1. ఇంత గొప్ప సాక్షి సమూహము మేఘమువలె మనలను ఆవరించియున్నందున

“సాక్షి సమూహం”– ఇలా అనువదించిన గ్రీకు పదానికి రెండు అర్థాలు ఉన్నాయి – చూస్తూవున్నవారు, ఒక దాన్ని గురించి సాక్ష్యం చెప్పేవారు. ఇక్కడ రచయిత బహుశా ఈ రెండో అర్థాన్ని దృష్టిలో పెట్టుకుని ఈ మాటను వాడి ఉండవచ్చు. బైబిల్లో ఎక్కడ చూచినా ఈ సాక్షులు మనకు కనిపిస్తారు. బైబిలు పేజీల్లో నుంచి మనలను చూస్తూ, మనకు సాక్ష్యం ఇస్తూ ఉన్నారు. విశ్వాస జీవితం మంచిదనీ, దానికి ప్రతిఫలం గొప్పదనీ, ఏ ఆటంకాన్నైనా జయించడం సాధ్యమేననీ మనకు చెప్తూ ఉన్నారు. “ఆటంకపరిచే ప్రతిదాన్నీ”– పెద్ద పెద్ద బరువులు మోసుకుంటూ పరుగు పందెంలోకి ఎవరు వెళ్తారు? విశ్వాసం పందెంలో మన వేగాన్ని తగ్గించేదేదైనా, మన దృష్టిని మరలించేదేదైనా, పరుగెత్తడం కష్టతరం చేసేదేదైనా, లేక గెలవాలన్న నిశ్చయతను పలుచన చేసేదేదైనా ఆటంకమే. అది బద్దకం కావచ్చు. లోక రీతిన బతకాలని ఆశ, క్రమశిక్షణ నచ్చక పోవడం, లేక నిరుత్సాహం మొదలైన వాటిలో ఏదైనా కావచ్చు. అన్నిటికన్నా పెద్ద ఆటంకం పాపం. రచయిత ఒక ప్రత్యేకమైన పాపం గురించి హెచ్చరిస్తున్నాడు – “సుళువుగా చిక్కులుపెట్టే పాపం”. అంటే అపనమ్మకం అని రచయిత ఉద్దేశం కావచ్చు. విశ్వాసులు పరిగెత్తే పందెంలో ఎదురయ్యే అతి పెద్ద ఆటంకం ఇదే. ఇది గమ్యం దగ్గరికి నమ్మకంతో పరిగెత్తేవారందరి వెంటా మొరిగే కుక్కలాగా వెంటపడే ఆటంకం. “యేసువైపు చూస్తూ”– యేసు పరలోకంలో ఉన్నాడు. నమ్మకంద్వారా మాత్రమే ఆయనపై మనం చూపు నిలుపుకోగలం (హెబ్రీయులకు 11:1, హెబ్రీయులకు 11:27; ఫిలిప్పీయులకు 3:13-14; 2 తిమోతికి 4:7 పోల్చి చూడండి). ఇక్కడ సాక్షులుగా ఉన్న గొప్ప మేఘంలాంటి గుంపు (11వ అధ్యాయంలోని విశ్వాసులు), తప్పించుకోవలసిన ఆటంకాలు (పాపాలు, మొ।।), పందెంలో పాల్గొనేందుకు అవసరమైన సూత్రం (ఓర్పు), అనుసరించడానికి గొప్ప ఆదర్శం (యేసు) కనిపిస్తున్నాయి. అంతంలో గొప్ప బహుమానం ఉందన్న భావాన్ని కూడా రచయిత కలిగిస్తున్నాడు. “ఓర్పుతో”– ఈ లేఖ అంతట్లోనూ నొక్కి చెప్పబడిన ఒక విషయం – హెబ్రీయులకు 3:6, హెబ్రీయులకు 3:12-14; హెబ్రీయులకు 4:11; హెబ్రీయులకు 6:11-12; హెబ్రీయులకు 10:36.

