Ezekiel - యెహెఙ్కేలు 1 | View All

1. ముప్పదియవ సంవత్సరము నాలుగవ నెల అయిదవ దినమున నేను కెబారు నదీప్రదేశమున చెరలోని వారి మధ్య కాపురముంటిని; ఆ కాలమున ఆకాశము తెరవ బడగా దేవునిగూర్చిన దర్శనములు నాకు కలిగెను.
ప్రకటన గ్రంథం 19:11

2. యెహోయాకీను చెరపట్టబడిన అయిదవ సంవత్సరము ఆ నెలలో అయిదవ దినమున కల్దీయుల దేశమందున్న కెబారు నదీప్రదేశమున యెహోవా వాక్కు బూజీ కుమారుడును

3. యాజకుడునగు యెహెజ్కేలునకు ప్రత్యక్షముకాగా అక్కడనే యెహోవా హస్తము అతనిమీదికి వచ్చెను.

4. నేను చూడగా ఉత్తర దిక్కునుండి తుపాను వచ్చుచుండెను; మరియు గొప్ప మేఘమును గోళమువలె గుండ్రముగా ఉన్న అగ్నియు కనబడెను, కాంతిదానిచుట్టు ఆవరించియుండెను; ఆ అగ్నిలోనుండి కరగబడినదై ప్రజ్వలించుచున్న యపరంజివంటి దొకటి కనబడెను.

5. దానిలోనుండి నాలుగు జీవుల రూపములుగల యొకటి కనబడెను, వాటి రూపము మానవ స్వరూపము వంటిది.
ప్రకటన గ్రంథం 4:6

6. ఒక్కొక్క దానికి నాలుగు ముఖములును నాలుగు రెక్కలును గలవు.

7. వాటి కాళ్లు చక్కగా నిలువబడినవి, వాటి అరకాళ్లు పెయ్యకాళ్లవలె ఉండెను, అవి తళతళలాడు ఇత్తడివలె ఉండెను.

8. వాటి నాలుగు ప్రక్కలరెక్కల క్రింద మానవ హస్తములవంటి హస్తములుండెను, నాలుగింటికిని ముఖములును రెక్కలును ఉండెను.

9. వాటి రెక్కలు ఒకదానినొకటి కలిసికొనెను, ఏ వైపునకైనను తిరుగక అవన్నియు చక్కగా నెదుటికి పోవుచుండెను.

10. ఆ నాలుగింటి యెదుటి ముఖరూపములు మానవ ముఖమువంటివి, కుడిపార్శ్వపు రూపములు సింహ ముఖము వంటివి. యెడమపార్శ్వపు ముఖములు ఎద్దుముఖము వంటివి. నాలుగింటికి పక్షిరాజు ముఖమువంటి ముఖములు కలవు.
ప్రకటన గ్రంథం 4:7

11. వాటి ముఖములును రెక్కలును వేరు వేరుగా ఉండెను, ఒక్కొక జీవి రెక్కలలో ఒక రెక్క రెండవ జతలో ఒకదానితో కలిసి యుండెను; ఒక్కొక జత రెక్కలు వాటి దేహములను కప్పెను.

12. అవన్నియు చక్కగా ఎదుటికి పోవుచుండెను, అవి వెనుకకు తిరుగక ఆత్మయే వైపునకు పోవుచుండునో ఆ వైపునకే పోవు చుండెను.

13. ఆ జీవుల రూపములు మండుచున్న నిప్పులతోను దివిటీలతోను సమానములు; ఆ అగ్ని జీవుల మధ్యను ఇటు అటు వ్యాపించెను, ఆ అగ్ని అతికాంతిగా ఉండెను, అగ్నిలోనుండి మెరుపు బయలుదేరుచుండెను.
ప్రకటన గ్రంథం 4:5, ప్రకటన గ్రంథం 11:19

14. మెరుపు తీగెలు కనబడు రీతిగా జీవులు ఇటు అటు తిరుగు చుండెను.

15. ఈ జీవులను నేను చూచుచుండగా నేల మీద ఆ నాలుగింటి యెదుట ముఖముల ప్రక్కను చక్రమువంటిదొకటి కనబడెను.

16. ఆ చక్రములయొక్క రూపమును పనియు రక్తవర్ణపు రాతివలె నుండెను, ఆ నాలుగును ఒక్క విధముగానే యుండెను. వాటి రూపమును పనియు చూడగా చక్రములో చక్రమున్నట్టుగా ఉండెను.

