1. ధర్మశాస్త్రము రాబోవుచున్న మేలుల ఛాయగలదియే గాని ఆ వస్తువుల నిజస్వరూపము గలదికాదు గనుక ఆ యాజకులు ఏటేట ఎడతెగకుండ అర్పించు ఒక్కటే విధమైన బలులు వాటిని తెచ్చువారికి ఎన్నడును సంపూర్ణసిద్ధి కలుగజేయ నేరవు.

“నీడ”– హెబ్రీయులకు 8:2, హెబ్రీయులకు 8:5; హెబ్రీయులకు 9:23-24. సన్నిధి గుడారం, అర్పణలు, నియమాలు, ఆజ్ఞలు ఉన్న ధర్మశాస్త్రం మనుషులకోసం క్రీస్తు పరిచర్య, ఆయన విశ్వాసుల శాశ్వత విముక్తి అనే “మంచి విషయాలకు” సూచన లేక నీడ మాత్రమే. “పరిపూర్ణత”– వ 14; హెబ్రీయులకు 2:10; హెబ్రీయులకు 5:9; హెబ్రీయులకు 11:40; హెబ్రీయులకు 12:23. జంతు బలులు ఎవరినీ దేవుని సన్నిధికోసం సంపూర్ణంగా సిద్ధపరచడం అసాధ్యం (హెబ్రీయులకు 7:11, హెబ్రీయులకు 7:19). జంతు బలుల అర్థం కోసం లేవీయకాండము 1:2 నోట్ చూడండి.

2. ఆలాగు చేయగలిగినయెడల సేవించువారొక్కసారే శుద్ధపరచబడిన తరువాత వారి మనస్సాక్షికి పాపజ్ఞప్తి ఇకను ఉండదు గనుక వాటిని అర్పించుట మానుదురు గదా.

హెబ్రీయులకు 9:9. మనుషులకు తమ అర్పణల మూలంగా తమ పాపాలను పూర్తిగా, శాశ్వతంగా తీసివేయడం జరిగిందని అనుకుంటే వారి అంతర్వాణి శుద్ధమై ఉండి, తమ హృదయాలు తమనిక గద్దించవలసిన అవసరం లేదని వారు గ్రహించగలిగి ఉండేవారు. హెబ్రీయులకు 9:14 చూడండి.

3. అయితే ఆ బలులు అర్పించుటచేత ఏటేట పాపములు జ్ఞాపకమునకు వచ్చుచున్నవి

4. ఏలయనగా ఎడ్లయొక్కయు మేకలయొక్కయు రక్తము పాపములను తీసివేయుట అసాధ్యము.
లేవీయకాండము 16:15, లేవీయకాండము 16:21

“అసాధ్యం”– ఎందుచేత? జంతువులు మనుషుల స్థానంలో వారికి బదులుగా చనిపోవడం కుదరదు. చనిపోవలసిన ఒక వ్యక్తికి సాదృశ్యంగా సూచనగా అతని స్థానంలో ఉండగలగడం మాత్రమే వాటికి సాధ్యం. జంతువులకు నైతిక స్వభావం లేదు. అవి నోరులేని ప్రాణులు మాత్రమే. వాటి చావుకు అవి సమ్మతించలేదు. మనుషుల పాపాలకు రావలసిన శిక్షను అవి భరించలేకపోయాయి. ఈ శిక్ష ఆత్మ సంబంధమైన మరణం, దేవుని సన్నిధినుంచి శాశ్వతంగా దూరంగా ఉండడం. మత్తయి 25:41; 2 థెస్సలొనీకయులకు 1:9; ప్రకటన గ్రంథం 20:14 చూడండి. ఒక మనిషి అయినా సరే సాటి మనిషి పాపాలకోసం బలిగా పనికి రాడు. ప్రతి మనిషీ పాపాత్ముడే, తన సొంత పాపాలకోసం చనిపోవలసినవాడే గాని ఇతరుల పాపాలకోసం కాదు. ఒకవేళ పాపం అంటూ లేని మనిషి ఎవరైనా ఉంటే, పాపంకోసం బలిగా అతణ్ణి అర్పించడం సాధ్యం అయితే, మరొక మనిషి స్థానంలో మాత్రమే అతడు మరణించగలిగి ఉంటాడు గాని మనుషులందరి కోసం కాదు. అంతేగాక దేవుడు దానికి సమ్మతించాలి గాని దేవుడలా సమ్మతించడం లేదు. పాపవిమోచన, ప్రాయశ్చిత్తం గురించీ ఒకరి స్థానంలో వేరొకరు చనిపోవడం గురించీ బైబిలు నేర్పుతున్నదాన్ని మనం పూర్తిగా అర్థం చేసుకోవాలంటే ఈ క్రింది సత్యాలు మనం తెలుసుకుని ఉండాలి. పాపం అంతా దేవునికి విరుద్ధమే – కీర్తనల గ్రంథము 51:4. ఇతరులకు లేక తనకు లేక భూలోకానికి వ్యతిరేకంగా కనిపించిన పాపాలు నిజానికి దేవునికి వ్యతిరేకమైనవే. ఎందుకంటే మనుషులంతా, దేవుని సృష్టి అంతా ఆయన సొత్తే. ఎవరైనా నా ఇల్లు తగలబెట్టారంటే అది నా ఇల్లు కాబట్టి నాకు విరుద్ధంగా పాపం చేసినట్టే. ఒక మనిషి వేరొక మనిషికి హాని చేస్తే, లేక ప్రకృతిని పాడు చేస్తే అతడు దేవుని సొత్తు విషయంలో దోషి కాబట్టి దేవునికే వ్యతిరేకంగా పాపం చేస్తున్నాడన్న మాట. ఒకడు నాకు వ్యతిరేకంగా పాపం చేస్తే (ఉదా।। నా ఇల్లు తగలబెట్టాడనుకోండి), అందుకు నష్టపరిహారం కోరకుండా నేనతణ్ణి క్షమిస్తే, నాకు వ్యతిరేకంగా అతడు చేసిన పాపం యొక్క ఫలితాన్ని నేనే అనుభవిస్తున్నానన్నమాట. అందుకు సరిపోయిన ఖర్చును నేనే భరించడానికి సిద్ధంగా ఉన్నానని చూపిస్తున్నానన్నమాట. దేవుడు మనుషులందరినీ క్షమించడానికి ఇష్టపడితే వారి పాపాల ఫలితాన్ని ఆయనే భరించడానికీ, వారు చేసినదాని పరిహారాన్ని తానే ఇచ్చుకోవడానికీ ఆయన సిద్ధంగా ఉండాలి. పాపానికి శిక్ష, ప్రతీకారం తప్పక రావాలి (సంఖ్యాకాండము 31:1-3; ద్వితీయోపదేశకాండము 32:41, ద్వితీయోపదేశకాండము 32:43; యెషయా 34:8; యెషయా 47:3; రోమీయులకు 12:19). ఈ శిక్షను ఎవరు భరిస్తారు, ఎవరు భరించగలరు? మనుషులు మీరిన దేవుని ఆజ్ఞలకోసం దేవుడు విధించే న్యాయమైన శిక్ష ఎవరికి పడాలి? మనిషికి బదులుగా వధించిన జంతువుకా? ఇది అసాధ్యం. మరైతే ఎవరు ఆ శిక్ష భరించాలి? నేరం చేసినవాడే, లేదా దేవుడు తానే ఆ శిక్ష భరించాలి. పాపం లేని మనిషిగా ఈ లోకానికి వచ్చి మనుషుల పాపాలకోసం తనను తాను అర్పించుకోవడం ద్వారా ఆ శిక్షను భరించి వారి దోషాన్ని తీసివేయగలిగేది దేవుడే. దేవుడు ఇది చేశాడు. క్రీస్తు అవతారంలోని అర్థం ఇదే. పాపం లేని ఆ దైవ మానవుడు ఒక్కడే మనుషులందరి స్థానంలో చనిపోగలిగినవాడు. పాపమంతా ఆయనకు విరుద్ధంగా ఉంది. మన స్థానంలో మన పాపాన్నంతటినీ తన దేహంలో సిలువపై భరించి దానికి రావలసిన శిక్షను అనుభవించాడు – హెబ్రీయులకు 2:9; హెబ్రీయులకు 13:12; అపో. కార్యములు 20:28; 1 పేతురు 2:24. ప్రాయశ్చిత్తం, క్షమాపణ ఈ రెండూ బాధలమీదే ఆధారపడి ఉన్నాయి. ఏదో బలి జంతువు యొక్క బాధలు కాదు, మన బాధలు కాదు, దేవుడు భరించిన బాధలపైనే.