2. మనముకూడ ప్రతిభారమును, సుళువుగా చిక్కులబెట్టు పాపమును విడిచిపెట్టి, విశ్వాసమునకు కర్తయు దానిని కొనసాగించువాడునైన యేసువైపు చూచుచు, మన యెదుట ఉంచబడిన పందెములో ఓపికతో పరుగెత్తుదము. ఆయన తనయెదుట ఉంచబడిన ఆనందముకొరకై అవమానమును నిర్లక్ష్యపెట్టి, సిలువను సహించి, దేవుని సింహాసనముయొక్క కుడి పార్శ్వమున ఆసీనుడైయున్నాడు.
కీర్తనల గ్రంథము 110:1

“కర్త”– మనలో నమ్మకం గనుక ఉంటే దాన్ని మనలో కలిగించినవాడు యేసే (ఎఫెసీయులకు 2:8; ఫిలిప్పీయులకు 1:29). “కొనసాగించేవాడు”– మన నమ్మకం మరింత బలమైనదిగా, లోపం లేనిదిగా మారేలా, మనం యేసును ముఖాముఖిగా చూచే దినం వరకు అది నిలిచి ఉండేలా చేసేవాడు ఆయనే (హెబ్రీయులకు 10:39; లూకా 22:32; ఫిలిప్పీయులకు 1:6). “ఆనందం”– యేసుప్రభువు 2 కోరింథీయులకు 5:21; 1 పేతురు 2:24; యెషయా 53:5, యెషయా 53:10 లో ఉన్నవాటిని ఎలా ఓర్చుకోగలిగాడు? అవతలి వైపున ఆనందం ఆయనకోసం ఎదురుచూస్తూ ఉన్నది గనుకనే (కీర్తనల గ్రంథము 16:11). ఈ ఆనందం ఏమిటి? బహుశా తండ్రి అయిన దేవుణ్ణి సంతోషపెట్టడం, ఆయన ఇచ్చిన పనిని పూర్తి చేయడం (యోహాను 4:34) కావచ్చు. లేక అనేకమంది కుమారులను మహిమలోకి తీసుకువస్తున్న ఆనందం (హెబ్రీయులకు 2:10), లేక పాపులకు రక్షణ మార్గాన్ని తెరుస్తున్నానన్న ఆనందం (లూకా 15:7, లూకా 15:10) కావచ్చు లేక ఇవన్నీ. “అవమానాన్ని”– సిలువ మరణం అన్నిటికన్నా హీనమైన బహిరంగ అవమానం. “కూర్చున్నాడు”– హెబ్రీయులకు 10:12; హెబ్రీయులకు 1:3.

3. మీరు అలసట పడకయు మీ ప్రాణములు విసుకకయు ఉండునట్లు, పాపాత్ములు తనకు వ్యతిరేకముగ చేసిన తిరస్కార మంతయు ఓర్చుకొనిన ఆయనను తలంచుకొనుడి.
సంఖ్యాకాండము 16:38

విశ్వాస జీవితంలో యేసే విశ్వాసికి ఆదర్శం (1 పేతురు 2:21-23). మన మనసులను ఆయనను గురించిన ఆలోచనలతో నింపుకోవడం విశ్వాసులు పరుగెత్తవలసిన పందెంలో గొప్ప ప్రోత్సాహాన్ని ఇస్తుంది. హెబ్రీయులకు 3:1; కొలొస్సయులకు 3:12 కూడా చూడండి. “వ్యతిరేకత”– మత్తయి 9:3, మత్తయి 9:34; మత్తయి 12:14, మత్తయి 12:24; మత్తయి 21:23, మత్తయి 21:46; మత్తయి 22:15; మత్తయి 26:3-4, మత్తయి 26:14-16, మత్తయి 26:47-50, మత్తయి 26:65-68; మత్తయి 27:20-23, మత్తయి 27:27-31, మత్తయి 27:35-44.

4. మీరు పాపముతో పోరాడుటలో రక్తము కారునంతగా ఇంక దానిని ఎదిరింపలేదు.

