1. ఈలాగున క్రీస్తు సేవకులమనియు, దేవుని మర్మముల విషయములో గృహనిర్వాహకులమనియు ప్రతి మనుష్యుడు మమ్మును భావింపవలెను.

1 కోరింథీయులకు 2:7; 1 కోరింథీయులకు 3:5, 1 కోరింథీయులకు 3:10; రోమీయులకు 16:25; గలతియులకు 1:11-12; ఎఫెసీయులకు 3:2-3. పౌలు, ఇతర రాయబారులు, క్రీస్తు సేవకులు వారి ఉపదేశాలను వారే కల్పించలేదు. దేవుడు వాటిని వెల్లడించి వారి సంరక్షణ క్రింద ఉంచాడు. ఈ సత్యంలోని ప్రాధాన్యతను అందరూ అర్థం చేసుకోవాలని పౌలు కోరిక.

2. మరియు గృహనిర్వాహకులలో ప్రతివాడును నమ్మకమైనవాడై యుండుట అవశ్యము.

మత్తయి 24:45; మత్తయి 25:21, మత్తయి 25:23; లూకా 16:10; లూకా 19:17. క్రీస్తు సేవకులందరికీ తప్పనిసరిగా ఉండవలసిన లక్షణం విశ్వసనీయత, తాము చేసే పనిలో నమ్మకంగా ఉండడం.

3. మీ చేతనైనను, ఏ మనుష్యునిచేతనైనను నేను విమర్శింపబడుట నాకు మిక్కిలి అల్పమైన సంగతి; నన్ను నేనే విమర్శించుకొనను.

కొరింతువారు తనలో విశ్వసనీయత ఉందని అనుకున్నారో లేదోనని పౌలుకు పెద్దగా పట్టింపు లేదు. తాను క్రీస్తు సేవకుడు, వారి సేవకుడు కాదు. క్రీస్తే తనను పంపించి, ఏమి ఉపదేశించాలో చెప్పాడు, వారు కాదు. తాను జవాబు చెప్పుకోవలసినది క్రీస్తుకే, వారికి కాదు. రోమీయులకు 14:10-12 పోల్చి చూడండి. పౌలు తనకు తాను తీర్పు తీర్చుకోలేదు. అది తన పని కాదు. ఎవరూ కూడా తనకు తాను సరిగా తీర్పు తీర్చుకోలేరని అతనికి తెలుసు. దేవుడు మాత్రమే అలా చెయ్యగలడు. ఎందుకంటే ప్రతి వ్యక్తికీ తాను ఏ పని అప్పగించాడో, వ్యక్తి ఉద్దేశాలు, పోరాటాలు, పరీక్షలు, బాధలు, అంతరంగంలో జరిగేవి ఏమిటో ఆయనకే పూర్తిగా తెలుసు. ఈ విధంగా ఇతరుల తీర్పును గురించి ఆందోళన లేనప్పుడు దేవుడు నడిపించిన రీతిలో ఆయనకు సేవ చేసేందుకు స్వేచ్ఛ ఉంటుంది.

4. నాయందు నాకు ఏ దోషమును కానరాదు; అయినను ఇందువలన నీతిమంతు డనుగా ఎంచబడను, నన్ను విమర్శించువాడు ప్రభువే.
కీర్తనల గ్రంథము 143:2

5. కాబట్టి సమయము రాకమునుపు, అనగా ప్రభువు వచ్చు వరకు, దేనిని గూర్చియు తీర్పు తీర్చకుడి. ఆయన అంధకారమందలి రహస్యములను వెలుగులోనికి తెచ్చి హృదయములలోని ఆలోచనలను బయలుపరచునప్పుడు, ప్రతి వానికిని తగిన మెప్పు దేవునివలన కలుగును.

ఇతరుల విశ్వసనీయత, వారి ఉద్దేశాల విషయంలో ఏమీ తీర్పు తీర్చకూడదని పౌలు భావం. మనుషుల బయటి ప్రవర్తన విషయంలో తీర్పు తీర్చాలని తరువాతి భాగంలో పౌలు వారికి చెప్పాడు (1 కోరింథీయులకు 5:12; 1 కోరింథీయులకు 6:1-6). హృదయంలో దాగి ఉండేవాటిని క్రీస్తు తీర్పు తీర్చగలడు, తీరుస్తాడు. ఏ మనిషీ దాన్ని చేయడానికి ప్రయత్నించకూడదు. “మెప్పు దేవుని వల్ల”– మత్తయి 25:21, మత్తయి 25:23; రోమీయులకు 2:29; 2 కోరింథీయులకు 10:18; గలతియులకు 1:10.