17. అవి జరుగునప్పుడు నాలుగు ప్రక్కలకు జరుగుచుండెను, వెనుకకు తిరుగకయే జరుగుచుండెను.

18. వాటి కైవారములు మిక్కిలి యెత్తుగలవై భయంకరముగా ఉండెను, ఆ నాలుగు కైవారములు చుట్టు కండ్లతో నిండి యుండెను.
ప్రకటన గ్రంథం 4:6-8

19. ఆ జీవులు కదలగా ఆ చక్రములును వాటి ప్రక్కను జరిగెను, అవి నేలనుండి లేచినప్పుడు చక్రములుకూడ లేచెను.

20. ఆత్మ యెక్కడికి పోవునో అక్కడికే, అది పోవలసిన వైపునకే అవియు పోవుచుండెను; జీవికున్న ఆత్మ, చక్రములకును ఉండెను గనుక అవి లేవగానే చక్రములును లేచుచుండెను.

21. జీవికున్న ఆత్మ చక్రములకును ఉండెను గనుక జీవులు జరుగగా చక్రములును జరుగుచుండెను, అవి నిలువగా ఇవియు నిలిచెను, అవి నేలనుండి లేవగా ఇవియు వాటితోకూడ లేచెను.

22. మరియు జీవుల తలలపైన ఆకాశమండలము వంటి విశాలతయున్నట్టుండెను. అది తళతళలాడు స్ఫటికముతో సమానమై వాటి తలలకు పైగా వ్యాపించి యుండెను.
ప్రకటన గ్రంథం 4:6

23. ఆ మండలమువంటి దాని క్రింది జీవుల రెక్కలలో రెండేసి యొకదానిప్రక్క ఒకటి పైకి చాప బడియుండెను; రెండేసి వాటి దేహములు కప్పుచుండెను, ఈ తట్టుననున్న జీవులకును ఆ తట్టుననున్న జీవులకును, అనగా ప్రతిజీవికిని ఆలాగున రెక్కలుండెను.

24. అవి జరుగగా నేను వాటి రెక్కల చప్పుడు వింటిని; అది విస్తారమైన ఉదకముల ఘోషవలెను సర్వశక్తుడగు దేవుని స్వరము వలెను దండువారు చేయు ధ్వనివలెను ఉండెను, అవి నిలుచునప్పుడెల్ల తమ రెక్కలను వాల్చుకొనుచుండెను.
ప్రకటన గ్రంథం 1:15, ప్రకటన గ్రంథం 14:2, ప్రకటన గ్రంథం 19:6

25. అవి నిలిచి రెక్కలను వాల్చునప్పుడు వాటి తలలకు పైగా నున్న ఆకాశ మండలమువంటి దానిలోనుండి శబ్దము పుట్టెను.

26. వాటి తలల పైనున్న ఆ మండలముపైన నీల కాంతమయమైన సింహాసనమువంటి దొకటి కనబడెను; మరియు ఆ సింహాసనమువంటి దానిమీద నరస్వరూపియగు ఒకడు ఆసీనుడైయుండెను.
ప్రకటన గ్రంథం 1:13, ప్రకటన గ్రంథం 4:2-9-10, ప్రకటన గ్రంథం 5:1-7-13, ప్రకటన గ్రంథం 6:16, ప్రకటన గ్రంథం 7:10, ప్రకటన గ్రంథం 7:15, ప్రకటన గ్రంథం 19:4, ప్రకటన గ్రంథం 21:5, ప్రకటన గ్రంథం 4:3

27. చుట్టు దాని లోపట కరుగుచున్న యిత్తడియు అగ్నియు నున్నట్టు నాకు కనబడెను. నడుము మొదలుకొని మీదికిని నడుము మొదలు కొని దిగువకును ఆయన అగ్నిస్వరూపముగా నాకు కనబడెను, చుట్టును తేజోమయముగా కనబడెను.

28. వర్ష కాలమున కనబడు ఇంద్ర ధనుస్సుయొక్క తేజస్సువలె దాని చుట్టునున్న తేజస్సు కనబడెను. ఇది యెహోవా ప్రభావ స్వరూప దర్శనము. నేను చూచి సాగిలపడగా నాతో మాటలాడు ఒకని స్వరము నాకు వినబడెను.



