Psalms - కీర్తనల గ్రంథము 119 | View All

1. (ఆలెఫ్‌) యెహోవా ధర్మశాస్త్రము ననుసరించి నిర్దోషముగా నడుచుకొనువారు ధన్యులు

2. ఆయన శాసనములను గైకొనుచు పూర్ణహృదయముతో ఆయనను వెదకువారు ధన్యులు.

3. వారు ఆయన మార్గములలో నడుచుకొనుచు ఏ పాప మును చేయరు

4. నీ ఆజ్ఞలను జాగ్రత్తగా గైకొనవలెనని నీవు మాకు ఆజ్ఞాపించియున్నావు.

5. ఆహా నీ కట్టడలను గైకొనునట్లు నా ప్రవర్తన స్థిరపడి యుండిన నెంత మేలు.

6. నీ ఆజ్ఞలన్నిటిని నేను లక్ష్యము చేయునప్పుడు నాకు అవమానము కలుగనేరదు.

7. నీతిగల నీ న్యాయవిధులను నేను నేర్చుకొనునప్పుడు యథార్థహృదయముతో నీకు కృతజ్ఞతాస్తుతులు చెల్లిం చెదను.

8. నీ కట్టడలను నేను గైకొందును నన్ను బొత్తిగా విడనాడకుము.

9. (బేత్‌) ¸యౌవనస్థులు దేనిచేత తమ నడత శుద్ధిపరచు కొందురు? నీ వాక్యమునుబట్టి దానిని జాగ్రత్తగా చూచుకొనుట చేతనే గదా?

10. నా పూర్ణహృదయముతో నిన్ను వెదకియున్నాను నన్ను నీ ఆజ్ఞలను విడిచి తిరుగనియ్యకుము.

11. నీ యెదుట నేను పాపము చేయకుండునట్లు నా హృదయములో నీ వాక్యము ఉంచుకొని యున్నాను.

12. యెహోవా, నీవే స్తోత్రము నొందదగినవాడవు నీ కట్టడలను నాకు బోధించుము.

13. నీ నోట నీవు సెలవిచ్చిన న్యాయవిధులన్నిటిని నా పెదవులతో వివరించుదును.

14. సర్వసంపదలు దొరికినట్లు నీ శాసనముల మార్గమునుబట్టి నేను సంతోషించు చున్నాను.

15. నీ ఆజ్ఞలను నేను ధ్యానించెదను నీ త్రోవలను మన్నించెదను.

16. నీ కట్టడలనుబట్టి నేను హర్షించెదను. నీ వాక్యమును నేను మరువకయుందును.

17. (గీమెల్‌) నీ సేవకుడనైన నేను బ్రదుకునట్లు నాయెడల నీ దయారసము చూపుము నీ వాక్యమునుబట్టి నేను నడుచుకొనుచుందును.

18. నేను నీ ధర్మశాస్త్రమునందు ఆశ్చర్యమైన సంగతులను చూచునట్లు నా కన్నులు తెరువుము.

19. నేను భూమిమీద పరదేశినై యున్నాను నీ ఆజ్ఞలను నాకు మరుగుచేయకుము.

20. నీ న్యాయవిధులమీద నాకు ఎడతెగని ఆశకలిగియున్నది దానిచేత నా ప్రాణము క్షీణించుచున్నది.

21. గర్విష్ఠులను నీవు గద్దించుచున్నావు. నీ ఆజ్ఞలను విడిచి తిరుగువారు శాపగ్రస్తులు.

22. నేను నీ శాసనముల ననుసరించుచున్నాను. నామీదికి రాకుండ నిందను తిరస్కారమును తొలగింపుము.

23. అధికారులు నాకు విరోధముగా సభతీర్చి మాటలాడు కొందురు నీ సేవకుడు నీ కట్టడలను ధ్యానించుచుండును.

24. నీ శాసనములు నాకు సంతోషకరములు అవి నాకు ఆలోచనకర్తలైయున్నవి.

25. (దాలెత్‌) నా ప్రాణము మంటిని హత్తుకొనుచున్నది నీ వాక్యముచేత నన్ను బ్రదికింపుము.

26. నా చర్య అంతయు నేను చెప్పుకొనగా నీవు నాకు ఉత్తరమిచ్చితివి నీ కట్టడలను నాకు బోధింపుము

27. నీ ఉపదేశమార్గమును నాకు బోధపరచుము. నీ ఆశ్చర్యకార్యములను నేను ధ్యానించెదను.

28. వ్యసనమువలన నా ప్రాణము నీరైపోయెను నీ వాక్యముచేత నన్ను స్థిరపరచుము.

29. కపటపు నడత నాకు దూరము చేయుము నీ ఉపదేశమును నాకు దయచేయుము

30. సత్యమార్గమును నేను కోరుకొనియున్నాను నీ న్యాయవిధులను నేను నాయెదుట పెట్టుకొని యున్నాను

31. యెహోవా, నేను నీ శాసనములను హత్తుకొని యున్నాను నన్ను సిగ్గుపడనియ్యకుము.

32. నా హృదయమును నీవు విశాలపరచునప్పుడు నేను నీ ఆజ్ఞలమార్గమున పరుగెత్తెదను.
2 కోరింథీయులకు 6:11

33. (హే) యెహోవా, నీ కట్టడలను అనుసరించుటకు నాకు నేర్పుము. అప్పుడు నేను కడమట్టుకు వాటిని గైకొందును.

34. నీ ధర్మశాస్త్రము ననుసరించుటకు నాకు బుద్ధి దయ చేయుము అప్పుడు నా పూర్ణహృదయముతో నేను దాని ప్రకారము నడుచుకొందును.

35. నీ ఆజ్ఞల జాడను చూచి నేను ఆనందించుచున్నాను దానియందు నన్ను నడువజేయుము.

36. లోభముతట్టు కాక నీ శాసనములతట్టు నా హృదయము త్రిప్పుము.

37. వ్యర్థమైనవాటిని చూడకుండ నా కన్నులు త్రిప్పి వేయుము నీ మార్గములలో నడుచుకొనుటకు నన్ను బ్రదికింపుము.

38. నీ విచ్చిన వాక్యము మనుష్యులలో నీ భయమును పుట్టించుచున్నది నీ సేవకునికి దాని స్థిరపరచుము.

39. నీ న్యాయవిధులు ఉత్తములు నాకు భయము పుట్టించుచున్న నా అవమానమును కొట్టివేయుము.

40. నీ ఉపదేశములు నాకు అధిక ప్రియములు నీతినిబట్టి నన్ను బ్రదికింపుము.

41. (వావ్‌) యెహోవా, నీ కనికరములు నా యొద్దకు రానిమ్ము నీ మాటచొప్పున నీ రక్షణ రానిమ్ము.

42. అప్పుడు నన్ను నిందించువారికి నేను ఉత్తరమీయగలను ఏలయనగా నీమాట నమ్ముకొనియున్నాను.

43. నా నోటనుండి సత్యవాక్యమును ఏమాత్రమును తీసి వేయకుము నీ న్యాయవిధులమీద నా ఆశ నిలిపియున్నాను.

44. నిరంతరము నీ ధర్మశాస్త్రము ననుసరించుదును నేను నిత్యము దాని ననుసరించుదును

45. నేను నీ ఉపదేశములను వెదకువాడను నిర్బంధములేక నడుచుకొందును

46. సిగ్గుపడక రాజులయెదుట నీ శాసనములనుగూర్చి నేను మాటలాడెదను.
రోమీయులకు 1:16

47. నీ ఆజ్ఞలనుబట్టి నేను హర్షించెదను అవి నాకు ప్రియములు.