విశ్వాసి జీవితం పరుగు పందెం వంటిది మాత్రమే కాదు. అదొక యుద్ధ రంగం (ఎఫెసీయులకు 6:10-18; 2 తిమోతికి 2:3; 2 తిమోతికి 4:7). పాపమే విశ్వాసికి శత్రువు. విశ్వాసి బయటనుంచి, లోపలనుంచి కూడా అది అతనితో పోరాడుతుంది (1 పేతురు 2:11; 1 యోహాను 1:8; రోమీయులకు 7:17-18). దానితో పోరు చాలించుకోవడం గొప్ప విపత్తుకు దారి తీస్తుంది.

5. మరియు నా కుమారుడా, ప్రభువు చేయు శిక్షను తృణీకరించకుము ఆయన నిన్ను గద్దించినప్పుడు విసుకకుము
సామెతలు 3:11-12

వారు తమ నమ్మకం కోసం ఇంకా చనిపోకపోయినా (వ 4), అనేక విధాలుగా బాధలు అనుభవించారు (హెబ్రీయులకు 10:32-34). నమ్మకం లేని యూదులు దీనికి కారణం దేవునికి వారిపై కోపం రావడమేనని వారితో చెప్పి ఉంటారు. రచయిత ఈ విశ్వాసులను ప్రోత్సహించడానికి ప్రయత్నిస్తున్నాడు. విశ్వాసుల జీవితాల్లో బాధలు, కష్టాలు దేవుని ప్రేమకే గానీ ఆయన కోపానికి సూచన కాదని వారు అర్థం చేసుకోవాలని కోరుతున్నాడు. వారు తన పిల్లలు కాబట్టి, వారికి గొప్ప మేలు కలగాలని దేవుడు కోరాడు కాబట్టి ఆయన వారిని శిక్షిస్తున్నాడు. దేవుడిచ్చే క్రమశిక్షణ గురించి ఐదు సత్యాలను ఇక్కడ నేర్చుకోవచ్చు. ఒకటి, విశ్వాసులందరికీ ఇది తప్పదు. “దేవుడు స్వీకరించిన ప్రతి కొడుకునూ” ఆయన శిక్షిస్తాడు (వ 6). రెండు, దేవుడు ఉపయోగించే పద్ధతి బాధకరంగా ఉంటుంది. “కొరడా దెబ్బలు” బాధపెడతాయి, సంతోషం కలిగించవు (వ 11). మూడు, క్రమశిక్షణ ఒక సూచన. అది తగిలినవారు దేవుని కొడుకులని అది చూపిస్తుంది. దేవుడు వారిపట్ల ప్రత్యేక శ్రద్ధ చూపుతున్నాడని దీని అర్థం. ఆదర్శవంతుడైన తండ్రిలాగా వారిని ఆయన ప్రేమిస్తున్నాడు, కాబట్టి వారిని క్రమశిక్షణలో ఉంచుతున్నాడు (వ 8). కొందరు అనుకుంటారు గదా, దేవునికి మనపై ప్రేమ ఉంటే మనల్నిలా చెయ్యడు. కానీ మనల్ని ప్రేమిస్తాడు గనుకనే అలా చేస్తాడు. నాలుగు, దేవుడు పంపే శిక్ష వెనుక అద్భుతమైన ఉద్దేశం ఉంది. – మనం దేవుని పవిత్రతలో పాల్గొనేలా చేయడం (వ 10). ఐదు, సహించేవారిలో (వ 7), లోబడేవారిలో (వ 9), తర్బీతు పొందిన వారిలో (వ 11) అది మంచి ఫలితాలను ఇస్తుంది. దేవుని శిక్షకు మనుషుల్లో కలిగే ప్రతిచర్య మూడు విధాలు. మనుషులు దాన్ని “చిన్నచూపు చూడవచ్చు” (వ 5) – అంటే దాన్ని లెక్కలోకి తీసుకోకుండా తిరస్కరించవచ్చు. లేక దానిని అనుభవించి నిరుత్సాహం చెందవచ్చు. లేక దేవునికి లోబడి దాని మూలంగా క్రమశిక్షణ పొందవచ్చు. నిరాకరణ, నిరుత్సాహం, లేక లొంగిపోవడం ఈ మూడింటిలో ఒకటి ఎన్నుకోవాలి. మనల్ని శిక్షించేందుకు దేవుడు ఏ పద్ధతులను ఉపయోగించు కుంటాడో రచయిత చెప్పడం లేదు. అయితే హెబ్రీయులకు 10:32-34; హెబ్రీయులకు 11:35-38 లో రాసిన సంగతుల్లాంటివి అతని మనసులో ఉండి ఉంటాయి గదా. 1 కోరింథీయులకు 11:29-32; 2 కోరింథీయులకు 12:7-10; 1 పేతురు 1:6-7 కూడా చూడండి. కీర్తనల గ్రంథము 66:10-12 పోల్చి చూడండి. సామెతలు 3:11-12. యోబు 5:17; కీర్తనల గ్రంథము 94:12; కీర్తనల గ్రంథము 119:67, కీర్తనల గ్రంథము 119:71, కీర్తనల గ్రంథము 119:75 కూడా చూడండి.