బైబిల్ అధ్యయనం - Study Bible
1:1 హెబ్రీ పాత నిబంధనకు అరామిక్ అనువాదమైన టార్గమ్ ముప్పదియవ సంవత్సరము అనే కాలసూచనను క్రీ.పూ. 621లో యోషీయా సంస్కరణల కాలానికి సంబంధించిందిగా పేర్కొన్నది. అయితే యోషీయా యేలుబడిలోని సంఘటనలకు, ఈ ప్రవచనం వచ్చిన కాలానికి మధ్య సంబంధాన్ని చూడడం అంత తేలిక కాదు (2రాజులు 22:8-13). ఒక రబ్బీల విద్యా సాంప్రదాయం ఈ సంఖ్యను సునాద సంవత్సరంగా (జూబిలీ) సూచిస్తుంది. ఈ గ్రంథంలోని సంపాదకీయ వివరణ (యెహె 1:2-3) “ముప్పదియవ సంవత్సరము" యెహోయాకీను బబులోను చెరలో ఉన్న అయిదవ సంవత్సరంతో సరిపోలుతుంది. యాజకత్వపు నియామకానికి యాజకులకు ముప్పయి యేళ్ల వయసును అర్హతగా పరిగణించే వారు (సంఖ్యా 4:30). యెహెజ్కేలుకు ముప్పయి. యేళ్ల వయసు వచ్చినప్పుడు అతడు నదీతీరంలో ఆకాశం తెరవబడిన దర్శనాన్ని చూసినట్లుగానే యేసు ముప్పయి యేళ్ల వయసులో యొర్దాను నదిలో బాప్తిస్మం తీసుకున్నప్పుడు ఆకాశం తెరవబడడం చూశాడు (మత్తయి 3:12-16; లూకా 3:21-23).
క్రీ.పూ. 597లో రాజుతోబాటు చెరలోకి వెళ్లిన పదివేల మంది సైనికులు మరియు అధిపతుల బృందంలో యెహెజ్కేలు కూడా ఉన్నాడు (2రాజులు 24:14-16). కెబారు బబులోనులోని నది, ఈ నదీప్రాంతంలోనే చెరలో ఉన్న యూదులు నివాసమున్నారు, యెహెజ్కేలు దర్శనాలు చూసిన స్థలమిదే. (వ.1,3; 3:15,23; 10:15, 20, 22; 43:3). హెబ్రీలోని నెహార్ కెవార్ అక్కాడియన్ భాషలో నర్ కబారి లేదా కబారు అనే పదంతో సరిపోలుతుంది. క్రీస్తు పూర్వం అయిదవ శతాబ్దంలో బబులోనులోని నిప్పూరు పట్టణంలో లభ్యమైన అక్కాడియన్ పత్రాల్లో “కబరు కాలువ” అనే నీటివనరు ప్రస్తావన రెండు చోట్ల కనబడుతుంది. చెరగా ఉన్న దేశంలో కూడా దేవుడు ఆకాశాన్ని తెరచి యెహెజ్కేలుకు తన మహిమను చూపించాడు, ఇది ఇశ్రాయేలు తీర్పుకు, నిరీక్షణకు కూడా ఆధారం. గగనము చీల్చుకొని అనే పదజాలం యెషయా 64:1 లో ఉన్నప్పటికీ, ఆకాశము తెరవబడడం పాత నిబంధనలో మరొక చోట ఆది 7:11లో మాత్రమే కనబడుతుంది. కొత్త నిబంధనలో, యేసు బాప్తిస్మం తీసుకున్నప్పుడు ఆకాశం తెరవబడింది (3:16). సైఫను ఆకాశం తెరవబడి, సహజాతీతమైన వాస్తవాల్ని తన కళ్లతో చూసిన అనుభవం పొందాడు. (అపొ.కా.7:56). ఆకాశం తెరవబడిన ఇటువంటి సందర్భాలు ప్రక 4:1; 19:11 వచనాల్లోను ఉన్నాయి. 
యెషయాకు, యెహెజ్కేలుకు కలిగిన దర్శనాల మధ్య ముఖ్యమైన పోలికలున్నాయి. ఇద్దరు ప్రవక్తలూ పరలోకంలో రెక్కలున్న జీవులు దేవుణ్ణి సేవించడం చూశారు. ఇద్దరూ ప్రవచన పరిచర్య కోసం సంకేత రీతిలో సిద్ధపరచబడ్డారు - యెషయా పెదవులు అగ్నిచేత శుద్ధి చేయబడ్డాయి, యెహెజ్కేలు గ్రంథపుచుట్టను భుజించాడు. ఇద్దరికీ తమ ప్రవచన సందేశాలకు ప్రతిస్పందించని ప్రజల దగ్గరకు వెళ్లే పని అప్పగించబడింది.
యెహెజ్కేలు తన దర్శనమంతటా భౌతికంగా చెరలో ఉన్న ప్రజల మధ్యనే ఉన్నా, అలౌకికమైన పరవశంలో మునిగిపోయాడు, ఎంతగానంటే అతనికి తన చుట్టుప్రక్కల ఉన్న పరిస్థితుల గురించి స్పృహ లేదు. నిజప్రవక్త లందరి విషయంలో లాగానే యెహెజ్కేలుకు కూడా ఈ దర్శనం, ప్రవచనాల విషయంలో ప్రేరణ కేవలం దేవుడు మాత్రమే.