48. నాకు ప్రియముగానున్న నీ ఆజ్ఞలతట్టు నా చేతులెత్తెదను నీ కట్టడలను నేను ధ్యానించుదును. జాయిన్‌.

49. (జాయిన్‌) నీ సేవకునికి దయచేయబడిన మాట జ్ఞాపకము చేసి కొనుము దానివలన నీవు నాకు నిరీక్షణ పుట్టించియున్నావు.

50. నీ వాక్యము నన్ను బ్రదికించి యున్నది నా బాధలో ఇదే నాకు నెమ్మది కలిగించుచున్నది.

51. గర్విష్ఠులు నన్ను మిగుల అపహసించిరి అయినను నీ ధర్మశాస్త్రమునుండి నేను తొలగక యున్నాను.

52. యెహోవా, పూర్వకాలమునుండి యుండిన నీ న్యాయ విధులను జ్ఞాపకము చేసికొని నేను ఓదార్పు నొందితిని.

53. నీ ధర్మశాస్త్రమును విడిచి నడుచుచున్న భక్తిహీనులను చూడగా నాకు అధిక రోషము పుట్టుచున్నది

54. యాత్రికుడనైన నేను నా బసలో పాటలు పాడుటకు నీ కట్టడలు హేతువులాయెను.

55. యెహోవా, రాత్రివేళ నీ నామమును స్మరణ చేయు చున్నాను నీ ధర్మశాస్త్రము ననుసరించి నడుచుకొనుచున్నాను

56. నీ ఉపదేశము ననుసరించి నడుచుకొనుచున్నాను ఇదే నాకు వరముగా దయచేయబడియున్నది.

57. (హేత్‌)యెహోవా, నీవే నా భాగము నీ వాక్యముల ననుసరించి నడుచుకొందునని నేను నిశ్చయించుకొని యున్నాను.

58. కటాక్షముంచుమని నా పూర్ణహృదయముతో నిన్ను బతిమాలుకొనుచున్నాను నీవిచ్చిన మాటచొప్పున నన్ను కరుణింపుము.

59. నా మార్గములు నేను పరిశీలన చేసికొంటిని నీ శాసనములతట్టు మరలుకొంటిని.

60. నీ ఆజ్ఞలను అనుసరించుటకు నేను జాగుచేయక త్వరపడితిని.

61. భక్తిహీనులపాశములు నన్ను చుట్టుకొని యున్నను నీ ధర్మశాస్త్రమును నేను మరువలేదు

62. న్యాయమైన నీ విధులనుబట్టి నీకు కృతజ్ఞతాస్తుతులు చెల్లించుటకు అర్ధరాత్రివేళ నేను మేల్కొనువాడను.

63. నీయందు భయభక్తులు గలవారందరికిని నీ ఉపదేశములను అనుసరించువారికిని నేను చెలి కాడను.

64. (తే­త్‌) యెహోవా, భూమి నీ కృపతో నిండియున్నది నీ కట్టడలను నాకు బోధింపుము.

65. యెహోవా, నీ మాట చొప్పున నీ సేవకునికి నీవు మేలు చేసియున్నావు.

66. నేను నీ ఆజ్ఞలయందు నమ్మిక యుంచియున్నాను మంచి వివేచన మంచి జ్ఞానము నాకు నేర్పుము.

67. శ్రమకలుగక మునుపు నేను త్రోవ విడిచితిని ఇప్పుడు నీ వాక్యము ననుసరించి నడుచుకొను చున్నాను.

68. నీవు దయాళుడవై మేలు చేయుచున్నావు నీ కట్టడలను నాకు బోధింపుము.

69. గర్విష్ఠులు నా మీద అబద్ధము కల్పించుదురు అయితే పూర్ణహృదయముతో నేను నీ ఉపదేశ ములను అనుసరింతును.

70. వారి హృదయము క్రొవ్వువలె మందముగా ఉన్నది నేను నీ ధర్మశాస్త్రమునుబట్టి ఆనందించుచున్నాను.

71. నేను నీ కట్టడలను నేర్చుకొనునట్లు శ్రమనొంది యుండుట నాకు మేలాయెను.

72. వేలకొలది వెండి బంగారు నాణములకంటె నీ విచ్చిన ధర్మశాస్త్రము నాకు మేలు.

73. (యోద్‌) నీ చేతులు నన్ను నిర్మించి నాకు రూపు ఏర్పరచెను నేను నీ ఆజ్ఞలను నేర్చుకొనునట్లు నాకు బుద్ధి దయ చేయుము.

74. నీ వాక్యముమీద నేను ఆశపెట్టుకొని యున్నాను నీయందు భయభక్తులుగలవారు నన్ను చూచి సంతోషింతురు

75. యెహోవా, నీ తీర్పులు న్యాయమైనవనియు విశ్వాస్యతగలవాడవై నీవు నన్ను శ్రమపరచితివనియు నేనెరుగుదును.

76. నీ సేవకునికి నీవిచ్చిన మాటచొప్పున నీ కృప నన్ను ఆదరించును గాక.

77. నీ ధర్మశాస్త్రము నాకు సంతోషకరము. నేను బ్రదుకునట్లు నీ కరుణాకటాక్షములు నాకు కలుగును గాక.

78. నేను నీ ఉపదేశములను ధ్యానించుచున్నాను. గర్విష్ఠులు నామీద అబద్ధములాడినందుకు వారు సిగ్గుపడుదురు గాక.

79. నీయందు భయభక్తులుగలవారును నీ శాసనములను తెలిసికొనువారును నా పక్షమున నుందురు గాక.

80. నేను సిగ్గుపడకుండునట్లు నా హృదయము నీ కట్టడలవిషయమై నిర్దోషమగును గాక.

81. (కఫ్‌) నీ రక్షణకొరకు నా ప్రాణము సొమ్మసిల్లుచున్నది. నేను నీ వాక్యముమీద ఆశపెట్టుకొని యున్నాను

82. నన్ను ఎప్పుడు ఆదరించెదవో అని నా కన్నులు నీవిచ్చిన మాటకొరకు కనిపెట్టి క్షీణించు చున్నవి

83. నేను పొగ తగులుచున్న సిద్దెవలెనైతిని అయినను నీ కట్టడలను నేను మరచుట లేదు.

84. నీ సేవకుని దినములు ఎంత కొద్దివాయెను? నన్ను తరుమువారికి నీవు తీర్పు తీర్చుట యెప్పుడు?

85. నీ ధర్మశాస్త్రము ననుసరింపని గర్విష్ఠులు నన్ను చిక్కించుకొనుటకై గుంటలు త్రవ్విరి.

86. నీ ఆజ్ఞలన్నియు నమ్మదగినవి పగవారు నిర్నిమిత్తముగా నన్ను తరుముచున్నారు నాకు సహాయముచేయుము.

87. భూమిమీద నుండకుండ వారు నన్ను నాశనము చేయుటకు కొంచెమే తప్పెను అయితే నీ ఉపదేశములను నేను విడువకయున్నాను.

88. నీవు నియమించిన శాసనమును నేను అనుసరించు నట్లు నీ కృపచేత నన్ను బ్రదికింపుము. లామెద్‌.

