1. అటుతరువాత భూమియొక్క నాలుగు దిక్కులలో నలుగురు దేవదూతలు నిలిచియుండి, భూమిమీదనైనను సముద్రముమీదనైనను ఏ చెట్టుమీదనైనను గాలి వీచ కుండునట్లు భూమియొక్క నాలుగు దిక్కుల వాయువులను పట్టుకొనియుండగా చూచితిని.
యిర్మియా 49:36, యెహెఙ్కేలు 7:2, యెహెఙ్కేలు 37:9, దానియేలు 7:2, జెకర్యా 6:5

ఇంతవరకూ ముద్రల విషయం అంతరాయం లేకుండా క్రమంగా సాగుతూ వచ్చింది. ఇప్పుడు ఒక విరామం వచ్చింది. గొర్రెపిల్ల ఏడో ముద్ర విప్పకముందు కథనంలో నడుమ కనిపిస్తున్న మాటలు ఉన్నాయి. ఆరు ముద్రలు విప్పినప్పుడు, జరగబోయే విషయాలను మరింత బాగా అర్థం చేసుకొనేలా యోహానుకు ఇక్కడ కొన్ని దర్శనాలిచ్చాడు యేసుప్రభువు. ఇవి వివరణ కోసమైన దర్శనాలు అనవచ్చు. ఇలాంటి వివరణ దర్శనాలు ఈ గ్రంథంలో మరి కొన్ని చోట్ల కనిపిస్తున్నాయి – ప్రకటన గ్రంథం 10:1-11; ప్రకటన గ్రంథం 12:1-18; ప్రకటన గ్రంథం 17:1-18 ప్రకటన గ్రంథం 19:1-11. ముద్రలూ బూరలూ పాత్రలూ ఒకదాని తరువాత ఒకటి అంతం వరకు పరిపూర్ణమైన వరుస క్రమంలో కథను తీసుకుపోతాయని స్పష్టంగా ఉన్నట్టు చూడవచ్చు. అక్కడక్కడ మధ్యలో వచ్చిన ఈ వివరణ దర్శనాలు మునుపు జరిగిపోయిన సంగతుల గురించి కూడా ఉండవచ్చు. రాబోయే సంగతుల గురించి ఉండవచ్చు. అవి ముద్రలు, బూరలు, పాత్రలు అనుసరించిన వరుస క్రమాన్ని అనుసరించవన్నమాట. సాధారణంగా అవి వెనక్కు చూస్తూ వాటికి మునుపటి అధ్యాయాల విషయాలను స్పష్టం చేసేందుకు తోడ్పడుతున్నాయి. ఈ నోట్స్ రచయిత అభిప్రాయం ఇది. ఈ అభిప్రాయంతో ప్రతి బైబిలు విద్వాంసుడూ, ప్రతి వ్యాఖ్యానకర్తా సమ్మతించడు. ఈ అధ్యాయంలోని దర్శనాలు ముందరి అధ్యాయంలోని సంఘటనలతో సంబంధం గలవి. ఈ భాగంలో రెండు ప్రత్యేకమైన గుంపులు కనిపిస్తున్నాయి. ఒకటి ఈ లోకంలో ఉంది, మరొకటి పరలోకంలో ఉంది. మొదటి గుంపులో ఉన్నవారి సంఖ్య మితమైనది, రెండో గుంపులో ఉన్నవారిని ఏ మనిషీ లెక్క పెట్టడానికి వీలుండదు. మొదటి గుంపు సంగతి ఆరు ముద్రలు విప్పబడిన తరువాత జరగబోయే సంఘటన. రెండో గుంపు విషయం మొదటి అయిదు ముద్రల కింద జరిగిన సంఘటనలకు సంబంధించినది. మొదటి గుంపు ఏడో ముద్ర కింద జరగబోయే తీర్పులనుంచి కాపాడబడుతుంది. రెండో గుంపువారు ఆరో ముద్ర విప్పబడకముందు జరిగే మహా బాధకాలంలో నుంచి వచ్చేవారు. “నాలుగు దిక్కుల గాలులు”– ఇవి పాపాత్ములను శిక్షించడానికి దేవుడు పంపబోయే నాశనకరమైన శక్తులను సూచిస్తున్నాయి. యిర్మియా 49:36-38 చూడండి.

