1. మరియు నేను చూడగా, ఇదిగో, ఆ గొఱ్ఱెపిల్ల సీయోను పర్వతముమీద నిలువబడియుండెను. ఆయన నామమును ఆయన తండ్రి నామమును నొసళ్లయందు లిఖింపబడియున్న నూట నలువది నాలుగు వేలమంది ఆయనతో కూడ ఉండిరి.
యెహెఙ్కేలు 9:4

ముద్రలు, బూరలు, పాత్రల వరుస క్రమంలో వచ్చిన అంతరాయం ఇంకా అయిపోలేదు. కథనంలో నడుమ రాసిన మాటలు ఈ అధ్యాయంలో కూడా ఉన్నాయి. ఈ మాటలు కోప పాత్రలు పోయబడకముందు యుగాంతం గురించి ఇంకా కొన్ని విషయాలను తెలియజేస్తున్నాయి. ఈ అధ్యాయం చివర బూర ఊదడం జరిగే ముందున్న సమయంలో జరగబోయే సంఘటనల్ని చూపిస్తున్నది. “సీయోను పర్వతం”– ఇది ఇస్రాయేల్ లోని జెరుసలంను (2 సమూయేలు 5:6-9; కీర్తనల గ్రంథము 2:6; మత్తయి 23:37-39) సూచించవచ్చు. లేక పరలోకంలోని జెరుసలంను (గలతియులకు 4:25-26; హెబ్రీయులకు 12:22-24) సూచించవచ్చు. ఒకవేళ అది ఈ లోకంలోని జెరుసలంను సూచిస్తే ఈ సంఘటన క్రీస్తు ఈ లోకానికి తిరిగి వచ్చిన తరువాత జరుగుతుంది. కానీ అది పరలోకంలోని జెరుసలంను సూచించవచ్చు – వ 3 గమనించండి. “గొర్రెపిల్ల”– ప్రకటన గ్రంథం 5:6. “లక్ష నలభై నాలుగు వేలమంది”– “ఆ” అనే మాట ఇక్కడ లేదు. “ఆ” గొర్రెపిల్ల ఇక్కడ ఉంది– అంటే మునుపు కనిపించిన గొర్రెపిల్ల అన్నమాట. కానీ “ఆ” 144,000 ఇక్కడ లేదు గనుక వీరు ప్రకటన గ్రంథం 7:4-8 లోని వారే అని మనం ఖచ్చితంగా చెప్పలేము. “నొసళ్ళమీద...రాసి ఉన్నాయి”– వీరు దేవుని ప్రత్యేకమైన సొత్తు అనీ ఆయన లక్షణాలు కొంతవరకు వారిలో కనిపిస్తాయనీ అది అర్థమిస్తున్నది.

2. మరియు విస్తారమైన జలముల ధ్వనితోను గొప్ప ఉరుము ధ్వనితోను సమానమైన యొక శబ్దము పరలోకములోనుండి రాగా వింటిని. నేను వినిన ఆ శబ్దము వీణలు వాయించుచున్న వైణికుల నాదమును పోలినది.
యెహెఙ్కేలు 1:24, యెహెఙ్కేలు 43:2, దానియేలు 10:6, యోవేలు 3:13

“తంతివాద్యాలు”– ప్రకటన గ్రంథం 5:8; ప్రకటన గ్రంథం 15:2.

3. వారు సింహాసనము ఎదుటను, ఆ నాలుగు జీవుల యెదుటను, పెద్దలయెదుటను ఒక క్రొత్త కీర్తన పాడుచున్నారు; భూలోకములోనుండి కొనబడిన ఆ నూట నలువది నాలుగువేలమంది తప్ప మరి ఎవరును ఆ కీర్తన నేర్చుకొనజాలరు.
కీర్తనల గ్రంథము 33:3, కీర్తనల గ్రంథము 40:3, కీర్తనల గ్రంథము 96:1, కీర్తనల గ్రంథము 98:1, కీర్తనల గ్రంథము 144:9, కీర్తనల గ్రంథము 149:1, యెషయా 42:10