5. కాబట్టి ఆయన ఈ లోకమందు ప్రవేశించునప్పుడు ఈలాగు చెప్పుచున్నాడు. బలియు అర్పణయు నీవు కోరలేదుగానినాకొక శరీరమును అమర్చితివి.
కీర్తనల గ్రంథము 40:6-8

కీర్తనల గ్రంథము 40:6-8 నోట్స్. ఇది క్రీ.పూ. 3వ శతాబ్దం నుంచి ఉనికిలో ఉన్న పాత ఒడంబడిక గ్రీకు అనువాదం నుంచి తీసుకున్న భాగం. జంతు బలుల గురించి తన ఉపదేశం సరైనదేనని రచయిత పాత ఒడంబడికలోనుంచే ఆధారాలు చూపిస్తున్నాడు. “బలిని యజ్ఞాన్ని”– జంతు బలులు దేవునికి అవసరం లేదు. అంతకన్నా మరింత శ్రేష్ఠమైన బలి ఆయనకు కావాలి. వ 7లోని “నేను” అంటే క్రీస్తు. “నీ చిత్తమే” అంటే మనుషుల పాపాలకోసం అర్పించవలసిన బలి క్రీస్తే అన్న దేవుని చిత్తం.

6. పూర్ణహోమములును పాపపరిహారార్థబలులును నీకిష్ఠమైనవికావు.

7. అప్పుడు నేనుగ్రంథపుచుట్టలో నన్నుగూర్చి వ్రాయబడిన ప్రకారము, దేవా, నీ చిత్తము నెరవేర్చుటకు ఇదిగో నేను వచ్చియున్నానంటిని.

మత్తయి 26:39.

8. బలులు అర్పణలు పూర్ణహోమములు పాపపరి హారార్థబలులును నీవు కోరలేదనియు, అవి నీకిష్ఠమైనవి కావనియు పైని చెప్పిన తరువాత

“ధర్మశాస్త్రం ప్రకారం”– క్రీస్తు బలి అర్పణకు సాదృశ్యాలుగా ఉండాలని దేవుడు ఆ అర్పణలను నియమించాడు. అయితే అవి మనుషుల పాపాన్ని తీసివేయలేవని ఆయనకు తెలుసు.

9. ఆయన నీ చిత్తము నెరవేర్చుటకు ఇదిగో నేను వచ్చియున్నానని చెప్పుచున్నాడు. ఇవన్నియు ధర్మశాస్త్రముచొప్పున అర్పింప బడుచున్నవి. ఆ రెండవదానిని స్థిరపరచుటకు మొదటి దానిని కొట్టివేయుచున్నాడు.

“రెండో దానిని”– మొదటిదంటే పాత ఒడంబడిక, రెండోదంటే క్రొత్త ఒడంబడిక. క్రీస్తు మొదటిదాన్ని రద్దు చేశాడు – హెబ్రీయులకు 8:7, హెబ్రీయులకు 8:13.

10. యేసుక్రీస్తుయొక్క శరీరము ఒక్కసారియే అర్పింపబడుటచేత ఆ చిత్తమును బట్టి మనము పరిశుద్ధపరచబడియున్నాము.
కీర్తనల గ్రంథము 40:6-8

దేవుని సంకల్పాన్ని పూర్తిగా నెరవేర్చడం ద్వారా, విశ్వాసుల కోసం మరణించడం ద్వారా క్రీస్తు వారిని పవిత్రులుగా చేశాడు. అంటే వారిని ప్రత్యేకపరచి, దేవుని ప్రజలుగా ఉండేందుకు ప్రతిష్ఠించాడు – 1 పేతురు 2:9. పవిత్రత గురించి లేవీయకాండము 20:7; యోహాను 17:17-19 చూడండి. ఇక్కడ 10లోని ఈ మాట విశ్వాసులు గడపవలసిన పవిత్ర జీవితం గురించి చెప్పేది కాదు. ఆ మాట హెబ్రీయులకు 12:10-16 లో చూడవచ్చు.

