1. ప్రేమ కలిగియుండుటకు ప్రయాసపడుడి. ఆత్మ సంబంధమైన వరములను ఆసక్తితో అపేక్షించుడి; విశేషముగా మీరు ప్రవచనవరము అపేక్షించుడి.

“అనుసరించండి”– మనం ప్రేమ స్వభావాన్ని తలుచుకుని అద్భుతాశ్చర్యాల్లో మునిగిపోవాలని గానీ, పౌలు రచనా ప్రవీణతను మెచ్చుకోవాలని గానీ అతడు 13వ అధ్యాయంలోని మాటలు రాయలేదు. మనం ప్రేమ విధానాన్ని అనుసరించాలని పౌలు ఉద్దేశం. “కోరండి”– 1 కోరింథీయులకు 12:31. “దేవునిమూలంగా పలికే”– 1 కోరింథీయులకు 12:10. దీన్ని బట్టి కొరింతు విశ్వాసులకు కలగగల ఆధ్యాత్మిక సామర్థ్యాలన్నిటిలోకీ దీన్ని గొప్పదిగా పౌలు ఎంచినట్టు కనబడుతున్నది. ఈ అధ్యాయంలో చాలా భాగం దేవునిమూలంగా పలికే సామర్థ్యం నానా భాషల్లో మాట్లాడడం కన్న గొప్పదని తెలియజేస్తున్నది (భాషల్లో మాట్లాడడం, దానికి అర్థం చెప్పడం అనేది, మాట్లాడేవాడు దేవునినుంచి ఒక సందేశం అందిస్తే, దేవునిమూలంగా పలకడంతో సమానం అవుతుందనుకోవచ్చు – వ 5).

2. ఎందుకనగా భాషతో మాటలాడువాడు మనుష్యులతో కాదు దేవునితో మాటలాడుచున్నాడు; మనుష్యుడెవడును గ్రహింపడుగాని వాడు ఆత్మవలన మర్మములను పలుకు చున్నాడు.

కొరింతులో ఇతర భాషల్లో మాట్లాడడం అనేది నూటికి నూరుపాళ్ళు అపో. కార్యములు 2:4-11 లో కనిపించిన ఆధ్యాత్మిక సామర్థ్యం వంటిది కాదేమో అనుకునేందుకు ఇది ఆధారమై ఉన్నట్టు అంటారు కొందరు. మరి కొందరు అది ఇది ఒకటే గాని కొరింతువారు దాన్ని దుర్వినియోగం చేశారంటారు. ఇది సాధ్యం కావచ్చు. పెంతెకొస్తు దినాన క్రీస్తు రాయబారులు తమకు తెలియని భాషలు మాట్లాడారు. అనువాదంతో పని లేకుండా అక్కడ ఉన్నవారికి ఎవరి భాష వారికి అర్థం అయింది. కొరింతులో అయితే అనువాదం లేకుండా భాషల్లో మాట్లాడేవారి మాటల్ని ఇతరులు అర్థం చేసుకోలేకపోయారు (వ 5,13). “భాష” అంటే భూమిపై ఎక్కడో మాట్లాడే ఒక భాష అనే అర్థం రాదనుకునేందుకు కారణం ఏముంది? “రహస్య సత్యాలు” – 1 కోరింథీయులకు 4:1; మత్తయి 13:11; రోమీయులకు 16:25.

3. క్షేమాభివృద్ధియు హెచ్చరికయు ఆదరణయు కలుగునట్లు, ప్రవచించువాడు మనుష్యులతో మాట లాడుచున్నాడు.

భాషల్లో మాట్లాడ్డం కంటే దేవుని మూలంగా పలకడమే గొప్ప విషయమనడానికి ఇది కారణం – అది ఇతరుల మేలుకోసం. 1 కోరింథీయులకు 10:24, 1 కోరింథీయులకు 10:33 చూడండి.

4. భాషతో మాటలాడువాడు తనకే క్షేమాభివృద్ధి కలుగజేసికొనును గాని ప్రవచించువాడు సంఘమునకు క్షేమాభివృద్ధి కలుగజేయును.

