1. పూర్వకాలమందు నానాసమయములలోను నానా విధములుగాను ప్రవక్తలద్వారా మన పితరులతో మాటలాడిన దేవుడు

“నానా విధాలుగా”– ఆదికాండము 15:1, ఆదికాండము 15:12; ఆదికాండము 18:1, ఆదికాండము 18:10; ఆదికాండము 28:12-15; నిర్గమకాండము 3:1-4; నిర్గమకాండము 19:20; నిర్గమకాండము 25:22; నిర్గమకాండము 33:11; నిర్గమకాండము 34:5-7; యెహోషువ 5:13-15; 2 సమూయేలు 23:1-3; 1 రాజులు 19:11-13; యెషయా 6:1-8; యిర్మియా 1:4, యిర్మియా 1:9-10; యెహెఙ్కేలు 2:1-2; దానియేలు 8:15-18; దానియేలు 9:20-22. ప్రవక్తల ద్వారా మాట్లాడినది దేవుడే కాబట్టి మనం పాత ఒడంబడిక గ్రంథాన్ని భయభక్తులతో చదవడం చాలా ప్రాముఖ్యమైన విషయం. “మన పూర్వీకులతో”– అంటే ఇస్రాయేల్‌ప్రజలతో. “ప్రవక్తలు”– తన సందేశాలను వినిపించేందుకు దేవుడు పంపిన మనుషుల గురించి వాడిన పదం. ఆదికాండము 20:7; మొ।। నోట్స్. “దేవుడు...మాట్లాడాడు”– ఈ లేఖలోని అతి ప్రాముఖ్యమైన అంశాలలో ఇదొకటి. దేవుడు మాట్లాడినది పాత ఒడంబడిక గ్రంథంలో రాసి ఉంది. 2 పేతురు 1:21; 2 తిమోతికి 3:16. ఈ ఉత్తరంలో తరువాతి వచనాలలో దేవుడు అలా మాట్లాడడం కనిపిస్తున్నది – హెబ్రీయులకు 1:6-8, హెబ్రీయులకు 1:10; హెబ్రీయులకు 2:11-13; హెబ్రీయులకు 3:7; హెబ్రీయులకు 4:3; హెబ్రీయులకు 5:5-6; హెబ్రీయులకు 6:13-14; హెబ్రీయులకు 7:21; హెబ్రీయులకు 8:8; హెబ్రీయులకు 10:5, హెబ్రీయులకు 10:15-17; హెబ్రీయులకు 12:25-26; హెబ్రీయులకు 13:5.

2. ఈ దినముల అంతమందు కుమారుని ద్వారా మనతో మాటలాడెను. ఆయన ఆ కుమారుని సమస్తమునకును వారసునిగా నియమించెను. ఆయన ద్వారా ప్రపంచములను నిర్మించెను.
ద్వితీయోపదేశకాండము 32:18, కీర్తనల గ్రంథము 2:8

వ 1,2లో ఈ లేఖలో ఒకదానితో మరొకటి పోల్చి చెప్పిన సందర్భాల్లో మొదటిది కనిపిస్తున్నది. “తన కుమారునిద్వారా”– యోహాను 7:16-17; యోహాను 8:28; యోహాను 12:49-50; యోహాను 17:8. చివరి మహా ప్రవక్త యేసు (ద్వితీయోపదేశకాండము 18:18-19). వ 2-4లో రచయిత దేవుని కుమారుడైన యేసును గురించి తొమ్మిది ప్రాముఖ్యమైన సంగతులను చెప్పాడు. “వారసుడు”– దేవుని కుమారుడు ఎవరో, ప్రవక్తకంటే ఆయనెంత గొప్పవాడో రచయిత చూపించడం ఆరంభిస్తున్నాడు. వారసుడు అంటే అతనికి చెందాలని రాసిన ఆస్తిని స్వాధీనం చేసుకోబోయేవాడు. మనుషుల వ్యవహారాల్లోనైతే వీలునామా రాసినవాడు చనిపోయిన తరువాతే వారసుడికి ఆస్తి సంక్రమిస్తుంది. దేవుని విషయంలో ఇలా కాదు. “విశ్వాన్ని”– వ 10; ఆదికాండము 1:1; యోహాను 1:1-3; 1 కోరింథీయులకు 8:6; కొలొస్సయులకు 1:16. విశ్వం ఉనికిలోకి రాకముందే దేవుని కుమారుడు ఉన్నాడు. భూమిపై జన్మించడం ద్వారా ఆయన దేవుని కుమారుడు కాలేదు (యోహాను 17:5; కొలొస్సయులకు 1:17). “కుమారుడు” గురించి నోట్స్ మత్తయి 3:16-17; మత్తయి 11:27; యోహాను 3:16; యోహాను 5:18-23.