11. మరియు ప్రతి యాజకుడు దినదినము సేవచేయుచు, పాపములను ఎన్నటికిని తీసివేయలేని ఆ బలులనే మాటిమాటికి అర్పించుచు ఉండును.
నిర్గమకాండము 29:38

“నిలిచి”– సన్నిధి గుడారంలో గానీ ఆలయంలో గానీ కుర్చీ ఒక్కటి కూడా లేదు. అంటే యాజుల పని ఎన్నటికీ పూర్తి కాదన్న విషయాన్ని ఇది సూచిస్తూ ఉండవచ్చు. “పాపాన్ని ఎన్నడూ తీసివేయలేవు”– వ 4.

12. ఈయనయైతే పాపములనిమిత్తమై సదాకాలము నిలుచు ఒక్క బలిని అర్పించి,
కీర్తనల గ్రంథము 110:1

“ఎప్పటికీ నిలిచి ఉండే”– వ 10,14; హెబ్రీయులకు 9:12, హెబ్రీయులకు 9:25-28. “కుడి వైపున”– రచయిత తన లేఖను ఎక్కడ మొదలు పెట్టాడో తిరిగి అక్కడికి వచ్చాడు – హెబ్రీయులకు 1:3. “కూర్చున్నాడు”– అంటే ఆయన చేయవలసిన బలి అర్పణ పని శాశ్వతంగా పూర్తి అయిపోయింది అని ఇది సూచిస్తున్నది. దానికి మరేదీ కలపడం అసాధ్యం. యోహాను 19:30. యాజి అనబడే వాడెవడూ చేయగల ఏదైనా ఇప్పుడు ఎవరి పాపవిముక్తికీ రక్షణకూ అవసరం కాదు.

13. అప్పటినుండి తన శత్రువులు తన పాదములకు పాదపీఠముగా చేయబడు వరకు కనిపెట్టుచు దేవుని కుడిపార్శ్యమున ఆసీనుడాయెను.
కీర్తనల గ్రంథము 110:1

“పాదాల క్రింద పీట”– హెబ్రీయులకు 1:13; కీర్తనల గ్రంథము 110:1. తండ్రి అయిన దేవుడు క్రీస్తు విరోధులను ఇంకా ఆయనకు పాదపీఠంగా చెయ్యలేదు. క్రీస్తు ఇంకా ఆ సమయం కోసం ఎదురు చూస్తున్నాడు. అది వస్తుంది – ప్రకటన గ్రంథం 11:15-18.

14. ఒక్క అర్పణచేత ఈయన పరిశుద్ధపరచబడు వారిని సదాకాలమునకు సంపూర్ణులనుగా చేసియున్నాడు.

అనేక వందల ఏళ్ళుగా యాజులు ఏటేటా వేలకొద్దీ జంతువులను బలి ఇచ్చారు. దానంతటి ఫలితంగా ఒక్క పాపం కూడా తీసివేయబడలేదు. ఒక్క మనిషి కూడా పరిపూర్ణుడు కాలేదు. కానీ క్రీస్తు ఒక్క అర్పణ విశ్వాసులందరినీ ఆయనలో శాశ్వతంగా పరిపూర్ణులను చేసింది. దీని అర్థం ఏమిటి? తన ప్రజలకోసం క్రీస్తు చేసిన అర్పణ మరి ఏ లోపమూ లేకుండా వారికి పూర్తిగా పాపవిముక్తి కలిగించింది అని దీని అర్థం (హెబ్రీయులకు 7:25 పోల్చి చూడండి). ఆయన చేసిన ఒక్క అర్పణ దేవుని ఎదుట విశ్వాసికి లోపం లేని స్థాయికి ఆధారం అయింది. దాని మూలంగా అడ్డంకులన్నీ తొలగి లోపం లేని సఖ్యత సమకూడింది. క్రీస్తు పరిపూర్ణంగా వారి పాపాలను తీసివేశాడు. ఒక్కటి కూడా వారి లెక్కలో మిగల్లేదు (రోమీయులకు 4:8; రోమీయులకు 8:33). దేవునితో లోపం లేని ఒక సంబంధాన్ని అది వారికిచ్చింది (రోమీయులకు 8:1, రోమీయులకు 8:15; 2 కోరింథీయులకు 5:18-19). వారి అంతర్వాణిని ఆయన పరిపూర్ణంగా శుద్ధి చేశాడు (హెబ్రీయులకు 9:4). ఇప్పుడు గానీ మరెప్పుడైనా గానీ దేవుని సన్నిధిలోకి వారు ప్రవేశించగలిగేలా వారిని పరిపూర్ణంగా సిద్ధపరిచాడు (వ 22; రోమీయులకు 5:2; ఎఫెసీయులకు 2:18). ఇక్కడ వాడిన “పరిపూర్ణులు” అనే మాటకు అర్థం ఇదే అని తరువాతి వచనాలవల్ల (వ 23 వరకు) మరింత స్పష్టంగా అయింది. భూమిపై విశ్వాసుల్లో తనంతట తాను ఏ లోపమూ లేక ఏ పాపమూ లేకుండా, ఎన్నడూ తప్పు చేయకుండా ఉండే పరిపూర్ణుడు ఎవడూ లేడు – యాకోబు 3:2; 1 యోహాను 1:8. అన్ని విషయాల్లోనూ పరిపూర్ణత ఏ విశ్వాసిలోనూ ఇంకా కలగలేదు – ఫిలిప్పీయులకు 3:12 లో పౌలు ఇదే మాట వాడాడు. అలాంటి పరిపూర్ణత మాత్రం ఇంకా రాబోయే కాలంలో కలుగుతుంది – 1 యోహాను 3:2. “పవిత్రపరచబడుతున్నవారిని”– బహుశా నిజ విశ్వాసులందరిలోనూ వారిని పవిత్రతను అనుసరించేలా (హెబ్రీయులకు 12:14) చేసే దేవుని పనిని ఉద్దేశించి రచయిత ఈ మాట రాసి ఉండవచ్చు. అంటే నిజ విశ్వాసులందరినీ “పవిత్ర పరచబడ్డవారు” అనేమాట సూచిస్తూ ఉంది. మత్తయి 5:6, మత్తయి 5:8; రోమీయులకు 6:15-22; రోమీయులకు 8:12-14; 1 యోహాను 3:3, 1 యోహాను 3:6, 1 యోహాను 3:9-10. క్రీస్తు తనలో విశ్వాసులందరినీ పరిపూర్ణులుగా చేశాడు. ఎవరో కొద్దిమంది మహానుభావులు, భక్తిపరులు, అసాధారణ పవిత్రులు మాత్రమే కాదు (రోమీయులకు 1:1; 1 కోరింథీయులకు 1:1; మొ।।). “శాశ్వతంగా” – హెబ్రీయులకు 5:9; హెబ్రీయులకు 9:12. వ్యక్తులుగా సమూహంగా తన ప్రజలకోసం క్రీస్తు చేసిన బలి అర్పణ ఫలితాలు శాశ్వతమైనవి, మార్పు చెందనివి.