6. ప్రభువు తాను ప్రేమించువానిని శిక్షించి తాను స్వీకరించు ప్రతి కుమారుని దండించును అని కుమారులతో సంభాషించినట్లు మీతో సంభాషించు ఆయన హెచ్చరికను మరచితిరి.

7. శిక్షాఫలము పొందుటకై మీరు సహించుచున్నారు; దేవుడు కుమారులనుగా మిమ్మును చూచుచున్నాడు. తండ్రి శిక్షింపని కుమారుడెవడు?
ద్వితీయోపదేశకాండము 8:5, 2 సమూయేలు 7:14

ఇతరుల కన్నా నిజ విశ్వాసులకే ఎక్కువ విషమ పరీక్షలు, బాధలు వచ్చినట్టు ఉంటాయి (కీర్తనల గ్రంథము 73:2-14). ఇందుకు కారణం – దేవుడు వారిని కుమారులుగా చూస్తున్నాడు. తనను తాను క్రైస్తవుడుగా ఎంచుకొంటున్న వ్యక్తి దేవుడు తనను శిక్షిస్తుంటే ఆందోళన చెందకూడదు. శిక్షించకుండా ఉంటేనే ఆందోళన చెందాలి. దేవుడు సైతాను పిల్లలను క్రమశిక్షణలో ఉంచడు. వారందరినీ సరైన సమయంలో తీర్పు తీర్చి దండిస్తాడు.

8. కుమాళ్లయినవారందరు శిక్షలో పాలుపొందుచున్నారు, మీరు పొందనియెడల దుర్బీజులేగాని కుమారులు కారు.

9. మరియు శరీర సంబంధులైన తండ్రులు మనకు శిక్షకులై యుండిరి. వారి యందు భయభక్తులు కలిగి యుంటిమి; అట్లయితే ఆత్మలకు తండ్రియైన వానికి మరి యెక్కువగా లోబడి బ్రదుక వలెనుగదా?
సంఖ్యాకాండము 16:22, సంఖ్యాకాండము 27:16

“తండ్రులు”– సామెతలు 13:24; సామెతలు 19:18; సామెతలు 22:15; సామెతలు 23:13-14. “గౌరవించాం”– తల్లిదండ్రులు తమ ప్రేమ కొద్దీ తమ పిల్లలను శిక్షిస్తే పిల్లలు దాన్ని అర్థం చేసుకుని వారిని గౌరవించాలి. పిల్లల్ని సరైన విధంగా శిక్షించకపోతే తమ తల్లిదండ్రులకు అసలు తమపై ప్రేమ ఉందా అని పిల్లలు సందేహించవచ్చు. “ఆత్మల తండ్రి”– బైబిల్లో ఈ వాక్య భాగం కనిపించినది ఇక్కడొక్క చోటే (ఇలాంటి మాట సంఖ్యాకాండము 16:22; సంఖ్యాకాండము 27:16 లో కనిపిస్తున్నది). దీనిద్వారా రచయిత ఈ లోకంలోని తల్లిదండ్రులకూ పరలోకంలోని పరమ తండ్రికీ ఉన్న ఒక తేడా చూపుతున్నట్టు ఉంది. వారైతే తమ పిల్లల శరీరాలను శిక్షిస్తారు. పరమ తండ్రి అయితే ముఖ్యంగా వారి ఆత్మల విషయం చూస్తాడు.