6. సహోదరులారా, మీరు మమ్మును చూచి, లేఖనముల యందు వ్రాసియున్న సంగతులను అతిక్రమింపకూడదని నేర్చుకొని, మీరొకని పక్షమున మరియొకని మీద ఉప్పొంగకుండునట్లు, ఈ మాటలు మీ నిమిత్తమై నా మీదను అపొల్లోమీదను పెట్టుకొని సాదృశ్యరూపముగా చెప్పియున్నాను.

కొరింతులోని విశ్వాసులతో వచ్చిన సమస్య ఏమిటంటే వారు దేవుని సేవకులను బైబిలు దృష్టిలో (అంటే లేఖనాల్లో రాసి ఉన్నదాన్ని బట్టి) చూడడం లేదు. దీనికి పౌలు తనను, అపొల్లోను ఇందుకు ఉదాహరణలుగా తీసుకొన్నాడు. వారు మనుషులకు తీర్పు తీరుస్తున్నారు, తమ ఇష్టం వచ్చినట్టు వారిని గొప్ప చేస్తున్నారు, లేదా నేరం మోపుతున్నారు. ఇలా చేయకూడదని వారు నేర్చుకోవడం అవసరం.

7. ఎందుకనగా నీకు ఆధిక్యము కలుగ జేయువాడెవడు? నీకు కలిగిన వాటిలో పరునివలన నీవు పొందనిది ఏది?పొందియుండియు పొందనట్టు నీవు అతిశ యింపనేల?

కొందరు తమ శక్తి సామర్థ్యాలను బట్టి, పదవులను బట్టి, లేదా తాము ఫలానా ఉపదేశకుణ్ణి అనుసరిస్తున్నామనే దాన్ని బట్టి అతిశయపడుతున్నారు. అక్కడున్న ఇతర క్రైస్తవులకంటే తమను అధికులుగా ఎంచుకునే విపరీతమైన పాపంలో పడిపోయారు (వారి అభిప్రాయాలు ఇందుకు సరిగ్గా వ్యతిరేకంగా ఉండవలసింది. ఫిలిప్పీయులకు 2:3 చూడండి. లూకా 18:9 పోల్చి చూడండి). వారికి ఉండదగిన విలువైనదేదైనా సరే దాన్ని దేవుడు ఉచితంగా ఇచ్చినదే అని పౌలు జ్ఞాపకం చేస్తున్నాడు. వారు అతిశయించదలచుకుంటే ఇచ్చిన దేవుని విషయంలో అతిశయించాలి, గాని తమ విషయంలో కాదు (1 కోరింథీయులకు 15:10)

8. ఇదివరకే మీరేమియు కొదువలేక తృప్తు లైతిరి, ఇది వరకే ఐశ్వర్యవంతులైతిరి, మమ్మును విడిచిపెట్టి మీరు రాజులైతిరి; అవును, మేమును మీతోకూడ రాజుల మగునట్లు మీరు రాజులగుట నాకు సంతోషమే గదా?

కొరింతువారు గొప్పలు చెప్పుకోవడం అనే సంగతిని ఖండించేందుకు పౌలు వ్యంగ్యం మాటలు ఉపయోగిస్తున్నాడు. వారి ఆధ్యాత్మిక జీవితానికి మేలు కలగాలని అతడలా చేస్తున్నాడు. పౌలు అంటున్నాడు, “మీరు క్రైస్తవ జీవితంలో ఎత్తైన శిఖరాలకు ఎక్కినట్టు మీరు అనుకుంటున్నట్టుంది. పరిపూర్ణత అనే గమ్యాన్ని చేరి, మహిమలో క్రీస్తుతో కూడా రాజ్యమేలుతున్నారని అనుకొంటున్నట్టుంది”.

9. మరణదండన విధింపబడినవారమైనట్టు దేవుడు అపొస్తలులమైన మమ్మును అందరికంటె కడపట ఉంచియున్నాడని నాకు తోచుచున్నది. మేము లోకమునకును దేవదూతలకును మనుష్యులకును వేడుకగా నున్నాము.

