1. ప్రియులారా, అనేకులైన అబద్ధ ప్రవక్తలు లోకము లోనికి బయలు వెళ్లియున్నారు గనుక ప్రతి ఆత్మను నమ్మక, ఆ యా ఆత్మలు దేవుని సంబంధమైనవో కావో పరీక్షించుడి.

ఈ వచనాల్లోని మనుషులు దేవుని సత్యాన్ని అనుసరిస్తున్నారో లేదో మనం తెలుసుకోగలిగేందుకు యోహాను రెండు పరీక్షలను ఇస్తున్నాడు. వ 2,3లో మొదటిది, వ 6లో రెండోది ఉన్నాయి. “కపట ప్రవక్తలు”– 1 యోహాను 2:18; 2 పేతురు 2:1. “ఆత్మ”– దేవుని ఆత్మ ఈ లోకంలో ఉన్నాడు. దురాత్మలు కూడా ఉన్నాయి. ఇవి తప్పు సిద్ధాంతాలు బోధించేలా మనుషుల్ని ప్రేరేపిస్తూ ఉంటాయి. వారి ద్వారా మాట్లాడవచ్చు కూడా. 2 కోరింథీయులకు 11:14-15; 1 తిమోతికి 4:1-3 చూడండి. అందువల్ల సత్యం చెప్తున్నామని బోధించే ప్రతి మనిషినీ, లేక మనుషుల ద్వారా మాట్లాడే ప్రతి ఆత్మనూ నమ్మకూడదు.

2. యేసుక్రీస్తు శరీరధారియై వచ్చెనని, యే ఆత్మ ఒప్పుకొనునో అది దేవుని సంబంధమైనది;

1 యోహాను 2:22. “శరీరంతో”– యోహాను 1:14; హెబ్రీయులకు 2:14. దీన్ని కాదనడం దేవుని అవతారం, ఆయన కన్య గర్భాన జన్మించడం, క్రీస్తులో దేవ, మానవ స్వభావాలు కలిసి ఉండడం మొదలైన సత్యాలను కాదనడమే.

3. యే ఆత్మ యేసును ఒప్పుకొనదో అది దేవుని సంబంధమైనది కాదు; దీనినిబట్టియే దేవుని ఆత్మను మీరెరుగుదురు. క్రీస్తువిరోధి ఆత్మ వచ్చునని మీరు వినినసంగతి ఇదే; యిదివరకే అది లోకములో ఉన్నది.

“ఒప్పుకోని”– యేసుప్రభువు శరీరంతో ఈ లోకంలోకి వచ్చాడని వారు బహిరంగంగా ఒప్పుకోరు. యోహాను 1:14 లో చెప్పిన సత్యాన్ని ఉపదేశించరు. బహుశా దాన్ని బహిరంగంగా కాదనరు కూడా. అయితే దాన్ని ఒప్పుకోకపోవడం ద్వారా దాన్ని తాము నమ్మడం లేదని తెలియజేస్తారు. మోసగాళ్ళు, కపట బోధకులను వారు చెప్పేదాన్ని బట్టీ, చెప్పనిదాన్ని బట్టీ కూడా గుర్తించవచ్చు. “ఇప్పుడే”– 2 థెస్సలొనీకయులకు 2:7 పోల్చి చూడండి.

4. చిన్నపిల్లలారా, మీరు దేవుని సంబంధులు; మీలో ఉన్నవాడు లోకములో ఉన్నవాని కంటె గొప్పవాడు గనుక మీరు వారిని జయించియున్నారు.

“లోకంలో ఉన్నవాడికంటే”– అంటే సైతాను. “మీలో ఉన్నవాడు”– క్రీస్తు ఆత్మ (1 యోహాను 3:24; రోమీయులకు 8:9-10). సైతానుకన్న దేవుని ఆత్మ ఎన్నో రెట్లు అధికుడు. కాబట్టి విశ్వాసులు సైతానును ఓడించగలరు (యాకోబు 4:7; ఎఫెసీయులకు 6:10-13). “జయించారు”– 1 యోహాను 2:13; 1 యోహాను 5:4. విశ్వాసులు దేవుడు ఎన్నుకున్నవారు. వారి కొత్త ఆధ్యాత్మిక జీవం దేవునినుంచి కలిగింది. కపట బోధకులను గుర్తించి వారి ఉపదేశాలను తిరస్కరించే జ్ఞానం వారికి ఉంది.