1:2-3 వ.1 లోని కాలసూచనకు ఆధారం, యెహోయాకీను చెరపట్టబడిన కాలం అని వ.2 తెలియజేస్తుంది. వాస్తవానికి యెహెజ్కేలు లోని అన్ని కాలసూచనలు దీనికి సంబంధించినవే. యెహోయాకీను కేవలం మూడునెలల పది రోజులు మాత్రమే పరిపాలించాడు (2రాజులు 24:8; 2దిన 36:9). అతను సింహాసనాన్ని కోల్పోవడం, చెర లోకి వెళ్లడం యెహెజ్కేలు ప్రవచనాలకు కాల సూచికగా ఉంది. సాధారణంగా రాజు సింహాసనాన్ని అధిష్టించిన కాలాన్ని పరిగణనలోకి తీసుకొని ప్రవచనాల కాలాన్ని సూచించడం జరుగుతుంది (2రాజులు 25:27; యిర్మీయా 52:31). బబులోను కాలక్రమం ప్రకారం, యెహోయాకీను చెరలోకి వెళ్లిన తేదీ క్రీ.పూ. 597, ఏప్రిల్ నెల 22. 

1:3 యెహెజ్కేలు అనే పేరుకు "దేవుడు బలపరచును" అని అర్థం. పాత నిబంధనలో ఇదే పేరున్న మరొక వ్యక్తి కూడా లేవీ గోత్రానికి చెందిన యాజకుడే (1దిన 24:16), అన్యదేశాల్ని అపవిత్రమైనవిగా పరిగణించేవారు కాబట్టి (యెహె 4:13; ఆమోసు 7:17), చెరలో ఉన్న ఇశ్రాయేలీయులు దేవునితో సహవసించడానికి నీటి ప్రవాహాలకు సమీప ప్రాంతాలను కోరుకో వడంలో ఆశ్చర్యం ఏమీ లేదు (లేవీ 14:5,50; 15:13; సంఖ్యా 19:17; అపొ.కా. 16:13 చూడండి). యెహెజ్కేలు గ్రంథంలో కల్దీయులు, అనే పేరు “బబులోనీయులు" అనే పదానికి బదులుగా వాడబడింది (12:13; 23:15,23). దేవుని హస్తము ఆయన శక్తికి స్పష్టమైన నిరూపణ (నిర్గమ 9:3; ద్వితీ 2:15; 1సమూ 5:9; యెషయా 41:20). దేవుని ఆత్మ శక్తి ప్రవక్తలు దైవికమైన సత్యాల్ని పలికేలా చేస్తుంది. 

1:4 దేవుడు సమీపంగా రావడంతో తుపానుగా వర్ణించబడింది. తుపానులు (ఉరుములు, మెరుపులు), మేఘాలు తరచూ దేవుని ప్రత్యక్షతకు సంబంధించినవి (యోబు 38:1; కీర్తన 18:7-15; 29:3-9; 104:3; యెషయా 29:6). గోళమువలె గుండ్రముగా ఉన్న అగ్నియు అనే పదజాలం, నిర్గమ 9:24 వచనంలో వడగండ్లు కురిసిన తెగులు సందర్భంలో మాత్రమే కనబడుతుంది. హెబ్రీయుల్ని అరణ్యప్రయాణాల్లో పగటివేళ మేఘస్తంభం, రాత్రివేళ అగ్నిస్తంభం నడిపించాయి (నిర్గమ 13:17-22). సీనాయి పర్వతం మీద దేవుడు ఉరుములు, మెరుపులు, ధూమం, అగ్ని నడుమ ప్రత్యక్షమయ్యాడు (నిర్గమ 19:16-18), మరొక చోట దేవుడు దహించు అగ్నిగా చూపబడ్డాడు (ద్వితీ 4:24; హెబ్రీ 12:28-29). తుపాను ఉత్తర దిక్కు నుండి రాబోతుంది,
యూదాపై దాడిచేసి ధ్వంసం చేయడానికి బబులోను సైన్యం వచ్చే దిశ ఇదే.