15. ఈ విషయమై పరిశుద్ధాత్మకూడ మనకు సాక్ష్యమిచ్చు చున్నాడు.

“పవిత్రాత్మ...సాక్ష్యం”– హెబ్రీయులకు 3:7; హెబ్రీయులకు 9:8; 2 తిమోతికి 3:16; 2 పేతురు 1:21. ఇప్పుడు విశ్వాసులు పరిపూర్ణులుగా చేయబడడమంటే ఏమిటో రచయిత తెలియజేస్తున్నాడు.

16. ఏలాగనగా ఆ దినములైన తరువాత నేను వారితో చేయబోవు నిబంధన ఇదేనా ధర్మవిధులను వారి హృదయము నందుంచి వారి మనస్సుమీద వాటిని వ్రాయుదును అని చెప్పిన తరువాత

యిర్మియా 31:34. క్రీస్తు తన విశ్వాసులను తీసుకువచ్చే పరిపూర్ణతలో ఇది చాలా ప్రాముఖ్యమైన అంశం. తన ఆజ్ఞల గురించి వారికి ఆధ్యాత్మికమైన గ్రహింపును ఇచ్చి, వాటికి లోబడాలన్న కోరికనూ లోబడే సామర్థ్యాన్నీ కూడా ఇస్తాడు. క్రీస్తులో ఉన్నది ఇదే (వ 7), క్రీస్తు బలి అర్పణ ఆధారంగా దేవుడు తన ప్రజలకు ఇచ్చేది కూడా ఇదే. ఇది క్రొత్త ఒడంబడిక అతి ప్రాముఖ్యమైన లక్షణం. నిజంగా ఇది లేకుండా ఎవరైనా తాను విశ్వాసి అనుకునేందుకు నిజమైన రుజువు ఏముంది? యోహాను 14:15, యోహాను 14:23; రోమీయులకు 8:3-4; 1 కోరింథీయులకు 2:16; 2 కోరింథీయులకు 3:3 చూడండి. దేవునిపై మనసు లగ్నం కాకుండా, క్రీస్తును సేవించే మనసు లేకుండా, బైబిల్లో వెల్లడైన దేవుని సంకల్పం ప్రకారం చేయడంలో ఆనందం లేకుండా ఒక వ్యక్తి తన పాపాలు పోయాయని చెప్పుకొన్నందువల్ల లాభమేముంది? క్రొత్త ఒడంబడిక దీవెనలను విడివిడిగా చేయడం సాధ్యమా? ఒక దీవెనను తీసుకొని మరొకదాన్ని వద్దనగలమా?

17. వారి పాపములను వారి అక్రమములను ఇకను ఎన్నటికిని జ్ఞాపకముచేసికొనను అని ప్రభువు చెప్పుచున్నాడు.
యిర్మియా 31:34

క్రీస్తు తన విశ్వాసులను పరిపూర్ణులుగా చేశాడనడంలో రచయిత భావమేమిటో అర్థం చేసుకొనేందుకు ఇది కూడా సాయపడుతుంది. ఆయన వారికి పాపాలనుంచి పరిపూర్ణమైన క్షమాపణ ఇచ్చాడు. దేవుడు విశ్వాసులను నిర్దోషులుగా లెక్కించాడని పౌలు చెప్పిన మాటలకూ ఈ మాటలకూ అర్థం ఒకటే. రోమీయులకు 3:24; రోమీయులకు 4:6-8; రోమీయులకు 8:33 చూడండి. దేవుని ఎదుట విశ్వాసి స్థాయిని పరిపూర్ణమైనదిగా చేశాడు క్రీస్తు.

18. వీటి క్షమాపణ ఎక్కడ కలుగునో అక్కడ పాపపరి హారార్థబలి యికను ఎన్నడును ఉండదు.

“ఇంకెన్నడూ”– ఆ పని పూర్తిగా, పరిపూర్ణంగా, శాశ్వతంగా సమాప్తమైపోయింది. దేవునికి మరి ఏ ఇతర అర్పణ గానీ, క్రీస్తుయొక్క ఒకే అర్పణను మరో సారి చేయడం గానీ అవసరం లేదు.

19. సహోదరులారా, యేసు మనకొరకు ప్రతిష్ఠించిన మార్గమున, అనగా నూతనమైనదియు, జీవముగలదియు, ఆయన శరీరము అను తెరద్వారా యేర్పరచబడినదియునైన మార్గమున,

ప్రముఖయాజిగా, క్రొత్త ఒడంబడిక మధ్యవర్తిగా క్రీస్తును గురించి ఉపదేశించడం ఇక్కడికి ముగిస్తున్నాడు రచయిత. ఇప్పుడు ఈ సత్యం అంతటి ప్రకారమూ నడుచుకోవలసిందని విశ్వాసులందరినీ హెచ్చరిస్తున్నాడు. ఇలా చెయ్యడంలో దేవుని ఎదుట వారి స్థాయి ఎంత పరిపూర్ణంగా ఉందో వచనాల్లో మరింత స్పష్టంగా చూపిస్తున్నాడు. అతడు బైబిల్లో ఉన్న అత్యంత దివ్య వచనాలలో కొన్నింటిని రాస్తున్నాడు. “తెర”– సన్నిధి గుడారం, దేవాలయం రెంటిలోనూ పవిత్ర స్థలాన్ని, అతి పవిత్ర స్థలాన్ని వేరు చేసే తెర ఒకటి ఉండేది (హెబ్రీయులకు 9:3). అప్పుడు దేవుని సన్నిధిలోకి మార్గమింకా వెల్లడి కాలేదని ఇది సూచిస్తున్నది – హెబ్రీయులకు 9:8. ఆ తెర క్రీస్తుకు చిహ్నం. క్రీస్తు మానవ దేహంలో వచ్చి (హెబ్రీయులకు 10:5), మన పాపాలకోసం మరణించినప్పుడు దేవాలయంలోని తెర రెండుగా చినిగింది – మత్తయి 27:50-51. అంటే ఆయన మరణం దేవుని సన్నిధిలోకి మార్గాన్ని వెల్లడించింది. సిలువ మరణానికి గురియైన క్రీస్తు దేహం మనకోసం చీల్చబడింది గనుక మనం అతి పవిత్ర స్థలంలోకి ప్రవేశించగలం. “కొత్త మార్గం”– ప్రజలను దూరంగా ఉంచిన పాత ఒడంబడికతో పోల్చుకుంటే క్రీస్తు ఏర్పరచిన ఈ మార్గం కొత్తది – నిర్గమకాండము 19:21-25; నిర్గమకాండము 27:9-19. ఇది సజీవ మార్గం. ఇది క్రీస్తు జీవంపై ఆధారపడేది, ఆయనలో నమ్మకం ఉంచిన వారందరికీ కొత్త ఆధ్యాత్మిక జీవాన్ని ఇచ్చేది – యోహాను 14:6; యోహాను 3:1-4. ఇదంతా పాత ఒడంబడికలో ఉన్న జీవం లేని కర్మకాండలకు, ఆచారాలకు భిన్నమైనది.