2. మరియు సజీవుడగు దేవుని ముద్రగల వేరొక దూత సూర్యోదయ దిశనుండి పైకి వచ్చుట చూచితిని. భూమికిని సముద్రమునకును హాని కలుగజేయుటకై అధికారముపొందిన ఆ నలుగురు దూతలతో

“దేవుని ముద్ర”– ఈ ముద్ర పడినవారు ప్రత్యేకమైన రీతిలో దేవుని సొంతవారన్నమాట (2 కోరింథీయులకు 1:21-22; ఎఫెసీయులకు 1:13 పోల్చి చూడండి). ఈ గుంపులోని వారి మీద ముద్ర వేయడం అంటే వారు దేవుని ప్రజలై రాబోయే తీర్పులు, విపత్తుల సమయంలో కాపాడబడతారని అర్థం. యెహెఙ్కేలు 9:3-6 పోల్చి చూడండి.

3. ఈ దూత మేము మా దేవుని దాసులను వారి నొసళ్లయందు ముద్రించువరకు భూమికైనను సముద్రమునకైనను చెట్లకైనను హాని చేయవద్దని బిగ్గరగా చెప్పెను.
యెహెఙ్కేలు 9:4

4. మరియు ముద్రింపబడినవారి లెక్క చెప్పగా వింటిని. ఇశ్రాయేలీయుల గోత్రములన్నిటిలో ముద్రింప బడినవారు లక్ష నలువది నాలుగు వేలమంది.

ఈ యుగాంతంలో దేవుని ముద్ర పడబోయే “దేవుని దాసులు” (వ 3) ఇస్రాయేల్ జాతివారే. ఇక్కడ ఇస్రాయేల్ గోత్రాల జాబితా ఉంది. బైబిల్లో ఇదివరకు ఆ గోత్రాల జాబితాలు దాదాపు 30 ఉన్నాయి. అవన్నీ అక్షరాలా ఇస్రాయేల్ జాతిని సూచిస్తున్నాయి. ఈ ఒక్క జాబితాలోని వారు మాత్రం ఇస్రాయేల్‌వారు కాదు అని ఎవరైనా ఎలా అనగలరు? దేవుని వాక్కును బట్టి చూస్తే ఇస్రాయేల్ ప్రజలు ఒక జాతిగా ఈ యుగాంతంలో దేవుని వైపుకు తిరిగి, క్రీస్తును అంగీకరిస్తారని కనిపిస్తుంది. ఇప్పుడు వారు క్రీస్తును తమ అభిషిక్తుడుగా రక్షకుడుగా నిరాకరిస్తూ అపనమ్మకంతో ఉన్నారు. కానీ యుగాంతంలో అదంతా మారిపోతుంది. రోమీయులకు 11:11, రోమీయులకు 11:25-32; యిర్మియా 25:5-8; యిర్మియా 31:31-37; యిర్మియా 32:37-40; యెహెఙ్కేలు 20:40-44; యెహెఙ్కేలు 37:21-28; దానియేలు 12:1; హోషేయ 3:4-5; జెకర్యా 10:10-12; జెకర్యా 12:9-14; జెకర్యా 13:1, జెకర్యా 13:9 చూడండి. 144,000 అనే సంఖ్య (వ 4) బహుశా సంపూర్ణతను సూచించే సంకేత సంఖ్య కావచ్చు. 144,000 అంటే 12×12×1000. బైబిల్లో 12 సంపూర్ణతను సూచించే సంఖ్య – పన్నెండు గోత్రాలు, పన్నెండుమంది క్రీస్తురాయబారులు, పన్నెండు ద్వారాలు (ప్రకటన గ్రంథం 21:12), పన్నెండు పునాదులు (ప్రకటన గ్రంథం 21:14), పన్నెండు కాపులు (ప్రకటన గ్రంథం 22:2). 1000 అంటే 10×10×10 – మూడు పరిమాణాలు సమానంగా ఉన్నది. ఇది కూడా సంపూర్ణతను సూచించవచ్చు. 144,000 యూదులంటే సంపూర్ణమైన ఇస్రాయేల్ జాతిని సూచించవచ్చు. లేదా, 144,000 – మితంగా ఉన్న కొంచెం పెద్ద సమూహాన్ని సూచించవచ్చు. ఇలాంటి సంఖ్యల విషయాల్లో సందేహానికి తావుంది. వీటిని గురించి బల్లగుద్ది చెప్పడం తగదు.