“కొత్తపాట”– ప్రకటన గ్రంథం 5:9. “నేర్చుకోలేక”– మొట్టమొదట ఈ పాట ఎవరు పాడుతారో ఈ 144,000 మందికి ఎవరు నేర్పుతారో చెప్పలేదు. “విమోచించబడ్డవారు”– ప్రకటన గ్రంథం 1:5; ప్రకటన గ్రంథం 5:9; 1 పేతురు 1:18; హెబ్రీయులకు 9:12; ఎఫెసీయులకు 1:7; రోమీయులకు 3:24; మత్తయి 20:28.

4. వీరు స్త్రీ సాంగత్యమున అపవిత్రులు కానివారును, స్త్రీ సాంగత్యము ఎరుగని వారునైయుండి, గొఱ్ఱెపిల్ల ఎక్కడికి పోవునో అక్కడికెల్ల ఆయనను వెంబడింతురు;వీరు దేవుని కొరకును గొఱ్ఱె పిల్లకొరకును ప్రథమఫలముగా ఉండుటకై మనుష్యులలోనుండి కొనబడినవారు.

“అపవిత్రం చేసుకోనివారు”– పెళ్ళి మనుషుల్ని అపవిత్రం చేసేది కాదు. హెబ్రీయులకు 13:4; మత్తయి 19:4-6 చూడండి. తమను అపవిత్రం చేసుకోనివారు అంటే వ్యభిచారం, ఏ రకమైన లైంగిక అవినీతీ ఎప్పుడూ చేయనివారని అర్థం కావచ్చు (1 కోరింథీయులకు 6:9-10; ఎఫెసీయులకు 5:5), లేక వారు దేవుని విషయంలో ఆత్మ సంబంధంగా నమ్మకమైనవారు, ఎన్నడూ ద్రోహం చేయనివారు అని అర్థం కావచ్చు (2 కోరింథీయులకు 11:2-3; హోషేయ 1:2; హోషేయ 2:2; యిర్మియా 2:2, యిర్మియా 2:5; మొ।।). ఈ గ్రంథంలో అనేక చిహ్నాలూ, సూచనలూ ఉన్నాయి గదా. “వెంట వెళ్తూ ఉన్నారు”– ప్రకటన గ్రంథం 7:17; యోహాను 10:27. ఇప్పుడు ఇక్కడ మంచి కాపరి అయిన యేసును అనుసరించేవారు అప్పుడు అక్కడ ఆయనను అనుసరిస్తారు. ఇప్పుడు ఇక్కడ ఆయనను అనుసరించనివారు అక్కడ ఉండరు. “మనుషులలో నుంచి విమోచించబడి”– ఈ మాటల్ని బట్టి వీరు ప్రకటన గ్రంథం 7:4-8 లోని వారు కాదని అనుకోవచ్చు. ఎందుకంటే ప్రకటన గ్రంథం 7:4-8 లోని వారు అందరూ ఇస్రాయేల్ వారు మాత్రమే. “తొలి పంటగా”– క్రీస్తు మొదటి సారి రాకముందు ఇస్రాయేల్ జాతి అంతా దేవుని “పంటకోతలో మొదటి భాగం”– అని రాసి ఉంది (యిర్మియా 2:3). క్రీస్తు వచ్చాక ఆధ్యాత్మికంగా కొత్త జన్మం పొందినవారంతా ఒక గుంపుగా తొలి పంటగా ఉన్నారు (యాకోబు 1:18). తొలిపంట అంటే తరువాత ఇంకా కోత ఉంటుందని ఎప్పుడూ అర్థమిస్తుంది. ఇక్కడ ఈ వచనంలో ఈ మాట క్రీస్తు వెయ్యేళ్ళ పరిపాలనలో ఆయన రాజ్యంలోకి సమకూర్చబడబోయే గొప్ప జన సమూహాలను సూచించవచ్చు (ప్రకటన గ్రంథం 15:4; యెషయా 2:2-4; యెషయా 60:3-9; యిర్మియా 3:17; జెకర్యా 14:16 చూడండి). దీనికి ఈ అర్థం గనుక లేకపోతే మరి ఏ అర్థం ఉంటుందో ఊహించడం కష్టం.