“తనకే అభివృద్ధి”– అంటే ఆధ్యాత్మికంగా బలపడడం. 1 కోరింథీయులకు 8:1; 1 కోరింథీయులకు 10:23; 1 థెస్సలొనీకయులకు 5:11 కూడా చూడండి. మాట్లాడుతున్నవాడికే అర్థం కాని భాషలో మాట్లాడ్డం అతనికి అభివృద్ధి కలిగించగలదా? ఇది అసంభవం కాదా? లేక మాట్లాడు తున్నవాడు చెప్తున్నది ఇతరులకు అర్థం కాకపోయినా అతనికి మాత్రం అర్థం అవుతుందనీ, దానిమూలంగా అతనికి అభివృద్ధి కలుగుతుందనీ పౌలు చెప్తున్నాడా? సాధారణంగా ఆధ్యాత్మిక అభివృద్ధి చెందడం అంటే సత్యాన్ని విని అర్థం చేసుకోవడం ద్వారా కలిగే ఫలితం అని మనం భావిస్తాం గదా.

5. మీరందరు భాషలతో మాటలాడవలెనని కోరుచున్నానుగాని మీరు ప్రవచింపవలెనని మరి విశేషముగా కోరుచున్నాను. సంఘము క్షేమాభివృద్ధి పొందునిమిత్తము భాషలతో మాట లాడువాడు అర్థము చెప్పితేనేగాని వానికంటె ప్రవచించువాడే శ్రేష్ఠుడు.
సంఖ్యాకాండము 11:29

భాషల్లో మాట్లాడడం అనే సామర్థ్యాన్ని పౌలు ఎంత మాత్రం చిన్నచూపు చూడడం లేదు. అది సంఘం మేలుకోసం దేవుని ఆత్మ ప్రత్యక్షత ఒకటి అని అతడే చెప్పాడు (1 కోరింథీయులకు 12:7, 1 కోరింథీయులకు 12:10). కానీ ఈ సామర్థ్యాన్ని దుర్వినియోగం చెయ్యడం గురించి పౌలు ఇక్కడ మాట్లాడుతున్నాడు. అర్థం చెప్పడం ఉంటేనే తప్ప ఆ సామర్థ్యాన్ని ఉపయోగించకూడదని చెప్తున్నాడు (వ 13,27,28). అర్థం చెప్పడం అనే మాటను బట్టి ఆ “భాషలు” అర్థంతో కూడినవేననీ, వాటిని ఇతర భాషల్లోకి తర్జుమా చేయవచ్చని సూచిస్తున్నది. తెలియని భాషలో చెప్పబడిన దాన్ని తర్జుమా చేసి వినిపిస్తే సంఘానికి అభివృద్ధి కలుగుతుందని కూడా సూచిస్తున్నది.

6. సహోదరులారా, ఆలోచించుడి; భాషలతో మాటలాడుచు నేను మీయొద్దకు వచ్చి సత్యమును బయలు పరచవలెననియైనను జ్ఞానోపదేశము చేయ వలెనని యైనను ప్రవచింపవలెననియైనను బోధింపవలెనని యైనను మీతో మాటలాడకపోయిన యెడల, నావలన మీకు ప్రయోజనమేమి?

1 కోరింథీయులకు 12:8-10. “వెల్లడి”– వ 26. సంఘంలో ఇతరులకు అందించవలసిందని ఒక వ్యక్తికి దేవుడు తెలియజేసిన సందేశం అని దీని అర్థం. ఇది దేవుని మూలంగా పలికే సామర్థ్యం లాంటిదే. సమకూడినవారిలో ఒక వ్యక్తికి హఠాత్తుగా దేవునినుంచి ఒక విషయం వెల్లడి కావచ్చు (వ 29-31). “ప్రయోజనం”– పౌలు అస్తమానం ఇతరులకు తాను చేయగలిగిన మేలు గురించే ఆలోచించాడనీ, విశ్వాసులందరికీ ఇదే ఉద్దేశం ఉండాలని కోరాడనీ మరోసారి చూస్తున్నాం (వ 12,19,26).

7. పిల్లనగ్రోవి గాని వీణ గాని, నిర్జీవ వస్తువులు నాదమిచ్చునప్పుడు, స్వరములలో భేదము కలుగజేయనియెడల, ఊదినదేదో మీటినదేదో యేలాగు తెలియును?