20. ఆయన రక్తమువలన పరిశుద్ధస్థలమునందు ప్రవేశించుటకు మనకు ధైర్యము కలిగియున్నది గనుకను,

“ప్రవేశించడానికి”– పాత ఒడంబడిక కింద ప్రముఖయాజి మాత్రమే సంవత్సరానికి ఒక్క సారే అతి పవిత్ర స్థలంలోకి ప్రవేశించగలిగేవాడు (హెబ్రీయులకు 9:7). ఇప్పుడు ఏ రోజునైనా, ఏ క్షణమైన క్రీస్తు విశ్వాసికి పరలోకంలో అతి పవిత్ర స్థలంలోకి ప్రవేశించే మార్గం తెరిచి ఉంది – అంటే దేవుని సన్నిధిలోకి ఎప్పుడైనా ప్రవేశించగలం. దేవుడు విశ్వాసులందరినీ యాజులుగా చేశాడు (హెబ్రీయులకు 13:15-16; 1 పేతురు 2:9; ప్రకటన గ్రంథం 1:6). వారంతా తమ ప్రముఖ యాజిలాగా దేవుని సముఖంలోకి వెళ్ళవచ్చు. ఇదంతా యేసు రక్తం పాపం కోసం ప్రాయశ్చిత్తం చేసి దేవునికీ మనిషికీ మధ్య ఉన్న అడ్డంకిని తొలగించినందువల్లనే సాధ్యం అయింది.

21. దేవుని యింటిపైన మనకు గొప్ప యాజకుడున్నాడు గనుకను,
సంఖ్యాకాండము 12:7, జెకర్యా 6:12-13

“ఇంటిమీద”– హెబ్రీయులకు 3:6. “యాజి”– హెబ్రీయులకు 2:17; హెబ్రీయులకు 4:14; మొ।।.

22. మనస్సాక్షికి కల్మషము తోచకుండునట్లు ప్రోక్షింపబడిన హృదయములు గలవారమును, నిర్మలమైన ఉదకముతో స్నానముచేసిన శరీరములు గలవారమునై యుండి, విశ్వాసవిషయములో సంపూర్ణ నిశ్చయత కలిగి, యథార్థమైన హృదయముతో మనము దేవుని సన్ని ధానమునకు చేరుదము.
యెహెఙ్కేలు 36:25

“విశ్వాస నిశ్చయత”– హెబ్రీయులకు 11:1, హెబ్రీయులకు 11:6. హెబ్రీయులకు 3:12 పోల్చి చూడండి. విశ్వాసులకు విశ్వాసం గురించిన పూర్తి నిశ్చయత ఉండాలి. క్రీస్తు మన పాపాలను తీసివేశాడనీ ఆయన మన ప్రముఖ యాజి అనీ ఆయన చూపిన మార్గం మనల్ని దేవుని చెంతకు తెచ్చిందనీ, దేవుడు మనల్ని తన సముఖంలోకి స్వీకరిస్తున్నాడనీ మనం తెలుసుకోవాలి. ఈ విషయంలో సందేహాలకూ భయాలకూ మన హృదయాల్లో తావుండకూడదు. హెబ్రీయులకు 3:14; హెబ్రీయులకు 6:19; 1 యోహాను 5:13; 2 తిమోతికి 1:12; యోహాను 14:1; లూకా 12:32 పోల్చి చూడండి. “యథార్థ హృదయం”– లూకా 12:1; మత్తయి 5:8; యోహాను 4:23-24; 1 కోరింథీయులకు 5:8. “శుద్ధ జలం”– ఈ ఉత్తర మంతా రచయిత పాత ఒడంబడికలోని ఆరాధన వస్తువులన్నిటినీ విషయాలన్నిటినీ ఆధ్యాత్మిక వాస్తవాలకు చిహ్నాలుగా చూపుతూ వచ్చాడు. ఇక్కడ ఇదే చేస్తున్నాడు (కానీ క్రైస్తవ బాప్తిసాన్ని గురించి ఇతడు మాట్లాడుతున్నాడని కొందరు పండితులు భావించారు). నిర్గమకాండము 30:17-21; లేవీయకాండము 8:6; లేవీయకాండము 16:4 చూడండి. యాజులు శారీరకంగా కడుక్కోవడం ఇప్పటి విశ్వాసుల శరీర చర్యలను శుద్ధి చేయడానికి చిహ్నం. వారు క్రొత్త ఒడంబడిక కింద యాజులు – వ 19. వారి హృదయాల్లాగే వారి బయటి ప్రవర్తన కూడా పరిశుభ్రంగా ఉండాలి. “ప్రోక్షించబడ్డ హృదయాలు” అనేది మన అంతరంగంలోని అనుభవం గురించి తెలియజేస్తున్నది. హెబ్రీయులకు 9:13-14 చూడండి. విశ్వాసి హృదయంలో క్రీస్తు రక్తం చిలకరించబడింది. అంటే క్రీస్తు చేసిన బలి అర్పణను గురించిన గ్రహింపూ అందులో నమ్మకమూ విశ్వాసి హృదయాన్ని శుద్ధి చేశాయి. “సమీపిద్దాం”– హెబ్రీయులకు 4:16; ఎఫెసీయులకు 2:18; ఎఫెసీయులకు 3:12; రోమీయులకు 5:1-2; యాకోబు 4:8. మనం ప్రవేశించవలసిన రీతిలో ప్రవేశించగలగాలంటే పై నాలుగు విషయాలు ముఖ్యమని రచయిత చెప్తున్నాడు.