5. వారు లోక సంబంధులు గనుక లోక సంబంధులైనట్టు మాటలాడుదురు, లోకము వారి మాట వినును.

“లోకానికి”– 1 యోహాను 2:15-16. కపట ప్రవక్తలు పాపవిముక్తి లేని ఆధ్యాత్మికత లేని మనుషులు వినడానికీ ఇష్టపడే సంగతులు మాట్లాడుతారు గనుక, ఆ మనుషులు వారిని మెచ్చుకుంటారు (2 తిమోతికి 4:3).

6. మనము దేవుని సంబంధులము; దేవుని ఎరిగినవాడు మన మాట వినును, దేవుని సంబంధి కానివాడు మన మాట వినడు. ఇందువలన మనము సత్య స్వరూప మైన ఆత్మ యేదో, భ్రమపరచు ఆత్మ యేదో తెలిసికొను చున్నాము.

ఇదొక ముఖ్యమైన పరీక్ష. “మనమైతే – అంటే దేవుడు పంపగా వచ్చి దేవుని వాక్కును ఉపదేశించే నిజమైన భక్తులు అని యోహాను భావం. నిజ విశ్వాసులు (వారికి దేవుడు తెలుసు) వారి మాటలు విని, వారిని దేవుని మనుషులుగా గుర్తించి వారి ఉపదేశాలకు విధేయత చూపుతారు (అపో. కార్యములు 2:42). దేవుని సత్య ఉపదేశాలను విశ్వాసులు గుర్తిస్తారు. ఉపదేశకులు దేవుని సంతానాన్ని గుర్తిస్తారు. దేవుడు వెల్లడి చేసిన సత్యమే వారిని పరీక్షించేదీ, నిరూపించేదీ. బైబిల్లో రాసివున్న క్రీస్తు శుభవార్త ఉపదేశాన్ని స్వీకరించని వారు తమలో తాము ఏమి అనుకున్నప్పటికీ, క్రీస్తుకు చెందినవారు మాత్రం కారు.

7. ప్రియులారా, మనము ఒకనినొకడు ప్రేమింతము; ఏలయనగా ప్రేమ దేవునిమూలముగా కలుగుచున్నది; ప్రేమించు ప్రతివాడును దేవుని మూలముగా పుట్టినవాడై దేవుని ఎరుగును.

ప్రేమ అంటే ఏమిటో ఈ వచనాలు తెలియజేస్తున్నాయి. ప్రేమ, ప్రేమించడం వంటి పదాలు ఈ భాగంలో 24 సార్లు ఉన్నాయి. యోహాను నేర్పేది ఇది: దేవుడు ప్రేమ మూర్తి. మనపట్ల తన ప్రేమను క్రియలద్వారా నిరూపించాడు. కాబట్టి మనం కూడా ప్రేమించాలి. ఇతరులపట్ల మన ప్రేమను చేతల్లో చూపాలి (1 యోహాను 3:18). “ప్రేమతో చూచుకొందాం”– యోహాను 13:34. నిజమైన ప్రేమకు మూలాధారం దేవుడే. విశ్వాసులు దేవుని మూలంగా పుట్టారు కాబట్టి ప్రేమించడంలో దేవునిలాగానే వారుండాలి. ఇక్కడ యోహాను చెప్తున్నది దివ్య ప్రేమ (“ఆగాపే”– 1 కోరింథీయులకు 13:1 నోట్‌). ఇది దేవుని ప్రేమ, క్రీస్తులో నమ్మకం ఉంచిన వారికి ఆయన ఇచ్చే ప్రేమ (యోహాను 17:26). లోకంలో మరెవరిలోనూ ఇది లేదు. లోకంలో మనుషులకు తమ స్నేహితులపట్ల, కుటుంబాలపట్ల ఉండే సహజ ప్రేమ కంటే మించినది ఇది. లైంగిక ప్రేమతో గానీ మోహంతో గానీ లోకమంతటా కనిపించే భావోద్రేక పూరితమైన ప్రేమతో గానీ దీనికి సంబంధమే లేదు. ఇది స్వార్థం లేని ప్రేమ. సేవ చేస్తూ, ఇతరులకు దీవెనలు తేవాలని చూచే ప్రేమ. ఇతరుల ఆధ్యాత్మిక మేలును ఆశించే ప్రేమ. మన కోసం చనిపోయేందుకు దేవుడు తన కుమారుణ్ణి పంపడంలో ఇది చక్కగా కనిపించింది (వ 9). ఒక మనిషి ఆధ్యాత్మికంగా జన్మించాడు, దేవుణ్ణి ఎరిగినవాడు అనడానికి ఉన్న ఖాయమైన రుజువు ఏమిటంటే అతని హృదయంలో దేవుని ప్రేమ ఉండడమే. ఇది మనుషుల్లో ఉంటే వారు చేసేదానిలో కనిపిస్తుంది.