అనువాదం లేకుండా తెలియని భాషలో మాట్లాడడం వినేవారికి ఎలాంటి మేలూ కలిగించదని పౌలు భావం. 10,11 వచనాలు పౌలు “భాషలు” అని రాస్తున్నది కేవలం ప్రపంచంలో ఎక్కడో ఒక చోట ప్రజలు మాట్లాడే భాషలని సూచిస్తున్నట్టుంది.

8. మరియు బూర స్పష్టముకాని ధ్వని ఇచ్చు నప్పుడు యుద్ధమునకెవడు సిద్ధపడును?

9. ఆలాగే మీరు స్పష్టమైన మాటలు నాలుకతో పలికితేనేగాని పలికినది ఏలాగు తెలియును? మీరు గాలితో మాటలాడు చున్నట్టుందురు.

10. లోకమందు ఎన్నో విధములగు భాషలున్నను వాటిలో ఒకటైనను స్పష్టముకానిదై యుండదు.

11. మాటల అర్థము నాకు తెలియకుండిన యెడల మాటలాడు వానికి నేను పరదేశినిగా ఉందును, మాటలాడువాడు నాకు పరదేశిగా ఉండును.

12. మీరు ఆత్మసంబంధమైన వరముల విషయమై ఆసక్తిగలవారు గనుక సంఘమునకు క్షేమాభివృద్ధి కలుగునిమిత్తము అవి మీకు విస్తరించునట్లు ప్రయత్నము చేయుడి.

వ 3,4,6,19,26,31; 1 కోరింథీయులకు 10:24.

13. భాషతో మాటలాడువాడు అర్థము చెప్పు శక్తికలుగుటకై ప్రార్థనచేయవలెను.

అనువాదం ఉంటేనే అది ఇతరులకు అభివృద్ధి కలిగిస్తుంది.

14. నేను భాషతో ప్రార్థన చేసినయెడల నా ఆత్మ ప్రార్థనచేయును గాని నా మనస్సు ఫలవంతముగా ఉండదు.

పౌలు మనసుకూ వివేచనా శక్తికీ ఇస్తున్న ప్రాముఖ్యతను గమనించండి. “మనసు ఫలించదు” అనే కష్టమైన మాటలో పౌలు భావమేమిటి? అంటే ఒక వేళ ఎవరైనా తనకు అర్థం కాని భాషలో ప్రార్థిస్తే ఆ ప్రార్థన తన అంతరంగంలో ఉంది గానీ ఆ ప్రార్థనలో అతని మనసుకు భాగం లేదు. తాను చెప్తున్న మాటలు తనకు అర్థం కావు గనుక అలా అర్థమైతే కలిగే అభివృద్ధి కూడా అతనికి కలగదని భావం కావచ్చు. లేక తాను చెప్తున్నది తనకు అర్థం అయినా, అది ఇతరుల విషయంలో ఏ విధంగానూ ఫలించదు. ఎందుకంటే వారికేమీ అర్థం కావడం లేదని భావం కావచ్చు. ఏది ఏమైనా వ 15ను బట్టి తన ఆరాధన మాటలు ఇతరులకు అర్థం కావాలని పౌలు కోరుతున్నట్టు తెలుస్తున్నది. అందులో తన ఆత్మ, మనస్సు రెండూ పాల్గొనాలని అతని కోరిక.

15. కాబట్టి ఆత్మతో ప్రార్థన చేతును, మనస్సుతోను ప్రార్థన చేతును; ఆత్మతో పాడుదును, మనస్సుతోను పాడుదును.

16. లేనియెడల నీవు ఆత్మతో స్తోత్రము చేసినప్పుడు ఉపదేశము పొందనివాడు నీవు చెప్పుదానిని గ్రహింపలేడు గనుక, నీవు కృతజ్ఞతాస్తుతులు చెల్లించినప్పుడు ఆమేన్‌ అని వాడేలాగు పలుకును?

17. నీవైతే బాగుగానే కృతజ్ఞతాస్తుతులు చెల్లించుచున్నావు గాని యెదుటివాడు క్షేమాభివృద్ధి పొందడు.

“అభివృద్ధి”– పౌలు పదే పదే చెప్పే అంశాన్ని మరో సారి గమనించండి (వ 3,4,19,26).

18. నేను మీ యందరికంటె ఎక్కువగా భాషలతో మాటలాడుచున్నాను; అందుకు దేవుని స్తుతించెదను.