23. వాగ్దానము చేసినవాడు నమ్మదగిన వాడు గనుక మన నిరీక్షణ విషయమై మన మొప్పుకొనినది నిశ్చలముగా పట్టుకొందము.

హెబ్రీయులకు 3:6, హెబ్రీయులకు 3:14. “విశ్వసనీయుడు”– హెబ్రీయులకు 6:16-18; తీతుకు 1:2; 1 యోహాను 5:9-10. అపనమ్మకం చూపడం ద్వారా సందేహించడం ద్వారా మనమాయన్ను కించపరచకూడదు. అపనమ్మకం, సందేహం ఇవి ఆయన తన వాగ్దానాలను నిలబెట్టుకోడని భావించడంతో సమానమే గదా.

24. కొందరు మానుకొను చున్నట్టుగా, సమాజముగా కూడుట మానక, ఒకనినొకడు హెచ్చరించుచు,

రచయిత వ 19-23లో విశ్వాసులకు దేవునితో ఉన్న సంబంధాన్ని గురించి మాట్లాడాడు. ఇప్పుడు ఒకరిపట్ల ఒకరికి బాధ్యతలు ఉన్నాయని చెప్తున్నాడు. హెబ్రీయులకు 3:13; రోమీయులకు 14:19; రోమీయులకు 15:2; 1 కోరింథీయులకు 9:24; కొలొస్సయులకు 3:16 కూడా చూడండి. “ఆలోచిద్దాం”– క్రీస్తును మరింతగా ప్రేమించేలా, ఆయనకు మరింతగా సేవ చేసేలా ఇతరులను ఎలా పురిగొల్పగలమా అని మనం ఆలోచించాలి.

25. ఆ దినము సమీపించుట మీరు చూచినకొలది మరి యెక్కువగా ఆలాగు చేయుచు, ప్రేమ చూపుటకును సత్కార్యములు చేయుటకును ఒకనినొకడు పురికొల్పవలెనని ఆలోచింతము.

వ 22-25లో చేద్దాం, ఉందాం అని నాలుగు చోట్ల కనిపిస్తున్నది. అవన్నీ కూడా క్రీస్తు ఎవరో ఆయన మనకోసం చేసినదేమిటో అన్నవాటిపై ఆధారపడి ఉన్నాయి. విశ్వాసుల సభలకు వెళ్ళడం ఏ విశ్వాసీ మానుకోకూడదు. ప్రతి ఒక్కరికీ ఇతర విశ్వాసులతో సహవాసం అవసరం. ఈ విశ్వాస జీవితంలో అందరూ ఒకరినొకరు ప్రోత్సహించుకోవాలి. “ఆ దినం”– ఆ దినం దగ్గర పడడం అంటే ఏమిటి? జెరుసలం నగరం, అందులోని ఆలయం నాశనమయ్యే రోజు అని రచయిత ఉద్దేశం కావచ్చు (మత్తయి 24:1-3; లూకా 19:41-44; లూకా 21:20-24). అతడీ లేఖ రాసిన సమయానికి ఆ విధ్వంసం చాలా సమీపంలో ఉంది. లేక క్రీస్తు తిరిగి వచ్చే దినం అని అతని ఉద్దేశం కావచ్చు (హెబ్రీయులకు 9:28; మత్తయి 24:33). లేక ఈ రెంటినీ ఈ ఒక్క మాటలోనే కలిపి ఉండవచ్చు. మొదటి తరం క్రైస్తవులు ఈ రెండు సంభవాలూ దాదాపు ఒకే సమయంలో జరగవచ్చునని ఎదురు చూచేవారు.

26. మనము సత్యమునుగూర్చి అనుభవజ్ఞానము పొందిన తరువాత బుద్ధిపూర్వకముగా పాపము చేసినయెడల పాప ములకు బలియికను ఉండదు గాని

విశ్వాసద్రోహం, భ్రష్టత్వం గురించి ఇది నాలుగో హెచ్చరిక. హెబ్రీయులకు 2:1-4 నోట్ చూడండి. క్రీస్తు ద్వారా, క్రీస్తును గురించి దేవుడు వెల్లడించిన దివ్య సత్యానికి విరుద్ధంగా ఉద్దేశపూర్వకంగా పాపం చేయడం గురించి చేస్తున్న హెచ్చరిక ఇది. “పాపాలు చేస్తూ ఉంటే”– స్థిరపడిపోయిన హృదయ స్థితినీ, జీవిత విధానాన్నీ ఈ మాట సూచిస్తున్నది. ఒక్క పాపకార్యం చేయడం కాదు. వారిలో ఎవరైనా ఈ స్థితిలో పడిపోతారని అనుకుంటున్నానని రచయిత చెప్పడం లేదు. “చేస్తూ ఉంటే” అంటున్నాడు (హెబ్రీయులకు 6:6 పోల్చి చూడండి). వ 39లో తాను ఎవరికి ఈ లేఖ రాస్తున్నాడో ఆ విశ్వాసులు ఇలాంటి దోషంలో పడరని తనకు గట్టి నమ్మకం ఉన్నట్టు రాశాడు (1 యోహాను 3:9-10 పోల్చి చూడండి). రచయిత ప్రత్యేకించి ఒక రకం పాపం గురించి మాట్లాడుతున్నట్టు కనిపిస్తున్నది. విశ్వాసులు పాపం చేస్తే క్షమాపణ పొందవచ్చు (1 యోహాను 1:9; 1 యోహాను 2:1; 1 యోహాను 5:16). అయితే క్షమాపణ లేని పాపం ఒకటున్నది. ఇక్కడ ఆ పాపాన్ని వర్ణిస్తున్నాడు. అదేమిటంటే క్రీస్తును, ఆయన బలిని నిరాకరించడం, ఆయన రక్తంవల్ల కలిగిన క్రొత్త ఒడంబడికకు వీపు చూపడం, దేవుని ఆత్మ స్వరాన్ని పెడచెవిని బెట్టడం (వ 29). విశ్వాసులు ఒక్క పాపం చేస్తే వారు శాశ్వతంగా నశించిపోవచ్చునని నేర్పించేవారు ఉన్నారు. ఇది క్రొత్త ఒడంబడిక గ్రంథంలో కనిపించే ఉపదేశం కాదు – మత్తయి 6:12; 1 యోహాను 1:9; 1 యోహాను 2:1. “సత్యాన్ని గురించి తెలుసుకొన్న తరువాత” అన్న రచయిత మాటల్ని గమనించండి. “పశ్చాత్తాపపడి, నమ్మకముంచిన తరువాత” అనడం లేదు అతడు. సత్యం గురించి మనకు తెలియ వచ్చు, అయినా పశ్చాత్తాపపడి క్రీస్తులో నమ్మక ముంచడానికి మనం నిరాకరించవచ్చు. ఈ వచనంలో రచయిత మాట్లాడుతున్న పాపం అదేపనిగా నిరాకరిస్తూ ఉండడమే కావచ్చు. “పాపాలకోసం బలి ఉండదు”– ఎవరైనా క్రీస్తు బలిని నిరాకరిస్తే అతనికోసం మరి ఏ ఇతర బలినీ దేవుడు అంగీకరించడని స్పష్టమే.

