1. సమూయేలు వృద్ధుడైనప్పుడు తన కుమారులను ఇశ్రా యేలీయులమీద న్యాయాధిపతులుగా నియమించెను.

ద్వితీయోపదేశకాండము 1:16 ద్వితీయోపదేశకాండము 16:18-19. ఇస్రాయేల్‌వారికి న్యాయం తీర్చేందుకు శ్రమ, ప్రయాణాలు చేయలేనంతగా సమూయేలుకు వృద్ధాప్యం పైబడింది. అతడు చాలా గొప్పవాడు. దేవుడు అతన్ని ఎంతో వాడుకున్నాడు. అయితే ఇప్పుడు సమూయేలు గొప్ప పొరపాటు చేశాడు. తన కొడుకులు నాయకులుగా ఉండేందుకు యోగ్యులని అతడు యథార్థంగా ఎంచాడు. అయితే వారిలో ఆ యోగ్యత లేదు. అస్తమానమూ ప్రయాణాలు చేస్తూ దేవుని పరిచర్య జరిగించటం మూలంగా సమూయేలు తన కొడుకులను పెంచవలసిన విధంగా పెంచలేకపోయాడేమో. దేవుని సేవలో ఉన్న ప్రతివాడూ తన పిల్లల గురించి జాగ్రత్త వహించాలి. తమ కుటుంబ సభ్యుల గుణాలను అర్థం చేసుకోగలిగే జ్ఞానం కోసం ప్రార్థించాలి.

2. అతని జ్యేష్ఠకుమారుని పేరు యోవేలు; రెండవవాని పేరు అబీయా,

3. వీరు బెయేర్షెబాలో న్యాయాధిపతులుగా ఉండిరి. అతని కుమారులు అతని ప్రవర్తనను అనుసరింపక, ధనాపేక్షకులై లంచములు పుచ్చుకొని న్యాయమును త్రిప్పివేయగా

ప్రజలు తమకు రాజు కావాలని కోరుకోవడానికి కొంతవరకు కారణం సమూయేలు కొడుకుల అయోగ్యత, అయితే ఈ సందర్భంలో యెహోవా పట్ల ప్రజలు విశ్వసనీయత చూపనందుకు సాకు లేదు. అయితే సమూయేలు కొడుకుల్లాంటి వ్యక్తుల ప్రభావం ఇతరులపై ఎంతగా పడుతుందో మనం గ్రహించాలి. “తీరు”– దేవుని ప్రజల పై నాయకత్వం వహించడంలో తమ తండ్రుల నుండి తమ బాధ్యతను వరసగా స్వీకరించిన కొడుకులు అనేక సార్లు ఎలా తప్పిపోయారో పాత ఒడంబడికలో కనిపిస్తాయి. గిద్యోను, అబీమెలెకు (న్యాయాధిపతులు 8:28-35 న్యాయాధిపతులు 9:1); ఏలీ, అతని కొడుకులు (1 సమూయేలు 2:12); సమూయేలు, అతని కొడుకులు; దావీదు అతని కొడుకులు (2 సమూయేలు 15:12 1 రాజులు 1:5); సొలొమోను, రెహబాం (1 రాజులు 11:43) మొ।।. న్యాయాధిపతులూ నాయకులూ ఎలా ఉండాలో అందుకు వ్యతిరేకులు వీళ్ళు (నిర్గమకాండము 23:6-8 ద్వితీయోపదేశకాండము 16:19 కీర్తనల గ్రంథము 15:5 కీర్తనల గ్రంథము 82:1-8). సమూయేలు కొడుకుల్లాంటి కొందరు వ్యక్తులకు అధికారం దొరికితే ఘోరంగా తప్పిపోతారు. భ్రష్టత్వం, అవినీతి, అత్యాశ అనే దుష్ ప్రేరణకు లొంగిపోతారు.