పౌలు ఈ విధంగా రాస్తున్నది తనకు భాషల్లో మాట్లాడే సామర్థ్యం లేనందువల్ల కాదు. అది అతనికి ఉంది. అందుకు దేవునికి కృతజ్ఞతలు చెప్పాడు.

19. అయినను సంఘములో భాషతో పదివేల మాటలు పలుకుటకంటె, ఇతరులకు బోధకలుగునట్లు నా మనస్సుతో అయిదు మాటలు పలుకుట మేలు.

“ఇతరుల ఉపదేశం”– మనకు ఆదర్శమూర్తి అయిన పౌలు ఎప్పుడూ ఇతరుల గురించే ఆలోచిస్తూ వారికెలా అభివృద్ధి కలిగించాలా, ఎలా నేర్పించాలి, ప్రోత్సహించాలా, వారిని ఎలా బలపరచి ఆదరించాలా అని చూస్తున్నాడు.

20. సహోదరులారా, మీరు బుద్ధివిషయమై పసిపిల్లలు కాక దుష్టత్వము విషయమై శిశువులుగా ఉండుడి; బుద్ధి విషయమై పెద్దవారలై యుండుడి.

1 కోరింథీయులకు 13:11.

21. అన్య భాషలు మాటలాడు జనులద్వారాను, పరజనుల పెదవులద్వారాను, ఈ జనులతో మాటలాడుదును; అప్పటికైనను వారు నా మాట వినకపోదురు అని ప్రభువు చెప్పుచున్నాడని ధర్మశాస్త్రములో వ్రాయ బడియున్నది.
యెషయా 28:11-12

యెషయా 28:11-12. ఇస్రాయేల్‌ప్రజలు అపనమ్మకంలో పడిపోయారు. తమకు అర్థమయ్యే భాషలో మాట్లాడిన ప్రవక్తల మాటలు వారు వినలేదు. అందువల్ల వారి పైకి తీర్పుగా శిక్షగా వారు అర్థం చేసుకోలేని భాష మాట్లాడే వారిని వారి దగ్గరికి పంపించాడు దేవుడు. పౌలు ఇందులో నుంచి క్రైస్తవులకు ఒక పాఠం నేర్పిస్తున్నాడు. భాషల్లో మాట్లాడ్డమన్నది ఒక “సూచన” – దేవుని ఆత్మ అక్కడ ఉన్నాడని అది సూచిస్తున్నది (1 కోరింథీయులకు 12:7). ఈ సూచన విశ్వాసులను గానీ భాషల్లో మాట్లాడే వ్యక్తిని గానీ అతనిలో దేవుని ఆత్మ ఉన్నాడని నమ్మించేందుకు కాదు (ఇందుకు భాషల్లో మాట్లాడడం కన్న శ్రేష్ఠమైన, మరింత అవసరమైన సాక్ష్యాధారాలూ రుజువులూ ఉన్నాయి). భాషలు అవిశ్వాసులకు సూచన (అపో. కార్యములు 2:4). దేవునిమూలంగా పలకడమైతే విశ్వాసుల అభివృద్ధి కోసం (వ 3,4). “భాషలు” అంటే ఇతర దేశాల్లో మాట్లాడే మానవ భాషలని వ 21లో గుర్తించాలి. వ 22లో ఇందుకు భిన్నంగా ఉంటుందా?

22. కాబట్టి భాషలు విశ్వాసులకు కాదు అవిశ్వాసులకే సూచకమైయున్నవి. ప్రవచించుట అవిశ్వాసులకు కాదు విశ్వాసులకే సూచకమై యున్నది.

23. సంఘమంతయు ఏకముగా కూడి అందరు భాషలతో మాటలాడుచుండగా, ఉపదేశము పొందనివారైనను అవి శ్వాసులైనను లోపలికి వచ్చినయెడల, మీరు వెఱ్ఱిమాట లాడుచున్నారని అనుకొందురు కదా?

వ 22లో సరైన విధంగా ఉపయోగపడే భాషల సామర్థ్యం గురించి పౌలు మాట్లాడాడు. ఇక్కడ సరిగా ఉపయోగించక పోవడం గురించి మాట్లాడుతున్నాడు – అందరూ భాషల్లో మాట్లాడుతూ, అనువాదం ఏమీ లేని పరిస్థితి.