89. (లామెద్‌) యెహోవా, నీ వాక్యము ఆకాశమందు నిత్యము నిలకడగా నున్నది.

90. నీ విశ్వాస్యత తరతరములుండును. నీవు భూమిని స్థాపించితివి అది స్థిరముగానున్నది

91. సమస్తము నీకు సేవచేయుచున్నవి కావున నీ నిర్ణయముచొప్పున అవి నేటికిని స్థిరపడి యున్నవి

92. నీ ధర్మశాస్త్రము నాకు సంతోషమియ్యనియెడల నా శ్రమయందు నేను నశించియుందును.

93. నీ ఉపదేశమువలన నీవు నన్ను బ్రదికించితివి నేనెన్నడును వాటిని మరువను.

94. నీ ఉపదేశములను నేను వెదకుచున్నాను నేను నీవాడనే నన్ను రక్షించుము.

95. నన్ను సంహరింపవలెనని భక్తిహీనులు నా కొరకు పొంచియున్నారు అయితే నేను నీ శాసనములను తలపోయుచున్నాను.

96. సకల సంపూర్ణతకు పరిమితి కలదని నేను గ్రహించి యున్నాను నీ ధర్మోపదేశము అపరిమితమైనది.

97. (మేమ్‌) నీ ధర్మశాస్త్రము నాకెంతో ప్రియముగానున్నది దినమెల్ల నేను దానిని ధ్యానించుచున్నాను.

98. నీ ఆజ్ఞలు నిత్యము నాకు తోడుగా నున్నవి. నా శత్రువులను మించిన జ్ఞానము అవి నాకు కలుగ జేయుచున్నవి.

99. నీ శాసనములను నేను ధ్యానించుచున్నాను కావున నా బోధకులందరికంటె నాకు విశేషజ్ఞానము కలదు.

100. నీ ఉపదేశములను నేను లక్ష్యము చేయుచున్నాను కావున వృద్ధులకంటె నాకు విశేషజ్ఞానము కలదు.

101. నేను నీ వాక్యము ననుసరించునట్లు దుష్టమార్గములన్నిటిలోనుండి నా పాదములు తొలగించుకొనుచున్నాను

102. నీవు నాకు బోధించితివి గనుక నీ న్యాయవిధులనుండి నేను తొలగకయున్నాను.

103. నీ వాక్యములు నా జిహ్వకు ఎంతో మధురములు అవి నా నోటికి తేనెకంటె తీపిగా నున్నవి.

104. నీ ఉపదేశమువలన నాకు వివేకము కలిగెను తప్పుమార్గములన్నియు నా కసహ్యములాయెను.

105. (నూన్‌) నీ వాక్యము నా పాదములకు దీపమును నా త్రోవకు వెలుగునై యున్నది.

106. నీ న్యాయవిధులను నేననుసరించెదనని నేను ప్రమాణము చేసియున్నాను నా మాట నెర వేర్చుదును.

107. యెహోవా, నేను మిక్కిలి శ్రమపడుచున్నాను నీ మాటచొప్పున నన్ను బ్రదికింపుము.

108. యెహోవా, నా నోటి స్వేచ్ఛార్పణలను అంగీక రించుము. నీ న్యాయవిధులను నాకు బోధింపుము

109. నా ప్రాణము ఎల్లప్పుడు నా అరచేతిలో ఉన్నది. అయినను నీ ధర్మశాస్త్రమును నేను మరువను.

110. నన్ను పట్టుకొనుటకై భక్తిహీనులు ఉరియొడ్డిరి అయినను నీ ఉపదేశములనుండి నేను తొలగి తిరుగుట లేదు.

111. నీ శాసనములు నాకు హృదయానందకరములు అవి నాకు నిత్యస్వాస్థ్యమని భావించుచున్నాను.

112. నీ కట్టడలను గైకొనుటకు నా హృదయమును నేను లోపరచుకొనియున్నాను ఇది తుదవరకు నిలుచు నిత్యనిర్ణయము.

113. (సామెహ్‌) ద్విమనస్కులను నేను ద్వేషించుచున్నాను నీ ధర్మశాస్త్రము నాకు ప్రీతికరము.

114. నాకు మరుగుచోటు నా కేడెము నీవే నేను నీ వాక్యముమీద ఆశపెట్టుకొనియున్నాను.

115. నేను నా దేవుని ఆజ్ఞలను అనుసరించెదను దుష్‌క్రియలు చేయువారలారా, నాయొద్దనుండి తొలగుడి.

116. నేను బ్రదుకునట్లు నీ మాటచొప్పున నన్ను ఆదు కొనుము నా ఆశ భంగమై నేను సిగ్గునొందక యుందును గాక.

117. నాకు రక్షణకలుగునట్లు నీవు నన్ను ఉద్ధరింపుము అప్పుడు నీ కట్టడలను నిత్యము లక్ష్యము చేసెదను.

118. నీ కట్టడలను మీరిన వారినందరిని నీవు నిరాకరించుదువు వారి కపటాలోచన మోసమే.

119. భూమిమీదనున్న భక్తిహీనులనందరిని నీవు మష్టువలె లయపరచుదువు కావున నీ శాసనములు నాకు ఇష్టమైయున్నవి

120. నీ భయమువలన నా శరీరము వణకుచున్నది నీ న్యాయవిధులకు నేను భయపడుచున్నాను.

121. (అయిన్‌) నేను నీతిన్యాయముల ననుసరించుచున్నాను. నన్ను బాధించువారివశమున నన్ను విడిచిపెట్టకుము.

122. మేలుకొరకు నీ సేవకునికి పూటపడుము గర్విష్ఠులు నన్ను బాధింపక యుందురు గాక.

123. నీ రక్షణకొరకు నీతిగల నీ మాటకొరకు కనిపెట్టుచు నా కన్నులు క్షీణించుచున్నవి.

124. నీ కృపచొప్పున నీ సేవకునికి మేలుచేయుము నీ కట్టడలను నాకు బోధింపుము

125. నేను నీ సేవకుడను నీ శాసనములను గ్రహించునట్లు నాకు జ్ఞానము కలుగ జేయుము

126. జనులు నీ ధర్మశాస్త్రమును నిరర్థకము చేసియున్నారు యెహోవా తన క్రియ జరిగించుటకు ఇదే సమయము.

127. బంగారుకంటెను అపరంజికంటెను నీ ఆజ్ఞలు నాకు ప్రియముగానున్నవి.

128. నీ ఉపదేశములన్నియు యథార్థములని నేను వాటిని మన్నించుచున్నాను అబద్ధమార్గములన్నియు నా కసహ్యములు.

129. (పే) నీ శాసనములు ఆశ్చర్యములు కావుననే నేను వాటిని గైకొనుచున్నాను.

130. నీ వాక్యములు వెల్లడి అగుటతోడనే వెలుగుకలుగును అవి తెలివిలేనివారికి తెలివి కలిగించును.

131. నీ ఆజ్ఞలయందైన యధిక వాంఛచేత నేను నోరు తెరచి ఒగర్చుచున్నాను.

132. నీ నామమును ప్రేమించువారికి నీవు చేయదగునట్లు నాతట్టు తిరిగి నన్ను కరుణింపుము.

133. నీ వాక్యమునుబట్టి నా యడుగులు స్థిరపరచుము ఏ పాపమును నన్ను ఏలనియ్యకుము.

