Revelation - ప్రకటన గ్రంథము 2 | View All

1. ఎఫెసులో ఉన్న సంఘపు దూతకు ఈలాగు వ్రాయుము ఏడు నక్షత్రములు తన కుడిచేత పట్టుకొని యేడు దీపస్తంభములమధ్య సంచరించువాడు చెప్పు సంగతు లేవనగా

2. నీ క్రియలను నీ కష్టమును నీ సహనమును నేనెరుగుదును; నీవు దుష్టులను సహింపలేవనియు, అపొస్తలులు కాకయే తాము అపొస్తలులమని చెప్పుకొను వారిని పరీక్షించి వారు అబద్ధికులని నీవు కనుగొంటివనియు,

3. నీవు సహనము కలిగి నా నామము నిమిత్తము భారము భరించి అలయలేదనియు నేనెరుగుదును.

4. అయినను మొదట నీకుండిన ప్రేమను నీవు వదిలితివని నేను నీమీద తప్పు ఒకటి మోపవలసియున్నది.

5. నీవు ఏ స్థితిలోనుండి పడితివో అది జ్ఞాపకము చేసికొని మారు మనస్సుపొంది ఆ మొదటి క్రియలను చేయుము. అట్లుచేసి నీవు మారు మనస్సు పొందితేనే సరి; లేనియెడల నేను నీయొద్దకు వచ్చి నీ దీపస్తంభమును దాని చోటనుండి తీసివేతును.

6. అయితే ఈ యొకటి నీలో ఉన్నది, నీకొలాయితుల క్రియలు నీవు ద్వేషించుచున్నావు; నేనుకూడ వీటిని ద్వేషించుచున్నాను.
కీర్తనల గ్రంథము 139:21

7. చెవిగలవాడు ఆత్మ సంఘములతో చెప్పుచున్నమాట వినునుగాక. జయించు వానికి దేవుని పరదైసులో ఉన్న జీవవృక్షఫలములు భుజింప నిత్తును.
ఆదికాండము 2:8, ఆదికాండము 2:9, ఆదికాండము 3:22, ఆదికాండము 3:24, యెహెఙ్కేలు 28:13, యెహెఙ్కేలు 31:8

8. స్ముర్నలోఉన్న సంఘపుదూతకు ఈలాగు వ్రాయుము మొదటివాడును కడపటివాడునై యుండి, మృతుడై మరల బ్రదికినవాడు చెప్పు సంగతులేవనగా
యెషయా 44:6, యెషయా 48:12

9. నీ శ్రమను దరిద్రతను నేనెరుగుదును, అయినను నీవు ధనవంతుడవే; తాము యూదులమని చెప్పుకొనుచు, యూదులు కాక సాతాను సమాజపు వారివలన నీకు కలుగు దూషణనే నెరుగుదును. నీవు పొందబోవు శ్రమలకు భయపడకుము.

10. ఇదిగో మీరు శోధింపబడునట్లు అపవాది మీలో కొందరిని చెరలో వేయింపబోవుచున్నాడు; పది దినములు శ్రమ కలుగును; మరణమువరకు నమ్మకముగా ఉండుము. నేను నీకు జీవకిరీట మిచ్చెదను.
దానియేలు 1:12, దానియేలు 1:14

11. సంఘములతో ఆత్మచెప్పుచున్న మాట చెవిగలవాడు వినును గాక.జయించువాడు రెండవ మరణమువలన ఏ హానియుచెందడు.

12. పెర్గములోఉన్న సంఘపు దూతకు ఈలాగు వ్రాయుము వాడియైన రెండంచులుగల ఖడ్గముగలవాడు చెప్పు సంగతులేవనగా
యెషయా 49:2

13. సాతాను సింహాసనమున్న స్థలములో నీవు కాపురమున్నావని నేనెరుగుదును. మరియసాతాను కాపురమున్న ఆ స్థలములో, నాయందు విశ్వాసియైయుండి నన్నుగూర్చి సాక్షియైన అంతిపయనువాడు మీమధ్యను చంపబడిన దినములలో నీవు నా నామము గట్టిగా చేపెట్టి నాయందలి విశ్వాసమును విసర్జింపలేదని నేనెరుగుదును.