8. దేవుడు ప్రేమాస్వరూపి, ప్రేమలేని వాడు దేవుని ఎరుగడు.

“దేవుడు ప్రేమ స్వరూపి”– వ 16. ఇది దేవుని తత్వం. దేవుని స్వభావం. ఆయన ప్రేమించకుండా ఉండలేడు. “ఎరగనివాడే”– దేవుణ్ణి గురించి తమకున్న జ్ఞానం, తెలివి విషయంలో మనుషులు గర్వపడవచ్చు. కానీ దేవుని ప్రేమ వారిలో లేకపోతే తమను తాము మోసగించుకొంటున్నారు. వారికి రకరకాల నిగూఢ అనుభవాలు, ఆత్మ తృప్తి కలిగించే ఉద్రేకాలు ఉండవచ్చు. కానీ అవి కూడా వారిని క్రీస్తులోని విశ్వాసులపట్ల ప్రేమ చూపేలా చేయకపోతే అన్నీ వ్యర్థమే, నిరుపయోగమే.

9. మనము ఆయన ద్వారా జీవించు నట్లు, దేవుడు తన అద్వితీయ కుమారుని లోకములోనికి పంపెను; దీనివలన దేవుడు మనయందుంచిన ప్రేమ ప్రత్యక్షపరచబడెను.

యోహాను 3:16; రోమీయులకు 5:8; ఎఫెసీయులకు 2:4-5. దివ్య ప్రేమకు మూలాధారం దేవుడే, మానవుడు కాదు. దేవుడు మనకు నేర్పించకపోతే అదేమిటో మనకు తెలియదు. ఆయన మనల్ని ప్రేమించకపోతే, తన ప్రేమను మన హృదయాల్లో ఉంచకపోతే మనం ఆయన్ను ప్రేమించగలిగేవాళ్ళం కాదు (వ 19).

10. మనము దేవుని ప్రేమించితిమని కాదు, తానే మనలను ప్రేమించి, మన పాపములకు ప్రాయశ్చిత్తమై యుండుటకు తన కుమారుని పంపెను; ఇందులో ప్రేమయున్నది.

“కరుణాధారమైన బలి”– 1 యోహాను 2:2.

11. ప్రియులారా, దేవుడు మనలను ఈలాగు ప్రేమింపగా మనమొకనినొకడు ప్రేమింప బద్ధులమై యున్నాము.

దేవుడు ఏమిటో, తాము ఏమిటో వాటిని బట్టి విశ్వాసులు ఒకరిపట్ల ఒకరు ప్రేమ చూపాలి.

12. ఏ మానవుడును దేవుని ఎప్పుడును చూచియుండ లేదు; మన మొకనినొకడు ప్రేమించిన యెడల దేవుడు మనయందు నిలిచియుండును; ఆయన ప్రేమ మనయందు సంపూర్ణమగును.

“చూడలేదు”– యోహాను 1:18; 1 తిమోతికి 6:16. “దేవుడు మనలో”– యోహాను 14:23; రోమీయులకు 8:9. క్రీస్తు విశ్వాసుల విషయంలో మాత్రమే ఇది నిజం (ఎఫెసీయులకు 2:12; ఎఫెసీయులకు 4:18). దీనికి రుజువేమిటంటే వారు ఒకరినొకరు ప్రేమతో చూడడమే. దేవుడు మనలో ఉంటే ప్రేమ మనలో ఉంటుంది. ప్రేమ (ఆగాపే) మనలో ఉంటే దేవుడు మనలో ఉంటాడు. “ప్రేమ...పరిపూర్ణమై”– దేవుని ప్రజలు ఒకరినొకరు ప్రేమించడం వల్లే దేవుని ప్రేమ ఈ భూమిపై నెరవేరుతుంది.