3. ఆయన దేవుని మహిమ యొక్క తేజస్సును, ఆయన తత్వముయొక్క మూర్తి మంతమునైయుండి, తన మహత్తుగల మాటచేత సమస్తమును నిర్వహించుచు, పాపముల విషయములో శుద్ధీకరణము తానే చేసి, దేవదూతలకంటె ఎంత శ్రేష్ఠమైన నామము పొందెనో వారికంటె అంత శ్రేష్ఠుడై, ఉన్నత లోక
కీర్తనల గ్రంథము 45:2, కీర్తనల గ్రంథము 110:1

“దేవుని మహిమాతేజస్సు”– అంటే సాక్షాత్తూ దేవ స్వభావమే. దేవుణ్ణి “వెలుగు”గా వర్ణించవచ్చు (1 యోహాను 1:5). ఆ వెలుగే గొప్ప తేజంతో ప్రకాశించడమే క్రీస్తు (లూకా 1:78-79; లూకా 2:29-32; యోహాను 1:4-5, యోహాను 1:9; యోహాను 8:12; 2 కోరింథీయులకు 4:5). సూర్యగోళం నుంచి వెలువడే తేజం ఆ గోళం కనిపించేలా చేస్తుంది. అది అక్షరాలా సూర్యగోళం స్వభావమే. అదే విధంగా యేసు దేవుణ్ణి వెల్లడి చేస్తున్నాడు. దేవుని కుమారుడుగా ఆయన స్వభావం, దేవుని స్వభావం ఒకటే – యోహాను 1:14, యోహాను 1:18; యోహాను 10:30; యోహాను 14:9. ఇతర రిఫరెన్సులు లూకా 2:11; ఫిలిప్పీయులకు 2:6 నోట్స్‌లో ఉన్నాయి. దేవుని స్వభావం ఉన్నవాడు మాత్రమే దేవుని మహిమా ప్రకాశంగా ఉండగలడు. యేసు వెలుగుకు వెలుగు. “దేవుని స్వభావ స్వరూపం”– 2 కోరింథీయులకు 4:4; కొలొస్సయులకు 1:15 పోల్చి చూడండి. శాశ్వత ఆత్మగా దేవుడు “ఎవ్వరూ సమీపించలేనంతటి వెలుగులో” అదృశ్యుడుగా నివసిస్తున్నాడు (1 తిమోతికి 6:16; యోహాను 1:18). ఆ దేవుడే క్రీస్తులో ప్రత్యక్షం అయ్యాడు. దేవుని స్వభావం, లక్షణాలు క్రీస్తులో సంపూర్ణంగా కనిపిస్తున్నాయి (కొలొస్సయులకు 2:9). దేవుడు ఎలాంటివాడో క్రీస్తు తనలో ఉన్నది ఉన్నట్టుగా చూపించాడు. ఇది కూడా దేవుని స్వభావం ఉన్నవాణ్ణి గురించి మాత్రమే చెప్పదగిన మాట. “వాక్కు”– కొలొస్సయులకు 1:17 పోల్చి చూడండి. ఆయన వాక్కు ఆయన సంకల్పాన్ని బయట పెడుతుంది. ఆయన పలికినది జరిగి తీరుతుంది. ఈ విశ్వంలో సూర్యుడు, గ్రహాలు, నక్షత్రాలు, నక్షత్ర సమూహాలు అన్నీ తమ తమ స్థానాల్లో కక్ష్యల్లో మండలాల్లో ఉంటూ కూలిపోకుండా ఉంటున్నది యేసు క్రీస్తు బలప్రభావాల వల్లనే. ఆయన మూలంగా విశ్వమంతా దాని విషయం ఆయనకున్న సంకల్పాన్ని పూర్తి చేయడానికి కొనసాగుతూ ఉన్నది. ఇందులో కూడా క్రీస్తుకు సాక్షాత్తూ దేవుని స్వభావం ఉన్నట్టు చూస్తున్నాం. విశ్వాన్నంతటినీ నిర్వహించగలిగేది దేవుడు తప్ప మరెవరు? “మన పాపాల విషయంలో శుద్ధీకరణ”– క్రీస్తు సిలువపై తనను బలిగా అర్పించుకోవడం ద్వారా మనుషులు తమ పాపాలనుంచి శుద్ధులయ్యే మార్గాన్ని కల్పించాడు (హెబ్రీయులకు 7:27; హెబ్రీయులకు 9:26; మత్తయి 26:28; మత్తయి 10:10; 1 యోహాను 1:7; యోహాను 1:29; ప్రకటన గ్రంథం 1:5). “కూర్చున్నాడు”– వ 13; హెబ్రీయులకు 2:9; హెబ్రీయులకు 10:12; కీర్తనల గ్రంథము 110:1; మార్కు 16:19; అపో. కార్యములు 2:33; ప్రకటన గ్రంథం 3:21. పాపాలను శుద్ధీకరించే పని పూర్తిగా చేసి ముగించాడు. ఆయన కూర్చుండడం దీనిని సూచిస్తుంది. యోహాను 19:30 చూడండి. విశ్వమంతటిలో ప్రభావం, మహిమలతో కూడిన అత్యున్నత స్థానంలో యేసు నివసిస్తున్నాడు (ఎఫెసీయులకు 1:21).