14. అయినను నేను నీమీద కొన్ని తప్పిదములు మోపవలసియున్నది. అవేవనగా, విగ్రహములకు బలియిచ్చిన వాటిని తినునట్లును, జారత్వము చేయునట్లును, ఇశ్రాయేలీయులకు ఉరి యొడ్డుమని బాలాకునకు నేర్పిన బిలాముబోధను అనుసరించువారు నీలో ఉన్నారు
సంఖ్యాకాండము 25:1-2, సంఖ్యాకాండము 31:16

15. అటువలెనే నీకొలాయితుల బోధ ననుసరించు వారును నీలో ఉన్నారు.

16. కావున మారుమనస్సు పొందుము; లేనియెడల నేను నీయొద్దకు త్వరగా వచ్చి నా నోటనుండి వచ్చు ఖడ్గముచేత వీరితో యుద్ధముచేసెదను.
యెషయా 49:2

17. సంఘములతో ఆత్మ చెప్పుచున్న మాట చెవిగలవాడు వినును గాక. జయించువానికి మరుగైయున్న మన్నాను భుజింప నిత్తును. మరియు అతనికి తెల్లరాతినిత్తును; ఆ రాతిమీద చెక్కబడిన యొక క్రొత్తపేరుండును; పొందిన వానికే గాని అది మరి యెవనికిని తెలియదు.
కీర్తనల గ్రంథము 78:24, యెషయా 62:2, యెషయా 65:15

18. తుయతైరలో ఉన్న సంఘపు దూతకు ఈలాగు వ్రాయుము అగ్నిజ్వాలవంటి కన్నులును అపరంజిని పోలిన పాదములునుగల దేవుని కుమారుడు చెప్పు సంగతులేవనగా
దానియేలు 10:6

19. నీ క్రియలను, నీ ప్రేమను, నీ విశ్వాసమును, నీ పరిచర్యను, నీ సహనమును నేనెరుగుదును; నీ మొదటి క్రియల కన్న నీ కడపటి క్రియలు మరియెక్కువైనవని యెరుగుదును.

20. అయినను నీమీద తప్పు ఒకటి నేను మోపవలసి యున్నది; ఏమనగా, తాను ప్రవక్త్రినని చెప్పుకొనుచున్న యెజెబెలను స్త్రీని నీ వుండనిచ్చుచున్నావు. జారత్వము చేయుటకును, విగ్రహములకు బలియిచ్చిన వాటిని తినుటకును అది నా దాసులకు బోధించుచు వారిని మోసపరచుచున్నది.
సంఖ్యాకాండము 25:1-3, 1 రాజులు 16:31, 2 రాజులు 9:22

21. మారుమనస్సు పొందుటకు నేను దానికి సమయమిచ్చితినిగాని అది తన జారత్వము విడిచిపెట్టి మారుమనస్సు పొందనొల్లదు.

22. ఇదిగో నేను దానిని మంచము పట్టించి దానితోకూడ వ్యభిచరించు వారు దాని క్రియలవిషయమై మారుమనస్సు పొందితేనే గాని వారిని బహు శ్రమలపాలు చేతును,

23. దాని పిల్లలను నిశ్చయముగా చంపెదను. అందువలన అంతరింద్రియములను హృదయములను పరీక్షించువాడను నేనే అని సంఘము లన్నియు తెలిసికొనును. మరియు మీలో ప్రతివానికి వాని వాని క్రియల చొప్పున ప్రతిఫలము ఇచ్చెదను.
కీర్తనల గ్రంథము 7:9, కీర్తనల గ్రంథము 62:12, సామెతలు 24:12, యిర్మియా 11:20, యిర్మియా 17:10

24. అయితే తుయతైరలో కడమవారైన మీతో, అనగా ఈ బోధను అంగీకరింపక సాతానుయొక్క గూఢమైన సంగ తులను ఎరుగమని చెప్పుకొనువారందరితో నేను చెప్పుచున్నదేమనగా మీపైని మరి ఏ భారమును పెట్టను.

