15:1 పూర్వకాలంలోని మోషే, సమూయేలు వంటి గొప్ప ప్రార్ధనా వీరులు దేవుని యెదుట ప్రార్థించడానికి నిలువబడినను, వారు సైతం ఆయన తన నిర్ణయాన్ని మార్చుకొనేలా చేయలేరు. ఏ ప్రార్థనా ప్రజలకు సహాయ పడనంతగా వారు పాపాల్లో కూరుకొనిపోయారు. మోషే అనేక సార్లు ఇశ్రాయేలీయుల కోసం విజయవంతంగా విజ్ఞాపన చేశాడు. (నిర్గమ 32:714,30-32; సంఖ్యా 14:13-19; ద్వితీ 9:13-29), సమూయేలు కూడా అంతే (1సమూ 7:8-9; 12:17-25). అయితే ఇప్పుడు యూదాకు అన్ని ఆశలూ అంతరించిపోయాయి.
15:2 ప్రజల భవిష్యత్తు నిరాశాజనకంగా మారింది. వారనుకున్నవాటిలో ఏదీ దేవుని నిర్ణయాన్ని మార్చలేదు.
15:3 యిర్మీయాలో, యెహెజ్కేలులో నాలుగురకాల శాపాలు తరచూ కన బడతాయి (మరణం, ఖడ్గం, కరవు, చెర). ఇవే శ్రమలు ప్రకటన గ్రంథంలోని నలుగురు గుఱ్ఱపురౌతుల ప్రస్తావనలోను కనబడుతున్నాయి (ప్రక 6:1-8).
15:4 ద్వితీ 28:37 లో మోషే ముందుగా చెప్పినట్టుగానే యూదా ప్రజలు సకల రాజ్యములలోనికి యిటు - అటు చెదరగొట్టబడి అన్యజనులను విస్మయపరుస్తారు (24:9; 29:18; 34:17). యిర్మీయా గ్రంథమంతటిలో ఇక్కడ ఒక్కచోట మాత్రమే రాజైన మనషే ప్రస్తావన కనబడుతున్నది (క్రీ.పూ. 696-642), యూదాలో దారుణమైన పరిస్థితులకు కారణం అతడే అని ఈ వచనం తెలియజేస్తుంది. మనషే ప్రవేశపెట్టిన దుష్టక్రియల ప్రభావం ఎంత దీర్ఘకాలికమైనదంటే అతని మనుమడు రాజైన యోషీయా క్రీ.పూ. 621లో మతసంస్కరణల్ని ప్రవేశపెట్టి దేశంలో పునరుజ్జీవం కలిగేలా చేసినప్పటికీ (2రాజులు 23:26) యూదాకు వినాశనం తప్పలేదు.
15:5- ఈ వచనంలోని ప్రశ్నలకు “ఎవరూ లేరు" అనే జవాబు వస్తుంది.
15:6 నీవు నన్ను విసర్జించి అనే పదజాలంలో “నీవు” అనే పదం ప్రధానంగా కనబడుతున్నది. అంటే “నీ అంతట నీవే విడిచి పెట్టావనే అవగాహనలో ఉంది. దేవుడు ముందుగా యూదాను విడిచిపెట్టలేదు గానీ యూదాయే దేవుణ్ణి ముందుగా విడిచిపెట్టింది. దేవుడు యూదాను విడిచిపెట్టడానికిదే కారణం.
15:7 ధాన్యాన్ని, చెత్తను వేరుచేయడానికి చేటతో చెరిగి తూర్పారపట్టినట్టుగా దేవుడు యూదాను తూర్పారపడుతున్నాడు. ఈ సాదృశ్యం యూదా మొత్తం పూర్తిగా నాశనం కాదని తెలియజేస్తుంది. నమ్మకస్తులైన శేషప్రజ మిగులుతారు. దేశద్వారములో అనే పదం యూదాలోని శివారు ప్రాంతాల్ని సూచిస్తుంది.
15:8-9 సముద్రపు ఇసుక అనే అలంకారిక వర్ణన ఆది 41:49 వచనం నుండి సుపరిచితమైనదే, అయితే ఇక్కడ ఈ వర్ణన వ్యతిరేక భావంలో ఉంది. ఏడుగురిని కనిన స్త్రీ సంతానవతి అయినా ఆమె ఏడుగురినీ పోగొట్టుకుంది.
15:10-12 ఇది యిర్మీయా చేసిన మరొక “ఒప్పుకోలు" ప్రకటన (4:19-22 నోట్సు చూడండి). తాను పుట్టకపోయినా బాగుండేదని యిర్మీయా చెబుతున్నాడు. యిర్మీయా తన పిలుపును తన పరిచర్యను విడిచి పెట్టాలని శోధించబడుతున్నాడు.
15:10 ప్రవక్త తాను జగడమాడువానిగాను... కలహించువానిగాను ఉన్నా నేమోనని అనుకుంటున్నాడు. ఈ పదాలు న్యాయస్థానాల్లోని పారిభాషిక పదాలు. తన ప్రజల్ని న్యాయస్థానానికి ఈడ్చుకొని వెళ్తున్నానేమోనని యిర్మీయా భావన. అయితే తాను వడ్డికి అప్పులివ్వలేదనీ, వారెవరూ తనకు డబ్బులు బదులివ్వలేదనీ యిర్మీయా నొక్కి చెబుతున్నాడు, అధిక వడ్డికి అప్పులివ్వడం అక్రమార్జనకు సంబంధించినది (ద్వితీ 23:19).