134. నీ ఉపదేశములను నేను అనుసరించునట్లు మనుష్యుల బలాత్కారమునుండి నన్ను విమోచింపుము.

135. నీ సేవకునిమీద నీ ముఖకాంతి ప్రకాశింపజేయుము నీ కట్టడలను నాకు బోధింపుము.

136. జనులు నీ ధర్మశాస్త్రము ననుసరింపకపోయినందుకు నా కన్నీరు ఏరులై పారుచున్నది.

137. (సాదె) యెహోవా, నీవు నీతిమంతుడవు నీ న్యాయవిధులు యథార్థములు
ప్రకటన గ్రంథం 16:5-7, ప్రకటన గ్రంథం 19:2

138. నీతినిబట్టియు పూర్ణ విశ్వాస్యతనుబట్టియు నీ శాసనములను నీవు నియమించితివి.

139. నా విరోధులు నీ వాక్యములు మరచిపోవుదురు కావున నా ఆసక్తి నన్ను భక్షించుచున్నది.

140. నీ మాట మిక్కిలి స్వచ్ఛమైనది అది నీ సేవకునికి ప్రియమైనది.

141. నేను అల్పుడను నిరాకరింపబడినవాడను అయినను నీ ఉపదేశములను నేను మరువను.

142. నీ నీతి శాశ్వతమైనది నీ ధర్మశాస్త్రము కేవలము సత్యము.

143. శ్రమయు వేదనయు నన్ను పట్టియున్నవి అయినను నీ ఆజ్ఞలు నాకు సంతోషము కలుగజేయు చున్నవి

144. నీ శాసనములు శాశ్వతమైన నీతిగలవి నేను బ్రదుకునట్లు నాకు తెలివి దయచేయుము.

145. (ఖొఫ్‌) యెహోవా, హృదయపూర్వకముగా నేను మొఱ్ఱ పెట్టుచున్నాను నీ కట్టడలను నేను గైకొనునట్లు నాకు ఉత్తరమిమ్ము.

146. నేను నీకు మొఱ్ఱ పెట్టుచున్నాను నీ శాసనములచొప్పున నేను నడుచుకొనునట్లు నన్ను రక్షింపుము.

147. తెల్లవారకమునుపే మొఱ్ఱపెట్టితిని నీ మాటలమీద నేను ఆశపెట్టుకొని యున్నాను

148. నీవిచ్చిన వాక్యమును నేను ధ్యానించుటకై నాకన్నులు రాత్రిజాములు కాకమునుపే తెరచు కొందును.

149. నీ కృపనుబట్టి నా మొఱ్ఱ ఆలకింపుము యెహోవా, నీ వాక్యవిధులనుబట్టి నన్ను బ్రదికింపుము.

150. దుష్కార్యములు చేయువారును నీ ధర్మశాస్త్రమును త్రోసివేయువారును నా యొద్దకు సమీపించుచున్నారు

151. యెహోవా, నీవు సమీపముగా ఉన్నావు. నీ ఆజ్ఞలన్నియు సత్యమైనవి.

152. నీ శాసనములను నీవు నిత్యములుగా స్థిరపరచితివని నేను పూర్వమునుండి వాటివలననే తెలిసికొని యున్నాను.

153. (రేష్‌) నేను నీ ధర్మశాస్త్రమును మరచువాడను కాను నా శ్రమను విచారించి నన్ను విడిపింపుము

154. నా పక్షమున వ్యాజ్యెమాడి నన్ను విమోచింపుము నీవిచ్చిన మాటచొప్పున నన్ను బ్రదికింపుము.

155. భక్తిహీనులు నీ కట్టడలను వెదకుట లేదు గనుక రక్షణ వారికి దూరముగా నున్నది.

156. యెహోవా, నీ కనికరములు మితిలేనివి నీ న్యాయవిధులనుబట్టి నన్ను బ్రదికింపుము.

157. నన్ను తరుమువారును నా విరోధులును అనేకులు అయినను నీ న్యాయశాసనములనుండి నేను తొలగక యున్నాను.

158. ద్రోహులను చూచి నేను అసహ్యించుకొంటిని నీవిచ్చిన మాటను వారు లక్ష్యపెట్టరు.

159. యెహోవా, చిత్తగించుము నీ ఉపదేశములు నాకెంతో ప్రీతికరములు నీ కృపచొప్పున నన్ను బ్రదికింపుము

160. నీ వాక్య సారాంశము సత్యము నీవు నియమించిన న్యాయవిధులన్నియు నిత్యము నిలుచును.

161. (షీన్‌) అధికారులు నిర్నిమిత్తముగా నన్ను తరుముదురు అయినను నీ వాక్యభయము నా హృదయమందు నిలుచుచున్నది.
యోహాను 15:25

162. విస్తారమైన దోపుసొమ్ము సంపాదించినవానివలె నీవిచ్చిన మాటనుబట్టి నేను సంతోషించుచున్నాను.

163. అబద్ధము నాకసహ్యము అది నాకు హేయము నీ ధర్మశాస్త్రము నాకు ప్రీతికరము.

164. నీ న్యాయవిధులనుబట్టి దినమునకు ఏడు మారులు నేను నిన్ను స్తుతించు చున్నాను.

165. నీ ధర్మశాస్త్రమును ప్రేమించువారికి ఎంతో నెమ్మది కలదు వారు తూలి తొట్రిల్లుటకు కారణమేమియులేదు
1,Joh,2,10

166. యెహోవా, నీ రక్షణకొరకు నేను కనిపెట్టుచున్నాను నీ ఆజ్ఞలను అనుసరించి నడుచుకొనుచున్నాను.

167. నేను నీ శాసనములనుబట్టి ప్రవర్తించుచున్నాను అవి నాకు అతి ప్రియములు,

168. నా మార్గములన్నియు నీయెదుట నున్నవి నీ ఉపదేశములను నీ శాసనములను నేను అనుసరించు చున్నాను.

169. (తౌ) యెహోవా, నా మొఱ్ఱ నీ సన్నిధికి వచ్చునుగాక నీ మాటచొప్పున నాకు వివేకము నిమ్ము.

170. నా విన్నపము నీ సన్నిధిని చేరనిమ్ము నీవిచ్చిన మాటచొప్పున నన్ను విడిపింపుము.

171. నీవు నీ కట్టడలను నాకు బోధించుచున్నావు నా పెదవులు నీ స్తోత్రము నుచ్చరించును

172. నీ ఆజ్ఞలన్నియు న్యాయములు నీ వాక్యమునుగూర్చి నా నాలుక పాడును.

173. నేను నీ ఉపదేశములను కోరుకొనియున్నాను నీ చెయ్యి నాకు సహాయమగును గాక.

174. యెహోవా, నీ రక్షణకొరకు నేను మిగుల ఆశపడు చున్నాను నీ ధర్మశాస్త్రము నాకు సంతోషకరము.

175. నీవు నన్ను బ్రదికింపుము నేను నిన్ను స్తుతించెదను నీ న్యాయవిధులు నాకు సహాయములగును గాక

176. తప్పిపోయిన గొఱ్ఱవలె నేను త్రోవవిడిచి తిరిగితిని నీ సేవకుని వెదకి పట్టుకొనుము ఎందుకనగా నేను నీ ఆజ్ఞలను మరచువాడను కాను.