4. మందు మహామహుడగు దేవుని కుడిపార్శ్వమున కూర్చుం డెను.
కీర్తనల గ్రంథము 45:2

ప్రవక్తలకంటే క్రీస్తు ఘనుడని రచయిత నిరూపించడం ద్వారా (వ 1,2). ఆయన దేవదూతలకంటే కూడా ఘనుడని నిరూపించాడు. దేవదూతల గురించి నోట్స్ ఆదికాండము 16:7; మొ।। చూడండి. “పేరు”– ఆయన ఘనమైన నామం “కుమారుడు” (వ 5). దేవదూతలకంటే తక్కువవాడుగా జన్మించిన యేసు విశ్వం ఉనికిలోకి రాకముందు దేవుని కుమారునికి చెందిన పేరును వారసత్వంగా పొందాడు. క్రీస్తు ఎవరో ఈ హీబ్రూవారిలో కొందరికి సరైన గ్రహింపు లేకపోవచ్చు. క్రీస్తు కూడా ఒక రకమైన దేవదూత అనో, లేక దేవుడు తన దూతలను సృష్టించిన రీతిలోనే క్రీస్తును కూడా సృష్టించాడనో వారు అనుకుంటూ ఉండవచ్చు. అలాంటి అభిప్రాయాలు పొరపాటని ఈ అధ్యాయం చూపిస్తున్నది. అయితే దేవదూతలకంటే క్రీస్తు పైవాడని చూపించడంలో బహుశా రచయిత ఉద్దేశం ఇది కావచ్చు – ధర్మశాస్త్ర సంబంధమైన పాత ఒడంబడిక కంటే క్రీస్తు స్థాపించిన కొత్త ఒడంబడిక శ్రేష్ఠమని చూపించాలని. దేవుడు పాత ఒడంబడికను దేవదూతలద్వారా ఇచ్చాడు – హెబ్రీయులకు 2:2. “అంత శ్రేష్ఠుడయ్యాడు కూడా”– భూమికి రాకముందు దేవదూతల కంటే ఆయన పైనున్నవాడు. అయితే భూమిపై మానవుడుగా ఆయన “దేవదూతలకంటే తక్కువవాడు” (హెబ్రీయులకు 2:9). మరణంనుంచి సజీవంగా లేచిన తరువాత దేవదూతలకంటే పైస్థితికి ఎక్కిపోయాడాయన.

5. ఏలయనగా నీవు నా కుమారుడవు, నేను నేడు నిన్ను కని యున్నాను అనియు, ఇదియుగాక నేను ఆయనకు తండ్రినైయుందును, ఆయన నాకు కుమారుడైయుండును అనియు ఆ దూతలలో ఎవనితోనైన ఎప్పుడైనను చెప్పెనా ?
2 సమూయేలు 7:14, 1 దినవృత్తాంతములు 17:13, కీర్తనల గ్రంథము 2:7

కీర్తనల గ్రంథము 2:7; 2 సమూయేలు 7:14. ఏ దేవదూత “నేను దేవుని కుమారుణ్ణి” అని చెప్పుకోకూడదు (యోహాను 3:16 నోట్ చూడండి). 2 సమూయేలు 7:14 లో దేవుడు మొదటగా దావీదు కొడుకు సొలొమోను గురించి మాట్లాడుతున్నాడు. అయితే సొలొమోను కన్నా గొప్పవాడు రానున్నాడనీ ఆయన దావీదు కుమారుడూ దేవుని కుమారుడూ అయి ఉంటాడనీ ఆయనకు తెలుసు (రోమీయులకు 1:3-4; యెషయా 9:6).