25. నేను వచ్చువరకు మీకు కలిగియున్నదానిని గట్టిగా పట్టుకొనుడి.

26. నేను నా తండ్రివలన అధికారము పొందినట్టు జయించుచు, అంతమువరకు నా క్రియలు జాగ్రత్తగా చేయువానికి జనులమీద అధికారము ఇచ్చెదను.
కీర్తనల గ్రంథము 2:8-9

27. అతడు ఇనుపదండముతో వారిని ఏలును; వారు కుమ్మరవాని పాత్రలవలె పగులగొట్టబడుదురు;
కీర్తనల గ్రంథము 2:8-9

28. మరియు అతనికి వేకువ చుక్కను ఇచ్చెదను.

29. సంఘములతో ఆత్మ చెప్పుచున్న మాట చెవి గలవాడు వినునుగాక.



బైబిల్ అధ్యయనం - Study Bible
2:1-3:22 ఈ ఏడు సంఘాలకు పత్రికలు రాయాలని ఎంచుకోడానికి కారణం బహుశా ఆ సంఘాలు నేర్పించే పాఠాలు “సంఘములన్ని"టికి (2:23) సరిపోతాయని కావచ్చు. కొందరు వ్యాఖ్యాతలు చెప్తున్నట్లు, అవి సంఘ , చరిత్రలో ఉన్న ఏడు దశలకు ప్రతినిధులుగా ఉండడం కాదు. అయినప్పటికీ, ఏ చారిత్రక కాలంలోనైనా, అధికశాతం సంఘాలు, ఈ ఏడు సంఘాలలో ఉన్న నిజాలను ప్రతిబింబిస్తాయి. అని కావచ్చు. సామాన్యంగా చెప్పాలంటే, ప్రతి ఉత్తరంలో: (1) 1:12-18లో నుండి తీసుకొన్న పునరుత్థానుడైన క్రీస్తు లక్షణాలలో ఒకటి, (2) సంఘాన్ని మెచ్చుకోవడం (సాఫ్టస్, లవొదికయ సంఘాలకు మాత్రం, ఇదిలేదు), (3) సంఘాల లోపాలను విమర్శచేయడం (స్ముర్న్, ఫిలదెల్ఫియా సంఘాలకు మాత్రం ఇది లేదు), వాటిని ఎలా సరిచేసుకోవాలి అని చెప్పడం, (4) “సంఘములతో ఆత్మ చెప్పుచున్న మాట” వినమనే ఆ, (5) ఓపికతో ఆధ్యాత్మికంగా “
జయించువాడు" పొందేది. 

2:1 సంఘపు దూత గురించి 1:20 నోట్సు చూడండి. ఎఫెసు రోమా సామ్రాజ్యంలో ఉన్న ఒక పెద్ద, అత్యంత శక్తివంతమైన పట్టణాలలో ఒకటి. దానిలో అర్తెమి (లాటిన్ "డయానా", అపొ.కా.19:28) అనే సంతానాభివృద్ధిని సూచించే దేవతను, దేవుడుగా భావించే రోమా చక్రవర్తిని ఆరాధించేవారు. ఎఫెసు సంఘాన్ని సుమారు క్రీ.శ. 52 ప్రాంతంలో ప్రిస్కిల్ల, అకులలు స్థాపించారు. పౌలు అక్కడ రెండు లేక మూడు సంవత్సరాలు పరిచర్య చేసి (అపొ.కా. 20:31), ఆ ప్రాంతమంతా సువార్తీకరణ చేయడానికి కేంద్ర స్థావరంగా ఉపయోగించాడు (అపొ.కా.19:8-10). ప్రక 2-3లోని మిగిలిన ఆరు సంఘాలు ఇలాగే స్థాపించబడ్డాయని నిశ్చయంగా చెప్పవచ్చు. ఏడు నక్షత్రములు... ఏడు దీపస్తంభముల గురించి 1:20 చూడండి. 

