయినవాటిని వెదకరు, అది మాత్రమేగాక మీరు కఠినమనస్కులై బలాత్కారముతో వాటిని ఏలుదురు.

5. కాబట్టి కాపరులు లేకయే అవి చెదరిపోయెను, చెదరి పోయి సకల అడవి మృగములకు ఆహారమాయెను.
మత్తయి 9:36, మార్కు 6:34, 1 పేతురు 2:25

6. నా గొఱ్ఱెలు పర్వతము లన్నిటిమీదను ఎత్తయిన ప్రతి కొండమీదను తిరుగులాడు చున్నవి, నా గొఱ్ఱెలు భూమియందంతట చెదరిపోయినను వాటినిగూర్చి విచారించువాడొకడును లేడు, వెదకువా డొకడును లేడు.
1 పేతురు 2:25

7. కాబట్టి కాపరులారా, యెహోవా మాట ఆలకించుడి

8. కాపరులు లేకుండ నా గొఱ్ఱెలు దోపుడుసొమ్మయి సకలమైన అడవిమృగములకు ఆహార మాయెను; కాపరులు నా గొఱ్ఱెలను విచారింపరు, తమ కడుపు మాత్రమే నింపుకొందురు గాని గొఱ్ఱెలను మేపరు; ఇదే ప్రభువైన యెహోవా వాక్కు.
మార్కు 6:34, యూదా 1:12

9. కాబట్టి కాపరులారా యెహోవా మాట ఆలకించుడి.

10. ప్రభువైన యెహోవా సెలవిచ్చునదేమనగా నా జీవముతోడు నేను ఆ కాపరులకు విరోధినైతిని, నా గొఱ్ఱెలనుగూర్చి వారియొద్ద విచారించెదను, వారు గొఱ్ఱెలు మేపుట మాన్పించెదను, ఇకను కాపరులు తమ కడుపు నింపుకొన జాలక యుందురు; నా గొఱ్ఱెలు వారికి తిండికాకుండ వారి నోటనుండి వాటిని తప్పించెదను, ఇదే ప్రభువైన యెహోవా వాక్కు.

11. ప్రభువైన యెహోవా సెలవిచ్చునదేమనగా ఇదిగో నేను నేనే నా గొఱ్ఱెలను వెదకి వాటిని కనుగొందును.
లూకా 15:4

12. తమ గొఱ్ఱెలు చెదరిపోయినప్పుడు కాపరులు వాటిని వెదకునట్లు నేను నా గొఱ్ఱలను వెదకి, చీకటిగల మబ్బుదినమందు ఎక్కడెక్కడికి అవి చెదరిపోయెనో అక్కడనుండి నేను వాటిని తప్పించి

13. ఆ యా జనులలోనుండి వాటిని తోడుకొని వచ్చి, ఆ యా దేశములలోనుండి వాటిని సమకూర్చి వాటి స్వదేశము లోనికి వాటిని తెచ్చి పర్వతములమీదను వాగులయొద్దను దేశమందున్న సకలమైన కాపురపు స్థలములందును వాటిని మేపెదను.

14. నేను మంచి మేతగలచోట వాటిని మేపెదను, ఇశ్రాయేలుయొక్క ఉన్నతస్థలములమీద వాటికి దొడ్డి యేర్పడును, అక్కడ అవి మంచి దొడ్డిలో పండు కొనును, ఇశ్రాయేలు పర్వతములమీద బలమైన మేతగల స్థలమందు అవి మేయును,

15. నేనే నా గొఱ్ఱెలను మేపి పరుండబెట్టుదును; ఇదే ప్రభువగు యెహోవా వాక్కు.
యోహాను 10:11

16. తప్పిపోయిన దానిని నేను వెదకుదును, తోలివేసిన దానిని మరల తోలుకొని వచ్చెదను, గాయపడినదానికి కట్టు కట్టు దును, దుర్బలముగా ఉన్నదానిని బలపరచుదును; అయితే క్రొవ్వినవాటికిని బలముగలవాటికిని శిక్షయను మేతపెట్టి లయపరచెదను.
లూకా 15:4, లూకా 19:10

17. నా మందా, మీ విషయమై దేవుడనైన యెహోవానగు నేను సెలవిచ్చునదేమనగా గొఱ్ఱెకును గొఱ్ఱెకును మధ్యను, గొఱ్ఱెలకును పొట్టేళ్ల కును మధ్యను, గొఱ్ఱెలకును మేకపోతులకును మధ్యను భేదము కనుగొని నేను తీర్పుతీర్చెదను.
మత్తయి 25:32

18. విశేషముగా మేతమేసి మిగిలిన దానిని కాళ్లతో త్రొక్కుట మీకు చాలదా?