10. వారు కొన్నిదినములమట్టుకు తమ కిష్టము వచ్చినట్టు మనలను శిక్షించిరిగాని మనము తన పరిశుద్ధతలో పాలుపొందవలెనని మన మేలుకొరకే ఆయన శిక్షించు చున్నాడు.

“పవిత్రత”– తన పిల్లలు రోజురోజుకూ ఈ లోకంలోని అవినీతి, మురికితనం నుంచి వేరైపోవాలనీ (2 కోరింథీయులకు 6:17), “పాపంతో పెనుగులాట”లో సంపూర్ణంగా జయించాలనీ (వ 4), హృదయంలో మరింత శుద్ధులు కావాలనీ (మత్తయి 5:8) దేవుడు కోరుతున్నాడు. ఈ ప్రయోజనం కోసమే ఆయన వారిని శిక్షిస్తాడు, బుద్ధి చెప్తాడు, క్రమశిక్షణలో ఉంచుతాడు. అలాంటి ఫలితాన్ని తెచ్చే కష్టాల్నీ బాధల్నీ చేతులు చాచి ఆహ్వానిద్దాం. మనల్ని అవి శుద్ధులుగా చేయడానికి తోడ్పడుతూ ఉంటే, దేవుని పవిత్రతలో మనకు మరింత భాగం లభించేలా చేస్తూ ఉంటే కొద్దిపాటి నొప్పిదేముంది? కష్టాలవల్ల కలిగే మరి కొన్ని లాభాల కోసం యోబు 3:20 నోట్ చూడండి. విశ్వాసి జీవితంలో పవిత్రత అనేది ఎప్పుడూ కొనసాగుతూ ఉండే ప్రక్రియ అని గమనించండి. దేవుడు చేసే ఒక్క క్రియ మూలంగా రెప్పపాటు కాలంలో అది కలగదు. “మేలుకే”– రోమీయులకు 8:28.

11. మరియు ప్రస్తుతమందు సమస్తశిక్షయు దుఃఖకరముగా కనబడునేగాని సంతోషకరముగా కనబడదు. అయినను దానియందు అభ్యాసము కలిగినవారికి అది నీతియను సమాధానకరమైన ఫలమిచ్చును.

విశ్వాసులంతా కోరే “ఫలాలు” ఇవే (మత్తయి 5:6). కాబట్టే ఆ ఫలాలు వచ్చేందుకు దేవుడు ఉపయోగించే పద్ధతికి మనం అభ్యంతరం చెప్పకూడదు. శిక్షించడమే ఆయన ఉపయోగించే పద్ధతి. “శిక్షణ”– కష్టాలు, బాధలు వచ్చినప్పుడు మనపై మనం జాలిపడడం, లేదా నిరుత్సాహంలో పడిపోవడం తేలికే. మనం అలా కాకుండా శిక్షణ పొందాలి. మనల్ని మనం పరీక్షించుకుని, దేవుని శిక్షకు కారణం గ్రహించి, మనల్ని మనం సరిదిద్దుకోవడం నేర్చుకోవాలి. విలాపవాక్యములు 3:40 పోల్చి చూడండి.

12. కాబట్టి వడలిన చేతులను సడలిన మోకాళ్లను బలపరచుడి.
యెషయా 35:3

చేతులు వేలాడేసి, మోకాళ్ళను జారిపోయేలా చేసుకుంటే వారు పందెంలో ఎలా పరిగెత్తగలుగుతారు?

13. మరియు కుంటికాలు బెణకక బాగుపడు నిమిత్తము మీ పాదములకు మార్గములను సరళము చేసికొనుడి.
సామెతలు 4:26

“పాదాలకు”– సామెతలు 4:25-27. మనం దేవుని శిక్షకు లోబడితే అందులో మనల్ని బాగు చేసే గుణం ఉంది.