27. న్యాయపు తీర్పునకు భయముతో ఎదురుచూచుటయు, విరోధులను దహింపబోవు తీక్షణమైన అగ్నియు నికను ఉండును.
యెషయా 26:11

“తీర్పు”– హెబ్రీయులకు 9:27; అపో. కార్యములు 17:31; ప్రకటన గ్రంథం 20:11-15. “విరోధులను”– క్రీస్తును గురించీ ఆయన మానవ పాపం కోసం చేసిన ఒక్క బలి అర్పణ గురించీ దేవుడు తెలియజేసిన సత్యాన్ని ఉద్దేశ పూర్వకంగా తిరస్కరించేవాడు దేవునికి శత్రువు. యోహాను 7:7; యోహాను 15:18; రోమీయులకు 5:10; యాకోబు 4:4 పోల్చి చూడండి. “అగ్నిజ్వాలలు”– హెబ్రీయులకు 12:29; 2 థెస్సలొనీకయులకు 1:7; మత్తయి 3:10; మార్కు 9:42-48; లూకా 16:24; ప్రకటన గ్రంథం 20:14.

28. ఎవడైనను మోషే ధర్మశాస్త్రమును నిరాకరించినయెడల ఇద్దరు ముగ్గురు సాక్షుల మాటమీద, కనికరింపకుండ వాని చంపించుదురు.
ద్వితీయోపదేశకాండము 17:6, ద్వితీయోపదేశకాండము 19:15

హెబ్రీయులకు 2:2; ద్వితీయోపదేశకాండము 17:6-7. ధర్మశాస్త్రం ప్రకారం మరణశిక్ష విధించవలసిన పాపాలకోసం నిర్గమకాండము 21:36 చూడండి. దానికి ఉదాహరణ సంఖ్యాకాండము 15:30-35 చూడండి.

29. ఇట్లుండగా దేవుని కుమారుని, పాదములతో త్రొక్కి, తాను పరిశుద్ధపరచబడుటకు సాధనమైన నిబంధన రక్తమును అపవిత్రమైనదిగా ఎంచి, కృపకు మూలమగు ఆత్మను తిరస్కరించినవాడు ఎంత ఎక్కువైన దండనకు పాత్రుడుగా ఎంచబడునని మీకు తోచును?
నిర్గమకాండము 24:8

30. పగతీర్చుట నా పని, నేనే ప్రతిఫలమిత్తుననియు మరియు ప్రభువు తన ప్రజలకు తీర్పు తీర్చును అనియు చెప్పినవానిని ఎరుగుదుము గదా.
ద్వితీయోపదేశకాండము 32:35-36, కీర్తనల గ్రంథము 135:14

ద్వితీయోపదేశకాండము 32:35-36; కీర్తనల గ్రంథము 135:14.

31. జీవముగల దేవుని చేతిలో పడుట భయంకరము.

దేవుడు పవిత్రుడు, పాపాన్ని అసహ్యించుకుంటాడు. అపనమ్మకం తిరుగుబాటులను తప్పక శిక్షిస్తాడు గనుక ఇది భయంకరమైన విషయం. మనం గనుక దేవుని సత్యాన్ని స్వీకరించి దాన్ని అనుసరిస్తే, వ 19-25లో ఆయన చెప్పినట్టుగా చేస్తే దీని గురించి మనమేమీ ఆందోళన చెందవలసిన అవసరం లేదు.

32. అయితే మీరు వెలిగింపబడినమీదట, శ్రమలతో కూడిన గొప్ప పోరాటము సహించిన పూర్వపుదినములు జ్ఞాపకము తెచ్చుకొనుడి.

రచయిత హెబ్రీయులకు 6:9-12 లో భ్రష్టత్వం గురించి హెచ్చరించిన తరువాత చేసినట్టే ఇక్కడ కూడా చేస్తున్నాడు. వారు పాపవిముక్తి, రక్షణ పొందినవారనీ, 26-29లోని పాపం జరిగించరనీ తాను నమ్ముతున్నట్టు వారికి తెలియాలని అతని ఉద్దేశం. తమ క్రియల ద్వారా తమ నమ్మకాన్ని అలానే నిరూపిస్తూ నిబ్బరం కలిగి కొనసాగాలని అతడు కోరుతున్నాడు. బాధలు కలిగినప్పుడు వారిలో కనిపించిన స్థిరత్వం, క్రీస్తుకు చెందిన ఇతరుల పట్ల వారి ప్రేమ, క్రీస్తుకోసం అన్నిటినీ పోగొట్టుకోవడానికి వారు సిద్ధపడిన స్థితి ఇదంతా వారి నమ్మకం వాస్తవమైనది అనేందుకు రుజువు. “పోరాటం” (వ 32) – వ 26; అపో. కార్యములు 26:18; 2 కోరింథీయులకు 4:6; 2 తిమోతికి 3:12. “శాశ్వతమైన ఆస్తి” (వ 34) – హెబ్రీయులకు 6:12; మత్తయి 6:19-20; రోమీయులకు 8:17; 1 పేతురు 1:4.