5. వీరినోట ఏ అబద్ధమును కనబడలేదు; వీరు అనింద్యులు.
కీర్తనల గ్రంథము 32:2, యెషయా 53:9, జెఫన్యా 3:13

“ఏ మోసమూ (ఏ అబధ్ధమూ)”– కీర్తనల గ్రంథము 15:1-5 పోల్చి చూడండి. అబద్ధికులు వేరే స్థలంలో ఉంటారు (ప్రకటన గ్రంథం 21:8, ప్రకటన గ్రంథం 21:27; ప్రకటన గ్రంథం 22:15). అబద్ధమాడడం అంటే సత్య స్వరూపి అయిన దేవునికి చెడ్డ అసహ్యం – కీర్తనల గ్రంథము 31:5; సామెతలు 6:16-19, మొ।। “నిందించతగిన విషయమేమీ లేదు”– కీర్తనల గ్రంథము 15:2; కీర్తనల గ్రంథము 24:3-5; ఆదికాండము 17:1; ద్వితీయోపదేశకాండము 18:13; ఎఫెసీయులకు 1:4; ఎఫెసీయులకు 5:27; ఫిలిప్పీయులకు 1:10; ఫిలిప్పీయులకు 2:15; 2 పేతురు 3:14.

6. అప్పుడు మరియొక దూతను చూచితిని. అతడు భూనివాసులకు, అనగా ప్రతి జనమునకును ప్రతి వంశ మునకును ఆ యా భాషలు మాటలాడువారికిని ప్రతి ప్రజకును ప్రకటించునట్లు నిత్యసువార్త తీసికొని ఆకాశ మధ్యమున ఎగురుచుండెను.

12వ అధ్యాయంలోని స్త్రీ, 13వ అధ్యాయంలోని మృగంలాగానే ఈ దేవదూత ఒక చిహ్నంగా సూచనగా ఉండవచ్చు. అతడు ఈ యుగం సమాప్తి కాకముందు సర్వ లోకంలో జరగబోయే క్రీస్తు శుభవార్త ప్రకటనకు సూచనగా ఉండవచ్చు. మత్తయి 24:14 చూడండి.

7. అతడుమీరు దేవునికి భయపడి ఆయనను మహిమపరచుడి; ఆయన తీర్పుతీర్చు గడియ వచ్చెను గనుక ఆకాశమును భూమిని సముద్రమును జలధారలను కలుగజేసిన వానికే నమస్కారము చేయుడి అని గొప్ప స్వరముతో చెప్పెను.
నిర్గమకాండము 20:11, కీర్తనల గ్రంథము 146:6

“దేవునికి భయపడండి”– ప్రకటన గ్రంథం 15:4; ప్రకటన గ్రంథం 19:5; 1 పేతురు 1:17; 1 పేతురు 2:17; 2 కోరింథీయులకు 5:11; రోమీయులకు 3:18; హెబ్రీయులకు 12:28; ఆదికాండము 20:11; కీర్తనల గ్రంథము 34:11-14; కీర్తనల గ్రంథము 111:10; సామెతలు 1:7. “మహిమ చేకూర్చండి”– ప్రకటన గ్రంథం 16:9; ప్రకటన గ్రంథం 19:7; 1 కోరింథీయులకు 10:31. “తీర్పు ఘడియ”– ప్రకటన గ్రంథం 11:18. “కలగజేసిన ఆయనను ఆరాధించండి”– మత్తయి 4:10; అపో. కార్యములు 14:15; 1 కోరింథీయులకు 8:5-6; యెషయా 40:18-26; యెషయా 42:5; యెషయా 43:10-11; యెషయా 45:18. మనుషులు సృష్టికర్తను మాత్రమే ఆరాధించాలి, మరెవరినీ మరి దేనినీ కాదు.