19. మీరు స్వచ్ఛమైన నీరుత్రాగి మిగిలినదానిని కాళ్ళతో కలకలు చేయుట మీకుచాలదా? మీరు కాళ్లతో త్రొక్కినదానిని నా గొఱ్ఱెలు మేయవలెనా? కాళ్లతో మీరు బురదగా కలిపినదానిని అవి త్రాగవలెనా?

20. కాబట్టి ప్రభువైన యెహోవా ఈ మాట సెలవిచ్చు చున్నాడు ఇదిగో నేను నేనే క్రొవ్విన గొఱ్ఱెలకును చిక్కిపోయిన గొఱ్ఱెలకును మధ్య భేదము కనుగొని తీర్పు తీర్చుదును.

21. మీరు భుజముతోను ప్రక్కతోను త్రోసి, కొమ్ములతో రోగముగల వాటినన్నిటిని పొడిచి చెదర గొట్టెదరు.

22. నా గొఱ్ఱెలు ఇక దోపుడు కాకుండ గొఱ్ఱె కును గొఱ్ఱెకును మధ్య తీర్పుతీర్చి నేను వాటిని రక్షించెదను.

23. వాటిని మేపుటకై నేను నా సేవకుడైన దావీదును వాటిమీద కాపరినిగా నియమించెదను, అతడు వాటికి కాపరిగా ఉండి వాటిని మేపును.
యోహాను 1:45, యోహాను 10:16, ప్రకటన గ్రంథం 7:17

24. యెహోవానైన నేను వారికి దేవుడనై యుందును, నా సేవకుడైన దావీదు వారిమధ్య అధిపతిగా ఉండును, యెహోవానైన నేను మాటయిచ్చియున్నాను.

25. మరియు అవి అరణ్యములో నిర్భయముగా నివసించునట్లును, అడవిలో నిర్భయముగా పండుకొనునట్లును నేను వారితో సమాధానార్థ నిబంధన చేయుదును, దుష్టమృగములు దేశములో లేకుండ చేయుదును.

26. వారిని నా పర్వతము చుట్టుపట్ల స్థలములను దీవెనకరముగా చేయుదును. ఋతువుల ప్రకారము వర్షము కురిపించెదను,దీవెనకరమగు వర్షములు కురియును,

27. ఫలవృక్ష ములు ఫలములిచ్చును, భూమి పంట పండును, వారు దేశములో నిర్భయముగా నివసింతురు, నేను వారి కాడికట్లను తెంపి వారిని దాసులుగా చేసినవారి చేతిలో నుండి వారిని విడిపింపగా నేను యెహోవానైయున్నానని వారు తెలిసికొందురు.

28. ఇక వారు అన్యజనులకు దోపుడు సొమ్ముగా ఉండరు, దుష్టమృగములు వారినిక భక్షింపవు, ఎవరివలనను భయము లేకుండ వారు సురక్షితముగా నివసించెదరు.
ప్రకటన గ్రంథం 6:8

29. మరియు వారు ఇక దేశములో కరవు కలిగి నశించిపోకుండను అన్యజనులవలన వారి కవమానము ప్రాప్తించకుండను వారి ప్రఖ్యాతికొరకై తోట యొకటి నే నేర్పరచెదను.
1 తిమోతికి 6:15

30. అప్పుడు తమ దేవుడైన యెహోవానగు నేను తమకు తోడుగా ఉన్నాననియు, ఇశ్రాయేలీయులైన తాము నా జనులైయున్నారనియు వారు తెలిసికొందురు; ఇదే ప్రభువగు యెహోవా వాక్కు.