14. అందరితో సమాధానమును పరిశుద్ధతయు కలిగి యుండుటకు ప్రయత్నించుడి. పరిశుద్ధతలేకుండ ఎవడును ప్రభువును చూడడు.
కీర్తనల గ్రంథము 34:14

“సమాధానం”– మత్తయి 5:9; రోమీయులకు 12:18. “పవిత్రత”– వ 10. పవిత్రంగా ఉండాలంటే చాలా ప్రయత్నం కావాలి. అది ఎంతో విలువైనదన్నట్టు (నిజంగా ఎంతో విలువైనదే) పవిత్రతను అనుసరించాలి. “ప్రభువును చూడరు”– చూడాలంటే పవిత్రత తప్పనిసరి (మత్తయి 5:8; 1 కోరింథీయులకు 6:9-11). పవిత్రత గురించి నోట్స్ లేవీయకాండము 20:8; యోహాను 17:17-19; మొ।।.

15. మీలో ఎవడైనను దేవుని కృపను పొందకుండ తప్పిపోవునేమో అనియు, చేదైన వేరు ఏదైనను మొలిచి కలవరపరచుటవలన అనేకులు అపవిత్రులై పోవుదురేమో అనియు,
ద్వితీయోపదేశకాండము 29:18

విశ్వాసద్రోహం, భ్రష్టత్వం గురించిన చివరి హెచ్చరిక ఇది (హెబ్రీయులకు 2:1-4; హెబ్రీయులకు 3:7-19; హెబ్రీయులకు 6:4-8; హెబ్రీయులకు 10:26-31). ఇది దేవుడు వెల్లడించిన క్రొత్త ఒడంబడికను తిరస్కరించడం గురించిన హెచ్చరిక.

16. ఒక పూట కూటి కొరకు తన జ్యేష్ఠత్వపు హక్కును అమ్మివేసిన ఏశావువంటి భ్రష్టుడైనను వ్యభిచారియైనను ఉండునేమో అనియు, జాగ్రత్తగా చూచుకొనుడి.
ఆదికాండము 25:33

17. ఏశావు ఆ తరువాత ఆశీర్వాదము పొందగోరి కన్నీళ్లు విడుచుచు దానికోసరము శ్రద్ధతో వెదకినను, మారుమనస్సుపొంద నవకాశము దొరకక విసర్జింపబడెనని మీరెరుగుదురు.

18. స్పృశించి తెలిసికొనదగినట్టియు, మండుచున్నట్టియు కొండకును, అగ్నికిని, కారు మేఘమునకును, గాఢాంధ కారమునకును, తుపానుకును,
నిర్గమకాండము 20:18-21, ద్వితీయోపదేశకాండము 4:11-12

19. బూరధ్వనికిని, మాటల ధ్వనికిని మీరు వచ్చియుండలేదు. ఒక జంతువైనను ఆ కొండను తాకినయెడల రాళ్లతో కొట్టబడవలెనని ఆజ్ఞాపించిన మాటకు వారు తాళలేక,
నిర్గమకాండము 19:16, ద్వితీయోపదేశకాండము 5:23, ద్వితీయోపదేశకాండము 5:25, నిర్గమకాండము 20:18-21, ద్వితీయోపదేశకాండము 4:11-12

20. ఆ ధ్వని వినినవారు మరి ఏ మాటయు తమతో చెప్పవలదని బతిమాలు కొనిరి.
నిర్గమకాండము 19:12-13

21. మరియు ఆ దర్శనమెంతో భయంకరముగా ఉన్నందున మోషేనేను మిక్కిలి భయపడి వణకు చున్నాననెను.
ద్వితీయోపదేశకాండము 9:19

22. ఇప్పుడైతే సీయోనను కొండకును జీవముగల దేవుని పట్టణమునకు, అనగా పరలోకపు యెరూషలేమునకును, వేవేలకొలది దేవదూతలయొద్దకును,

23. పరలోకమందు వ్రాయబడియున్న జ్యేష్టుల సంఘమునకును, వారి మహోత్సవమునకును, అందరి న్యాయాధిపతియైన దేవుని యొద్దకును, సంపూర్ణసిద్ధి పొందిన నీతిమంతుల ఆత్మల యొద్దకును,
ఆదికాండము 18:25, కీర్తనల గ్రంథము 50:6

24. క్రొత్తనిబంధనకు మధ్య వర్తియైన యేసునొద్దకును హేబెలుకంటె మరి శ్రేష్ఠముగ పలుకు ప్రోక్షణ రక్తమునకును మీరు వచ్చియున్నారు.

