1. కావున నేనపేక్షించు నా ప్రియ సహోదరులారా, నా ఆనందమును నా కిరీటమునైయున్న నా ప్రియులారా, యిట్లు ప్రభువునందు స్థిరులై యుండుడి.

“నిలకడగా ఉండండి”– ఎఫెసీయులకు 6:11, ఎఫెసీయులకు 6:13-14 మొ।।. “నాకెంతో ఆశ”– ఫిలిప్పీయులకు 1:7-8. “నా ఆనందం, నా కిరీటం”– ఫిలిప్పీయులకు 2:16; 1 థెస్సలొనీకయులకు 2:19 – ఇప్పుడు వారు అతనికి ఆనందం. తరువాతి కాలంలో అతనికి ఆనందం, కిరీటం కూడా.

2. ప్రభువునందు ఏకమనస్సుగలవారై యుండుడని యువొదియను, సుంటుకేను బతిమాలుకొనుచున్నాను.

ఈ ఇద్దరు క్రైస్తవ స్త్రీలూ ఎవరో మనకు తెలియదు. కానీ వారి మధ్య పోట్లాట మట్టుకు పౌలుకు ఆందోళన కలిగించింది. వారి అభిప్రాయ భేదాలు సరిచేసుకొమ్మని పౌలు వారిని బ్రతిమాలుతున్నాడు. ఫిలిప్పీయులకు 2:1-2 పోల్చి చూడండి. ఒక విశ్వాసుల గుంపులో విభేదాలు ఎంత హాని కలిగించగలవో అతనికి తెలుసు – 1 కోరింథీయులకు 1:10-13; 1 కోరింథీయులకు 3:3-4.

3. అవును, నిజమైన సహకారీ ఆ స్త్రీలు క్లెమెంతుతోను నా యితర సహకారులతోను సువార్తపనిలో నాతోకూడ ప్రయాసపడినవారు గనుక వారికి సహాయము చేయుమని నిన్ను వేడుకొనుచున్నాను. ఆ సహకారుల పేరులు జీవగ్రంథమందు వ్రాయబడియున్నవి
నిర్గమకాండము 32:33, కీర్తనల గ్రంథము 69:28, దానియేలు 12:1

“నిజమైన సహకారి”– ఇతనెవరో మనకు తెలియదు. ఆ ఇద్దరు స్త్రీల మధ్య సఖ్యత చేకూర్చే సామర్థ్యం ఇతనికి ఉందని పౌలు భావించినట్టున్నాడు. “జీవ గ్రంథం”– నిర్గమకాండము 32:32; కీర్తనల గ్రంథము 69:28; కీర్తనల గ్రంథము 139:16; లూకా 10:20; ప్రకటన గ్రంథం 3:5; ప్రకటన గ్రంథం 20:12-15. వారి పేర్లు జీవ గ్రంథంలో ఉన్నాయని పౌలుకు ఎలా తెలుసు? వారి మాటలు, చేతలు గమనించడంవల్ల. 1 థెస్సలొనీకయులకు 1:4-10 పోల్చి చూడండి.

4. ఎల్లప్పుడును ప్రభువునందు ఆనందించుడి, మరల చెప్పు దును ఆనందించుడి.

ఫిలిప్పీయులకు 3:1; నెహెమ్యా 8:10.

5. మీ సహనమును సకల జనులకు తెలియబడనియ్యుడి. ప్రభువు సమీపముగా ఉన్నాడు.

“సాత్వికం”– 2 కోరింథీయులకు 10:1; 1 తిమోతికి 3:3; యాకోబు 3:17. “ప్రభువు సమీపంగా ఉన్నాడు”– అంటే ఇప్పుడు విశ్వాసులకు సమీపంగా ఉన్నాడని అర్థం కావచ్చు (కీర్తనల గ్రంథము 145:18; మత్తయి 28:20; హెబ్రీయులకు 13:5), లేదా ఆయన రెండో రాకడ సమీపంగా ఉందని కావచ్చు (యాకోబు 5:8; ప్రకటన గ్రంథం 1:3).

6. దేనినిగూర్చియు చింతపడకుడి గాని ప్రతి విషయములోను ప్రార్థన విజ్ఞాపనములచేత కృతజ్ఞతాపూర్వకముగా మీ విన్నపములు దేవునికి తెలియజేయుడి.