15:12 ఎవడైన అనే పదం అబద్ద ప్రవక్త హనన్యాను సూచిస్తుంది. అతడు యిర్మీయా మెడమీద నుండి కలపతో చేసిన కాడిని తీసి విరగగొట్టాడు (28:10-13). అయితే అతడు ఇనుముతో చేసిన కాడిని విరగగొట్టలేడు. అంటే బబులోను అనే ఉత్తరమునుండి వచ్చు యినుమునైనను విరగగొట్టలేడు.
15:13-14 యాజకుడైన పషూరు కివ్వబడిన ఈ ప్రవచనం (20:5), క్రీ.పూ. 597 లో నెరవేరింది (2రాజులు 24:13).
15:15-18 యిర్మీయా “ఒప్పుకోలు" ప్రకటనల్లో ఇది మరొకటి (4:19-22 నోట్సు చూడండి). దేవుని నుండి వచ్చిన జవాబు వ. 19-21 లలో ఉంది.
15:15 నా కొరకై ప్రతిదండన చేయుము అని యిర్మీయా మొట్ట పెట్టాడు . అతడు తానుగా ప్రతిదండన చేయాలనుకోలేదు గానీ, ఆ పని దేవునికే వదిలిపె పెట్టాడు. వాస్తవానికి అతని శత్రువులు అతనిని కాదు, దేవుడే వ్యతిరేకిస్తున్నారు.
15:16 యిర్మీయాకు, యెహెజ్కేలుకు (యెహె 2:8-3:3) మొదట్లో దేవుని మాటలు సంతోషం కలిగించాయి. నీ మాటలు నాకు దొరకగా అనే భావ ప్రకటన బహుశా రాజైన యోషీయా కాలంలో దేవాలయంలో ధర్మశాస్త్ర గ్రంథం దొరకడాన్ని సూచిస్తుండవచ్చు (2రాజులు 22:13; 23:2)
15:18 దేవుడు ఎండమావుల లాగా ఉన్నాడని లేదా “నిలువని జలముల" లాగా ఉన్నాడనే ఆరోపణ. నిలువని జలము అనే పదజాలం వేసవికాలంలో ఎండిపోయే వాగును సూచిస్తుంది. ఈ సాదృశ్యానికి భిన్నంగా 2:13లో దేవుడు “జీవజలముల ఊట” అని యిర్మీయా వర్ణించాడు.
15:19 దేవుడు యిర్మీయాను తనవైపు మళ్లాలని... పిలిచి (నా తట్టు తిరిగినయెడల) అతనికి ఉలికిపాటు కలిగించాడు, షువ్ అనే హెబ్రీ పదానికి “వెనుకకు తిరుగు”, “పశ్చాత్తాపపడు" అని అర్థం. దేవుడు యిర్మీయాను తిరిగి తనవైపు రప్పించుకొని (రప్పింతును) తన సన్నిధిని నిలుచునట్లు చేయడానికి అతడు ఇలా మాట్లాడడం ఆపివేయాలని ఆయన కోరుకొంటున్నాడు (హెబ్రీ. షువ్, హిఫిల్ అనే పదాలు "తిరిగి రప్పించడం" అనే అర్థాన్నిస్తాయి). దేవుడు వ.15-18 లోని యిర్మీయా మాటల్ని నీచములని చెబుతున్నాడు. ప్రవక్త
యెహోవాకు నోటివలె కొనసాగాలంటే అతడు వెంటనే పశ్చాత్తాపపడాలి.
15:20-21 ఈ మాటలు యిర్మీయా తనను తాను పరిచర్యకు పునరంకితం చేసుకొనడానికి తగినవిగా ఉన్నాయి (1:18-19). అప్పుడు దేవుడు తనకు శత్రువులుగా మారిన తన ప్రజల మధ్య ప్రవక్తను యిత్తడి ప్రాకారముగా నియమిస్తాడు (1:17-19 నోట్సు చూడండి). విమోచనకు సంబంధించిన మూడు క్రియాపదాలు (నిర్గమం వృత్తాంతంలోను ఇవి కనబడతాయి) దేవుని రక్షణను, విమోచనను బహుముఖ కోణాల నుండి నొక్కి చెబుతున్నాయి: రక్షించుటకును (హెబ్రీ. హెషియా) అనే పదం దాస్యంనుండి విశాలస్థలంలోకి తీసుకొనిరావడాన్నీ, విడిపించుటకును (హెబ్రీ. నట్సల్) అనే పదం వేటాడి చంపి తినే జంతువు నుండి లేదా సంహరించే బలవంతుడి నుండి లాగి విడిపించడాన్నీ, విమోచించెదను (హెబ్రీ. పదా) అనే పదం స్వతంత్రుడిని చేయడంకోసం వెల చెల్లించి దాస్యవిముక్తి కలిగించడాన్ని వివరిస్తున్నాయి.