5. యూదా గోత్రములో ముద్రింపబడినవారు పండ్రెండువేలమంది. రూబేను గోత్రములో పండ్రెండు వేలమంది, గాదు గోత్రములో పండ్రెండు వేలమంది,

6. ఆషేరు గోత్రములో పండ్రెండు వేలమంది, నఫ్తాలి గోత్రములో పండ్రెండు వేలమంది, మనష్షే గోత్రములో పండ్రెండు వేలమంది,

7. షిమ్యోను గోత్రములో పండ్రెండు వేలమంది, లేవి గోత్రములో పండ్రెండు వేలమంది, ఇశ్శాఖారు గోత్రములో పండ్రెండు వేలమంది,

8. జెబూలూను గోత్రములో పండ్రెండు వేలమంది, యోసేపు గోత్రములో పండ్రెండు వేలమంది, బెన్యామీను గోత్రములో పండ్రెండు వేలమంది ముద్రింపబడిరి.

“యోసేపు”– మనష్షే (వ 6) యోసేపు కుమారుడు. ఎఫ్రాయిం అతని తమ్ముడు. ఎఫ్రాయిం ఈ జాబితాలో లేడు గనుక యోసేపు అతనికి బదులుగా ఉన్నాడనుకోవచ్చు. దాను గోత్రం ఈ జాబితాలో కనబడదు.

9. అటు తరువాత నేను చూడగా, ఇదిగో, ప్రతి జనములోనుండియు ప్రతి వంశములోనుండియు ప్రజలలోనుండియు, ఆయా భాషలు మాటలాడువారిలో నుండియు వచ్చి, యెవడును లెక్కింపజాలని యొక గొప్ప సమూహము కనబడెను. వారు తెల్లని వస్త్రములు ధరించుకొన్నవారై, ఖర్జూరపుమట్టలు చేతపట్టుకొని సింహాసనము ఎదుటను గొఱ్ఱెపిల్లయెదుటను నిలువబడి

ఈ గొప్ప జనసమూహం వ 4లోని 144,000 ఉన్న గుంపుకు భిన్నంగా ఉంది. ఆ గుంపువారు ఇస్రాయేల్ పన్నెండు గోత్రాలవారు. ఈ సమూహంలో భూలోకంలోని ప్రతి జాతిలో నుంచీ ప్రతి దేశంలో నుంచీ వచ్చినవారు ఉన్నారు. వారి సంఖ్య పరిమితం. వీరి సంఖ్య లెక్కించ వీలు లేనంత పెద్దది. “సింహాసనం ఎదుట”– ప్రకటన గ్రంథం 4:2. వారు పరలోకంలో ఉన్నారన్నమాట. “అన్నీ జాతుల...భాష”– ప్రకటన గ్రంథం 5:9; ప్రకటన గ్రంథం 10:11; ప్రకటన గ్రంథం 11:9; ప్రకటన గ్రంథం 13:7; ప్రకటన గ్రంథం 14:6; ప్రకటన గ్రంథం 17:15. ఈ యుగాంతానికి ముందు క్రీస్తు శుభవార్త ప్రకటన భూలోకం ప్రతి మారుమూలలో జరుగుతుందని ఇది రుజువు. మత్తయి 24:14 పోల్చి చూడండి. “తెల్లని నిలువుటంగీలు”– ప్రకటన గ్రంథం 6:11. “మట్టలు”– లేవీయకాండము 23:40; యోహాను 12:13. ఇవి ఆనందానికీ స్తుతికీ సూచనగా ఉన్నాయి.

10. సింహాసనాసీనుడైన మా దేవునికిని గొఱ్ఱెపిల్లకును మా రక్షణకై స్తోత్రమని మహాశబ్దముతో ఎలుగెత్తి చెప్పిరి.
1 రాజులు 22:19, 2 దినవృత్తాంతములు 18:18, కీర్తనల గ్రంథము 47:8, యెషయా 6:1, యెహెఙ్కేలు 1:26-27

“రక్షణ (విముక్తి)”– ప్రకటన గ్రంథం 19:1; కీర్తనల గ్రంథము 3:8; కీర్తనల గ్రంథము 37:39; కీర్తనల గ్రంథము 62:1; యెషయా 43:11; యోనా 3:9; రోమీయులకు 1:16; ఎఫెసీయులకు 2:8-9. “గొర్రెపిల్లకూ”– ప్రకటన గ్రంథం 5:13; ప్రకటన గ్రంథం 14:4; ప్రకటన గ్రంథం 22:1, ప్రకటన గ్రంథం 22:3.