8. వేరొక దూత, అనగా రెండవ దూత అతని వెంబడి వచ్చిమోహోద్రేకముతో కూడిన తన వ్యభిచార మద్యమును సమస్త జనములకు త్రాగించిన యీ మహా బబులోను కూలిపోయెను కూలిపోయెను అని చెప్పెను.
యెషయా 21:9, యిర్మియా 51:7, యిర్మియా 51:8, దానియేలు 4:30

“మహా బబులోను”– ప్రకటన గ్రంథం 17:1-5; ప్రకటన గ్రంథం 18:2. ఇక్కడ అది “కూలిపోయింది” అని రాసివుంది, అయితే 18వ అధ్యాయం వరకు దాని పతనం వివరణ కనబడదు. “వ్యభిచార...మద్యం”– ప్రకటన గ్రంథం 18:3, ప్రకటన గ్రంథం 18:9.

9. మరియు వేరొక దూత, అనగా మూడవ దూత వీరి వెంబడి వచ్చి గొప్ప స్వరముతో ఈలాగు చెప్పెను ఆ క్రూరమృగమునకు గాని దాని ప్రతిమకు గాని యెవడైనను నమస్కారముచేసి, తన నొసటియందేమి చేతి మీదనేమి ఆ ముద్ర వేయించుకొనినయెడల

ఆ మృగాన్ని పూజించకూడదని హెచ్చరించడంలో ఏకైక నిజ దేవుణ్ణి తప్ప మరెవరినీ మరి దేనినీ ఆరాధించకూడదనే హెచ్చరిక ఇమిడి ఉన్నట్టుంది (వ 7). ఆ మృగాన్ని పూజించేవారితో పాటు విగ్రహ పూజ చేసేవారంతా నరకాగ్ని అనే శిక్షకు గురి అవుతారు (ప్రకటన గ్రంథం 21:8).

10. ఏమియు కలపబడకుండ దేవుని ఉగ్రతపాత్రలో పోయబడిన దేవుని కోపమను మద్యమును వాడు త్రాగును. పరిశుద్ధ దూతల యెదుటను గొఱ్ఱెపిల్ల యెదుటను అగ్నిగంధకములచేత వాడు బాధింపబడును.
ఆదికాండము 19:24, కీర్తనల గ్రంథము 11:6, కీర్తనల గ్రంథము 75:8, యెషయా 51:17, యిర్మియా 25:15, యెహెఙ్కేలు 38:22

“ఆగ్రహ...ఉగ్రత”– వ 19; సంఖ్యాకాండము 25:3; కీర్తనల గ్రంథము 90:7-11; యెషయా 51:17; యిర్మియా 25:15; యోహాను 3:36; రోమీయులకు 1:18; ఎఫెసీయులకు 5:6. “గొర్రెపిల్ల ముందర”– తన ప్రాణాన్ని మనుషులకోసం ధారపోసిన యేసుప్రభువు ఈ దుర్మార్గుల వేదనల్ని చూస్తూ వాటిని తొలగించేందుకు ఏమీ చేయడు. వారి బాధలు పరిపూర్ణ న్యాయాన్ని బట్టి కలుగుతాయనీ, వాటిని తొలగించడం గానీ తగ్గించడం గానీ న్యాయం కాదు, పరలోక శాసనాలకు అనుగుణం కాదు అనీ ఇది రుజువుగా ఉంది. “అగ్ని గంధకాలతో”– ఆదికాండము 19:24; కీర్తనల గ్రంథము 11:6; యూదా 1:7 పోల్చి చూడండి.

11. వారి బాధసంబంధమైన పొగ యుగయుగములు లేచును; ఆ క్రూరమృగమునకు గాని దాని ప్రతిమకు గాని నమస్కారముచేయువారును, దాని పేరుగల ముద్ర ఎవడైనను వేయించుకొనినయెడల వాడును రాత్రింబగళ్లు నెమ్మదిలేనివారై యుందురు.
యెషయా 34:10

“యుగ యుగాలకు”– ప్రకటన గ్రంథం 19:3; మత్తయి 25:46; మార్కు 9:48; లూకా 16:22-26. పగలు, రాత్రి అనేవి ఉన్నంతవరకూ దుర్మార్గులకు బాధ నివారణ అంటూ ఉండదు.