13. దీనివలన మనము ఆయనయందు నిలిచియున్నామనియు ఆయన మన యందున్నాడనియు తెలిసికొనుచున్నాము; ఏలయనగా ఆయన మనకు తన ఆత్మలో పాలు దయచేసియున్నాడు.

1 యోహాను 3:24; యోహాను 17:21-23.

14. మరియు తండ్రి తన కుమారుని లోక రక్షకుడుగా ఉండుటకు పంపియుండుట మేము చూచి, సాక్ష్యమిచ్చు చున్నాము.

1 యోహాను 1:1-2. “లోక రక్షకుడు”– 1 యోహాను 2:2; యోహాను 4:42; 1 తిమోతికి 4:10.

15. యేసు దేవుని కుమారుడని యెవడు ఒప్పు కొనునో, వానిలో దేవుడు నిలిచియున్నాడు, వాడు దేవునియందున్నాడు.

“దేవుని కుమారుడు”– దేవుని కుమారుల్లో ఒకడు కాదు. మత్తయి 3:17; యోహాను 3:16; యోహాను 5:18-23 నోట్స్ చూడండి. “ఒప్పుకొన్న”– ఇదే మాట 1 యోహాను 1:9 లో కూడా కనిపిస్తున్నది. యేసు దేవుని ఏకైక కుమారుడని ఒప్పుకోవడమంటే ఆయనను, ఆయన చెప్పిన మాటలను నమ్మడమే. ఆయన చెప్పాడు కాబట్టే ఆయన దేవుని కుమారుడని మనకు తెలిసింది. ఈ నమ్మకమే మనల్ని దేవుని చెంతకు తెచ్చి మన జీవితాన్ని ఆయనలో లీనం చేసింది. “దేవునిలో”– వ 3,16.

16. మనయెడల దేవునికి ఉన్న ప్రేమను మనమెరిగినవారమై దాని నమ్ముకొనియున్నాము; దేవుడు ప్రేమాస్వరూపియై యున్నాడు, ప్రేమయందు నిలిచి యుండువాడు దేవునియందు నిలిచియున్నాడు, దేవుడు వానియందు నిలిచియున్నాడు.

మనల్ని ప్రేమిస్తున్నానని దేవుడు చెప్పినంత మాత్రాన కాక సాధ్యం అయినంత అద్భుత రీతిలో దాన్ని రుజువు చేశాడు కాబట్టి దేవుని ప్రేమ ఏమిటో మనకు తెలిసింది (వ 9; 1 యోహాను 3:16). “నమ్ముకొన్నాం”– తన ప్రేమను గురించి దేవుడు సందేహానికి తావులేని రుజువులు చూపాడు కాబట్టి ఆయన ప్రేమను ఎప్పుడూ శంకించకూడదు. మనపైకి, మన సన్నిహితులపైకి ఎన్ని కష్టాలు, బాధలు, హింసలు వచ్చినా, దేవుని ప్రేమపై మనం ఆధారపడగలం. అది ఎన్నడూ విఫలం కాదు. మనలను విడిచిపెట్టదు (కీర్తనల గ్రంథము 23:6; రోమీయులకు 8:35-39; 1 కోరింథీయులకు 13:8).

17. తీర్పుదినమందు మనకు ధైర్యము కలుగునట్లు దీనివలన ప్రేమ మనలో పరిపూర్ణము చేయబడి యున్నది; ఏలయనగా ఆయన ఎట్టివాడై యున్నాడో మనముకూడ ఈ లోకములో అట్టివారమై యున్నాము.