బైబిల్ అధ్యయనం - Study Bible
కీర్తన-119. దేవుని లిఖితవాక్యం పట్ల గంభీరమైన, లోతైన ప్రేమను వ్యక్తపరిచే ఈ కీర్తన దేవుని వాక్యాన్ని ఒక వాగ్దానంగా, ఆజ్ఞగా, మార్గదర్శిగా, సాక్ష్యంగా, బోధనగా, జ్ఞానంగా, సత్యంగా, నీతిగా, గద్దింపుగా పరిగణిస్తున్నది. 

119:1-176 దేవుని వాక్యం కీర్తనకారునికి గొప్ప ఆదరణగా, ఒక జీవన సిద్ధాంతంగా అతని హృదయానికి, ఆత్మకు ఆనందం కలిగించేదిగా, అతని అవసరాలన్నింటినీ తీర్చేదిగా వర్ణించబడింది. కీర్తనకారుడు దేవుని వాక్యాన్ని ధ్యానిస్తూ, ప్రార్ధించడం ద్వారా దేవునిపై గొప్ప ప్రేమను వ్యక్తం చేస్తున్నాడు. ఆ వాక్యంపై మనలో ప్రేమ పెంపొందితేనే మనం కృపలోను, నీతిలోను ఎదగగలమని అతడు మనకు ఉపదేశిస్తున్నాడు. ఈ కీర్తనలో 8 వచనాలతో గల ఇరవై రెండు పద్యాలు లేక పేరాగ్రాఫులు హెబ్రీ అక్షరమాలలోని ఇరవై రెండు అక్షరాలకు అనుగుణంగా ఉన్నాయి. పేరాగ్రాఫులో ఉన్న ప్రతి వచనం ఆ పద్యం గుణలక్షణానికి సంబంధించిన అక్షరంతో ప్రారంభమవుతుంది. దాదాపుగా ప్రతి వచనంలోను దేవుని ధర్మశాస్త్రాని కుపయోగించిన ఈ ఎనిమిది పదాల్లో ఏదో ఒకటి కనిపిస్తుంది: “ధర్మశాస్త్రము”, “శాసనము", “ఆజ్ఞ”, “కట్టడ”, “న్యాయవిధి", "మాట", "వాక్యము”, “ఉపదేశము”.

119:1-8 దేవుని ప్రజలకు ఆయన పూర్తి ఉపదేశాన్ని ధర్మశాస్త్రము (హెబ్రీ. టోరా) అనే మాట తెలియజేస్తున్నది. అది పంచకాండాలను (పా.ని.లోని మొదటి ఐదు గ్రంథాలు) లేక పాత నిబంధనను మొత్తంగా కూడా వివరిస్తుంది. దేవుని శాసనములు (హెబ్రీ. ఏదోత్ ) అంటే ఆయన నిబంధనా సూత్రాలు, లేక ఆయన చిత్తం అని ఏదైతే ప్రకటించబడిందో అది. ఈ భూమి మీద దేవుని మార్గములు (హెబ్రీ. డెరెక్ ) తన ప్రజలకు అన్వయించి తన విమోచనను ముందుకు తీసుకొని వెళ్లే సిద్ధాంతాలను, వాటిని అనుసరించే విధానాన్ని వివరిస్తున్నాయి. ఆయన మార్గాలు మానవ జ్ఞానానికి, విలువలకు భిన్నంగా ఉంటాయి (యెషయా 55:8-9 చూడండి). కట్టడలనేవి (హెబ్రీ. ఖుఖేక) తన ప్రజలకు వ్యక్తిగతంగా, సామూహికంగా అన్వయించే నియమాలు. దేవుని చిత్తాన్ని అనుసరించడానికి, ఆయన మార్గాలలో స్థిరపడడానికి ఆయన కృప కోసం విశ్వాసులు ఎడతెగక అడుగుతూ ఉండాలి. అయితే పరిశుద్ధాత్మ కాపుదల, సహాయం లేకుండా దేవుని కట్టడలకు మనం నమ్మకంగా ఉండలేం కాబట్టి ఇలాంటి ప్రార్థనలు చేస్తూ ఉండాలి (మత్తయి 7:21 నోట్సు చూడండి). దేవుని ఆజ్ఞల(హెబ్రీ. “మిట్సక్షాత్")నేవి దేవుని అధికారాన్ని, మనం విధేయత చూపవలసిన ఆయన ఉద్దేశాన్ని తెలియజేస్తున్నాయి. దేవుని న్యాయవిధులు (హెబ్రీ. మిష్పతిమ్) ప్రజలు ఒకరి కొకరు చేసే కార్యాలకు సంబంధించి దైవన్యాయాధిపతి ఇచ్చే తీర్పులు. 

119:9-16 యౌవనులు దేనిచేత తమ నడత శుద్ధిపరచు కొందురు? దేవుని దృష్టిలో మనల్ని మనం పవిత్రంగా కనపరచుకోడానికి అవసరమైన మార్గాలను ఈ కీర్తనలోని రెండో పద్యం (వ.9-16) ఒక్కొక్క వచనంలో ఒకటి చొప్పున ఎనిమిది. మార్గాలను వివరిస్తుంది. (1) మన జీవిత కాలమంతా లిఖిత పూర్వకమైన దేవుని వాక్యానికి నమ్మకంగా ఉంటామని స్థిరమైన నిర్ణయం తీసుకోవాలి. (2) ప్రార్థనలో ఎడతెగక దేవుని వెదకుతూ ఉండాలి. (3) దేవుని వాక్యాన్ని పదేపదే మననం చేసుకోవాలి. (4) అనుదిన జీవితంలో నడిపింపు కోసం దేవునివైపు చూడాలి. (5) దేవుని సత్యానికి కట్టుబడి ఉండాలని స్థిరంగా నిర్ణయించుకోవాలి (6) దేవుడు చెప్పే ప్రతిమాటలో ఆనందించి ఉత్సహించాలి. (7) ఈ లోకసంబంధమైన విధానాలకు వ్యతిరేకమైన దైవికమార్గాలను వెదకాలి (8) దేవుని వాక్యం చదివి దానిని అధ్యయనం చేయడానికి వీలు లేనంతగా విస్తారమైన పనుల్లో నిమగ్నం కాకూడదు 

119:17-24 అధికారులు నాకు విరోధముగా సభ తీర్చి మాటలాడుకొం దురు. కీర్తనకారుడు దేవుని వాక్యం ప్రకారం నీతిగా జీవించడానికి ప్రయత్నిం చినప్పుడు తిరస్కారం, అలక్ష్యం, అపవాదులతో ఎంతో బాధపడ్డానని సాక్ష్యం చెబుతున్నాడు. అయినప్పటికీ, ఈ వ్యతిరేకత అతడు దేవుని మార్గాన్ని అనుసరించకుండా అతన్ని ఆపలేకపోయింది. .
ఈ రోజున క్రీస్తుకు, ఆయన వాక్యానికి నమ్మకంగా ఉన్నవారు కూడా విమర్శలను, ఎగతాళిని, అవమానాన్ని ఎదుర్కొనడానికి సిద్ధంగా ఉండాలి. (మత్తయి 5:10 నోట్సు; లూకా 6:20-26 నోట్సు చూడండి). దేవుడు సృష్టించిన భూమి మీద తాను పరదేశినైయున్నాను అని కీర్తనకారుడు తనను తాను వర్ణించుకుంటున్నాడు.