25. మీకు బుద్ధి చెప్పుచున్నవానిని నిరాకరింపకుండునట్లు చూచుకొనుడి. వారు భూమిమీదనుండి బుద్ధిచెప్పిన వానిని నిరాకరించినప్పుడు తప్పించుకొనకపోయినయెడల, పరలోకమునుండి బుద్ధిచెప్పుచున్న వానిని విసర్జించు మనము తప్పించుకొనకపోవుట మరి నిశ్చయముగదా.

మాట్లాడుతున్నది దేవుడు (హెబ్రీయులకు 1:1-2). “భూమి”– దేవుడు సీనాయి కొండదగ్గర మోషేద్వారా మాట్లాడాడు. “పరలోకం”– తాను పరలోకం నుంచే నేరుగా మాట్లాడుతున్నాను అన్నట్టుగా దేవుడు తన కుమారుని ద్వారా మాట్లాడాడు (యోహాను 1:18; యోహాను 8:23; యోహాను 12:49-50). మోషే ద్వారా వచ్చిన దేవుని మాటను లెక్క చేయనివారు తప్పించు కోలేదు. క్రీస్తు వాక్కును లెక్క చేయనివారు తప్పించుకునే అవకాశం అంతకన్నా తక్కువ (హెబ్రీయులకు 2:3; హెబ్రీయులకు 10:28-29; యోహాను 12:48). “విడిచిపెట్టిపోతే”– హెబ్రీయులకు 6:6; హెబ్రీయులకు 10:26.

26. అప్పు డాయన శబ్దము భూమిని చలింపచేసెను గాని యిప్పుడు నే నింకొకసారి భూమిని మాత్రమేకాక ఆకాశమును కూడ కంపింపచేతును అని మాట యిచ్చియున్నాడు.
నిర్గమకాండము 19:18, న్యాయాధిపతులు 5:4, కీర్తనల గ్రంథము 68:8, హగ్గయి 2:6

“భూమిని కదిలించింది”– నిర్గమకాండము 19:18. “ఆకాశాన్ని”– హగ్గయి 2:6.

27. ఇంకొకసారి అను మాట చలింపచేయబడనివి నిలుకడగా ఉండు నిమిత్తము అవి సృష్టింపబడినవన్నట్టు చలింపచేయబడినవి బొత్తిగా తీసి వేయబడునని అర్ధమిచ్చుచున్నది.
హగ్గయి 2:6

హెబ్రీయులకు 1:10-12; ప్రకటన గ్రంథం 6:12-14; ప్రకటన గ్రంథం 21:1. భవిష్యత్తులో ఎప్పుడో కనిపించే ఈ సృష్టి అంతా గతించి పోతుంది. కానీ దేవుని రాజ్యం, క్రొత్త ఒడంబడిక ద్వారా కలిగిన పరిపూర్ణత, వ 22-24లో ఇచ్చిన జాబితాలోని విషయాలు ఇవెన్నడూ గతించవు.

28. అందువలన మనము నిశ్చలమైన రాజ్యమును పొంది, దైవ కృప కలిగియుందము. ఆ కృప కలిగి వినయ భయభక్తులతో దేవునికి ప్రీతికరమైన సేవచేయుదము,

“రాజ్యం”– మత్తయి 4:17; రోమీయులకు 14:17 నోట్స్ చూడండి. “భయభక్తులు”– ఆదికాండము 20:11; కీర్తనల గ్రంథము 34:11-14; కీర్తనల గ్రంథము 90:11; కీర్తనల గ్రంథము 111:10; సామెతలు 1:7. దేవునిపట్ల గౌరవం, భయభక్తులు లేకుండా జ్ఞానం గానీ దేవునికి అంగీకారమైన ఆరాధన గానీ లేవు.

29. ఏలయనగా మన దేవుడు దహించు అగ్నియై యున్నాడు.
ద్వితీయోపదేశకాండము 4:24, ద్వితీయోపదేశకాండము 9:3, యెషయా 33:14

“జ్వాల”– నిర్గమకాండము 3:2 నోట్.