33. ఒక విధముగా చూచితే, మీరు నిందలను బాధలను అనుభవించుటచేత పదిమందిలో ఆరడిపడితిరి; మరియొక విధముగా చూచితే, వాటి ననుభ వించినవారితో పాలివారలైతిరి.

34. ఏలాగనగా మీరు ఖైదులో ఉన్నవారిని కరుణించి, మీకు మరి శ్రేష్ఠమైనదియు స్థిరమైనదియునైన స్వాస్థ్యమున్నదని యెరిగి, మీ ఆస్తి కోలుపోవుటకు సంతోషముగా ఒప్పుకొంటిరి.

35. కాబట్టి మీ ధైర్యమును విడిచిపెట్టకుడి; దానికి ప్రతిఫలముగా గొప్ప బహుమానము కలుగును.

“బహుమతి దొరుకుతుంది”– మత్తయి 19:28-30; ప్రకటన గ్రంథం 22:12.

36. మీరు దేవుని చిత్తమును నెరవేర్చినవారై, వాగ్దానముపొందు నిమిత్తము మీకు ఓరిమి అవసరమై యున్నది.

“ఓర్పు”– హెబ్రీయులకు 3:6, హెబ్రీయులకు 3:14; హెబ్రీయులకు 6:11; రోమీయులకు 3:3-5; రోమీయులకు 8:24-25; యాకోబు 1:2-4. అన్నిటినీ ఓర్చుకుంటూ పోతూ, ఏమి జరిగినా క్రీస్తులో నమ్మకాన్ని నిలుపుకుంటూ ఉండడమే ప్రతి విశ్వాసీ చేయవలసిన పని. వారు అలా చేస్తారన్న నమ్మకం రచయితకు ఉంది (వ 39).

37. ఇక కాలము బహు కొంచెముగా ఉన్నది, వచ్చుచున్నవాడు ఆలస్యముచేయక వచ్చును.
హబక్కూకు 2:3-4

హబక్కూకు 2:3-4. రోమీయులకు 1:17; గలతియులకు 3:11 కూడా చూడండి. మనుషులు తనపై నమ్మకం పెట్టుకుంటే దేవుడు వారిని న్యాయవంతులుగా ఎంచుతాడు – రోమీయులకు 3:24-25, రోమీయులకు 3:28; రోమీయులకు 4:24; రోమీయులకు 5:1. న్యాయవంతుల జాబితాలోకి వచ్చిన తరువాత వారు విశ్వాస జీవితం ఆరంభిస్తారు. అది భూమిపై వారి జీవిత యాత్ర ముగిసేదాకా కొనసాగుతుంది (2 కోరింథీయులకు 5:7). హీబ్రూవారికి లేఖలో విశ్వాసం మూలంగా జీవించడం, అంతం వరకు విశ్వాసంలో కొనసాగడం గురించి రచయిత నొక్కి చెప్తూ వచ్చాడు.

38. నా యెదుట నీతిమంతుడైనవాడు విశ్వాసమూలముగా జీవించును గాని అతడు వెనుకతీసిన యెడల అతని యందు నా ఆత్మకు సంతోషముండదు.

“వెనక్కు తీస్తే”– హెబ్రీయులకు 6:6.

39. అయితే మనము నశించుటకు వెనుకతీయువారము కాము గాని ఆత్మను రక్షించుకొనుటకు విశ్వాసము కలిగినవారమై యున్నాము.

“మనం”– అంటే క్రీస్తులో నిజ విశ్వాసులు (రచయితకు తాను విశ్వాసినని తెలుసు. తానెవరికైతే ఈ లేఖ రాస్తున్నాడో వారు కూడా విశ్వాసులనేందుకు చాలినంత సాక్ష్యాధారాలు కనిపించాయి – వ 32-34; హెబ్రీయులకు 6:11). వారు గనుక వెనక్కు తీస్తే దేవునికి ఆనందం కలగదు. అది వారికి నాశనమే కలిగిస్తుంది. అయితే దేవప్రేరణ గలిగిన ఈ రచయిత వారలా వెనక్కు తీయరని చెప్తున్నాడు. నిజ విశ్వాసులు సైతం వెనక్కు తీయవచ్చనీ, వ 26; హెబ్రీయులకు 2:3; హెబ్రీయులకు 3:12; హెబ్రీయులకు 6:6; హెబ్రీయులకు 12:25 లో చెప్పిన పాపాలు జరిగించి శాశ్వత నాశనానికి వెళ్లిపోవచ్చుననీ కొందరు వాదిస్తున్నారు. విశ్వాసులు అలా చేయరని ఈ లేఖ రచయిత సూచిస్తున్నాడు. నమ్మకం కొందరు ఊహించినదాని కన్నా ఎంతో ఎక్కువ బలప్రభావాలు గలదే. అది లోకం కన్నా బలమైనది (1 యోహాను 5:4). అది పర్వతాలను కదిలించగలదు, అసాధ్యమనిపించిన వాటిని సాధ్యం చేయగలదు (మత్తయి 17:20). అది అదృశ్యంగా ఉన్నవాటిని మనం చూచేలా చెయ్యగలదు (2 కోరింథీయులకు 4:18). అది మనుషులను పాపంనుంచి రక్షించి, ఆ స్థితిలోనే ఉంచేందుకు దేవుడు ఎన్నుకొన్న సాధనం (ఎఫెసీయులకు 2:8; 1 పేతురు 1:5). అందువల్ల అది ఆ పనికి అన్నిటికన్నా శ్రేష్ఠమైన సాధనం అయి ఉండాలి. దేవుడు తానే ఎన్నుకున్న సాధనం తన ఉద్దేశాన్ని నెరవేర్చకుండా ఉంటుందా? నమ్మకం క్రీస్తు తన విశ్వాసుల కోసం చేసిన ప్రత్యేక ప్రార్థనలోని ఒక ముఖ్యాంశం (లూకా 22:32). అలాంటప్పుడు అది ఫలించకుండా భంగమైపోతుందా? అలా జరగదన్న తన నిశ్చయతను ఈ లేఖ రచయిత తెలియజేస్తున్నాడు. క్రీస్తు నిజ విశ్వాసులు దేవుడు వారికి వాగ్దానం చేసిన అంతిమ రక్షణ వరకు నమ్మకంలో కొనసాగుతారు. తరువాతి అధ్యాయంలో నమ్మకానికి ఉన్న ప్రభావం గురించి కొంత వివరిస్తున్నాడు రచయిత.