1:5 యెహెజ్కేలు దర్శనంలో నాలుగు సంఖ్య ప్రాముఖ్యంగా కనబడుతుంది (నాలుగు జీవుల రూపములు), ఈ సంఖ్య భూమి నాలుగు భాగాలుగా ఉంటుందనే ప్రాచీన సంప్రదాయానికి సంబంధించింది ("భూమి యొక్క నాలుగు దిగంతముల నుండి" - యెషయా 11:12 తో పోల్చండి), లేదా నాలుగు దిక్కులు (“ఉత్తరపుతట్టు, దక్షిణపుతట్టు, తూర్పు తట్టు, పడమరతట్టు" - ఆది 13:14) అనే భావనకు సంబంధించినది. సర్వలోకం మీద దేవుని అధికారానికున్న శక్తిని సాదృశ్యరీతిగా తెలియజేయడానికి యెహెజ్కేలు నాలుగు సంఖ్యనుపయోగించాడు. ఈ నాలుగు జీవులు కెరూబులని యెహెజ్కేలు పదవ అధ్యాయం తెలియజేస్తుంది. (10:5,20). ప్రత్యక్ష గుడారం లోని అడ్డతెర మీద చిత్రకారుడి పనిగా కెరూబుల్ని అల్లిక చేయడం కనబడుతుంది (నిర్గమ 26:31). అతి పరిశుద్ధ స్థలంలో ఆజ్ఞల పలకలున్న నిబంధన మందసం మీద కెరూబుల నుంచారు (నిర్గమ 25:18-22). కెరూబులు దేవుని తీర్పును అమలుచేస్తారు. ఆదాము హవ్వల్ని ఏదెను తోట నుండి బయటికి పంపివేసినప్పుడు, వారు మళ్లీ తోట లోపలికి ప్రవేశించకుండా దేవుడు అక్కడ కెరూబులను కావలిగా ఉంచాడు . (ఆది 3:24). “దేవుడు కెరూబుల మధ్య ఆసీనుడై" ఉంటాడని ఇతరచోట్ల కనబడుతుంది (1సమూ 4:4; 2సమూ 6:2; కీర్తన 99:1). 

1:6 నాలుగు జీవుల వర్ణనలో ఈ జీవుల్ని స్త్రీ, పుంలింగాలు రెంటిలోనూ పేర్కొన్నారు. నలభై అయిదు వర్ణనల్లో పన్నెండు మాత్రమే వ్యాకరణ శుద్ధిగా స్త్రీ లింగం బహువచనంలో ఉన్నాయి, మిగిలినన్నీ పుంలింగం బహువచనంలో ఉన్నాయి. దేవుడు చూపించిన దర్శనాన్ని వర్ణించడం మానవ భాషకు నిజంగా సవాలువంటిది, దర్శనాన్ని వర్ణించడంలో మానవభాషలోని పదాలు న్యాయం చేయలేవేమో. దేవుని గురించిన సత్యాలు మనం తెలుసుకోగలిగినప్పటికీ ఆయన గురించిన సంపూర్ణమైన జ్ఞానం పొందడం మన పరిధి కందనిది. 

1:7-8 కాళ్లు చక్కగా నిలబడి ఉండడమంటే అతుకులు లేవని అర్థం. 

1:9 అతి పరిశుద్ధ స్థలంలో కెరూబులు రెక్కలు విప్పుకొని ఒకదానితో నొకటి “అంటుకొని” ఉన్నాయి (1రాజులు 6:27), ఇక్కడ ఉపయోగించిన క్రియాపదం నిర్గమ 26:3 లో కనబడుతుంది. ఈ క్రియాపదాన్ని ఇతరచోట్ల ప్రత్యక్ష గుడారంలోని తెరల్ని ఒకదానితో ఒకటి కూర్పుచేయడాన్ని సూచిస్తూ ఉపయోగించారు. నాలుగు జీవులు. అటూ ఇటూ తిరగక, చక్కగా నెదుటికి పోతున్నాయి. ఆ ప్రకారంగా అన్నిదిక్కులూ “చక్కగా నెదుటి” వైపే ఉన్నాయి. 