ఇది జీవితంలో ఎదురయ్యే పరిస్థితులన్నిటిలోనూ అస్తమానం మనకు హృదయంలో మనసులో శాంతి కలిగించే దేవుని విధానం (పాపం చేస్తున్న సమయంలో తప్ప – పాపం ఎప్పుడూ విశ్వాసిలోని శాంతిని భంగం చేస్తుంది). “కలత చెందకండి”– చింతించడం దేవునిలో మన నమ్మకం, ఆయన సత్యం గురించి మన జ్ఞానం బలహీన స్థితిలో ఉన్నాయనడానికి సూచన. చింత, నమ్మకం నూనె నీరువంటివి. అవెన్నడూ కలవవు. మత్తయి 6:25-34 చూడండి. “ఏ విషయంలోనూ” అనే మాటను గమనించండి. అతి క్లిష్ట పరిస్థితుల్లో అయినా సహజంగా ఆందోళన పుట్టించే సంఘటనల్లో అయినా సరే మనం చింత పడకూడదు. మనం విశ్వాసులమైతే దేవుడు మనలో, మన దగ్గర, మన చుట్టూ, మనతో ఉన్నాడు. మన ఊహకు అందనంతగా మనల్ని ప్రేమించే తండ్రి ఆయన. ఆయన శక్తికి పరిమితి అంటూ లేదు. దాన్ని ఆయన మనకోసం ప్రయోగిస్తాడు. మనం చేయవలసినదల్లా నమ్మకంతో మన చింతలన్నీ ఆయనపై వేసి ఆయనలో, ఆయన వాగ్దానాల్లో విశ్రమించడమే. 1 పేతురు 5:8 చూడండి. విశ్వాసుల ప్రార్థన జీవితాల గురించి చెప్తూ పౌలు నాలుగు మాటలు వాడుతున్నాడు. దేవునితో మనం మాట్లాడే వాటన్నిటినీ కలిపి చెప్పే సామాన్య పదం “ప్రార్థన”. “విన్నపం” అంటే ఏదో ఒక అవసరతను గుర్తించి మాట్లాడడం. మనవులు అంటే మనం కోరిన వాటిని స్పష్టమైన భాషలో వెల్లడించేవి (పౌలు ప్రార్థించినప్పుడు ఎంత స్పష్టంగా, తూచి తూచి మాట్లాడాడో గమనించండి – ఫిలిప్పీయులకు 1:9-11; ఎఫెసీయులకు 1:17-19). అన్ని రకాల ప్రార్థనలతో కృతజ్ఞతలు కలిసి ఉండాలి. గతంలో మన ప్రార్థనలు విన్నందుకు, ఇప్పుడు వింటున్నందుకు, మనకు మేలుకరమైనదే ఆయన చేయబోతున్నందుకూ ఆయనకు కృతజ్ఞతలు చెప్పాలి. ప్రార్థన, కృతజ్ఞతార్పణ గురించి నోట్స్ ఆదికాండము 18:32; ఎఫెసీయులకు 6:18; లేవీయకాండము 7:12-13; కీర్తనల గ్రంథము 7:17; కీర్తనల గ్రంథము 50:14-15; 1 థెస్సలొనీకయులకు 5:18; హెబ్రీయులకు 13:15. “దేవునికి”– మనుషులకు కాదు. మత్తయి 7:11 కూడా చూడండి.

7. అప్పుడు సమస్త జ్ఞానమునకు మించిన దేవుని సమాధానము యేసుక్రీస్తువలన మీ హృదయములకును మీ తలంపులకును కావలి యుండును.
యెషయా 26:3

దేవుని శాంతి అంటే ఆయన ఇచ్చే శాంతి. అది ఆయనకున్న శాంతి. దేవుడు దేని విషయంలోనూ చింతించడు. దేవుని సంకల్పానికి లొంగిపోయి ఆయనలో నమ్మకం ఉంచడం ద్వారా విశ్వాసిలో శాంతి కలుగుతుంది – యెషయా 26:3. యోహాను 14:1, యోహాను 14:27; యోహాను 16:33; కొలొస్సయులకు 3:15 కూడా చూడండి. మత్తయి 11:28-30 లో యేసు వాగ్దానం చేసిన విశ్రాంతి వంటిదే ఈ శాంతి. ఇతరులకు ఈ శాంతి కరువయ్యే పరిస్థితుల్లో విశ్వాసులకు ఇది ఉంటుంది. తమలో అలాంటి శాంతి ఎలా ఉందో వారు అర్థం చేసుకోలేక ఆశ్చర్యపోతూ ఉంటారు. వారి మనసులు, హృదయాల ద్వారాల్లో దేవుని శాంతి కావలి ఉంది, ఈ శాంతి లేనివారిని అమితంగా బాధించే ఆందోళనలనూ చింతలనూ మనసును వికలం చేసే తలంపులనూ దరిచేరనివ్వదు.