2:2-4 ఎఫెసులోని సంఘం దుష్టులను సహింపలేదు, అబద్ద అపొస్తలులను పరీక్షించడంలో నమ్మకంగా ఉంది. కానీ వారు తాము మొదట ఉంచిన ప్రేమను, అంటే దేవునికోసమైన ప్రేమను, వదిలివేశారు. ఆజ్ఞలలో ప్రధానమైనది ఏమంటే, ఒకడు తన సర్వముతో ప్రభువును ప్రేమించడమే (ద్వితీ 6:5; మత్తయి 22:36-38). 

2:5 దేవుని ప్రేమించకపోవడం మనస్సును పరీక్షించుకొని మారుమనస్సు (అంటే మనస్సు, హృదయం మారడం, అంటే ప్రవర్తనలో మార్పు కలగడం) పొందాల్సిన, చాలా గంభీరమైన ఆధ్యాత్మిక విషయం అయినప్పటికీ, ఇక్కడ పడితివి అంటే ఒకడు తన రక్షణను కోల్పోవడం కాదు. వారు మారుమనస్సు పొందకపోతే, క్రీస్తు ఆ సంఘం మూతపడేటట్లు చేస్తాడు (దీపస్తంభమును... తీసివేతును). 

2:6 నీకొలాయితుల క్రియలు పెర్గము సంఘానికి రాసిన ఉత్తరంలో వివరించబడ్డాయి (వ.14-15). వారి “క్రియలు" తుయతైరలోని సంఘానికి ఉన్న సమస్యను పోలినట్లున్నాయి (వ.20-21,24). 

2:7 చెవిగలవాడు... వినును గాక అనే మాటలు, విత్తువాని ఉపమానం చివరిలో యేసు తన శ్రోతలకు ఇచ్చిన హెచ్చరికను ప్రతిధ్వనిస్తాయి (మత్తయి 13:9). జయించువానికి అనే మాటలు బహుశా నమ్మకస్తులైన, విధేయులైన విశ్వాసులను సూచిస్తున్నాయి. ఈ నేపథ్యంలో జయించలేకపోవడం అంటే ఆధ్యాత్మిక బహుమానాలు కోల్పోవడమే గాని రక్షణను కోల్పోవడం కాదు. ఆదాము హవ్వలు జీవవృక్షఫలములు (ఆది 3:22-24) భుజించి, పాపంలోనే నిరంతరం జీవించకుండా ఉండేలా వారిని ఏదెను వనం నుండి బయటకు పంపివేశాడు. దేవుని పరదైసు అంటే కొత్త ఆకాశములు, కొత్త భూమి (ప్రక 22:2). జీవవృక్షం అక్కడ ఉంటుంది. 

2:8 సంఘపు దూత గురించి, 1:20 నోట్సు చూడండి. ఎఫెసువలె, స్ముర్న కూడా ఉత్తరంగా 35 మైళ్ళ దూరంలో ఉన్న ఒక నౌకాశ్రయ పట్టణం. అందులో అధికంగా ఉన్న యూదుల జనాభా, క్రైస్తవ్యాన్ని బహుగా ఎదిరించారు. రోమా సామ్రాజ్యంలోని ప్రతి పౌరునికీ చక్రవర్తిని ఆరాధించడం తప్పనిసరి అని మిషియన్ ఆజ్ఞ జారీ చేసినపుడు, దానినుండి యూదులకు మాత్రం మినహాయింపును ఇచ్చాడు. ఈ మత స్వాతంత్ర్యం క్రైస్తవులకు విస్తరించాలని యూదులు కోరుకోలేదు. స్ముర్న సంఘం పౌలు మూడవ సువార్త ప్రకటనా యాత్రలో స్థాపించబడివుంటుంది (అపొ.కా.19). మొదటివాడును కడపటివాడునై యుండి, మృతుడై మరల బ్రదికినవాడు గురించి, 1:5-6, 8 నోట్సు చూడండి.