12. దేవుని ఆజ్ఞలను యేసునుగూర్చిన విశ్వాసమును గైకొనుచున్న పరిశుద్ధుల ఓర్పు ఇందులో కనబడును.

ప్రకటన గ్రంథం 13:10; హెబ్రీయులకు 6:12; 2 థెస్సలొనీకయులకు 1:4.

13. అంతట ఇప్పటినుండి ప్రభువునందు మృతినొందు మృతులు ధన్యులని వ్రాయుమని పరలోకమునుండి యొక స్వరము చెప్పగా వింటిని. నిజమే; వారు తమ ప్రయాసములు మాని విశ్రాంతి పొందుదురు; వారి క్రియలు వారి వెంట పోవునని ఆత్మ చెప్పుచున్నాడు.

“ఇప్పటి నుంచి”– మృగం పరిపాలన కాలంలో మరణాన్ని ఎదుర్కోబోయే విశ్వాసులందరికీ ఈ సత్యం ప్రోత్సాహకరంగా ఉండాలి. విశ్వాసులు ప్రభువులో చనిపోవడం అనేది ఎప్పుడూ ధన్యతే (2 కోరింథీయులకు 5:1-6; ఫిలిప్పీయులకు 1:21-23; కీర్తనల గ్రంథము 116:15). అయితే మృగానికీ కపట ప్రవక్తకూ లోబడడానికి నిరాకరించినవారి విషయంలో ఇది మరింత నిజం. “విశ్రాంతి”– వ 11 పోల్చి చూడండి. “క్రియలు వారివెంట వస్తాయి”– గొప్ప ఒత్తిడినీ అపాయాన్నీ ఎదుర్కొన్నవారు ప్రత్యేకమైన విశ్వసనీయతను చూపినందుచేత వారికి ప్రత్యేకమైన బహుమతులు కలుగుతాయి.

14. మరియు నేను చూడగా, ఇదిగో తెల్లని మేఘము కనపడెను. మనుష్యకుమారుని పోలిన యొకడు ఆ మేఘముమీద ఆసీనుడైయుండెను ఆయన శిరస్సుమీద సువర్ణకిరీటమును, చేతిలో వాడిగల కొడవలియు ఉండెను.
దానియేలు 10:16

“మేఘం”– ప్రకటన గ్రంథం 1:7; మత్తయి 24:30; మత్తయి 26:64; అపో. కార్యములు 1:9, అపో. కార్యములు 1:11; 1 థెస్సలొనీకయులకు 4:16-17. మేఘానికి క్రీస్తు రెండో రాకడతో సంబంధం ఉంది. “మానవ పుత్రుడిలాంటి”– అదే మాటలు ప్రకటన గ్రంథం 1:13 లో యేసును గురించి వాడాడు. ఈ మేఘం మీద కూర్చుని ఉన్నవాడు యేసు కాదని అనుకోవడానికి మంచి కారణం కనబడడం లేదు. “కిరీటం”– క్రొత్త ఒడంబడిక గ్రంథంలో ఈ మాట దేవదూతల గురించి కనిపించడం లేదు. కిరీటం అని అనువదించిన గ్రీకు పదం (స్తెఫానొస్‌) జయించేవానికి ఇవ్వబడే బహుమతి అని అర్థమిస్తుంది గాని రాజు ధరించే కిరీటం కాదు. ప్రకటన గ్రంథం 2:10; 1 కోరింథీయులకు 9:25; హెబ్రీయులకు 2:9 పోల్చి చూడండి. ఈ గ్రంథంలో తరువాతి భాగంలో క్రీస్తు అనేక కిరీటాలు ధరించుకొని కనిపిస్తాడు – ప్రకటన గ్రంథం 19:12. అక్కడ గ్రీకు పదానికి అర్థం రాజులు ధరించే కిరీటాలు. ఇక్కడైతే క్రీస్తు కోత కోసుకోవడానికి వస్తున్నాడు గాని పరిపాలించడానికి కాదు.