4. ఇశ్రాయేలీయుల పెద్దలందరు కూడి రామాలో సమూయేలునొద్దకు వచ్చి

5. చిత్తగించుము, నీవు వృద్ధుడవు, నీ కుమారులు నీ ప్రవర్తనవంటి ప్రవర్తన గలవారు కారు గనుక, సకలజనుల మర్యాదచొప్పున మాకు ఒక రాజును నియమింపుము, అతడు మాకు న్యాయము తీర్చునని అతనితో అనిరి.
అపో. కార్యములు 13:21

తమకు ఓ రాజు కావాలని వారి కోరిక. ఇస్రాయేల్ రాజ్యాన్ని స్థాపించడం మనకు ఎన్నో ప్రాముఖ్యమైన సంగతులను నేర్పుతున్నవి. (1) రాచరిక వ్యవస్థ దేవుడు నియమించిన ఆదర్శం కాదు. నిజానికి అది దేవుని పట్ల చూపిన నిరాకార భావానికి గుర్తుగా ఉంది. (2) వారు కోరిన ప్రకారం దేవుడు జరిగించాడు. తానే వారి రాజును ఎంపిక చేసి పెట్టాడు కూడా. దేవుడు తన సంకల్పాన్ని మన నెత్తిపై రుద్దడు. మన ఇష్టం వచ్చినట్టు జరిగించనియ్య వచ్చు. కానీ మనకు ఏ ఆశీర్వాదాలు కలగాలని ఆయన కోరుతాడో అలాంటి ప్రవర్తన వాటిని మనకు తెచ్చిపెట్టవు. కీర్తనల గ్రంథము 78:29-31 కీర్తనల గ్రంథము 106:15 పోల్చిచూడండి. (3) తమ ఇష్టానుసారంగా చేసినందుకు కొంత నష్టపోవలసి వచ్చింది. వారి కోరిక ఎటు దారితీస్తుందో దేవుడు వారిని హెచ్చరించాడు కూడా. కానీ వారు వినలేదు (9-19 వ). (4) వారు తప్పు చేసినా దేవుడు తన కృపను వారినుంచి తొలగించలేదు. దేవుని ప్రజలు తప్పు దారి పట్టిన సమయాలలో కూడా తన కృప కొద్దీ ఆయన వారిని దీవించవచ్చు. దేవుని దీవెనలకు మూలాధారం ఆయన కృపే. వారు మూర్ఖంగా తమ దారి తామే చూసుకున్నప్పటికీ ఆయన వారిని విడిచిపెట్టెయ్యడు. (5) నిజానికి తన ప్రజలకు రాజులుండాలని మొదట దేవుడు నియమించకపోయినా, తరువాత దావీదు, హిజ్కియా, యోషియా మొదలైన రాజుల ద్వారా తన కృప ప్రకారం తన కార్యాలు జరిగించాడు. (6) దేవుని కృప వల్ల ఇస్రాయేల్ రాజ్యం కొంతవరకు దేవుని రాజ్యానికి సూచనగానూ, దాని రాజులు రాజైన యేసుప్రభువుకు సూచనగాను అయ్యారు (2 సమూయేలు 7:12-16 కీర్తనల గ్రంథము 2:7 కీర్తనల గ్రంథము 45:1 కీర్తనల గ్రంథము 45:6 కీర్తనల గ్రంథము 89:33-37 యెషయా 9:6-7 మత్తయి 1:1 మత్తయి 2:2 లూకా 1:32-33 ప్రకటన గ్రంథం 3:21 ప్రకటన గ్రంథం 19:11-16). చరిత్ర నేర్పే పాఠాలను ఇస్రాయేల్‌వారు నేర్చుకోవడానికి నిరాకరించారు. భద్రత లేకపోవడం, ఓటమి ఇవన్నీ వారి పాపం, దేవుని అధికారం పట్ల వారి తృణీకార భావం వల్లే. అయితే వారు సమూయేలు వృద్ధాప్యాన్నీ, అతని కొడుకుల దుర్గుణాలనూ అందుకు కారణాలుగా చెప్పుతున్నారు. ఇతర దేశాలకు ఉన్నట్టుగా స్థిరమైన మానవాధికారం తమ సమస్యలన్నింటికీ పరిష్కార మార్గం అనుకున్నారు (వ 20). అయితే ఇతర దేశాలలాగానే తమకూ కావాలని వారు కోరుకోవడం గొప్ప పొరపాటు, పాపం (వ 7; హోషేయ 13:10-11). దేవుని ప్రజలు ప్రత్యేకంగా లోకంలోని ఏ ఇతర జనంతోనూ పోలిక లేనివారుగా, అతీతులుగా, పవిత్రులుగా ఉండాలి (నిర్గమకాండము 19:5-6). ఇప్పటి విశ్వాసుల విషయంలోనూ ఇదే సత్యం (1 పేతురు 2:9). దేవుణ్ణెరుగని ఇతర ప్రజల్లాగా మేమూ ఉండాలని వారు కోరుకునేందుకు వీలులేదు.