2:9-10 క్రీస్తు ఎలాంటి విమర్శచేయని స్ముర్నలోని సంఘం, ఆధ్యాత్మిక పోరాటం ద్వారా శ్రమపడుతూ ఉంది. స్థానికంగా ఉన్న ఒక యూదుల సమాజపువారు చేసిన దూషణవల్ల, సంఘసభ్యులు కొంతకాలం (పది దినములు) చెరసాలలో వేయబడ్డారు. ఇదంతా వారి విశ్వాసానికి కలిగిన శ్రమను సూచించింది. తాము యూదులమని చెప్పుకొనుచు, యూదులు కాక అనే మాటలు వారిని హింసించేవారు శారీరకంగా యూదులు కాదని చెప్పడం లేదు గానీ, నిజానికి అవి యూదుతనమనేది బాహ్యపరమైనది కాదనీ, అది అంతరంగానికి సంబంధించినదనీ, విశ్వాసము ద్వారా "హృదయమునకు సున్నతి" అనీ పౌలు చెప్పిన బోధను ప్రతిబింబిస్తున్నాయి (రోమా 2:28-29). జీవ కిరీటము యాకోబు 1:12లో కూడా కనిపిస్తుంది. అక్కడ అది ప్రభువును ప్రేమించి, శ్రమలను సహించినవారికి, బహుశా “క్రీస్తు న్యాయపీఠము" ఎదుట ఇవ్వబడుతుంది (2కొరింథీ 5:10). 

2:11 చెవిగలవాడు వినునుగాక అనే మాటలను గురించి, వ.7 నోట్సు చూడండి. రెండవ మరణము అపవాది, మృగము, అబద్ద ప్రవక్తలకు (20:10), ఎన్నిక చేయబడని వారందరికీ (20:15) కలిగే నిత్య వేదన వున్న అగ్నిగుండము (20:14). జయించువానికి అనే మాటల కోసం, వ.7 నోట్సు చూడండి. 

2:12-13 సంఘపు దూత గురించి 1:20 నోట్సు చూడండి. క్రీ.శ. మొదటి శతాబ్దంలో, స్ముర్నకు ఉత్తరంగా 50 మైళ్ళ దూరంలో ఉన్న పెర్గము పట్టణం, చిన్నాసియాలోని ప్రసిద్ధిచెందిన మతకేంద్రం. స్ముర్నలాగా, పెర్గము కూడా చక్రవర్తి ఆరాధనకు కేంద్రంగా ఉండి, అలాంటి ఆరాధన చేయడానికి నిరాకరించే క్రైస్తవులను కఠినంగా హింసించేది. ఇలా నిరాకరించడం ద్రోహంగా, దేశభక్తి లేనితనంగా క్రైస్తవేతరులు భావించేవారు. అందువల్లే యేసు పెర్గమును సాతాను సింహాసనమున్న స్థలము అని పిలిచాడు. పెర్గములో ఉన్న క్రైస్తవుల పరిస్థితి స్ముర్నలోని వారికంటే అధ్వాన్నంగా ఉంది. , అంతిపయ అనే ఒక నమ్మకస్తుడు అప్పటికే చంపబడినాడు. వాడియైన రెండంచులుగల ఖడ్గము గురించి 1:16 నోట్సు చూడండి. 

2:14-15 బిలాము బోధ అనే మాటను పోలిన పా.ని. దృక్కోణం (సంఖ్యా 22-25), బహుశా నీకొలాయితుల బోధకు సంబంధించినదిగా ఉండి (వ. 6,20-23తో పోల్చండి), సంఘంలో బలమైన చోటు సంపాదించుకుంది. 2:16 నా నోటనుండి వచ్చు ఖడ్గము అనేది, వ.12లోని ఖడ్గం. పెర్గము సంఘంయొక్క స్పష్టమైన విధి ఏమిటంటే, వారి మధ్య ఉన్న ఈ అబద్దపు దృక్కోణంతో యుద్ధం చేయడమే (వ.14-15) లేకుంటే వారికి ప్రభువైన యేసు తీర్పు తీర్చుతాడు. 