8. మెట్టుకు సహోదరులారా, యే యోగ్యతయైనను మెప్పైనను ఉండినయెడల, ఏవి సత్యమైనవో, ఏవి మాన్య మైనవో, ఏవి న్యాయమైనవో, ఏవి పవిత్రమైనవో, ఏవి రమ్యమైనవో, ఏవి ఖ్యాతిగలవో, వాటిమీద ధ్యాన ముంచుకొనుడి.

“తలపోస్తూ ఉండండి”– మన మనసు, తలంపులు ఆధ్యాత్మిక జీవితంలో అత్యంత ప్రాముఖ్యమైనవి. చాలామట్టుకు మన చర్యలను అవే నిర్ణయిస్తాయి. విశ్వాసులకు కొత్త మనసు ఉండాలి – రోమీయులకు 12:2. పరలోక సంబంధమైన విషయాలపైనే వారు మనసు పెట్టుకోవాలి – కొలొస్సయులకు 3:2. దేవుని వాక్కుకు సంబంధించిన వాటిమీదే తమ తలంపులు లగ్నం చెయ్యాలి. కీర్తనల గ్రంథము 1:1-2 చూడండి. పాప సంబంధమైనవి, లోక సంబంధమైనది, దుర్మార్గమైనవి మనలోని భ్రష్ట స్వభావానికి ఇంపుగా అనిపిస్తాయి – గలతియులకు 5:16-17. అలాంటి వాటిపై మన ఆలోచనలు పెట్టుకుంటే, వాటిని చేయాలన్న కోరిక మనలను లొంగదీయవచ్చు. మన ఆలోచనలెప్పుడూ నిజమైన, పవిత్రమైన, శ్రేష్ఠమైనవాటిమీదే ఉంటే మరింత బాగా పాపిష్టి తలంపులను తిరస్కరించి వాటిని జయించగలుగుతాం. కాబట్టి మనం చదువుతున్నవి ఏమిటో, ఎలాంటివాటిని చూస్తున్నామో, ఎలాంటి సంగీతం వింటున్నామో, మన ఊహలు మనల్ని ఎటు తీసుకుపోతున్నాయో జాగ్రత్తగా ఉండాలి. క్రీస్తు విశ్వాసులకు తగని విషయాలతో మన మనసులు నింపుకుంటే, త్వరలోనే క్రీస్తుకు తగని జీవితం మనలో కనిపిస్తుంది.

9. మరియు మీరు నావలన ఏవి నేర్చుకొని అంగీకరించితిరో, నాయందున్నట్టుగా ఏవి వింటిరో ఏవి చూచితిరో, అట్టివాటిని చేయుడి; అప్పుడు సమాధాన కర్తయగు దేవుడు మీకు తోడైయుండును.

దేవుడు విశ్వాసులకు ఆదర్శంగా పౌలును ఉంచాడు. మనం ఎలా ఆలోచించాలో, దేన్ని నమ్మాలో, దేన్ని ఆచరించాలో అతణ్ణి చూచి నేర్చుకోవచ్చు – ఫిలిప్పీయులకు 3:17. “శాంతి ప్రదాత అయిన దేవుడు”– రోమీయులకు 15:33; రోమీయులకు 16:20; 1 థెస్సలొనీకయులకు 5:23; హెబ్రీయులకు 13:20. ఇలాంటి దేవుడు మనతో ఉంటేనే మన హృదయాల్లో ఆయన శాంతి ఉంటుంది – వ 7.

10. నన్నుగూర్చి మీరిన్నాళ్లకు మరల యోచన చేయ సాగితిరని ప్రభువునందు మిక్కిలి సంతోషించితిని. ఆ విషయములో మీరు యోచనచేసియుంటిరి గాని తగిన సమయము దొరకకపోయెను.

“ఆనందించాను”– ఫిలిప్పీయులకు 1:4-5. తన గురించి, తనకేదో దొరికిందని ఆనందించడం లేదు. దాని మూలంగా దేవునినుంచి వారికి బహుమతి లభిస్తుందని ఆనందిస్తున్నాడు – వ 17.