119:25-32 నీ వాక్యము చేత నన్ను బ్రతికించుము. దేవుని వాక్యంలో జీవం ఉంది. నిస్సత్తువతో నేలనంటుకున్న వారిని అది సరికొత్త జీవంతో నింపగలదు. కీర్తనకారుడు ధర్మశాస్త్రాన్ని తన జీవితానికి వర్తించుకొనేలా దాన్ని అర్థం చేసుకొనడానికి తనకు సహాయం చేయాలని దేవుణ్ణి ఆశ్రయిస్తున్నాడు. నీ ఉపదేశ మార్గమును నాకు బోధపరచుము. దేవుని వాక్యాన్ని ఆయన సహాయంతో మాత్రమే పూర్తిగా అర్థం చేసుకోగలం (వ.26-27,29). అందుకే తన పరిశుద్ధాత్మతో మనలను నింపి, మన అవగాహనా శక్తిని పెంపొందించమని, ఆయన సత్యాన్ని మనకు ఉపదేశించమని మనం ఎడతెగక దేవుని ప్రార్థించాలి (యోహాను 14:16-17 నోట్సు).

119:33-40 విధేయతకు దేవుడిచ్చే ప్రతిఫలం మీద ఈ విభాగం ప్రధానంగా దృష్టిని కేంద్రీకరిస్తున్నది. నా పూర్ణహృదయముతో - ద్వితీ 6:5 తో పోల్చి చూడండి. లోభము (ఆన్యాయార్జిత లాభం) పాపానికి దారితీస్తుంది, అయితే యెహోవా మార్గాలు జీవానికి నడిపిస్తాయి. 

119:41-48 కీర్తనకారునికి శ్రమ, పగ ఎదురైన సందర్భంలో అతడు దేవుని కృపాకనికరాల (ఫేసెద్) కోసం ఎదురు చూస్తూ (“నిబంధనా పూర్వకమైన విశ్వాస్యత" - 136:1-26 దగ్గర పదాధ్యయనం చూడండి), దేవుని నుండి రక్షణ కోరుకుంటున్నాడు. దేవుని శాసనాల మీద మనసు కేంద్రీకరించిన వ్యక్తి నిర్బంధము లేక (అంటే, స్వేచ్ఛగా) ప్రతికూల పరిస్థితుల్లో సైతం నిబ్బరంగా ఉండగలుగుతాడు. నీతిమంతుడైన వ్యక్తి సిగ్గుపడక (వ. 6,31,42) యెహోవా శాసనముల గురించి ధైర్యంగా మాట్లాడతాడు (మాటలాడెదను). నీ ఆజ్ఞలను బట్టి నేను హర్షించెదను, అవి నాకు ప్రియములు. దేవుని వాక్యంలో కీర్తనకారునికి గల ఆనందాన్ని, దానిపట్ల అతని హృదయపూర్వక ప్రేమనూ 119వ కీర్తన నొక్కి చెబుతున్నది.
మనం దేవుని వాక్యాన్ని చదువుతూ, దానికి విధేయులమైనప్పుడు మన హృదయాల్లో ఆనందం కలుగుతుంది. అలాగే దానిని అర్ధం చేసికొని, దానిలోని క్రీస్తు ఆజ్ఞలను అనుసరించాలని మనఃపూర్వకమైన కోర్కెతో బైబిలు చదివినప్పుడు (వ.20, 24,40,60) పరిశుద్ధాత్మ దేవుని ప్రేమను మన హృదయాలలో నింపుతాడు (యోహాను 14:15-17,21,23 చూడండి; రోమా 5:5 నోట్సు చూడండి), దేవుని వాక్యసత్యాన్ని తెలుసుకోడానికి సహాయం చేసి, మనలో గొప్ప ఆనందాన్ని కలిగిస్తాడు. (యోహాను 15:10-11తో పోల్చండి). 

119:49-56 నీ వాక్యము... నా బాధలో యిదే నాకు నెమ్మది కలిగించుచున్నది. విశ్వాసులు .. కష్టాలు - బాధలు. "అనుభవిస్తున్నప్పుడు ఆత్మద్వారా బలోపేతం చేయబడిన ఆయన వాక్యం వారికి ఆదరణ, నిరీక్షణ కలిగిస్తుంది. దేవుని వాక్యం సజీవమైంది (హెబ్రీ 4:12తో పోల్చండి). కాబట్టి దానిలోను, దేవునిలోను నిలిచి ఉన్న మనలను ఉజ్జీవింపజేసి, పూర్వస్థితికి తీసుకొని వచ్చే శక్తి దానికి ఉన్నది. (యోహాను 14:27తో పోల్చండి). నీతిమంతునికి యెహోవా న్యాయవిధులు ఓదార్పునిస్తాయి. ఎందుకంటే యెహోవా యథార్థతతో న్యాయం జరిగిస్తాడు. (వ.52). పూర్వకాలంలో యెహోవా అద్భుతకార్యాల ద్వారా ఇశ్రాయేలీయుల్ని విడిపించినందున, దేవుని " కార్యాల గురించి - ఈ దృష్టాంతాలు. కీర్తనకారునికి నిరీక్షణ కలిగించాయి. దేవుని ధర్మశాస్త్రాన్ని నిర్లక్ష్యం చేసిన గర్విష్ఠులు... భక్తిహీనుల మీద కీర్తనకారుని కోపం సరైనదే (15:4; 109:1-31 నోట్సు చూడండి).

119:57-64 యెహోవా, నీవే నా భాగము. దేవుడు, దేవుని వాక్యం చుట్టూ కీర్తనకారుని జీవితం కేంద్రీకృతమై ఉంది. మనం దేవుణ్ణి, ఆయన ప్రేమను తెలుసుకోవాలంటే (వ.57-64) ఆయన వాక్యంలో నిలిచి ఉండి (వ.57), హృదయ పూర్వకంగా ఆయన అనుగ్రహాన్ని, కృపను వెదకాలి (వ.58). ఆయన వాక్యాన్ని అనుసరించడానికి త్వరపడాలి (వ.60), తరచుగా ప్రార్థించాలి (వ.62), ఆయనలో భయభక్తులు గలవారితో సహవాసంలో గడపాలి (వ.63), ఆయన ప్రేమ కోసం వెదకి (వ.64), ఆయన చిత్తం తెలుసుకోవాలనీ, దానిని జరిగించాలని కోరుకొని ప్రార్థించాలి (వ.64). మనం క్రీస్తులో నిలిచి ఉండాలంటే ఆయన వాక్యంలో నిలిచి ఉండి దాని ప్రకారం జీవించడమే అత్యుత్తమమైన మార్గం (యోహాను 15:1-10). 

119:65-72 కీర్తనకారుడు గతంలో శ్రమ ననుభవించడానికి కారణం యెహోవా గద్దింపు. కీర్తనకారుడు గతావలోకనం చేసుకుంటూ గతంలోని తన నైతికలోపాల్ని ఒప్పుకొంటున్నాడు. శ్రమలు కలుగక మునుపు... ఇప్పుడు నీ వాక్యము ననుసరించి నడుచుకొనుచున్నాను. మనలను తన వాక్యానికి దగ్గరగా తేవడం కోసం దేవుడు కొన్నిసార్లు మన జీవితంలో కష్టాలు, బాధలను అనుమతిస్తాడు (వ.67; 94:12; సామె 3:11-12తో పోల్చండి; హెబ్రీ 12:5).
దేవుని గద్దింపు తనను చక్కదిద్ది బాగుచేసిందని గుర్తిస్తున్నాడు (వ.71). తనను వ్యతిరేకించేవారు తన మీద అబద్దము కల్పించుదురు అని కీర్తనకారుడు చెబుతున్నాడు. ఈ న్యాయస్థానపు పరిభాష అబద్దసాక్ష్యాల్ని సూచిస్తున్నది. దేవుని ధర్మశాస్త్రం - (ఆజ్ఞలు, కట్టడలు, న్యాయవిధులు, ఉపదేశాలు) లెక్కించలేనంత అపారమైన విలువ గలది (19:7-10).