24. అయితే అందరు ప్రవచించుచుండగా అవిశ్వాసియైనను ఉపదేశము పొందని వాడైనను లోపలికి వచ్చినయెడల, అందరి బోధవలన తాను పాపినని గ్రహించి, అందరివలన విమర్శింపబడును.

“అభ్యాసం లేనివాడు”– శుభవార్తనూ క్రీస్తు ఉపదేశాలనూ ఇంకా అర్థం చేసుకోనివాడన్న మాట. దేవుని మూలంగా పలికిన మాటలు అలాంటివాడికి అర్థం అవుతాయి. అవి అతణ్ణి తాను పాపినని ఒప్పించి క్రీస్తులో నమ్మకం పెట్టెలా చేయవచ్చు. “ఒప్పుదల కలుగుతుంది”– యోహాను 16:8-11 పోల్చి చూడండి.

25. అప్పుడతని హృదయరహస్యములు బయలుపడును. ఇందు వలన దేవుడు నిజముగా మీలో ఉన్నాడని ప్రచురముచేయుచు అతడు సాగిలపడి దేవునికి నమస్కారము చేయును.
యెషయా 45:14, దానియేలు 2:47, జెకర్యా 8:23

26. సహోదరులారా, యిప్పుడు మీలో ఏమి జరుగు చున్నది? మీరు కూడి వచ్చునప్పుడు ఒకడు ఒక కీర్తన పాడవలెనని యున్నాడు; మరియొకడు బోధింపవలెనని యున్నాడు; మరియొకడు తనకు బయలు పరచబడినది ప్రకటనచేయవలెనని యున్నాడు; మరియొకడు భాషతో మాటలాడవలెనని యున్నాడు; మరియొకడు అర్థము చెప్ప వలెనని యున్నాడు. సరే; సమస్తమును క్షేమాభివృద్ధి కలుగుటకై జరుగనియ్యుడి.

విశ్వాసుల సభల్లో ఆధ్యాత్మిక సామర్థ్యాలను సరిగా ఉపయోగించడం గురించి పౌలు ఇక్కడ చెప్తున్నాడు. అన్నిట్లో క్రమం ఉండాలని అతడు నొక్కి చెప్తున్నాడు (వ 26,31,33,40). “వెల్లడి”– వ 6. “అభివృద్ధి”– వ 3,4,12,31.

27. భాషతో ఎవడైనను మాటలాడితే, ఇద్దరు అవసరమైన యెడల ముగ్గురికి మించకుండ, వంతులచొప్పున మాటలాడవలెను, ఒకడు అర్థము చెప్ప వలెను.

“వంతులప్రకారం”– కొరింతు సంఘంలో చాలామంది ఒకే సమయంలో మాట్లాడుతూ గందరగోళం సృష్టించినట్టు కనిపిస్తున్నది. “అర్థం చెప్పాలి”– వ 5,13.

28. అర్థము చెప్పువాడు లేనియెడల అతడు సంఘములో మౌనముగా ఉండవలెను గాని, తనతోను దేవునితోను మాటలాడుకొనవచ్చును.

“తనతో”– వ 2. అంటే భాషల్లో మాట్లాడే సామర్థ్యం ఉన్నవారు తాము మాట్లాడే భాషను అర్థం చేసుకోగలిగారనీ, బయటికి వినిపించేలా మట్లాడవలసిన అవసరం లేకుండా కూడా ఈ సామర్థ్యాన్ని ఉపయోగించుకోగలిగారనీ దీని భావం కావచ్చు.

29. ప్రవక్తలు ఇద్దరు ముగ్గురు మాటలాడవచ్చును; తక్కినవారు వివేచింపవలెను.

“వివేచించాలి”– 1 థెస్సలొనీకయులకు 5:20-21. వేరొకరు చెప్తున్న దాన్ని వారు జాగ్రత్తగా కనిపెడుతూ ఉండాలి. ఎందుకంటే కపట బోధకులు, అబద్ధమైన ఉపదేశాలూ సంఘంలో ప్రవేశించే అవకాశం ఉంది. వేరొకరు మాట్లాడుతున్న దాన్ని దేని సహాయంతో వివేచించాలి? పాత ఒడంబడిక లేఖనాల్లోనూ, క్రీస్తు రాయబారుల ద్వారానూ వెల్లడి అయిన దేవుని సత్యం సహాయంతోనే. ఈ సత్యంతో ఏకీభవించనిది ఏదైనా తప్పు, ప్రమాదకరం.