31. నా గొఱ్ఱెలును నేను మేపుచున్న గొఱ్ఱెలు నగు మీరు మనుష్యులు, నేను మీ దేవుడను; ఇదే ప్రభువైన యెహోవా వాక్కు.



బైబిల్ అధ్యయనం - Study Bible
34:1 ఈ అధ్యాయం సాహిత్యపరంగా ఒక సంపూర్ణ విభాగం. ఇది యెహోవా వాక్కు నాకు ప్రత్యక్షమై అనే పరిచయ పదజాలంతో ప్రారంభమై, 30-31 వచనాల్లోని "...వారు తెలిసికొందురు” అనే గుర్తింపు సూత్రీకరణతో ముగుస్తుంది. ఈ వాక్యభాగం యిర్మీయా 23:1-6 వచనాలకు దగ్గరగా ఉంది. 

34:2-3 ఇశ్రాయేలీయుల కాపరులను గూర్చి అనే పదజాలం అధిపతుల్ని, బహుశా ముఖ్యంగా రాజుల్ని సూచించే అలంకారిక వర్ణన. రాజుల్ని, ఇతర అధిపతుల్ని “కాపరులు" అనడం పరిపాటి (2సమూ 7:7; కీర్తన 78:70-72; యెషయా 44:28; 63:11; యిర్మీయా 10:21; 23:1-6; 25:34-38; మీకా 5:4-5; జెకర్యా 11:4-17). బైబిల్లో గొట్టెల ప్రస్తావన చాలా తరచుగా కనబడుతుంది, గొట్టెల్ని సంరక్షించే "కాపరులు" గురించి బైబిల్ లోని దాదాపు వంద వాక్యభాగాలు తెలియజేస్తున్నాయి. పాత నిబంధనలో కాపరులుగా పేరుపొందిన వారిలో అబ్రాహాము (ఆది 12:16), ఇస్సాకు (ఆది 26:14), మోషే (నిర్గమ 3:1), దావీదు (2సమూ 7:8), ఆమోసు (ఆమోసు 1:1) ఉన్నారు. గొట్టెలు వాటినవి కాపాడుకోలేని నిస్సహాయప్రాణులు, ఎవరైనా వాటికి మంచి కాపరిగా ఉండాలనుకుంటున్నట్లయితే ఆ వ్యక్తికి వాటిమీద శ్రద్ధ, కనికరం ఉండాలి. ఈ ప్రకారంగా, రాజకీయాధికారం కలిగిన అధిపతుల్ని, మతనాయకుల్ని ప్రజల మందకు - కాపరులుగా పేర్కొనడం పరిపాటి. ఇశ్రాయేలు అధిపతులు గొఱ్ఱల్ని సంరక్షించడానికి బదులు దోచుకుంటున్నారు కాబట్టి వారిని హెచ్చరించినట్టుగానే (వ.2,8,10), క్రైస్తవ సంఘంలోని నాయకులు స్వార్థ ప్రయోజనాలతో ఉండకూడదని పేతురు హెచ్చరిస్తున్నాడు (1 పేతురు 5:2-3). మరొక వైపు, కొత్త నిబంధనలో ఉపయోగించబడిన "కాపరి” సాదృశ్యం సంఘనాయకులు, సంఘపెద్దలు తమ బాధ్యతలనెలా నిర్వహించాలో అనుకూల కోణంలో వర్ణిస్తుంది. (యోహాను 21:15-17; అపొ.కా. 20:28-29; 1పేతురు 5:1-5). 

34:4 తప్పిపోయినవాటిని వెదకడం అనే కాపరి విశిష్టగుణం బైబిల్ లోని అనేక వాక్యభాగాల్లో కనబడుతుంది (యిర్మీయా 50:6; మత్తయి 18:12-14; లూకా 15:4; 19:10). కఠినమనస్కులై అనే పదం గతంలో ఇశ్రాయేలీయులు ఐగుప్తులో ఉన్న కాలాన్ని గుర్తుచేస్తుంది, ఇశ్రాయేలీయులు ఐగుప్తులో వెట్టిచాకిరి చేసినప్పుడు. వారి పనుల్ని పర్యవేక్షించిన కార్యనిర్వాహకులు వారిచేత కఠినశ్రమ చేయించారని తెలియజేయడానికి ఇదే పదాన్నుపయోగించడం జరిగింది. (నిర్గమ 1:13-14). మోషే ధర్మశాస్త్రం ప్రకారం ఇటువంటి చర్య నిషిద్ధం (లేవీ 25:43,46). ఇశ్రాయేలు సమాజంలో ఎవరిపట్లా ఈ విధంగా ప్రవర్తించకూడదు.