1:10 క్రూర జంతువులన్నిటిలో సింహం భయంకరమైనది (సంఖ్యా 23:24; 24:9; న్యాయాధి 14:18; 2సమూ 1:23; 17:10), పక్షులన్నిటిలో పక్షిరాజు గంభీరమైనది (ద్వితీ 28:49; 2సమూ 1:23; యోబు 39:27; యిర్మీయా 48:40; విలాప 4:19). పెంపుడు జంతువులన్నిటిలో ఎద్దు విలువైనది (యోబు 21:10; సామె 14:4 చూడండి; నిర్గమ 21:36 తో పోల్చండి). దేవుడు సృష్టించిన ప్రాణికోటి. అంతటి మీదా మానవునికి అధికారం ఇవ్వబడింది (ఆది 1:28; కీర్తన 8:6-7). 

1:11 ప్రతి జీవికి ఒక జత రెక్కలు పైకి లేచి, ఒక్కొక్కటి ప్రక్కనున్న జీవి రెక్కల పైభాగాన్ని తాకుతూ ఉన్నాయి. ఈ దృశ్యం అతి పరిశుద్ధ స్థలంలోని నిబంధన మందసం మీద ఉన్న కెరూబుల్ని పోలి వుంది. అతి పరిశుద్ధ స్థలంలోని కెరూబులు దేవుని అదృశ్య సింహాసనానికి సాదృశ్యపూర్వక పాదపీఠంగా ఉన్నాయి (నిర్గమ 25:18-22; 1సమూ 4:4; 2సమూ 6:2; 2రాజులు 19:15; కీర్తన 80:1; 99:1). 

1:12 ఆత్మ నడిపించిన దిక్కువైపు జీవులు వెళ్తున్నాయి, “జీవచేతనాత్మక నియమం దేవుని నుండి కలిగినది" (డేనియల్ బ్లాక్), 

1:13 మండుచున్న నిప్పులులాగా ఉన్న ఆ జీవులు యెషయా గ్రంథం 6వ అధ్యా. లోని సెరాపుల్ని గుర్తుకు తెస్తున్నాయి, సెరాపులు కూడా మండుతున్న నిప్పుల్ని పోలి, రెక్కలు కలిగి ఉన్న జీవులు. 10:2 వచనంలో యెరూషలేము మీదకు వచ్చే శిక్షలో నిప్పు కూడా ఉంది (కీర్తన 50:3; 97:3). 

1:14 "రథములు దివిటీలవలె కనబడుచున్నవి, మెరుపులవలె అవి పరుగులెత్తుచున్నవి” అని నహూము 2:4 వచనం తెలియజేస్తుంది. ఆకాశంలో మెరుపు ఈ చివర నుండి ఆ చివరకు ప్రకాశిస్తుందని మత్తయి 24:27 వచనం వర్ణిస్తుంది. 

1:15-17 ఏ దిశలోనైనా నడవడానికి వీలుగా వాటికి చక్రాలు అమర్చబడి ఉన్నాయి. 

1:16 రక్తవర్ణపు రాతివలె అనే పదాన్ని సెప్టువజింట్ పసుపుపచ్చని ప్రశస్తమైన రత్నంగా పేర్కొంటుంది. 

1:18 కైవారములు అనే పదం చక్రాల అంచుల్ని సూచిస్తుంది. ( చక్రాల అంచుల్లో ఉన్న కళ్లు దేవుని సర్వజ్ఞత్వానికి, నిరంతర పరిశీలనా శక్తికి సూచన (2దిన 16:9; సామె 15:3; జెకర్యా 3:9; 4:10; ప్రక 4:6). 

1:19-21 చక్రాలు జీవంతో చలిస్తూ ప్రక్కకు జరుగుతున్నట్టు పైకి లేస్తున్నట్టు ప్రవక్త మళ్ళీ మళ్ళీ చూస్తున్నాడు. .

1:22-25 విశాలత అనే పదం ఆది. 1:6 లోని “విశాలము” (హెబ్రీ. రఖియా). ఇది సింహాసనం ఉన్న సమతల ప్రదేశాన్ని సూచిస్తుండవచ్చు. విశాలం క్రింద జీవుల రెక్కల చప్పుడు విస్తారమైన ఉదకముల ఘోష వలె ఉంది, విశాలం పైన సర్వశక్తుడైన దేవుని స్వరం వినబడుతుంది. 