క్రీస్తు రాయబారులు భరించిన హింసలు, బాధల గురించి పౌలు మాట్లాడుతున్నాడు (అపో. కార్యములు 5:17-18, అపో. కార్యములు 5:40; అపో. కార్యములు 12:1-4; అపో. కార్యములు 14:19; అపో. కార్యములు 16:22-24; 2 కోరింథీయులకు 11:23-27). ఆ రోజుల్లో కొన్ని సార్లు అధికారులు నేరస్థులను చంపేముందు వారిని ప్రజల ఎదుట ఊరేగింపుగా నడిచేలా చేసేవారు. లోకంలో తన స్థానం అలా ఉన్నట్టుందని పౌలు అంటున్నాడు. ఇది ఎవరి ప్రమేయమూ లేకుండా, అదృష్టంకొద్దీ ఇలా జరిగిందని పౌలు అనుకోలేదు. ఒక జ్ఞానయుక్తమైన మంచి ఉద్దేశంతో దేవుడు ఇలా చేశాడని అతని నమ్మకం.

10. మేముక్రీస్తు నిమిత్తము వెఱ్ఱివారము, మీరు క్రీస్తునందు బుద్ధిమంతులు; మేము బలహీనులము, మీరు బలవంతులు; మీరు ఘనులు, మేము ఘనహీనులము.

“క్రీస్తు కోసం మందబుద్దులం”– లోక సంబంధమైన జ్ఞానాన్ని త్రోసిపుచ్చి లోకం వెర్రితనంగా (1 కోరింథీయులకు 1:18, 1 కోరింథీయులకు 1:23) భావించినదాన్ని ఉపదేశించేందుకు తాము సిద్ధమయ్యామని పౌలు ఉద్దేశం. కొరింతు క్రైస్తవులు నిజంగా జ్ఞానవంతులు కారు – అలాగని అనుకుంటున్నారు అంతే. “బలహీనులం”– 1 కోరింథీయులకు 2:3; 2 కోరింథీయులకు 12:9-10.

11. ఈ గడియవరకు ఆకలి దప్పులు గలవారము, దిగంబరులము; పిడిగుద్దులు తినుచున్నాము; నిలువరమైన నివాసములేక యున్నాము;

2 కోరింథీయులకు 11:27. మనుషులందరిలోకీ ఉత్తములు, ఆధ్యాత్మికంగా ఉన్నతులు అయినవారిని ఈ లోకం ఇలా చేస్తుంది. హెబ్రీయులకు 11:36-38; యోహాను 15:18-21; యోహాను 16:33 పోల్చి చూడండి.

12. స్వహస్తములతో పనిచేసి కష్టపడుచున్నాము. నిందింప బడియు దీవించుచున్నాము; హింసింపబడియు ఓర్చు కొనుచున్నాము;
కీర్తనల గ్రంథము 109:28

“కష్టపడి పని చేస్తున్నాం”– అపో. కార్యములు 18:3; అపో. కార్యములు 20:34-35. “దీవిస్తాం”– మత్తయి 5:44; లూకా 6:27-28; రోమీయులకు 12:14; 1 పేతురు 2:21-23.

13. దూషింపబడియు బతిమాలుకొను చున్నాము లోకమునకు మురికిగాను అందరికి పెంటగాను ఇప్పటివరకు ఎంచబడియున్నాము.
విలాపవాక్యములు 3:45

“చెత్త”– అంటే ఈ లోకం క్రీస్తురాయబారులను మనుషులందరిలోకి అతి హీనులుగా, నీచులుగా, నికృష్టులుగా భావించింది.

14. మిమ్మును సిగ్గుపరచవలెనని కాదుగాని నా ప్రియమైన పిల్లలని మీకు బుద్ధిచెప్పుటకు ఈ మాటలు వ్రాయు చున్నాను.

ఇలా రాయడంలో వారికి తనపై జాలి కలగాలనీ, లేక వారు తన విషయం సిగ్గుపడాలనీ పౌలు ఉద్దేశం కాదు. వారి పేద ఆధ్యాత్మిక స్థితిని అతడు చూచి వారిపై ప్రేమతో (“నా ప్రియమైన పిల్లలని”) దాని గురించి వారిని హెచ్చరించడానికే ఇలా రాశాడు.

15. క్రీస్తునందు మీకు ఉపదేశకులు పదివేలమంది యున్నను తండ్రులు అనేకులు లేరు.

దేవుని రాజ్యంలోకి ఆధ్యాత్మికంగా వారు జన్మించారు (యోహాను 1:12-13; యోహాను 3:3-8). ఇది పౌలు పరిచర్య మూలంగా జరిగింది. గలతియులకు 4:19 పోల్చి చూడండి.

16. క్రీస్తు యేసునందు సువార్త ద్వారా నేను మిమ్మును కంటిని గనుక మీరు నన్ను పోలి నడుచుకొనువారై యుండవలెనని మిమ్మును బతిమాలుకొనుచున్నాను.