15. అప్పుడు మరియొక దూత దేవాలయములోనుండి వెడలివచ్చి భూమి పైరుపండి యున్నది, కోతకాలము వచ్చినది, నీ కొడవలిపెట్టి కోయుమని గొప్ప స్వరముతో ఆ మేఘముమీద ఆసీనుడైయున్న వానితో చెప్పెను.
యోవేలు 3:13

మేఘం మీద కూర్చుని ఉన్నవాడు యేసు ప్రభువైతే ఒక దేవదూత వచ్చి ఆయన ఏమి చెయ్యాలో చెప్పడం ఎందుకు? ఎందుకంటే యేసు తండ్రి అయిన దేవునికి ఎప్పుడూ లోబడి ఉండేవాడు, ఆయననుంచి ఆదేశాలు పొందేవాడు (యోహాను 5:19; యోహాను 6:38; యోహాను 14:31 చూడండి). ఈ దేవదూత “దేవాలయంలో నుంచి”, అంటే దేవుని సన్నిధినుంచి వచ్చి తండ్రినుంచి కుమారుడైన యేసుకు సందేశాన్ని అందిస్తున్నాడు. ఒకవేళ ఈ దేవదూత తండ్రినుంచి కుమారునికి వచ్చే సందేశానికి చిహ్నంగా మాత్రమే ఉండవచ్చు. “పంట పండింది, కోతకాలం వచ్చింది”– మత్తయి 3:12; మార్కు 4:29 పోల్చి చూడండి. క్రీస్తు ఈ కోతను కోసేటప్పుడు దేవదూతల్ని వినియోగిస్తాడు – మత్తయి 13:39; మత్తయి 24:31.

16. మేఘముమీద ఆసీనుడై యున్నవాడు తన కొడవలి భూమిమీద వేయగా భూమి పైరు కోయబడెను.

ఈ పంట అంటే ఏమిటో ఇక్కడ చెప్పలేదు. అయితే వ 17-20లోని భూమి ద్రాక్షపండ్ల పంటకు ఇది భిన్నంగా ఉంది. ఆ పంట కోసే విషయానికీ దీనికీ తేడాలు ఉన్నాయి. ఆ పంట అంటే దుర్మార్గులు గనుక ఈ పంట దేవుని ప్రజలని అనుకోవడానికి ఆస్పదం లేకపోలేదు. వేరే మాటల్లో చెప్పాలంటే 14-16లోది క్రీస్తు సంఘం క్రీస్తును కలుసుకొనేందుకు పైకి వెళ్ళడం అనే విషయానికి చిహ్నంగా దృష్టాంతంగా ఉండవచ్చు (1 థెస్సలొనీకయులకు 4:16-17). ఆ సంఘటన ప్రకటన గ్రంథం 4:1 సమయంలో జరుగుతుందని కొందరు పండితుల అభిప్రాయం. మరి కొందరేమో ఆదికాండము 11:12 సమయంలో జరగబోయేది అనీ మరి కొందరు ప్రకటన గ్రంథం 19:11 సమయంలో జరగబోయేది అనీ అనుకొంటున్నారు. ఈ నోట్స్ రచయిత ఈ వచనాలు (ప్రకటన గ్రంథం 14:14-16) బహుశా క్రీస్తు సంఘం పైకి వెళ్ళడం అనే రాబోయే సంఘటనను సూచిస్తున్నదని అనుకొంటున్నాడు. అయితే కొంత సందేహమైనా ఉన్న విషయాల్ని గురించి బల్లగుద్ది నొక్కి చెప్పడం జ్ఞానం కాదని కూడా అనుకొంటున్నాడు.