1:26. నీలకాంతము ప్రాచీనకాలంలో ప్రశస్తమైన మణుల్లో ఒకటి.

1:27 అగ్ని అనేక చోట్ల దేవుని ప్రత్యక్షతకు సంబంధించినదిగా కనబడుతుంది (నిర్గమ 3:2-15; 24:17; ప్రక 4:1-5). ప్రవక్త దర్శనంలో సింహాసనాన్ని చూడడం, మోషే ఇంకా డెబ్బయిమంది పెద్దలు సీనాయి పర్వతం మీద చూసినదాన్ని పోలి ఉంది. (నిర్గమ 24:9-11). యెహెజ్కేలు దర్శనానికి చెందిన అనేక అంశాలు యోహాను చూచిన పరలోక సింహాసన దర్శనంలో పునరావృతమయ్యా యి (ప్రక 4:2-8). 

1:28 యెహెజ్కేలు దర్శనంలోని ఇంద్రధనుస్సు దేవుడు నోవహుతోను మానవజాతితోను చేసిన పూర్వ నిబంధనను గుర్తుకు తెస్తుంది (“ఆదికాండము” అధ్యాయం-9), ఇది యెహోవా మహిమకు దృశ్యరూప ప్రత్యక్షత (నిర్గమ 16:7; 24:16-17; 140:34-35), ఇశ్రాయేలీయుల అరణ్యప్రయాణాల్లో వారి వెంట ఉన్న “అగ్నిస్తంభము”ను కూడా యెహోవా మహిమ సూచిస్తుంది (నిర్గమ 13:21-22; సంఖ్యా 14:14). అగ్ని లాగానే మేఘములు కూడా పలు సందర్భాల్లో దేవుని ప్రత్యక్షతకు సంబంధించినవి (నిర్గమ 19:16; న్యాయాధి 5:4). తాను సాగిలపడ్డానని యెహెజ్కేలు చెబుతున్నాడు. ప్రాచీన కాలాల్లో రాజుల ముందుకు వచ్చే సామాన్యుల భంగిమ ఇదే. నరులు దేవుణ్ణి చూసి బ్రతకలేరని బైబిల్ తెలియజేస్తుంది (నిర్గమ 33:18,20). అందువల్ల ఆయన తన సంపూర్ణ మహిమప్రకాశం పూర్తిగా కనబడకుండా తనను తాను చాలా మటుకు మరుగుపర్చుకొని ప్రత్యక్షపర్చుకుంటాడు. యెహెజ్కేలు చూసింది దేవుని ప్రత్యక్షత యొక్క సంపూర్ణ సారాంశం కాదు గానీ దేవుడతనికి తననెంత వరకు ప్రత్యక్షపర్చుకున్నాడో అంత మేరకు మాత్రమే చూశాడు. అందుచేత దేవుని గురించి వర్ణనలో స్వరూప అనే పదం దర్శనము అనే పదం ఈ అధ్యాయమంతటా ఉన్నాయి. దేవుడు తన సర్వమహిమా ప్రభావాన్ని కాక, మానవమాత్రుడు చూడగలిగినంత వరకే తనను తాను వెల్లడి చేసుకుంటాడు. దేవుని మహిమ ప్రభావపు ఈ యొక్క పాక్షిక దర్శనమే యెహెజ్కేలును ఆయన యెదుట నిలువబడలేనివానిగా చేసింది, యెహెజ్కేలు ఆయన యెదుట సాగిలపడ్డాడు. దేవుడు తనను తాను దృశ్యరీతిగా ప్రత్యక్షపర్చుకున్నప్పుడు ఆయనను భయభక్తులతో ఆరాధించాలి, మోషే కాలం నుండి బైబిల్ ఇచ్చే సాక్ష్యమిదే (నిర్గమ 3:6; మత్తయి 17:1-9 తో పోల్చండి). యెహెజ్కేలు వినిన దేవుని స్వరము, యోహాను తన దర్శనంలో వినిన స్వరంలాగా ఉంది (ప్రక 1:15)