6. మాకు న్యాయము తీర్చుటకై రాజును నియమింపుమని వారు అనిన మాట సమూయేలు దృష్టికి ప్రతికూలముగా ఉండెను గనుక సమూయేలు యెహోవాను ప్రార్థనచేసెను.

7. అందుకు యెహోవా సమూయేలునకు సెలవిచ్చినదేమనగాజనులు నీతో చెప్పిన మాటలన్నిటి ప్రకారము జరిగింపుము; వారు నిన్ను విసర్జింపలేదుగాని తమ్మును ఏలకుండ నన్నే విసర్జించి యున్నారు.

1 సమూయేలు 10:19. అప్పటిదాకా ఇస్రాయేల్‌వారిలో రాజు దేవుడే (1 సమూయేలు 12:12). సర్వ శ్రేష్ఠమైన ప్రభుత్వ వ్యవస్థ వారిది. అది ప్రజాప్రభుత్వం గానీ కులీన పాలన గానీ ధనవంతుల పాలన గానీ ఏకరాజాధిపత్యం గానీ సామాన్యుల నియంతృత్వం గానీ కాదు. దేవుడే రాజుగా పరిపాలించే పద్ధతి వారికి ఉండేది. ఈ వ్యవస్థ విఫలమైంది. కారణం? దేవుడు సమర్థవంతుడైన పరిపూర్ణ పాలకుడు కాకపోవటం వల్ల కాదు. ప్రజలు అస్తమానం ఆయన శాసనాలను ధిక్కరిస్తూ ఆయన అధికారాన్ని తిరస్కరించారు. అనేక మార్లు అరాచరికంలోకి దిగారు (న్యాయాధిపతులు 21:25). ఇక్కడైతే ఇస్రాయేల్ దైవ పరిపాలనను పూర్తిగా విసర్జించారు. వ్యక్తులుగా మనం కూడా ఇదే పని చేయకుండా జాగ్రత్తపడాలి.

8. వారు నన్ను విసర్జించి, యితర దేవతలను పూజించి, నేను ఐగుప్తులోనుండి వారిని రప్పించిన నాటి నుండి నేటివరకు తాము చేయుచువచ్చిన కార్యములన్నిటి ప్రకారముగా వారు నీయెడలను జరిగించుచున్నారు; వారు చెప్పిన మాటలను అంగీకరించుము.

9. అయితే వారిని ఏలబోవు రాజు ఎట్టివాడగునో నీవే సాక్షివై వారికి దృఢముగా తెలియజేయుము.

తన ప్రజలు మంచి దారిని విడిచిపెడుతుంటే దేవుడే హెచ్చరించకుండా వారిని పోనియ్యడు.