2:17 చెవిగలవాడు వినునుగాక గురించి, వ.7 నోట్సు చూడండి. జయించువానికి (వ.7 నోట్సు చూడండి) మరుగైయున్న మన్నాను భుజింపనివ్వడం అనేది, దేవుడు పెర్గములో ఉన్న తన సంఘం పట్ల ఇంకా శ్రద్ధకలిగియున్నట్లుగానే, ఆయన ఇంకా మన్నాను ఇస్తుండగా కూడా, విగ్రహార్పితమైన ఆహారాన్ని తిన్న ఇశ్రాయేలీయుల పాపం మరింత నీచమైనదని పాఠకులకు జ్ఞాపకం చేసే ఉద్దేశంతో చెప్పాడు. తెల్లరాతి మీద చెక్కబడిన క్రొత్త పేరు అనేవి: (1) ప్రాచీన గ్రీకు క్రీడలలో విజయాన్ని సూచించి, క్రీడాకారుని శాశ్వతంగా విరమణకు అనుమతించే దానికి గాని, లేక (2) ఒక సమాజపు విందులోనికి ప్రవేశానికి సంబంధించినవి గాని అయివుంటాయి. 

2:18 సంఘపు దూత గురించి, 1:20 నోట్సు చూడండి. తుయతైర, లైకస్ నది ప్రక్కగా పెర్గముకు 30 మైళ్ళు ఆగ్నేయంగా ఉన్న పట్టణం. దానిలోని ప్రతి వ్యాపారసంఘానికి ఒక దేవత ఉండి, వాటి ఆరాధన చుట్టూనే సామాజిక కార్యకలాపాలు ఉండేవి. ఈ విగ్రహారాధనా జీవితవిధానంలో ఆర్థికంగాను, సామాజికంగాను. పాలు పొందాలనే వత్తిడి క్రైస్తవుల మీద ఎక్కువగా ఉండేది. తుయతైరకు రాసిన పత్రిక, ఏడు పత్రికలలో సుదీర్ఘమైనది, ఏడింటికీ కేంద్రంగా ఉంది. ఈ పట్టణాలన్నిటిలో అతి తక్కువ ప్రాధాన్యత ఉండి, చిన్నదైన తుయతైర పట్టణానికి ఇలా రాయడం కొంచెం చిత్రంగా అనిపిస్తుంది. జాగ్రత్తగా పరిశీలిస్తే, తుయతైరలో జరుగుతున్న ఆత్మీయ యుద్ధం, అంత్యకాలంలో జరిగే యుద్దానికి (ప్రక 14-18) సమాంతరంగా ఉంది అని కనిపిస్తుంది. ప్రకటన గ్రంథంలో ఒకే ఒక్కసారి క్రీస్తు దేవుని కుమారుడు అని పిలువబడ్డాడు. అగ్నిజ్వాలవంటి కన్నులు... అపరంజిని పోలిన పాదములు గురించి 1:14,15 నోట్సు చూడండి. 

2:19 ఎఫెసులోని సంఘంలాగా, తుయతైర సంఘం ప్రేమలో కొదువగలది కాదు. అక్కడ స్పష్టమైన ఆత్మీయాభివృద్ధి జరుగుతూ ఉంది. 

2:20 పెర్గము సంఘంలో ఉన్న పాపాలే యెజెబెలు తన అనుచరులచేత చేయించేది - జారత్వము చేయుట... విగ్రహములకు బలియిచ్చినవాటిని తినుట అనేవి ఆ పాపాలు. ఈ పాపములు పెర్గము సంఘానికి రాసినదానికి వ్యతిరేక క్రమంలో పేర్కొన్నాడు (వ.14). ఇలా రాయడం, ఆ రెండింటికి మధ్య ఉన్న సంబంధంవైపు మరింత దృష్టిపెట్టేటట్లుగా చేసే సాహితీ ప్రక్రియ. “యెజెబెలు" అనేది ఉత్తర రాజ్యమైన ఇశ్రాయేలు రాజుకు రాణియైన విగ్రహారాధికురాలిని జ్ఞాపకం చేయడానికి (1రాజులు 16; 18, 19, 21; 2రాజులు 9) ఉపయోగించిన సంక్షిప్త నామమై ఉండవచ్చు.