11. దేవదూతలందరును సింహాసనముచుట్టును పెద్దలచుట్టును ఆ నాలుగు జీవులచుట్టును నిలువబడియుండిరి. వారు సింహాసనము ఎదుట సాష్టాంగపడి ఆమేన్‌;

“పెద్దల...ప్రాణుల”– ప్రకటన గ్రంథం 4:4, ప్రకటన గ్రంథం 4:6-8. “సాష్టాంగపడి”– ప్రకటన గ్రంథం 5:8.

12. యుగయుగములవరకు మా దేవునికి స్తోత్రమును మహిమయు జ్ఞానమును కృతజ్ఞతా స్తుతియు ఘనతయు శక్తియు బలమును కలుగును గాకని చెప్పుచు దేవునికి నమస్కారము చేసిరి; ఆమేన్‌.

ప్రకటన గ్రంథం 5:12 పోల్చి చూడండి. “తథాస్తు”– ప్రకటన గ్రంథం 1:6. “కృతజ్ఞతలు”– లేవీయకాండము 7:12-13; కీర్తనల గ్రంథము 7:17; ఎఫెసీయులకు 5:20; 1 థెస్సలొనీకయులకు 5:18 చూడండి.

13. పెద్దలలో ఒకడుతెల్లని వస్త్రములు ధరించుకొనియున్న వీరెవరు? ఎక్కడనుండి వచ్చిరని నన్ను అడిగెను.

14. అందుకు నేను అయ్యా, నీకే తెలియుననగా అతడు ఈలాగు నాతో చెప్పెను వీరు మహాశ్రమలనుండి వచ్చిన వారు; గొఱ్ఱెపిల్ల రక్తములో తమ వస్త్రములను ఉదుకుకొని వాటిని తెలుపుచేసికొనిరి.
ఆదికాండము 49:11, దానియేలు 12:1

“మహా బాధ కాలం”– మత్తయి 24:21; దానియేలు 12:1 చూడండి. ఇది ఈ యుగాంత సమయంలో జరగబోయే అసాధారణమైన కష్ట కాలాన్ని సూచిస్తున్నది. ఈ లోకంలో విశ్వాసులకు సాధారణంగా ఎదురయ్యే కష్టాల్లాంటివే మహా బాధ కాలంలో ఉంటాయి (యోహాను 16:32; అపో. కార్యములు 14:22; 1 థెస్సలొనీకయులకు 3:3-4; 1 పేతురు 4:12-13), గాని అవి మరింత కఠినంగా విస్తారంగా ఉంటాయి (ప్రకటన గ్రంథం 13:7-8). “లో నుంచి వచ్చిన” అంటే ఆ కష్టాలను అనుభవించకుండా తప్పించుకోవడం కాదు. ప్రకటన గ్రంథం 13:7, ప్రకటన గ్రంథం 13:15 ను బట్టి చూస్తే వారు తమ విశ్వాసం కారణంగా హత్యకు గురి కావడం ద్వారా ఆ కష్టాలలో నుంచి వస్తారు. “రక్తంలో...తెల్లగా చేసుకొన్నారు”– ప్రకటన గ్రంథం 22:14. వీరి విశ్వాసం క్రీస్తు శుభవార్తలోనే. 1 యోహాను 1:7 పోల్చి చూడండి.

15. అందువలన వారు దేవుని సింహాసనము ఎదుట ఉండి రాత్రింబగళ్లు ఆయన ఆలయములో ఆయనను సేవించుచున్నారు. సింహాసనాసీనుడైన వాడు తానే తన గుడారము వారిమీద కప్పును;
1 రాజులు 22:19, 2 దినవృత్తాంతములు 18:18, కీర్తనల గ్రంథము 47:8, యెహెఙ్కేలు 1:26-27