17. ఇంకొక దూత పరలోకమునందున్న ఆలయములోనుండి వెడలివచ్చెను; ఇతని యొద్దను వాడిగల కొడవలి యుండెను.

“మరో”– మునుపటి కోత, ఇది ఒకటి కాదని తేటతెల్లంగా ఉంది. ఈ కోత దుర్మార్గులైన మనుషులమీదికీ రాబోయే దేవుని తీర్పునూ ఉగ్రతనూ సూచిస్తున్నది.

18. మరియొకదూత బలిపీఠమునుండి వెడలి వచ్చెను. ఇతడు అగ్నిమీద అధికారము నొందినవాడు; ఇతడు వాడియైన కొడవలిగలవానిని గొప్ప స్వరముతో పిలిచిభూమిమీద ఉన్న ద్రాక్షపండ్లు పరిపక్వమైనవి; వాడియైన నీ కొడవలిపెట్టి దాని గెలలు కోయుమని చెప్పెను.
యోవేలు 3:13

“వేదిక”– ప్రకటన గ్రంథం 6:9; ప్రకటన గ్రంథం 8:5; ప్రకటన గ్రంథం 16:7. “నిప్పు మీద అధికారం”– బహుశా ప్రకటన గ్రంథం 8:3-5 లోని దేవదూత ఇతడు. “భూమి ద్రాక్ష పండ్లు”– దేవుని ద్రాక్ష పండ్లు కాదన్నమాట. ద్వితీయోపదేశకాండము 32:32-33 (యోహాను 15:1-5 పోల్చి చూడండి). “పండాయి”– మృగం ఏలే కాలంలో దుర్మార్గత పూర్తిగా పండుతుంది.

19. కాగా ఆ దూత తన కొడవలి భూమిమీద వేసి భూమిమీదనున్న ద్రాక్షపండ్లను కోసి, దేవుని కోపమను ద్రాక్షల పెద్ద తొట్టిలో వేసెను

“ఉగ్రత”– వ 10 దగ్గర రిఫరెన్సులు చూడండి. “దేవుని...గానుగ తొట్టి”– యెషయా 63:3-4; విలాపవాక్యములు 1:15; యోవేలు 3:13.

20. ఆ ద్రాక్షలతొట్టి పట్టణమునకు వెలుపట త్రొక్కబడెను; నూరు కోసుల దూరము గుఱ్ఱముల కళ్ళెముమట్టుకు ద్రాక్షల తొట్టిలోనుండి రక్తము ప్రవహించెను.
యెషయా 63:3, విలాపవాక్యములు 1:15

“నగరం”– ఈ మాట ఇలా ఒంటరిగా ఉంటే ఇది జెరుసలంను సూచిస్తుందని అనుకోవచ్చు (ప్రకటన గ్రంథం 11:2, ప్రకటన గ్రంథం 11:8, ప్రకటన గ్రంథం 11:13). ఈ యుగాంతంలో దేవుని ఘోరమైన తీర్పు ఒకదానికి జెరుసలం కేంద్ర స్థలమన్నది స్పష్టమే. యోవేలు 3:12-16; జెకర్యా 14:1-3 చూడండి. “త్రొక్కడం”– యేసుప్రభువు తానే ఇలా చేస్తాడు – ప్రకటన గ్రంథం 19:15. అంటే భూమిమీద దుర్మార్గులపై దేవుని కోపం అమలు జరపడానికి దేవుడు ఆయనను నియమించాడు. “మూడు వందల ఇరవై కిలోమీటర్లు”– ఇస్రాయేల్ దేశం ఉత్తర సరిహద్దునుంచి దక్షిణాన ఉన్న ఎడారిలోకి, ఆ దేశంలో జనాభా ఎక్కువగా ఉన్న ప్రాంతమంత దూరం అన్నమాట. ఇంత రక్తం మహా గొప్ప జన సమూహాల సంహారాన్ని సూచిస్తున్నది. ప్రకటన గ్రంథం 19:17-18 పోల్చి చూడండి.