119:78-80 కీర్తనకారుడు అవమానం పొందదల్చుకోవడం లేదు, అయితే గర్విష్ఠులు సిగ్గుపడుదురు గాక అని ప్రార్థిస్తూ, తన హృదయం నిర్దోషమగును గాక అని పునరుద్ఘాటిస్తున్నాడు. 

119:81-88 ఈ విభాగంలో విలాపం కనబడుతుంది, ఎప్పుడు దేవుడు తనకు ఆదరణ నిస్తాడో అని కీర్తనకారుడు అడుగుతున్నాడు. తాను మరణం అంచున ఉన్నానని కీర్తనకారుడు తలంచుతున్నా, తనను దేవుడు బ్రతికించాలని ఆయనలో నిరీక్షణతో ఆయన ఉపదేశాల్ని విడిచిపెట్టడం లేదు (వ.87-88). 

119:89-96 ఈ వచనాల్లో వాక్యము ప్రధానాంశం. యెహోవా నిర్ణయము చొప్పున విశ్వం క్రమగతిలో నడిచినట్లే, మానవజీవితం కూడా క్రమగతిలో నడుస్తుంది. వ.96 ప్రసంగి గ్రంథ సారాంశంగా కనబడుతుంది (ప్రసంగి 12:8-14).

119:97-104 దేవుని వాక్యముతో ప్రియమైన మైత్రీబంధం, వివేకంతో కూడిన సూక్ష్మదృష్టి గల ప్రవర్తనకు నడిపిస్తుంది. (ద్వితీ 4:5-6; యిర్మీయా 15:16; యెహె 3:3). దేవుని వాక్యం లేనివారికంటె దేవుని వాక్యం ఉన్నవారు విశేషజ్ఞానము గలవారైనట్లే, సువార్త “పసిపిల్లలకు” అర్థమవుతుంది గానీ, ఐహికజ్ఞానం గలవారికి మరుగై ఉంటుంది. (లూకా 10:21; 1కొరింథీ 1:18-21; 2:8 చూడండి).

119:105-112 మనం ఏది కోరుకుంటున్నామో అది త్రోవకు వెలుగునై ఉండదు గానీ, దేవుని న్యాయవిధులను కోరుకోవడం, ఆయన ఉపదేశముల నుండి తొలగకపోవడం మాత్రమే త్రోవకు వెలుగు కాగలదు; అట్టి త్రోవలో ప్రాణభీతి గానీ (నా ప్రాణము ఎల్లప్పుడు నా అరచేతిలో ఉన్నది), ఉరి గానీ ఉండవు. అట్టి త్రోవ హృదయానందకరము... నిత్యస్వాస్థమని కీర్తనకారుడు తలంచుతున్నాడు. ఈ విధంగా యెహోవా ధర్మశాస్త్రం కీర్తనకారుడు ఏది మంచో ఏది చెడో తెలుసుకొనేలా చేసింది. (19:11-13; సామె 6:23; యోహాను 8:16).

119:113-120 నీతిమంతులు దేవునితో సహవాసం కలిగి ఉండడం కోసం ఆయన దివ్యోపదేశాలకు తమను తాము అప్పగించుకుంటారు. ద్విమనస్కులను నేను ద్వేషించుచున్నాను. నీ ధర్మశాస్త్రము నాకు ప్రీతికరము. పాపాన్ని ద్వేషించకపోతే మనం నిజంగా దేవుని వాక్యాన్ని ప్రేమించలేం (వ. 113. 115.119,128; హెబ్రీ 1:9 చూడండి). దేవుని పట్ల, ఆయన తీర్పులపట్ల పవిత్రతను, న్యాయమైన భయభక్తులను కాపాడుకోలేం. 

119:121-128 నన్ను బాధించువారి వశమున నన్ను విడిచిపెట్టకుము. కీర్తనకారునిలా విశ్వాసులు కూడా (1) ఆయన వాక్యం పట్ల విధేయత,
ప్రేమను (వ.121-122), (2) ఆయన వాక్యంలోని స్థిరమైన వాగ్దానాలను (వ. 123), (3) దేవుని కృపను (వ.124), (4) పరిచర్యలో మన సమర్పణను (వ.125), (5) మన జీవితావసరాలను (వ. 126) ఆధారం చేసుకొని దేవుని సహాయాన్ని వేడుకోవాలి.

119:129-136 వెల్లడి అనే పదానికి “ద్వారం” లేక “ప్రవేశం” అని అక్షరార్థం (వ.130). ఆకలితో దప్పికతో ఉన్న జంతువు నోరు తెరచి ఒగర్చినట్టుగా కీర్తనకారుడు దేవుని ఆజ్ఞల పట్ల ఆసక్తితో ఒగర్చుతున్నాడు (వ.131). కొన్నిసార్లు కీర్తనకారుడు దేవునికి లోబడనివారి మీద ధర్మాగ్రహాన్ని చూపించినప్పటికీ (వ.53,126,139,158), ఇక్కడ విచారం వ్యక్తం చేస్తున్నాడు (వ.136; మత్తయి 23:37; లూకా 19:41; అపొ.కా.20:31: రోమా 9:2-3; ఫిలిప్పీ 3:18). 

119:137-144 వ.138 ని వ.19:7తో పోల్చి చూడండి. వ.140 ని 19:9తో పోల్చి చూడండి. దేవుడు న్యాయాధిపతి అని కీర్తనకారుడు నొక్కి చెబుతున్నాడు.

119:145-152 కీర్తనకారుడు తనకు వ్యతిరేకంగా దుష్ట ప్రణాళికలు వేస్తున్నవారిని ఎదుర్కొనడానికి దేవుని సహాయం కోరుకుంటూ ప్రార్థిస్తున్నాడు. కీర్తనకారుడు యెహోవా విశ్వాస్యతలో తన నమ్మకాన్ని నిశ్చయతను వ్యక్తం చేస్తున్నాడు. కీర్తనకారుని శత్రువులు అతనికి సమీపంలోనే ఉన్నా (నా
యొద్దకు సమీపించు చున్నారు), దేవుని ఆజ్ఞల్లో మనస్సు పెట్టని శత్రువుల నుండి (నీ ధర్మశాస్త్రమును త్రోసివేయు వారును) కీర్తనకారున్ని రక్షించడానికి యెహోవా సమీపముగా ఉన్నాడు (వ.150-151). 

119:153-160 కీర్తనకారుడు తాను దేవుని మీద ఆధారపడవలసిన అత్యావశ్యకతను గుర్తించినవాడై, దేవుడే తన ప్రాణాన్ని కాపాడాలని (బ్రదికింపుము) ప్రార్థిస్తున్నాడు. కీర్తనకారుడు భక్తిహీనుల మార్గాల్ని అసహ్యించుకుంటున్నాడు (వ. 159,158; వ.53తో పోల్చండి). 