2:21-23 బహు శ్రమలు అనే మాట 7:14 లోని (దాని 12:1) క్రీస్తు రెండవ రాకడకు ముందు రాబోయే మహా శ్రమల సమయంతో సమానమైనది కాదు గాని మనకు తెలియని విధానంలో వచ్చే కఠినమైన శ్రమకాలం. ఆ మాటను ఉపయోగించడం భూమి అంతటిమీదికి రాబోతున్న బహు శ్రమ కాలాన్ని ముందుగా చూపుతుంది. (ప్రక 3:10; 7:14). యెజెబెలు పిల్లలు అంటే ఆమెకు భౌతికంగా పుట్టినవారు కాదు, ఆమె అబద్ధ బోధకు తమను అప్పగించుకున్న ఆధ్యాత్మిక “ పిల్లలు". యెజెబెలు పిల్లలు చంపబడతారు అనేది పుస్తకంలోని తరువాత భాగంలో తెగులు చేత బహుగా విస్తరించే మరణాన్ని ముందుగా సూచిస్తుంది (ఉదా: 6:8). యెజెబెలుకు, పుస్తకంలోని తరవాతి భాగంలో ఉన్న మహా వేశ్యయైన బబులోనుకు (16:17-19:5) ఉన్న బలమైన సమాంతరాలు, యెజెబెలును మహా బబులోనుకు మొదటి శతాబ్దపు సంకేతంగా సూచిస్తున్నాయి. 

2:24 యెజెబెలుకు సంబంధించిన జీవితవిధానం, దృక్కోణాలు (వ.20) సాతాను యొక్క గూఢమైన సంగతులుగా ఇప్పుడు బయల్పరచబడడం, ఈ అబద్దపు విశ్వాసం, ప్రవర్తన అపవాదితో ఆరంభమయ్యాయని చూపుతుంది. 

2:25 యెజెబెలుతో చేరకుండా ఉన్న తుయతైర సంఘంలోని మిగిలిన సభ్యులు వ.19లో క్రీస్తు వారిని మెచ్చుకున్న నమ్మకమైన క్రియలను గట్టిగా పట్టుకొనవలసి ఉంది. 

2:26-27 కీర్తన 2:9లోని మెస్సీయకు సంబంధించిన ఒక ప్రవచనాన్ని ఉపయోగించి, జయించువానికి జనులమీద అధికారము వస్తుందని అంటే ఆయన రెండవ రాకడ తర్వాత పాలనాధికారం వస్తుందని క్రీస్తు వాగ్దానం చేస్తున్నాడు (20:4,6).

2:28 వేకువచుక్క సంఖ్యా 24:17లో మెస్సీయకు గుర్తు. క్రీస్తు తననుతాను ప్రక 22:16లో “ప్రకాశమానమైన వేకువచుక్క” అని పిలుచుకున్నాడు. 


