1. కాబట్టి యేసు తాను మృతులలోనుండి లేపిన లాజరు ఉన్న బేతనియకు పస్కాపండుగకు ఆరు దినములు ముందుగా వచ్చెను. అక్కడ వారు ఆయనకు విందు చేసిరి.

పస్కా గురించి నోట్స్ నిర్గమ 12వ అధ్యాయం; లేవీయకాండము 23:4-8. క్రీస్తు సిలువ మరణానికి ముందు వారంలో జరిగిన సంగతులు ఇక్కడ నుంచి ఆరంభమౌతున్నాయి. లోక పాపాల కోసం ఆయన చనిపోవలసిన సమయం వచ్చింది. దేవుడే ఆ సమయాన్నీ (ఈ పస్కా దినం), స్థలాన్నీ (జెరుసలం) నిర్ణయించాడు. యేసుప్రభువు ఆ పరమ తండ్రి చిత్తం ప్రకారం చేయడానికి పూర్తిగా సిద్ధపడి ఉన్నాడు.

2. మార్త ఉపచారము చేసెను; లాజరు ఆయనతో కూడ భోజమునకు కూర్చున్నవారిలో ఒకడు.

మత్తయి 26:6-13; మార్కు 14:19 పోల్చి చూడండి. మత్తయి, మార్కు శుభవార్తలో రాసి ఉన్న సంఘటనా ఇదీ వేరువేరని కొందరు పండితుల అభిప్రాయం.

3. అప్పుడు మరియ మిక్కిలి విలువగల అచ్చ జటామాంసి అత్తరు ఒక సేరున్నర యెత్తు తీసికొని, యేసు పాదములకు పూసి తన తలవెండ్రుకలతో ఆయన పాదములు తుడిచెను; ఇల్లు ఆ అత్తరు వాసనతో నిండెను

4. ఆయన శిష్యులలో ఒకడు అనగా ఆయనను అప్పగింపనైయున్న ఇస్కరియోతు యూదా

ఈ మాట అన్నది యూదా అని మత్తయి, మార్కు రాయలేదు.

5. యీ అత్తరెందుకు మూడు వందల దేనార ములకు అమ్మి బీదలకు ఇయ్యలేదనెను.

ఒక దేనారం సాధారణంగా ఒక పనివాడికి ఒకరోజు కూలీ (మత్తయి 20:2). స్వార్థంకోసం గాక క్రీస్తుకోసం ప్రేమతో చేసిన పనులను ఇతరులు అపార్థం చేసుకుని విమర్శించవచ్చని గమనించండి. డబ్బును కూడబెట్టడం, స్వార్థానికి వాడుకోవడం యూదాకు తెలుసు గానీ కేవలం తనలోని ప్రేమ మూలంగా, ప్రతిఫలాపేక్ష లేకుండా మరియ అంత ఖరీదైనదాన్ని క్రీస్తు పాదాలపై ఒలకబోయడం యూదాకు అర్థం కాలేదు.

6. వాడీలాగు చెప్పినది బీదలమీద శ్రధ్ధకలిగి కాదుగాని వాడు దొంగయై యుండి, తన దగ్గర డబ్బు సంచియుండినందున అందులో వేయబడినది దొంగిలించుచు వచ్చెను గనుక ఆలాగు చెప్పెను.