“ఆలయం”– ఇలా అనువాదం చేసిన గ్రీకు పదానికి దేవాలయంలోని గర్భగృహం, అతి పవిత్ర స్థలం అని అర్థం. నిర్గమకాండము 26:31-35; హెబ్రీయులకు 9:3. పరలోకంలోని ఈ దేవాలయంలో విశ్వాసులు చేసే సేవ వారు దేవుని యాజులని తెలియజేస్తున్నది (ప్రకటన గ్రంథం 1:6; 1 పేతురు 2:5, 1 పేతురు 2:9). వారు ఇప్పుడు చేసే స్తుతి యజ్ఞం (హెబ్రీయులకు 13:15) వారు పరలోకానికి చేరిన తరువాత ఆగిపోదు. “సేవ”– ప్రకటన గ్రంథం 22:3. విశ్వాసులు ఈ లోకాన్ని విడిచి పరలోకానికి పోయినప్పుడు వారి సేవ ముగియదు. అక్కడ వారి సేవ అధికం అవుతుంది. పరలోకంలో నిద్ర అంటూ ఉండదు. వారు “రాత్రింబగళ్ళు” సేవ చేయగలుగుతారు. “తన గుడారం కప్పుతాడు”– దేవుడూ విశ్వాసులూ కలిసి అతి సన్నిహిత సహవాసంతో నివసిస్తారని ఇది సూచిస్తుంది. ఎలాంటి హాని అయినా తేగలిగే ప్రతిదాని నుంచీ (వ 16) విశ్వాసులను దేవుడు కాపాడుతాడని కూడా సూచిస్తున్నది. ప్రకటన గ్రంథం 21:3; నిర్గమకాండము 25:8 పోల్చి చూడండి.

16. వారికి ఇకమీదట ఆకలియైనను దాహమైనను ఉండదు, సూర్యుని యెండయైనను ఏ వడగాలియైనను వారికి తగులదు,
యెషయా 49:10

“ఆకలి...ఉండదు”– యెషయా 49:10; యోహాను 4:13-14; యోహాను 6:35, యోహాను 6:38 పోల్చి చూడండి. మహా బాధ కాలంలో చాలామంది విశ్వాసులు ఆకలితో బాధపడతారు (ప్రకటన గ్రంథం 13:16-17). ఆ మాటకొస్తే ఈ యుగమంతట్లో అలాంటివారు ఉన్నారు (1 కోరింథీయులకు 4:11; 2 కోరింథీయులకు 6:5; 2 కోరింథీయులకు 11:27; లూకా 6:21). పరలోకంలో ఎలాంటి బాధలు ఉండవు. “తీవ్రమైన వేడి”– ప్రకటన గ్రంథం 16:8 పోల్చి చూడండి.

17. ఏలయనగా సింహాసన మధ్యమందుండు గొఱ్ఱెపిల్ల వారికి కాపరియై, జీవజలముల బుగ్గలయొద్దకు వారిని నడిపించును, దేవుడే వారి కన్నులనుండి ప్రతి బాష్పబిందువును తుడిచి వేయును.
కీర్తనల గ్రంథము 23:1, కీర్తనల గ్రంథము 23:2, యెషయా 25:8, యిర్మియా 2:13, యెహెఙ్కేలు 34:23, యెషయా 49:10

“సింహాసనం మధ్యన”– ప్రకటన గ్రంథం 5:6 నోట్. “కాపరి”– కీర్తనల గ్రంథము 23:1; యోహాను 10:11. విశ్వాసులు పరలోకానికి చేరిన తరువాత క్రీస్తు కాపరిగా చేస్తున్న పని అయిపోదు. ఆయన వారికి యుగయుగాలకు ఎప్పటికీ నాయకుడుగా కాపరిగా ఉంటాడు. “జీవ జలాల ఊటలు”– యోహాను 4:10; యోహాను 7:38-39. పరలోకంలో విశ్వాసులు సంతృప్తిగా ఉంటారు గానీ ఈ జలాలను తాగడం మానుకోరు. “నడిపిస్తాడు”– విశ్వాసులు ఈ లోకంలో ఉన్నప్పుడు ఆయనను అనుసరించారు (యోహాను 10:3-4, యోహాను 10:27). అక్కడ కూడా ఆయనను అనుసరిస్తారు. “కన్నీరంతా”– ఈ లోకంలో కన్నీళ్ళకు ఎన్నో కారణాలు ఉన్నాయి (2 రాజులు 20:1-3; యోబు 16:20; కీర్తనల గ్రంథము 6:6; కీర్తనల గ్రంథము 42:3; కీర్తనల గ్రంథము 56:8; కీర్తనల గ్రంథము 119:136; కీర్తనల గ్రంథము 126:5; యిర్మియా 9:1; మత్తయి 26:75; లూకా 7:38; లూకా 19:41-44; అపో. కార్యములు 20:19, అపో. కార్యములు 20:31; ఫిలిప్పీయులకు 3:18; 2 తిమోతికి 1:4). పరలోకంలో ఇలాంటి కారణాలు ఉండవు – ప్రకటన గ్రంథం 21:4; యెషయా 25:8; యెషయా 35:10.