34:5 యెహెజ్కేలు ఇశ్రాయేలీయులు చెరలోకి వెళ్ళడాన్ని, వారు చెల్లాచెదురై పోవడాన్ని వర్ణించడానికి తరచుగా చెదరిపోయెను అనే పదాన్నుపయోగించాడు (11:16,17; 12:15; 20:23,34,41; 22:15; 28:25). ప్రజలు చెదరి పోయారు కాబట్టి, వారు అడవిమృగాలకు ఆహారమయ్యారు, కొండలమీద తిరుగులాడారు. అయితే కాపరులు ఎవరూ వారిని వెదకలేదు (మార్కు 6:33, 34). 

34:6 చెదరిపోవడమనే పదం అషూరు చెరను, బబులోను చెరను సైతం సూచిస్తుండవచ్చు. చెరకాలంలో ఇశ్రాయేలు, యూదా ప్రజలు అన్యజనుల్లోకి చెదరిపోవడం జరిగింది. మీకాయా ప్రవచనంలో తరిమి కొట్టబడిన సైన్యాన్ని గురించి చెప్పిన ఇదే అలంకారిక వర్ణన కోసం 1రాజులు 22:17 చూడండి. 

34:7-10 కాపరులు మందల క్షేమం చూడకుండా తమను తాము పోషించుకుంటున్నారు కాబట్టి వారు తొలగించ బడతారు. 

34:11 కనుగొందును (హెబ్రీ. బికర్) అనే క్రియాపదాన్ని లేవీయకాండ ములో యాజకుడు - కుష్ఠ రోగి... శరీరాన్ని పరీక్షించే సందర్భంలో ఉపయోగించడం జరిగింది. (లేవీ 13:36). ఈ క్రియాపదం బల్యర్పణగా జంతువుల్ని అర్పించేటప్పుడు, అవి అర్పణకు అర్హమైనవో కావో తెలుసుకొనే పరీక్షను సైతం సూచిస్తుంది (లేవీ 27:33) 

34:12 ప్రజల్లో అనేకులు బబులోను చెరలోకి తీసుకొనిపోబడ్డారు, కాగా ఇశ్రాయేలీయులు చెదరిపోయిన దేశం ఇదొక్కటే కాదు (యిర్మీయా 43:1-7). 

34:13-15 పునరుద్ధరణ గురించిన వాగ్దానం (నేను... వాటిని సమకూర్చి వాటి స్వదేశములోనికి వాటిని తెచ్చి) 11:17 లో కనబడుతుంది, 20:34,4142; 28:25 వచనాల్లో కూడా కనిపిస్తుంది. దేశం పునరుద్ధరణ గురించి 38-39 అధ్యాయాలు మరీ విశేషించి నొక్కి వక్కాణిస్తున్నాయి. (36:24; 37:21 కూడా చూడండి). ఈ మూడు పదజాలాలు ఇశ్రాయేలీయులు ఐగుప్తునుండి నిర్గమించడానికి ప్రతీకగా, ప్రతిబింబంగా ఉన్నాయి. అందుచేత, దేవుడు బబులోను చెరనుండి ఇశ్రాయేలీయుల్ని విడిపించి వారిని కనానుకు తిరిగి చేర్చడం పాత నిబంధనలోని దేవుని రక్షణకార్యానికి (ఐగుప్తునుండి నిర్గమం) కొనసాగింపుగా ఉండబోతుంది.