11. నాకు కొదువ కలిగినందున నేనీలాగు చెప్పుటలేదు; నేనేస్థితిలో ఉన్నను ఆస్థితిలో సంతృప్తి కలిగియుండ నేర్చుకొని యున్నాను.

1 తిమోతికి 6:6-8; హెబ్రీయులకు 13:5; లూకా 3:14. భూమిపై నిజమైన ధనికుడెవడు? తనకున్నదానిలో తృప్తి చెందేవాడే. తృప్తి అనేది పౌలు “నేర్చుకున్న” గుణం, స్వతహాగా అతనికి ఉన్నది కాదు. దేవుణ్ణి నమ్మినవారి హృదయాలకు కావలి ఉండే శాంతితోబాటే ఈ తృప్తి కూడా ఉంటుంది. పౌలు ఏ పరిస్థితుల్లో తృప్తిగా ఉండడం నేర్చుకున్నాడో వాటిలో కొన్ని చూడండి – 2 కోరింథీయులకు 4:8-9; 2 కోరింథీయులకు 6:4-10; 2 కోరింథీయులకు 11:23-27. ఈ లేఖ అతడు ఒక భవంతిలో ఉండి సిరిసంపదలతో తులతూగుతూ రాయడం లేదు. ఖైదులో ఉండి రాస్తున్నాడు – ఫిలిప్పీయులకు 1:12-13. ధనం, ఆస్తిపాస్తులు, విలాసాలు కూడబెట్టుకోవాలన్న కొందరి ఆశలు దేవుని వాక్కుకు వ్యతిరేకం, ఆధ్యాత్మిక జీవితానికి ఎంతో హానికరం.

12. దీనస్థితిలో ఉండ నెరుగుదును, సంపన్న స్థితిలో ఉండ నెరుగుదును; ప్రతివిషయములోను అన్ని కార్యములలోను కడుపు నిండియుండుటకును ఆకలిగొనియుండుటకును, సమృద్ధికలిగియుండుటకును లేమిలో ఉండుటకును నేర్చు కొనియున్నాను.

13. నన్ను బలపరచువానియందే నేను సమస్తమును చేయగలను.

“బలపరుస్తూ”– కీర్తనల గ్రంథము 73:26; యెషయా 40:31; 2 కోరింథీయులకు 12:8, 2 కోరింథీయులకు 12:10. ఇక్కడ పౌలు నేర్చుకున్నదాన్నే ప్రతి విశ్వాసీ నేర్చుకోవాలి, నేర్చుకోగలడు కూడా. తనకు ఏమీ చేత కాదని ఎప్పుడూ అనుకోకూడదు. “ఉన్న క్రీస్తు ద్వారా”– అంటే దేవుని ద్వారా, లేక క్రీస్తు ద్వారా – రోమీయులకు 8:37; 2 కోరింథీయులకు 2:14; 2 కోరింథీయులకు 3:4-6; ఎఫెసీయులకు 1:19; ఎఫెసీయులకు 3:20. పౌలు తన శక్తిసామర్థ్యాలపై, లేక తన క్రమశిక్షణపై నమ్మకం పెట్టుకోలేదు. “అన్నిటినీ”– జీవితంలో ఎలాంటి పరిస్థితి ఎదురైనా, ఏ పని చేయవలసి వచ్చినా, ఎంత కష్టమైనా తాను విజయం సాధించగలనని అతనికి అనిపిస్తున్నది.

14. అయినను నా శ్రమలో మీరు పాలుపుచ్చుకొనినది మంచిపని.

ఫిలిప్పీయులకు 1:5. ఇవ్వడం విషయంలో వారు ఆదర్శ ప్రాయమైన సంఘం – 2 కోరింథీయులకు 8:1-5 కూడా చూడండి.

15. ఫిలిప్పీయులారా, సువార్తను నేను బోధింప నారంభించి మాసిదోనియలోనుండి వచ్చినప్పుడు ఇచ్చు విషయములోను పుచ్చుకొను విషయములోను మీరు తప్ప మరి ఏ సంఘపువారును నాతో పాలివారు కాలేదని మీకే తెలియును.

16. ఏలయనగా థెస్సలొనీకలోకూడ మీరు మాటిమాటికి నా అవసరము తీర్చుటకు సహాయము చేసితిరి.

“తెస్సలోనిక”– అపో. కార్యములు 17:1.