10. సమూయేలు తనను, రాజును అడిగిన జనులకు యెహోవా మాటలన్ని వినిపించి

11. ఈలాగున చెప్పెనుమిమ్మును ఏలబోవు రాజు ఎట్టివాడగుననగా, అతడు మీ కుమారులను పట్టుకొని, తన రథములను తోలుటకును తన గుఱ్ఱములను కాపాడుటకును వారిని ఉంచుకొనును, కొందరు అతని రథముల ముందర పరగెత్తుదురు.

1 సమూయేలు 14:52 2 దినవృత్తాంతములు 1:14.

12. మరియు అతడు వారిని తన సైన్యములో సహస్రాధిపతులుగాను పంచదశాధిపతులుగాను నియమించును; తన భూములను దున్నుటకును వాటి పంటను కోయుటకును తన యుద్ధా యుధములను తన రథముల సామానులను చేయుటకును వారిని ఏర్పరచుకొనును.

1 సమూయేలు 22:7.

13. మీ కుమార్తెలను భక్ష్యకారిణులుగాను బోనకత్తెలుగాను రొట్టెలు కాల్చువారిని గాను పెట్టుకొనును.

14. మీ పొలములలోను మీ ద్రాక్షతోటలలోను ఒలీవతోటలలోను శ్రేష్ఠమైనవాటిని తీసికొని తన సేవకులకిచ్చును.

1 రాజులు 21:7 1 రాజులు 21:15 మీకా 2:2.

15. మీ ధాన్యములోను ద్రాక్ష పండ్లలోను పదియవ భాగము తీసి తన పరివారజనమునకును సేవకులకును ఇచ్చును.

1 సమూయేలు 17:25.

16. మీ దాసులను మీ పనికత్తెలను మీ పశువులలోను గార్దభములలోను శ్రేష్ఠమైన వాటిని పట్టుకొని తన పనికొరకు ఉంచుకొనును.

17. మీ మందలో పదియవభాగము పట్టుకొనును, మీమట్టుకు మీరు అతనికి దాసులవుదురు.

18. ఆ దినమున మీరు కోరు కొనిన రాజునుబట్టి మీరు మొఱ్ఱపెట్టినను యెహోవా మీ మొఱ్ఱవినక పోవును అనెను.

పాప సహితమైన తెలివి తక్కువ కోరికవల్ల వచ్చే ఫలితాలను వారు అనుభవించాలని దేవుడు నిర్ణయించాడు. గలతియులకు 6:7 చూడండి. మన ఇష్టం వచ్చినట్టు చేస్తామని పట్టుబట్టి, అందువల్ల కలిగే దుఃఖకరమైన ఫలితాల నుంచి దేవుడే మనల్ని కాపాడాలని చూడడం అవివేకం.

19. అయినను జనులు సమూయేలు యొక్క మాట చెవిని బెట్టనొల్లకఆలాగున కాదు,
అపో. కార్యములు 13:21

20. జనములు చేయురీతిని మేమును చేయునట్లుమాకు రాజుకావలెను, మా రాజు మాకు న్యాయము తీర్చును, మా ముందర పోవుచు అతడే మా యుద్ధములను జరిగించుననిరి.

“యుద్ధాలలో”– కానీ యెహోషువ 5:14 యెహోషువ 10:14 యెహోషువ 10:42 యెహోషువ 23:3 చూడండి! ఆత్మసంబంధమైన విషయాల గురించి రోమీయులకు 8:31 1 కోరింథీయులకు 15:57 గలతియులకు 3:3 చూడండి.

21. సమూయేలు జనులయొక్క మాటలన్నిటిని విని యెహోవా సన్ని ధిని వాటిని వివరించెను

22. గనుక యెహోవానీవు వారి మాటలు విని వారికి ఒక రాజును నియమించుమని సమూయేలునకు సెలవియ్యగా సమూయేలుమీరందరు మీ మీ గ్రామములకు పొండని ఇశ్రాయేలీయులకు సెలవిచ్చెను.

1 సమూయేలు 8:7 హోషేయ 13:11.