119:161-168 దేవుని ధర్మశాస్త్రము లో నమ్మిక కలిగినవారి జీవితాల్లో నిండైన సమాధానం ఉంటుంది. కేవలం విధేయత చూపించడం కోసం కాక, దేవుని సన్నిధిలో సమృద్ధితో నిండిన జీవితాన్ని ఆస్వాదించడం కోసం ఆయన ఉపదేశములను తాను అనుసరించుచున్నాను అని కీర్తనకారుడు చెబుతున్నాడు (వ. 168),

119:169-176 తప్పిపోయిన గొర్రెలె నేను త్రోవ విడిచి తిరిగితిని. కీర్తనకారుడు తాను దేవుని నుండి దూరమయ్యానని గాని, ఆయన వాక్యాన్ని తిరస్కరించానని గాని చెప్పడం లేదు. ఎందుకంటే తాను ఆ విధంగా చేయలేదని అతడు ఈ కీర్తనలో పదేపదే చెప్పాడు. అతని ముగింపు మాటలలో నేను నీ ఆజ్ఞలను మరచువాడను కాను అని అన్నాడు. దేవుని వాక్యం వలన నడిపించబడుతున్నప్పటికీ తాను తప్పులో పడుతున్నానని కీర్తనకారుడు ఇక్కడ నిష్కపటంగా ఒప్పుకొంటున్నాడు. ధర్మశాస్త్రం పట్ల తన విశ్వాస్యతను దృఢంగా చెబుతూ, దేవుని జోక్యం పట్ల మనఃపూర్వకమైన విజ్ఞప్తి చేస్తూ, కీర్తనకారుడు దైవస్తుతులతో కీర్తనను ముగిస్తున్నాడు. 


Shortcut Links
కీర్తనల గ్రంథము - Psalms : 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 | 49 | 50 | 51 | 52 | 53 | 54 | 55 | 56 | 57 | 58 | 59 | 60 | 61 | 62 | 63 | 64 | 65 | 66 | 67 | 68 | 69 | 70 | 71 | 72 | 73 | 74 | 75 | 76 | 77 | 78 | 79 | 80 | 81 | 82 | 83 | 84 | 85 | 86 | 87 | 88 | 89 | 90 | 91 | 92 | 93 | 94 | 95 | 96 | 97 | 98 | 99 | 100 | 101 | 102 | 103 | 104 | 105 | 106 | 107 | 108 | 109 | 110 | 111 | 112 | 113 | 114 | 115 | 116 | 117 | 118 | 119 | 120 | 121 | 122 | 123 | 124 | 125 | 126 | 127 | 128 | 129 | 130 | 131 | 132 | 133 | 134 | 135 | 136 | 137 | 138 | 139 | 140 | 141 | 142 | 143 | 144 | 145 | 146 | 147 | 148 | 149 | 150 |
ఆదికాండము - Genesis | నిర్గమకాండము - Exodus | లేవీయకాండము - Leviticus | సంఖ్యాకాండము - Numbers | ద్వితీయోపదేశకాండము - Deuteronomy | యెహోషువ - Joshua | న్యాయాధిపతులు - Judges | రూతు - Ruth | 1 సమూయేలు - 1 Samuel | 2 సమూయేలు - 2 Samuel | 1 రాజులు - 1 Kings | 2 రాజులు - 2 Kings | 1 దినవృత్తాంతములు - 1 Chronicles | 2 దినవృత్తాంతములు - 2 Chronicles | ఎజ్రా - Ezra | నెహెమ్యా - Nehemiah | ఎస్తేరు - Esther | యోబు - Job | కీర్తనల గ్రంథము - Psalms | సామెతలు - Proverbs | ప్రసంగి - Ecclesiastes | పరమగీతము - Song of Solomon | యెషయా - Isaiah | యిర్మియా - Jeremiah | విలాపవాక్యములు - Lamentations | యెహెఙ్కేలు - Ezekiel | దానియేలు - Daniel | హోషేయ - Hosea | యోవేలు - Joel | ఆమోసు - Amos | ఓబద్యా - Obadiah | యోనా - Jonah | మీకా - Micah | నహూము - Nahum | హబక్కూకు - Habakkuk | జెఫన్యా - Zephaniah | హగ్గయి - Haggai | జెకర్యా - Zechariah | మలాకీ - Malachi | మత్తయి - Matthew | మార్కు - Mark | లూకా - Luke | యోహాను - John | అపో. కార్యములు - Acts | రోమీయులకు - Romans | 1 కోరింథీయులకు - 1 Corinthians | 2 కోరింథీయులకు - 2 Corinthians | గలతియులకు - Galatians | ఎఫెసీయులకు - Ephesians | ఫిలిప్పీయులకు - Philippians | కొలొస్సయులకు - Colossians | 1 థెస్సలొనీకయులకు - 1 Thessalonians | 2 థెస్సలొనీకయులకు - 2 Thessalonians | 1 తిమోతికి - 1 Timothy | 2 తిమోతికి - 2 Timothy | తీతుకు - Titus | ఫిలేమోనుకు - Philemon | హెబ్రీయులకు - Hebrews | యాకోబు - James | 1 పేతురు - 1 Peter | 2 పేతురు - 2 Peter | 1 యోహాను - 1 John | 2 యోహాను - 2 John | 3 యోహాను - 3 John | యూదా - Judah | ప్రకటన గ్రంథం - Revelation |

Explore Parallel Bibles
21st Century KJV | A Conservative Version | American King James Version (1999) | American Standard Version (1901) | Amplified Bible (1965) | Apostles' Bible Complete (2004) | Bengali Bible | Bible in Basic English (1964) | Bishop's Bible | Complementary English Version (1995) | Coverdale Bible (1535) | Easy to Read Revised Version (2005) | English Jubilee 2000 Bible (2000) | English Lo Parishuddha Grandham | English Standard Version (2001) | Geneva Bible (1599) | Hebrew Names Version | Hindi Bible | Holman Christian Standard Bible (2004) | Holy Bible Revised Version (1885) | Kannada Bible | King James Version (1769) | Literal Translation of Holy Bible (2000) | Malayalam Bible | Modern King James Version (1962) | New American Bible | New American Standard Bible (1995) | New Century Version (1991) | New English Translation (2005) | New International Reader's Version (1998) | New International Version (1984) (US) | New International Version (UK) | New King James Version (1982) | New Life Version (1969) | New Living Translation (1996) | New Revised Standard Version (1989) | Restored Name KJV | Revised Standard Version (1952) | Revised Version (1881-1885) | Revised Webster Update (1995) | Rotherhams Emphasized Bible (1902) | Tamil Bible | Telugu Bible (BSI) | Telugu Bible (WBTC) | The Complete Jewish Bible (1998) | The Darby Bible (1890) | The Douay-Rheims American Bible (1899) | The Message Bible (2002) | The New Jerusalem Bible | The Webster Bible (1833) | Third Millennium Bible (1998) | Today's English Version (Good News Bible) (1992) | Today's New International Version (2005) | Tyndale Bible (1534) | Tyndale-Rogers-Coverdale-Cranmer Bible (1537) | Updated Bible (2006) | Voice In Wilderness (2006) | World English Bible | Wycliffe Bible (1395) | Young's Literal Translation (1898) | Telugu Bible Verse by Verse Explanation | పరిశుద్ధ గ్రంథ వివరణ | Telugu Bible Commentary |