17. నేను యీవిని అపేక్షించి యీలాగు చెప్పుటలేదు గాని మీ లెక్కకు విస్తారఫలము రావలెనని అపేక్షించి చెప్పు చున్నాను.

వ 10.

18. నాకు సమస్తమును సమృద్ధిగా కలిగియున్నది. మీరు పంపిన వస్తువులు ఎపఫ్రొదితువలన పుచ్చుకొని యేమియు తక్కువలేక యున్నాను; అవి మనోహరమైన సువాసనయు, దేవునికి ప్రీతికరమును ఇష్టమునైన యాగమునై యున్నవి.
ఆదికాండము 8:21, నిర్గమకాండము 29:18, యెహెఙ్కేలు 20:41

“యజ్ఞం”– ఫిలిప్పీయులకు 2:17; హెబ్రీయులకు 13:16.

19. కాగా దేవుడు తన ఐశ్వర్యము చొప్పున క్రీస్తుయేసునందు మహిమలో మీ ప్రతి అవసరమును తీర్చును.

వారు పౌలు అవసరతలు తీర్చారు – వ 18. వారు పేదరికంలో ఉంటూనే ఇది చేశారు – 2 కోరింథీయులకు 8:2. దేవుడు తన ధన సమృద్ధిలో నుంచి వారి అవసరాలు తీరుస్తాడు. ఈ విషయంలో ఒక నియమం పని చేస్తూ ఉంది. లూకా 6:38; 2 కోరింథీయులకు 9:6-8 చూడండి. “ఐశ్వర్యం”– రోమీయులకు 2:4; రోమీయులకు 9:23; ఎఫెసీయులకు 1:7, ఎఫెసీయులకు 1:18; ఎఫెసీయులకు 2:7; ఎఫెసీయులకు 3:8, ఎఫెసీయులకు 3:16. తమ అవసరాలు తీర్చడానికి చాలినంత దేవుని దగ్గర లేదన్నట్టు విశ్వాసులు ఆందోళన చెందాలా? మనుషుల వైపుకు చేయి చాపాలా? ఎంతమాత్రం అవసరం లేదు – వ 6; మత్తయి 9:29. మనుషులను దేనికోసమైనా అర్థించవలసిన అవసరం వస్తే విశ్వాసి పక్షాన దేవుడే అది చేయగలడు. తన ప్రజలకు ఏదైనా అవసరత ఉంటే వారికంటే మరింత బాగా తన ప్రజల హృదయాలను ప్రేరేపించి సహాయం చేయించగలడు. ఇలాంటి వాటిని వాటికి తగిన చోటనే అంటే దేవుని చేతుల్లోనే వదిలి, ఆయన్నే నమ్ముకుని ఉండాలి. సంఖ్యాకాండము 11:23 కూడా చూడండి. “మీ అక్కరలన్నీ”– మత్తయి 6:33; మత్తయి 7:9-11; కీర్తనల గ్రంథము 23:1; కీర్తనల గ్రంథము 37:25. మన ఆధ్యాత్మిక అక్కరలను కూడా దేవుడు తీరుస్తాడు – వ 23; ఎఫెసీయులకు 1:3; ఎఫెసీయులకు 3:16-20. అక్కరలన్నీ అంటే మనం కోరినవన్నీ అని కాదు. మనకు అవసరమని దేవునికి అనిపించినవి అని అర్థం.

20. మన తండ్రియైన దేవునికి యుగ యుగములకు మహిమ కలుగును గాక. ఆమేన్‌.

రోమీయులకు 16:27.

21. ప్రతి పరిశుద్ధునికి క్రీస్తుయేసునందు వందనములు చెప్పుడి.

22. నాతోకూడ ఉన్న సహోదరులందరు మీకు వందనములు చెప్పుచున్నారు. పరిశుద్ధులందరును ముఖ్యముగా కైసరు ఇంటివారిలో ఉన్న పరిశుద్ధులును మీకు వందనములు చెప్పుచున్నారు.

“చక్రవర్తి ఇంటివారిలో”– ఫిలిప్పీయులకు 1:13. అంటే చక్రవర్తి కొలువులో ఉన్నవారో, లేక పరిపాలన వ్యవహారాలు చూచుకునే ప్రభుత్వాధికారుల్లో కావచ్చు.

23. ప్రభువైన యేసుక్రీస్తు కృప మీ ఆత్మతో ఉండునుగాక.

రోమీయులకు 1:2; రోమీయులకు 16:20.