“తీర్పు రోజున”– మత్తయి 10:15; మత్తయి 11:22, మత్తయి 11:24; మత్తయి 12:36; 2 కోరింథీయులకు 5:10; 2 పేతురు 2:9; 2 పేతురు 3:7. “ధైర్యం”– 1 యోహాను 3:19, 1 యోహాను 3:21; 1 యోహాను 2:28. “పరిపూర్ణమై”– వ 12. “మనం ఆయనలాగా ఉన్నాం”– క్రీస్తులాగా – యోహాను 17:14. దేవుడు తన విశ్వాసులను తన పిల్లలుగా, తన జీవమూ ప్రేమా ఉన్నవారుగా ఎంచి తీర్పు తీరుస్తాడు.

18. ప్రేమలో భయముండదు; అంతేకాదు; పరిపూర్ణ ప్రేమ భయమును వెళ్లగొట్టును; భయము దండనతో కూడినది; భయపడువాడు ప్రేమయందు పరిపూర్ణము చేయబడినవాడు కాడు.

తీర్పు దినం గురించిన తలంపులు మన హృదయాల్లో భయం కలిగిస్తున్నాయా? అలాగైతే మనలో ఉండవలసినంత ప్రేమ లేదన్నమాట. “పరిపూర్ణ ప్రేమ”– అంటే పూర్తిగా ఎదిగి ఈడేరిన ప్రేమ. ఇది క్రీస్తు జీవితంలో కనిపించింది. ఈ ప్రేమను మనం గుర్తెరిగి మన జీవితాల్లోనూ కలిగి ఉండాలి (ఎఫెసీయులకు 3:16-19 పోల్చి చూడండి). అది మనలో ఉంటే దేవుని తీర్పు గురించి కూడా మనకు భయం ఉండదు – 2 కోరింథీయులకు 5:6-9; ఫిలిప్పీయులకు 1:21, ఫిలిప్పీయులకు 1:23; 2 తిమోతికి 4:7-8. క్రీస్తు విశ్వాసులను దేవుడు పరిపూర్ణంగా ప్రేమిస్తున్నాడు. అందువల్ల వారు కూడా పరిపూర్ణంగా ప్రేమించాలి. దేవుడు వారిని నడిపిస్తున్నది ఈ ధన్యకరమైన లక్ష్యం వైపుకే.

19. ఆయనే మొదట మనలను ప్రేమించెను గనుక మనము ప్రేమించుచున్నాము.

వ 10. నిజమైన ప్రేమ ఏమిటో దేవుడు మనకు చూపించాడు. తన ప్రేమ ద్వారా మనల్ని తన పిల్లలుగా చేసుకుని దాన్ని మనలో ఉంచాడు. రోమీయులకు 5:5 పోల్చి చూడండి.

20. ఎవడైనను నేను దేవుని ప్రేమించుచున్నానని చెప్పి, తన సహోదరుని ద్వేషించినయెడల అతడు అబద్ధికుడగును; తాను చూచిన తన సహోదరుని ప్రేమింపని వాడు తాను చూడని దేవుని ప్రేమింపలేడు.

1 యోహాను 2:9; 1 యోహాను 3:14-15. ఇతరులను ప్రేమించకుండా దేవుణ్ణి ప్రేమించవచ్చు అనుకుంటారు మనుషులు. కానీ ఇది కేవలం అసాధ్యం. మనం దేవుణ్ణి ప్రేమిస్తే ఆయన తన ప్రేమను మనలో ఉంచాడు గనుకనే అలా ప్రేమిస్తున్నాం. మనలోని ఈ దైవిక ప్రేమ మనం దేవుణ్ణి ప్రేమించినంత రూఢిగా మనుషులను కూడా ప్రేమించేలా చేస్తుంది. దేవుని పట్ల నిజ ప్రేమ, మనుషుల పట్ల నిజ ప్రేమ వేరువేరుగా ఉండవు.

21. దేవుని ప్రేమించువాడు తన సహోదరుని కూడ ప్రేమింపవలె నను ఆజ్ఞను మనమాయనవలన పొందియున్నాము.

ప్రేమించడం ఆధ్యాత్మిక అవసరత. మనం దాన్ని ఆచరణలో పెట్టాలని దేవుడు ఆజ్ఞాపిస్తున్నాడు. చేతల్లో వెల్లడయ్యే ప్రేమను గురించి ఆయన మాట్లాడుతున్నాడు.