34:16 దేవుడు మంచి కాపరి (కీర్తన 23; యెషయా 40:11; యిర్మీయా 23:3; 31:10; మీకా 2:12; 4:6-8), చెదిరిపోయిన గొట్టెల్ని ఆయన తిరిగి సమకూర్చుతాడు. ఇశ్రాయేలీయులు బబులోను చెర నుండి స్వదేశానికి తిరిగి రావడంతో ఈ ప్రవచనం ముగిసిపోలేదు, భవిష్యత్తులో వెయ్యేండ్ల పరిపాలనా కాలంలో నెరవేర్పు కోసం ఇది వేచి చూస్తుంది. యెహెజ్కేలు, ఇతర ప్రవక్తల గ్రంథాల్లో సామాజిక న్యాయంపట్ల శ్రద్ధ (బలపరచుదును... లయపరచెదను) ప్రధానాంశంగా కనబడుతుంది (యెషయా 3:13-15; 5:8; ఆమోసు 5:12; 6:1-7; మీకా 2:1-5). దేవుడు క్రొవ్వినవాటికిని బలము గలవాటికిని, మేత భూమిని తొక్కివేస్తూ స్వచ్చజలాల్ని కలకలు చేసే దురాశతో నిండి, బీదవారికి నిత్యావసరాలు అందకుండా తమ కడుపులు నింపుకొనే తిండిపోతు గొట్టెలకు దేవుడు తీర్పు తీరుస్తాడు. 

34:17-22 ఇప్పుడు దేవుడు తన మందతో మాట్లాడుతున్నాడు, బలహీనుల్ని అణచివేసేవారికి తీర్పు తీరుస్తానని హెచ్చరిక చేస్తున్నాడు. 

34:23-24 దేవుడు ఇశ్రాయేలుకు కాపరిగా ఉండడంతోబాటు, ఆయన వారికొక అధిపతిని కూడా నియమిస్తానని వాగ్దానం చేస్తున్నాడు, ఆయనే దావీదు వంశంనుండి రానున్న మెస్సీయ (2సమూ 7:12-14; కీర్తన 89:4,20,29). మెస్సీయ దావీదు వంశంనుండి వచ్చే నిజమైన కాపరి అని యిర్మీయా చెప్పాడు, ఆయనను “నీతి చిగురు" అనీ, “యెహోవా మనకు నీతి” అనీ ఆయనను పిలుస్తున్నాడు, ఆయన పాలనలో “యూదా రక్షణనొందును, ఇశ్రాయేలు నిర్భయముగా నివసించును” అని చెబుతున్నాడు (యిర్మీయా 23:5-6). గుర్తింపును సూచించే ఇవే మాటలు ప్రవచన సాహిత్యంలో ఇతర చోట్ల కూడా కనబడుతున్నాయి (37:24-25; యెషయా 55:3-4; యిర్మీయా 30:9; హోషేయ 3:5). భవిష్యత్ కాలంలో ఇశ్రాయేలు పునరుద్దరణను తెలియజేసే వాక్యభాగాల్లో దావీదు పేరు కనబడుతుంది. (37:24-25; యెషయా 11:1-10; యిర్మీయా 30:9; హో షేయ 3:5). ఈ ప్రకారంగా, యెహోవా ఇశ్రాయేలుకు దేవుడుగా ఉంటాడు, నా సేవకుడైన దావీదు అని పేర్కొనబడిన మెస్సీయ ఇశ్రాయేలును పునరుద్ధరించిన తర్వాత భూమ్మీద ఇశ్రాయేలును పరిపాలిస్తాడు. “నా సేవకుడైన దావీదు” అనే పదజాలం రాజైన దావీదుకు ప్రామాణికమైన బిరుదు (1రాజులు 11:34, 36,38; 2రాజులు 8:19; కీర్తన 36:1; 78:70; యెషయా 55:3-4 చూడండి). దావీదు చారిత్రకంగా మాత్రమే కాదు, వేదాంతపరంగా కూడా ముఖ్యుడు. ఇది దేవుడు దావీదుతో చేసిన నిబంధనలో రూఢిగా తెలుస్తుంది. (2సమూ 7). ఈ నిబంధన అంతిమంగా మెస్సీయ అయిన యేసులో నెరవేరింది. ఇశ్రాయేలుకు రాజుగా ఉండుటకై దావీదు వంశంనుండి (మత్తయి 1:1) వచ్చిన యేసు మంచి కాపరి (యోహాను 10:11-18). 