Shortcut Links
ప్రకటన గ్రంథం - Revelation : 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 |
ఆదికాండము - Genesis | నిర్గమకాండము - Exodus | లేవీయకాండము - Leviticus | సంఖ్యాకాండము - Numbers | ద్వితీయోపదేశకాండము - Deuteronomy | యెహోషువ - Joshua | న్యాయాధిపతులు - Judges | రూతు - Ruth | 1 సమూయేలు - 1 Samuel | 2 సమూయేలు - 2 Samuel | 1 రాజులు - 1 Kings | 2 రాజులు - 2 Kings | 1 దినవృత్తాంతములు - 1 Chronicles | 2 దినవృత్తాంతములు - 2 Chronicles | ఎజ్రా - Ezra | నెహెమ్యా - Nehemiah | ఎస్తేరు - Esther | యోబు - Job | కీర్తనల గ్రంథము - Psalms | సామెతలు - Proverbs | ప్రసంగి - Ecclesiastes | పరమగీతము - Song of Solomon | యెషయా - Isaiah | యిర్మియా - Jeremiah | విలాపవాక్యములు - Lamentations | యెహెఙ్కేలు - Ezekiel | దానియేలు - Daniel | హోషేయ - Hosea | యోవేలు - Joel | ఆమోసు - Amos | ఓబద్యా - Obadiah | యోనా - Jonah | మీకా - Micah | నహూము - Nahum | హబక్కూకు - Habakkuk | జెఫన్యా - Zephaniah | హగ్గయి - Haggai | జెకర్యా - Zechariah | మలాకీ - Malachi | మత్తయి - Matthew | మార్కు - Mark | లూకా - Luke | యోహాను - John | అపో. కార్యములు - Acts | రోమీయులకు - Romans | 1 కోరింథీయులకు - 1 Corinthians | 2 కోరింథీయులకు - 2 Corinthians | గలతియులకు - Galatians | ఎఫెసీయులకు - Ephesians | ఫిలిప్పీయులకు - Philippians | కొలొస్సయులకు - Colossians | 1 థెస్సలొనీకయులకు - 1 Thessalonians | 2 థెస్సలొనీకయులకు - 2 Thessalonians | 1 తిమోతికి - 1 Timothy | 2 తిమోతికి - 2 Timothy | తీతుకు - Titus | ఫిలేమోనుకు - Philemon | హెబ్రీయులకు - Hebrews | యాకోబు - James | 1 పేతురు - 1 Peter | 2 పేతురు - 2 Peter | 1 యోహాను - 1 John | 2 యోహాను - 2 John | 3 యోహాను - 3 John | యూదా - Judah | ప్రకటన గ్రంథం - Revelation |

Explore Parallel Bibles
21st Century KJV | A Conservative Version | American King James Version (1999) | American Standard Version (1901) | Amplified Bible (1965) | Apostles' Bible Complete (2004) | Bengali Bible | Bible in Basic English (1964) | Bishop's Bible | Complementary English Version (1995) | Coverdale Bible (1535) | Easy to Read Revised Version (2005) | English Jubilee 2000 Bible (2000) | English Lo Parishuddha Grandham | English Standard Version (2001) | Geneva Bible (1599) | Hebrew Names Version | Hindi Bible | Holman Christian Standard Bible (2004) | Holy Bible Revised Version (1885) | Kannada Bible | King James Version (1769) | Literal Translation of Holy Bible (2000) | Malayalam Bible | Modern King James Version (1962) | New American Bible | New American Standard Bible (1995) | New Century Version (1991) | New English Translation (2005) | New International Reader's Version (1998) | New International Version (1984) (US) | New International Version (UK) | New King James Version (1982) | New Life Version (1969) | New Living Translation (1996) | New Revised Standard Version (1989) | Restored Name KJV | Revised Standard Version (1952) | Revised Version (1881-1885) | Revised Webster Update (1995) | Rotherhams Emphasized Bible (1902) | Tamil Bible | Telugu Bible (BSI) | Telugu Bible (WBTC) | The Complete Jewish Bible (1998) | The Darby Bible (1890) | The Douay-Rheims American Bible (1899) | The Message Bible (2002) | The New Jerusalem Bible | The Webster Bible (1833) | Third Millennium Bible (1998) | Today's English Version (Good News Bible) (1992) | Today's New International Version (2005) | Tyndale Bible (1534) | Tyndale-Rogers-Coverdale-Cranmer Bible (1537) | Updated Bible (2006) | Voice In Wilderness (2006) | World English Bible | Wycliffe Bible (1395) | Young's Literal Translation (1898) | Telugu Bible Verse by Verse Explanation | పరిశుద్ధ గ్రంథ వివరణ | Telugu Bible Commentary |