6. మరియు ఆయన భూలోకమునకు ఆదిసంభూతుని మరల రప్పించినప్పుడు దేవుని దూతలందరు ఆయనకు నమస్కారము చేయవలెనని చెప్పుచున్నాడు.
ద్వితీయోపదేశకాండము 32:43, కీర్తనల గ్రంథము 97:7

“ప్రముఖుణ్ణి”– అంటే విశ్వమంతటిలో ప్రధానుణ్ణి అని అర్థం. కొలొస్సయులకు 1:15 నోట్ చూడండి. “ఆరాధించాలి”– ఈ మాటలు ద్వితీయోపదేశకాండము 32:43 లో హీబ్రూ పాత ఒడంబడిక గ్రీకు అనువాదంలో కనిపిస్తాయి. ఇక్కడ ఈ మాటలపై పవిత్రాత్మ తన ఆమోద ముద్ర వేస్తున్నాడు. కీర్తనల గ్రంథము 97:7 కూడా చూడండి. దేవదూతలు క్రీస్తును ఆరాధించాలి. కాబట్టి ఆయన దేవదూతలకంటే పైవాడని తేటతెల్లమే. క్రీస్తు దేవుని స్వభావం ఉన్నవాడన్నది కూడా స్పష్టంగానే ఉంది. అలా కాకుంటే దేవుడు ఆయన్ను ఆరాధించాలని దేవదూతలకు ఆజ్ఞాపించడు. మత్తయి 4:10 పోల్చి చూడండి. ఆరాధనకు దేవుడు మాత్రమే అర్హుడు.

7. తన దూతలను వాయువులుగాను తన సేవకులను అగ్ని జ్వాలలుగాను చేసికొనువాడు అని తన దూతలనుగూర్చి చెప్పుచున్నాడు
కీర్తనల గ్రంథము 104:4

కీర్తనల గ్రంథము 104:4; కీర్తనల గ్రంథము 45:6-7 చూడండి. ఈ వచనాలను బట్టి దేవదూతలు దేవుడు సృష్టించిన జీవులని తెలుస్తున్నది. దేవుని కుమారుడు సృష్టించబడిన వ్యక్తి కాదు. ఆయన దేవుని స్వభావం ఉన్నవాడు. వ 8లో తండ్రి అయిన దేవుడు కుమారునితో మాట్లాడుతూ ప్రవక్త అయిన దావీదు మూలంగా ఇలా పలుకుతున్నాడు – “దేవా, నీ సింహాసనం”. క్రీస్తు దేవుడు కాదని వాదించే కొందరు దీన్ని “దేవుడే నీ సింహాసనం” అని తర్జుమా చేసేందుకు ప్రయత్నించారు. ఇది చాలా విపరీతమైన తర్జుమా. నిజానికి ఈ తర్జుమా క్రీస్తును దేవునికంటే గొప్పవాణ్ణిగా చేస్తున్నది. సింహాసనంపై కూర్చునేవాడు సింహాసనం కంటే గొప్పవాడు గదా. క్రీస్తు దేవత్వం గురించి ఇతర రిఫరెన్సులు ఫిలిప్పీయులకు 2:6 నోట్‌లో ఉన్నాయి.

8. గాని తన కుమారునిగూర్చియైతే దేవా, నీ సింహాసనము నిరంతరము నిలుచునది;నీ రాజదండము న్యాయార్థమయినది.
కీర్తనల గ్రంథము 45:6-7

9. నీవు నీతిని ప్రేమించితివి దుర్నీతిని ద్వేషించితివి అందుచేత దేవుడు నీతోడివారికంటె నిన్ను హెచ్చించునట్లుగా ఆనందతైలముతో అభిషేకించెను.
కీర్తనల గ్రంథము 45:6-7

“నీ దేవుడు”– అంటే తండ్రియైన దేవుడు (ఎఫెసీయులకు 1:3).