34:25 సమాధానార్థ నిబంధనకు మూలం దేవుడు నోవహుతో చేసిన నిబంధన, జలప్రళయం తర్వాత ఇక ఎన్నడూ “సమస్తశరీరులు" జలప్రళయం ద్వారా నశించరని దేవుడు ప్రమాణపూర్వకంగా తెలియజేశాడు. (ఆది 9:817). ఈ నిబంధనను దేవుడు కొత్తగా చేయబోతున్న సమాధానార్ధమైన నిబంధనా సంబంధంతో పోల్చవచ్చు. (సంఖ్యా 25:12; యెహో 9:15; 10:1; కీర్తన 29:11; 85:8; యెషయా 54:10). పాపంవలన మనిషి దేవునితో సమాధాన స్థితిని కోల్పోయాడు. (ఆది 3:15; 4:8). అయితే మోషేతో స్థిరపర్చిన నిబంధనలో విధేయత ఫలితంగా సమాధానస్థితి కలుగుతుంది (లేవీ 26:6). ఈ సమాధానార్థ నిబంధన వెయ్యేండ్ల కాలంలో ఇశ్రాయేలు పొందబోయే దీవెనలకు సూచికగా ఉంది. అయితే ఇప్పుడు కూడా క్రీస్తుతో సరైన సంబంధం ద్వారా సమాధానాన్ని అనుభవించవచ్చు. దావీదుకు ఏకైక నిజకుమారుడైన క్రీస్తులో మాత్రమే ఈ ప్రవచనం నెరవేరింది. “సమస్త జ్ఞానమునకు మించిన దేవుని సమాధానము” వంటి కొన్ని మేళ్ళు ఇప్పటికే అనుభవంలోకి వచ్చాయి. (ఫిలిప్పీ 4:7; యోహాను 14:27తో పోల్చండి). వాగ్దానం చేయబడిన రీతిగా దావీదు కుమారుడూ, రాజూ అయిన మెస్సీయ మళ్ళీ వచ్చినప్పుడు అన్ని ఆశీర్వాదాలు సంపూర్ణంగా సార్థకమవుతాయి. ఇశ్రాయేలు భవిష్య పునరుద్దరణను సూచించే పదజాలం (అరణ్యములో నిర్భయముగా నివసించునట్లును, అడవిలో నిర్భయముగా పండుకొనునట్లును) నిర్గమం వృత్తాంతంలోని పదజాలాన్ని పోలి ఉంది, అంటే ఇది ఇశ్రాయేలు పునరుద్ధరణ మరొక కొత్త నిర్గమం అని సూచిస్తుంది, ఇది గతంలో ఇశ్రాయేలీయులు ఐగుప్తు దాస్యంనుండి విడుదల పొందడాన్ని గుర్తు చేస్తుంది. 

34:26 ఇశ్రాయేలులో శరదృతువులోని తొలకరివాన వర్షాకాలం ప్రారంభా నికి సూచన కాగా, వసంతకాలం లోని కడవరి వాన వర్షాకాలం ముగింపును సూచిస్తుంది. (యిర్మీయా 5:24). దీవెనకు సంబంధించిన పదజాలం తరచుగా సృష్టి వృత్తాంతంలో కనబడుతుంది, దీవెన సృష్టికర్త చేసిన పనికి - సంబంధించినది. దేవుడు సాధారణంగా ప్రకృతిలోని సహజ ప్రక్రియల్ని సజావుగా జరిగించడం ద్వారా ప్రజల్ని దీవిస్తాడు గానీ, వాటిని తలక్రిందులు చేసి అద్భుతాలు చేయడం ద్వారా కాదు.