30. అయితే కూర్చున్న మరి యొకనికి ఏదైనను బయలు పరచబడిన యెడల మొదటివాడు మౌనముగా ఉండవలెను.

వ 6,26.

31. అందరు నేర్చుకొనునట్లును అందరు హెచ్చరిక పొందునట్లును మీరందరు ఒకని తరువాత ఒకడు ప్రవచింపవచ్చును.

ప్రతిదాన్నీ అందరి మేలు కోసమూ చేయడం అవసరమని పౌలు ఈ అధ్యాయంలో ఎంత తరచుగా చెప్తున్నాడో చూడండి.

32. మరియు ప్రవక్తల ఆత్మలు ప్రవక్తల స్వాధీనములో ఉన్నవి.

ఒకడు ఆధ్యాత్మిక సామర్థ్యాలను ఉపయోగించడ మంటే తానే అదుపు తప్పిపోవడం కాదు. ఆ సామర్థ్యాలు ఒక వ్యక్తిలో పని చేయడం వల్ల ఆ వ్యక్తి మనసు లేక సంకల్పం ఎక్కడికో కొట్టుకుపోలేదు, అల్లకల్లోలం కాలేదు. దేవుని మూలంగా పలకడం, భాషల్లో మాట్లాడ్డం అనే సామర్థ్యాలు ఉన్నవారు (మరే ఇతర సామర్థ్యమైనా) కావాలంటే మౌనంగా ఉండగలిగారు (వ 28,30). అలా కాకపోతే అల్లరి జరిగి ఉండేది. అల్లరి, గందరగోళం దేవుని స్వభావానికే విరుద్ధం.

33. ఆలాగే పరిశుద్ధుల సంఘము లన్నిటిలో దేవుడు సమాధానమునకే కర్త గాని అల్లరికి కర్త కాడు.

34. స్త్రీలు సంఘములలో మౌనముగా ఉండవలెను; వారు లోబడియుండవలసినదే గాని, మాటలాడుటకు వారికి సెలవు లేదు. ఈలాగు ధర్మశాస్త్రమును చెప్పుచున్నది.

ఈ అధ్యాయంలోని అంశం సంఘ సభల్లో కొన్ని ఆధ్యాత్మిక సామర్థ్యాలను ఎలా ఉపయోగించాలి అనేది. ఇవి మాట్లాడే సామర్థ్యాలు. సంఘ సభల్లో స్త్రీలు ఈ సామర్థ్యాలు ఉపయోగించకూడదని పౌలు అంటున్నాడు. ఇవి వారికి ఉండవచ్చు గాని ఇతర సమయాల్లో వాటిని ఉపయోగించాలి. 1 కోరింథీయులకు 11:5-6; 1 తిమోతికి 2:11-14 నోట్స్ చూడండి. సంఘ సభల్లో స్త్రీలు ప్రార్థన కూడా చేయకూడదని పౌలు నిషేధించాడని కొందరు అనుకుంటున్నారు. కానీ ఇది చాలా సందేహించ వలసిన అభిప్రాయం. ఇక్కడి సందర్భం దేవుని మూలంగా పలకడం, భాషల్లో మాట్లాడ్డం, అర్థం చెప్పడం గురించి (వ 26-31). ఈ వచనాల్లో మాట్లాడ్డం అని తర్జుమా చేసిన గ్రీకు పదం 5,6,9,19 మొదలైన వచనాల్లో వాడిన పదమే. “అణిగి మణిగి”– 1 కోరింథీయులకు 11:3, 1 కోరింథీయులకు 11:8-9; ఎఫెసీయులకు 5:24; 1 తిమోతికి 2:11-12; 1 పేతురు 3:1, 1 పేతురు 3:5-6.

35. వారు ఏమైనను నేర్చుకొనగోరిన యెడల, ఇంట తమ తమ భర్తల నడుగవలెను; సంఘములో స్త్రీ మాటలాడుట అవమానము.