ఫిలిప్పీయులకు 3:17; 1 థెస్సలొనీకయులకు 1:6. పౌలు తనవైపుకు మనుషులను ఆకర్షించుకునేందుకు ఎంతమాత్రం ప్రయత్నించడం లేదు. (1 కోరింథీయులకు 3:1-7). అయితే మనుషులు ఎలా జీవించాలి అన్నదానికి దేవుడు తననొక మాదిరిగా ఉంచాడని, తాను ఉపదేశించిన శుభవార్తను ఆయనే వెల్లడి చేశాడని పౌలుకు తెలుసు. అతడు క్రీస్తును అనుసరించే మనిషి. అందువల్ల విశ్వాసులు అతణ్ణి అనుసరించడం క్షేమకరమే – 1 కోరింథీయులకు 11:1. అతడు ఒకటి ఉపదేశించి, మరో రకంగా ప్రవర్తించే అనేకమందిలాంటి వాడు కాదు (మత్తయి 23:3; రోమీయులకు 2:21-24). వారిని కలవరపరచేందుకు వచ్చిన కపట బోధకులను అనుసరించడం క్షేమకరం కాదు.

17. ఇందునిమిత్తము ప్రభువునందు నాకు ప్రియుడును నమ్మకమైన నా కుమారుడునగు తిమోతిని మీ యొద్దకు పంపియున్నాను. అతడు క్రీస్తునందు నేను నడుచుకొను విధమును, అనగా ప్రతి స్థలములోను ప్రతి సంఘములోను నేను బోధించు విధమును, మీకు జ్ఞాపకము చేయును.

పౌలు భౌతికంగా తిమోతి తండ్రి కాదు. ఆధ్యాత్మికంగా తండ్రి (అపో. కార్యములు 16:1; 1 తిమోతికి 1:2). పౌలు ఉపదేశాలకూ, అతని జీవిత విధానానికీ సరిపోతుందని తిమోతి కొరింతువారికి చెప్పగలడు.

18. నేను మీ యొద్దకు రానని అనుకొని కొందరుప్పొంగుచున్నారు.

పౌలుకు వ్యతిరేక పక్షాల్లో ఒకదానికి చెందిన వారు వీరు. వారి లోక సంబంధమైన జ్ఞానంతో పాప సంబంధమైన గర్వంతో తామే పౌలుకంటే గొప్పవారం అనుకుంటున్నారు. అతడిక కొరింతుకు రాడని వారనుకుంటున్నారు.

19. ప్రభువు చిత్తమైతే త్వరలోనే మీయొద్దకు వచ్చి, ఉప్పొంగుచున్న వారి మాటలను కాదు వారి శక్తినే తెలిసికొందును.

“ప్రభు చిత్తమైతే”– పౌలు జీవితంలో ఎప్పుడూ తనను ఏలే తలంపుల్లో ఒకటి ఇది. యాకోబు 4:13-16 పోల్చి చూడండి.

20. దేవుని రాజ్యము మాటలతో కాదు శక్తితోనేయున్నది.

కొరింతులో పౌలుకు వ్యతిరేకంగా ఉన్నవారు మంచి ప్రసంగాలు చెయ్యగలరు గాని మంచి జీవితాలు వారికున్నాయా? క్రీస్తు నిజమైన శుభవార్తే విముక్తి కలిగించే దేవుని ప్రభావం (రోమీయులకు 1:16). అది మనుషులను కొత్తవారుగా చేస్తుంది (2 కోరింథీయులకు 5:17). ఒక మనిషి మారకపోతే అణకువ, విధేయత, పవిత్రతతో బ్రతకడానికి అతనిలో శక్తి లేకపోతే అతని మాటలు, ఉపదేశాలు వ్యర్థమే. రోమీయులకు 14:17 పోల్చి చూడండి.

21. మీరేది కోరుచున్నారు? బెత్తముతో నేను మీయొద్దకు రావలెనా? ప్రేమతోను సాత్వికమైన మనస్సుతోను రావలెనా?

“బెత్తం”– పౌలు క్రీస్తురాయబారి. కొరింతువారికి ఆధ్యాత్మికంగా తండ్రి (వ 15). వారి స్థితికి తగినట్టు క్రమశిక్షణలో పెట్టేందుకు, మందలించేందుకు, బుద్ధి చెప్పేందుకు అతనికి హక్కు ఉంది. 2 కోరింథీయులకు 13:10 చూడండి. కఠినమైన క్రమశిక్షణతో నిమిత్తం లేకుండా వారితో ప్రేమ పూర్వకమైన సహవాసం చేయడమే అతనికి ఇష్టం. అయితే ఏది కావాలో వారే తేల్చుకోవాలి. 2 కోరింథీయులకు 1:23-24 చూడండి.