34:27 కాడి అనే పదం బైబిల్లో ఏభై సార్లకు పైగానే కనబడుతుంది. పశువులు పొలం దున్నడానికి లేదా బరువులు మోయడానికి వాటి మెడలమీద కాడినుంచుతారు. కాడికట్లను అనే పదం కాడి కిరువైపుల ఉండే త్రాళ్ళను సూచిస్తుంది, వీటిని ఎద్దుల మెడ చుట్టూ వేసి కాడికి కడతారు (30:18; లేవీ , 26:13; యిర్మీయా 27:2; 28:10-13). కాడి దాస్యానికి సాదృశ్యం, కాడికట్లను బిగించడం కఠినశ్రమకు సాదృశ్యం. బైబిల్లో కాడి అనే పదాన్ని సాధారణంగా అలంకారిక పదంగానే ఉపయోగించడం జరిగింది, కాడి అన్యజనుల ఏలుబడిని కూడా సూచిస్తుంది. (ద్వితీ 28:48; యిర్మీయా 27:8-12).

34:28 దేవుడు దుష్టమృగములు ఉండకుండా చేస్తాడు. కాబట్టి ప్రజలు నిర్భయంగా నివసిస్తారు (లేవీ 26:5-6). సర్వత్రా శాంతి సమాధానాలతో, మనుషులకు, అడవి జంతువులకు మధ్య సైతం సామరస్యం నెలకొని ఉండే మెస్సీయ యుగాన్ని ఒక సుందర దృశ్యంగా యెహెజ్కేలు చేసిన వర్ణన యెషయా 11:6-9; హోషేయ 2:18-23 లను గుర్తుచేస్తుంది. 1-24 అధ్యాయాల్లో నాశనం గురించి ఉన్న ప్రవచనాలు నిబంధనలోని శాపాలను మాత్రమే తెలియజేశాయి (ముఖ్యంగా, లేవీయకాండము అధ్యా. 26). ఇప్పుడైతే పునరుద్ధరణ గురించిన భవిష్య దర్శనాలు నిబంధనలో విధేయతకు సంబంధించిన దీవెనలను తెలియజేసే పరిభాషలో ఉన్నాయి (ముఖ్యంగా లేవీయకాండము అధ్యా.26), పైగా ఇవి షరతులులేని భావికాలపు ఆనందం గురించిన ప్రవచనాలు. 

34:29 ఇశ్రాయేలు అంతిమంగా యెహోవాకు విధేయత చూపినప్పుడు భూమ్మీద ఆశీర్వాదాల ననుభవిస్తుందని ప్రవక్తలు ప్రకటించారు. ఇదే అంశం రోమా 11:25-27 వచనాల్లో కనబడుతుంది. పునరుద్దరణ యుగంలోని దీవెనల్ని తెలియజేసే ఒక ప్రామాణిక సూచన సస్యసమృద్ధి (ద్వితీ 30:9; ఆమోసు 9:13). 

34:30 నిర్గమం వృత్తాంతంలో యెహోవాకు ఇశ్రాయేలుకు మధ్య స్థిరపడిన సంబంధంలో ఉన్నట్టుగా (11:20; నిర్గమ 6:7; హోషేయ 1:9), తమ దేవుడైన యెహోవానగు నేను తమకు తోడుగా ఉన్నాననియు... తెలిసికొందురు అనే ముగింపు నిబంధనలోని పరిభాషను ప్రతిబింబిస్తుంది.

34:31 నేను మేపుచున్న గొట్టెలునగు మీరు... నేను మీ దేవుడను అనే పదజాలం దేవుడు మోషేతో స్థిరపర్చిన దైవిక నిబంధన పునస్థాపనకు సంబంధించినదిగా కనబడుతుంది. (నిర్గమ 6:7; యిర్మీయా 7:23; హో షేయ 2:23). 