“భర్తలు”– అంటే వారి భర్తలు క్రీస్తులోని విశ్వాసులైతే అడగవచ్చు అని అర్థం. అలా కాకపోతే (ఏమి చెయ్యాలో చెప్పడం అవసరమనీ పౌలు తలంచకపోయినా) వారు సంఘంలోని కాపరులను, ఉపదేశకులను అడగవచ్చు. లేదా, తమకన్న ఎక్కువ జ్ఞానం ఉన్న ఇతర స్త్రీలను అడగవచ్చు. “అవమానకరం”– 1 కోరింథీయులకు 11:6. ఈ గ్రీకు పదానికి నీచం, సిగ్గుకరం, లేక స్వాభావికమైన సౌశీల్యతకూ, పవిత్రతకూ వ్యతిరేకం, లేక మర్యాదకు వ్యతిరేకం అని అర్థం. ఇతర క్రైస్తవ సంఘాలు ఏమి చేస్తున్నా, క్రీస్తురాయబారులు ఏమి చెప్పినా కొరింతు క్రైస్తవులు మాత్రం తమ ఇష్టం వచ్చినట్టు చెయ్యవచ్చని భావించినట్టున్నారు.

36. దేవుని వాక్యము మీ యొద్ద నుండియే బయలువెళ్లెనా? మీయొద్దకు మాత్రమే వచ్చెనా?

37. ఎవడైనను తాను ప్రవక్తననియైనను ఆత్మసంబంధినని యైనను తలంచుకొనిన యెడల, నేను మీకు వ్రాయుచున్నవి ప్రభువుయొక్క ఆజ్ఞలని అతడు దృఢముగా తెలిసికొనవలెను.

అక్కడ కొందరు క్రైస్తవులు తాము ఆధ్యాత్మికంగా చాలా సమర్థులమని అనుకుంటున్నట్టున్నారు. అదే నిజమైతే పౌలు ద్వారా యేసుప్రభువే స్వయంగా ఇచ్చిన ఆజ్ఞను వారు గుర్తించగలిగి ఉండేవారు.

38. ఎవడైనను తెలియని వాడైతే తెలియని వాడుగానే యుండనిమ్ము.

ప్రభు ఆజ్ఞను అలాంటి వ్యక్తి ఎవరైనా నిర్లక్ష్యం చేస్తే అతని మాట ఎవరైనా వినడానికి అతడు యోగ్యుడు కాడని దీని భావం కావచ్చు.

39. కాబట్టి నా సహోదరులారా, ప్రవచించుట ఆసక్తితో అపేక్షించుడి, భాషలతో మాటలాడుట ఆటంకపరచకుడి గాని,

వ 1,5,18.

40. సమస్తమును మర్యాదగాను క్రమముగాను జరుగ నియ్యుడి.

వ 33. 12–14 అధ్యాయాల్లో విశ్వాసులకు ఆది సంఘ కాలంలో ఉన్న కొన్ని ఆధ్యాత్మిక సామర్థ్యాల గురించి పౌలు రాశాడు. ఈ సామర్థ్యాలు ఇప్పుడు అంతరించి పోయాయా? వాటిలో కొన్ని (ఉదాహరణగా ఉపకారాలు చేయడం, ఉపదేశాలు చేయడం) అంతరించి పోలేదనడంలో ఏ సందేహమూ అవసరం లేదు. మరి మిగతా వాటిలో ఏవైనా అంతరించాయా? అలా అంతరించి పోతాయని బైబిల్లో ఎక్కడైనా రాసి లేదని ఈ నోట్స్ రచయిత నమ్ముతున్నాడు. బైబిలు స్వయంగా చెప్పని దాన్ని మనం చెప్పడం విషయంలో చాలా జాగ్రత్త వహించాలి. దేవునికి ఆయన ఇష్టం వచ్చినది చేయడానికి స్వతంత్రత ఉందని మనం గ్రహించాలి. ఈ రోజుల్లో ఎవరికైనా ఈ సామర్థ్యాల్లో దేన్నైనా ఇవ్వడం ఆయనకు ఇష్టమైతే, లేక ఎవరికైనా ఇవ్వకుండా ఉండదలచుకుంటే ఆయన అలా చేస్తాడు (1 కోరింథీయులకు 12:11).