Shortcut Links
యెహెఙ్కేలు - Ezekiel : 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 |
ఆదికాండము - Genesis | నిర్గమకాండము - Exodus | లేవీయకాండము - Leviticus | సంఖ్యాకాండము - Numbers | ద్వితీయోపదేశకాండము - Deuteronomy | యెహోషువ - Joshua | న్యాయాధిపతులు - Judges | రూతు - Ruth | 1 సమూయేలు - 1 Samuel | 2 సమూయేలు - 2 Samuel | 1 రాజులు - 1 Kings | 2 రాజులు - 2 Kings | 1 దినవృత్తాంతములు - 1 Chronicles | 2 దినవృత్తాంతములు - 2 Chronicles | ఎజ్రా - Ezra | నెహెమ్యా - Nehemiah | ఎస్తేరు - Esther | యోబు - Job | కీర్తనల గ్రంథము - Psalms | సామెతలు - Proverbs | ప్రసంగి - Ecclesiastes | పరమగీతము - Song of Solomon | యెషయా - Isaiah | యిర్మియా - Jeremiah | విలాపవాక్యములు - Lamentations | యెహెఙ్కేలు - Ezekiel | దానియేలు - Daniel | హోషేయ - Hosea | యోవేలు - Joel | ఆమోసు - Amos | ఓబద్యా - Obadiah | యోనా - Jonah | మీకా - Micah | నహూము - Nahum | హబక్కూకు - Habakkuk | జెఫన్యా - Zephaniah | హగ్గయి - Haggai | జెకర్యా - Zechariah | మలాకీ - Malachi | మత్తయి - Matthew | మార్కు - Mark | లూకా - Luke | యోహాను - John | అపో. కార్యములు - Acts | రోమీయులకు - Romans | 1 కోరింథీయులకు - 1 Corinthians | 2 కోరింథీయులకు - 2 Corinthians | గలతియులకు - Galatians | ఎఫెసీయులకు - Ephesians | ఫిలిప్పీయులకు - Philippians | కొలొస్సయులకు - Colossians | 1 థెస్సలొనీకయులకు - 1 Thessalonians | 2 థెస్సలొనీకయులకు - 2 Thessalonians | 1 తిమోతికి - 1 Timothy | 2 తిమోతికి - 2 Timothy | తీతుకు - Titus | ఫిలేమోనుకు - Philemon | హెబ్రీయులకు - Hebrews | యాకోబు - James | 1 పేతురు - 1 Peter | 2 పేతురు - 2 Peter | 1 యోహాను - 1 John | 2 యోహాను - 2 John | 3 యోహాను - 3 John | యూదా - Judah | ప్రకటన గ్రంథం - Revelation |

Explore Parallel Bibles
21st Century KJV | A Conservative Version | American King James Version (1999) | American Standard Version (1901) | Amplified Bible (1965) | Apostles' Bible Complete (2004) | Bengali Bible | Bible in Basic English (1964) | Bishop's Bible | Complementary English Version (1995) | Coverdale Bible (1535) | Easy to Read Revised Version (2005) | English Jubilee 2000 Bible (2000) | English Lo Parishuddha Grandham | English Standard Version (2001) | Geneva Bible (1599) | Hebrew Names Version | Hindi Bible | Holman Christian Standard Bible (2004) | Holy Bible Revised Version (1885) | Kannada Bible | King James Version (1769) | Literal Translation of Holy Bible (2000) | Malayalam Bible | Modern King James Version (1962) | New American Bible | New American Standard Bible (1995) | New Century Version (1991) | New English Translation (2005) | New International Reader's Version (1998) | New International Version (1984) (US) | New International Version (UK) | New King James Version (1982) | New Life Version (1969) | New Living Translation (1996) | New Revised Standard Version (1989) | Restored Name KJV | Revised Standard Version (1952) | Revised Version (1881-1885) | Revised Webster Update (1995) | Rotherhams Emphasized Bible (1902) | Tamil Bible | Telugu Bible (BSI) | Telugu Bible (WBTC) | The Complete Jewish Bible (1998) | The Darby Bible (1890) | The Douay-Rheims American Bible (1899) | The Message Bible (2002) | The New Jerusalem Bible | The Webster Bible (1833) | Third Millennium Bible (1998) | Today's English Version (Good News Bible) (1992) | Today's New International Version (2005) | Tyndale Bible (1534) | Tyndale-Rogers-Coverdale-Cranmer Bible (1537) | Updated Bible (2006) | Voice In Wilderness (2006) | World English Bible | Wycliffe Bible (1395) | Young's Literal Translation (1898) | Telugu Bible Verse by Verse Explanation | పరిశుద్ధ గ్రంథ వివరణ | Telugu Bible Commentary |