10. మరియు ప్రభువా, నీవు ఆదియందు భూమికి పునాది వేసితివి
ఆదికాండము 1:1, కీర్తనల గ్రంథము 102:25-26

“అన్నాడు”– కీర్తనల గ్రంథము 102:25-27 చూడండి. దేవుడు ప్రవక్తలద్వారా మాట్లాడ్డానికి ఇది మరో ఉదాహరణ. ఆయన దేవుని కుమారుడైన క్రీస్తును (వ 8) “ప్రభూ” అని పిలుస్తూ, వ 10లో క్రీస్తు ఆకాశాలనూ భూమినీ సృష్టించాడని అంటున్నాడు. దేవుడొక్కడే సృష్టికర్త (ఆదికాండము 1:1), కాబట్టి క్రీస్తు దేవుని స్వభావంలో భాగస్వామి అనేందుకు ఇది మరో రుజువు. వ 11,12లో కుమారుడు ఎప్పుడూ ఉండేవాడనీ ఎప్పుడూ ఒకే తీరున ఉండేవాడనీ అంటున్నాడు. దేవునికి మాత్రమే ఉండే లక్షణాలివి. దేవుడు తప్ప ఆకాశాలను పై పంచెలాగా వేరెవరు మడిచివేయగలరు (వ 12)? క్రీస్తు అలా చేస్తాడు. 102వ కీర్తన యెహోవాదేవుణ్ణి గురించిన ప్రార్థన అని కూడా మనం గమనించాలి (కీర్తనల గ్రంథము 102:1), గానీ ఇక్కడ రచయిత ఇది క్రీస్తును గురించిన ప్రార్థన అంటున్నాడు. అంటే క్రీస్తు యెహోవా అవతారమన్నమాట. ఇతర రిఫరెన్సులు లూకా 2:11 నోట్స్‌లో ఉన్నాయి.

11. ఆకాశములుకూడ నీ చేతిపనులే అవి నశించును గాని నీవు నిలిచియుందువు అవన్నియు వస్త్రమువలె పాతగిలును

12. ఉత్తరీయమువలె వాటిని మడిచివేతువు అవి వస్త్రమువలె మార్చబడును గాని నీవు ఏకరీతిగానే యున్నావు నీ సంవత్సరములు తరుగవు అని చెప్పుచున్నాడు.

13. అయితే నేను నీ శత్రువులను నీ పాదములకు పాదపీఠముగా చేయు వరకు నా కుడిపార్శ్వమున కూర్చుండుము అని దూతలలో ఎవనినిగూర్చియైనయెప్పుడైనను చెప్పెనా?
కీర్తనల గ్రంథము 110:1

కీర్తనల గ్రంథము 110:1. తన కుమారుడైన క్రీస్తుకు మాత్రమే దేవుడు విశ్వమంతటిలో అత్యున్నత స్థానాన్ని ఇచ్చాడు.

14. వీరందరు రక్షణయను స్వాస్థ్యము పొందబోవువారికి పరి చారము చేయుటకై పంపబడిన సేవకులైన ఆత్మలు కారా?
కీర్తనల గ్రంథము 33:6, కీర్తనల గ్రంథము 33:9, కీర్తనల గ్రంథము 34:7, కీర్తనల గ్రంథము 91:11-12

క్రీస్తు మనుషులకు ప్రభువు (వ 10; రోమీయులకు 14:9; ఫిలిప్పీయులకు 2:9-11). కానీ దేవదూతలు మాత్రం క్రీస్తు విశ్వాసులకు పరిచర్య చేసేందుకు పంపబడ్డవారు. ఆ విశ్వాసులే “మోక్ష రాజ్య వారసులు”– రోమీయులకు 8:17; 1 పేతురు 1:4; మొ।।. దేవదూతలు మనకు చేసే పరిచర్య ఏమిటో రచయిత చెప్పలేదు. దేవదూతల గురించి నోట్ ఆదికాండము 16:7. ఈ మాటలతో రచయిత తన మొదటి ముఖ్యాంశాన్ని ముగించాడు. దేవుడు తన స్వభావంలో పాలు వున్న తన స్వంత కుమారుని ద్వారా మాట్లాడాడు. ఆ కుమారుడు మనుషులందరి కన్నా, దేవదూతలందరి కన్నా ఎంతో గొప్పవాడు. తన కుమారుని ద్వారా దేవుడు తన గురించి, రక్షణ గురించి, అదృశ్య లోకం గురించి తెలియజేసిన సత్యాలు ఆఖరివి అని నిస్సందేహంగా నమ్మవచ్చు. క్రొత్త ఒడంబడిక గ్రంథాన్ని రాయించిన తరువాత ఆయన తిరిగి తన పాత పద్ధతికి వెళ్ళి, తాను మాట్లాడేందుకు ఎవరైనా ప్రవక్తను ఎందుకు ఎన్నుకోవాలి? మనుషులతో ఆయన చెప్పదలచుకున్నదంతా తన స్వంత కుమారునిద్వారా ఆయన చెప్పేశాడు.