Shortcut Links
యెహెఙ్కేలు - Ezekiel : 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 |
ఆదికాండము - Genesis | నిర్గమకాండము - Exodus | లేవీయకాండము - Leviticus | సంఖ్యాకాండము - Numbers | ద్వితీయోపదేశకాండము - Deuteronomy | యెహోషువ - Joshua | న్యాయాధిపతులు - Judges | రూతు - Ruth | 1 సమూయేలు - 1 Samuel | 2 సమూయేలు - 2 Samuel | 1 రాజులు - 1 Kings | 2 రాజులు - 2 Kings | 1 దినవృత్తాంతములు - 1 Chronicles | 2 దినవృత్తాంతములు - 2 Chronicles | ఎజ్రా - Ezra | నెహెమ్యా - Nehemiah | ఎస్తేరు - Esther | యోబు - Job | కీర్తనల గ్రంథము - Psalms | సామెతలు - Proverbs | ప్రసంగి - Ecclesiastes | పరమగీతము - Song of Solomon | యెషయా - Isaiah | యిర్మియా - Jeremiah | విలాపవాక్యములు - Lamentations | యెహెఙ్కేలు - Ezekiel | దానియేలు - Daniel | హోషేయ - Hosea | యోవేలు - Joel | ఆమోసు - Amos | ఓబద్యా - Obadiah | యోనా - Jonah | మీకా - Micah | నహూము - Nahum | హబక్కూకు - Habakkuk | జెఫన్యా - Zephaniah | హగ్గయి - Haggai | జెకర్యా - Zechariah | మలాకీ - Malachi | మత్తయి - Matthew | మార్కు - Mark | లూకా - Luke | యోహాను - John | అపో. కార్యములు - Acts | రోమీయులకు - Romans | 1 కోరింథీయులకు - 1 Corinthians | 2 కోరింథీయులకు - 2 Corinthians | గలతియులకు - Galatians | ఎఫెసీయులకు - Ephesians | ఫిలిప్పీయులకు - Philippians | కొలొస్సయులకు - Colossians | 1 థెస్సలొనీకయులకు - 1 Thessalonians | 2 థెస్సలొనీకయులకు - 2 Thessalonians | 1 తిమోతికి - 1 Timothy | 2 తిమోతికి - 2 Timothy | తీతుకు - Titus | ఫిలేమోనుకు - Philemon | హెబ్రీయులకు - Hebrews | యాకోబు - James | 1 పేతురు - 1 Peter | 2 పేతురు - 2 Peter | 1 యోహాను - 1 John | 2 యోహాను - 2 John | 3 యోహాను - 3 John | యూదా - Judah | ప్రకటన గ్రంథం - Revelation |

Explore Parallel Bibles
21st Century KJV | A Conservative Version | American King James Version (1999) | American Standard Version (1901) | Amplified Bible (1965) | Apostles' Bible Complete (2004) | Bengali Bible | Bible in Basic English (1964) | Bishop's Bible | Complementary English Version (1995) | Coverdale Bible (1535) | Easy to Read Revised Version (2005) | English Jubilee 2000 Bible (2000) | English Lo Parishuddha Grandham | English Standard Version (2001) | Geneva Bible (1599) | Hebrew Names Version | Hindi Bible | Holman Christian Standard Bible (2004) | Holy Bible Revised Version (1885) | Kannada Bible | King James Version (1769) | Literal Translation of Holy Bible (2000) | Malayalam Bible | Modern King James Version (1962) | New American Bible | New American Standard Bible (1995) | New Century Version (1991) | New English Translation (2005) | New International Reader's Version (1998) | New International Version (1984) (US) | New International Version (UK) | New King James Version (1982) | New Life Version (1969) | New Living Translation (1996) | New Revised Standard Version (1989) | Restored Name KJV | Revised Standard Version (1952) | Revised Version (1881-1885) | Revised Webster Update (1995) | Rotherhams Emphasized Bible (1902) | Tamil Bible | Telugu Bible (BSI) | Telugu Bible (WBTC) | The Complete Jewish Bible (1998) | The Darby Bible (1890) | The Douay-Rheims American Bible (1899) | The Message Bible (2002) | The New Jerusalem Bible | The Webster Bible (1833) | Third Millennium Bible (1998) | Today's English Version (Good News Bible) (1992) | Today's New International Version (2005) | Tyndale Bible (1534) | Tyndale-Rogers-Coverdale-Cranmer Bible (1537) | Updated Bible (2006) | Voice In Wilderness (2006) | World English Bible | Wycliffe Bible (1395) | Young's Literal Translation (1898) | Telugu Bible Verse by Verse Explanation | పరిశుద్ధ గ్రంథ వివరణ | Telugu Bible Commentary |