యూదా ఒకసారి దుష్‌ప్రేరణకు లొంగి, ఏదో దొంగిలించి తరువాత పశ్చాత్తాపపడి తన బలహీనతలను జయించిన రకం కాదు. దేవుని ప్రజలు దేవుని పనికోసం ఇచ్చిన డబ్బును అతడు కావాలని, అలవాటుగా తనకోసం తీసుకుంటూ వచ్చాడు. ఘనమైన, యోగ్యమైనవాటి కంటే, సత్యం లేక క్రీస్తు కంటే అతడికి డబ్బునే ఎక్కువ ప్రీతి. క్రీస్తును శత్రువులకు పట్టివ్వడంలో అతని ముఖ్యోద్దేశం డబ్బు (మత్తయి 26:14-16). అతణ్ణి పిశాచంగా చేసిన లక్షణాల్లో (యోహాను 6:70-71) డబ్బంటే అతనికి ఉన్న ప్రీతి ఒకటి. ఈ దురాశకు లోబడినవారికి ఏం సంభవించగలదో తెలిపే భయానకమైన ఒక ఉదాహరణ యూదా (1 తిమోతికి 6:5, 1 తిమోతికి 6:9-10 చూడండి). క్రీస్తు సంఘంలోపలా బయటా కూడా ధన లాభం కోసం తమ జీవితాలను పాడు చేసుకుని, దేవుణ్ణి అగౌరవపరచి, తమ ఆత్మలను నాశనానికి గురి చేసుకున్న అనేకమందిలో యూదా ఒకడు. క్రైస్తవ సేవలో ఉన్నవారిలో కూడా చాలామందిని డబ్బు విషయంలో నమ్మడానికి వీలు లేదు. ఎంత విచారం! యూదాలాగా వీరు కూడా తాము దొంగలమని రుజువు చేసుకుంటారు. అయితే ఇతర శిష్యులు యూదాను ఎలా ఎంచారో చూడండి. అతణ్ణి నమ్మి తమ గుంపుకు కోశాధికారిగా పెట్టుకున్నారు. ఈ వచనంలో యూదా కపటాన్ని కూడా గమనించండి. పేదలంటే అతనికేమీ శ్రద్ధ లేదు గానీ ఉన్నట్టు నటిస్తున్నాడు. అతని ఉద్దేశమేమిటంటే పేదలకియ్యవలసిన డబ్బు భద్రం చేయమని తన చేతికే ఇస్తారు. అందులో కొంత తన సొంతానికి వాడుకోవచ్చు అని. డబ్బు వాసన తగిలింది, అంతే! దేవుని కుమారుడు, ఆయన ఆశ్చర్యకరమైన ఉపదేశాలు, అద్భుత క్రియలు, ఆయన ఇస్తున్న శాశ్వత జీవం ఇవన్నీ యూదాకు వట్టివి, తృణప్రాయమయ్యాయి. ఇంకా ఇంకా డబ్బు సంపాదించే మార్గంగా తప్ప వేరే ఉద్దేశంతో పైవాటిని ఎన్నడూ చూడలేదు యూదా. ఈ విషయం గురించి యేసుప్రభువు చేసిన ఉపదేశాలను పూర్తిగా పెడచెవిన బెట్టాడు (మత్తయి 6:19-21, మత్తయి 6:24; లూకా 6:20, లూకా 6:24; లూకా 12:20-21, లూకా 12:33). మనం కూడా అలానే వాటిని నిర్లక్ష్యం చేస్తే యూదాలాగా అయిపోగలం. అబద్ధాలు, మోసం, దొంగతనం ఇలాంటివన్నీ చేయడంకన్నా పేదవారుగా ఉండడం ఎంతో మేలు – సామెతలు 19:22.

7. కాబట్టి యేసునన్ను పాతిపెట్టు దినమునకు ఆమెను దీని నుంచుకొననియ్యుడి;

మత్తయి 26:10-13.

8. బీదలు ఎల్లప్పు డును మీతో కూడ ఉందురుగాని నేనెల్లప్పుడు మీతో ఉండనని చెప్పెను.
ద్వితీయోపదేశకాండము 15:11

9. కాబట్టి యూదులలో సామాన్యజనులు ఆయన అక్కడ ఉన్నాడని తెలిసికొని, యేసును చూచుటకు మాత్రమే గాక మృతులలోనుండి ఆయన లేపిన లాజరునుకూడ చూడవచ్చిరి.

10. అతనినిబట్టి యూదులలో అనేకులు తమవారిని విడిచి యేసునందు విశ్వాస ముంచిరి గనుక

ఈ అవిశ్వాసుల స్వభావం (మొత్తంగా అవిశ్వాసులందరిదీ) ఇక్కడ మరోసారి బయట పడుతున్నది. యేసు లాజరును సజీవంగా లేపిన సంగతిని వారు కాదనలేకపోయారు. అందుకు బలమైన స్పష్టమైన రుజువు ఉంది. కానీ ఈ రుజువు చూపించిన దిశగా వెళ్ళవలసింది పోయి ఆ రుజువునే రూపుమాపాలని నిర్ణయించుకున్నారు. యిర్మియా 36:1-26 పోల్చి చూడండి.

11. ప్రధానయాజకులు లాజరునుకూడ చంప నాలోచనచేసిరి.

12. మరునాడు ఆ పండుగకు వచ్చిన బహు జనసమూ హము యేసు యెరూషలేమునకు వచ్చుచున్నాడని విని

మత్తయి 21:4-9; మార్కు 11:9-10; లూకా 19:37-38. నాలుగు శుభవార్తల్లోనూ ఆ జనసమూహం అన్నమాటలు వేరువేరుగా రాసి ఉన్నాయి. వీటిల్లో ఏవీ సరైనవి? అన్నీ సరైనవే. ఏ ఒక్క శుభవార్తలో జనసమూహం అన్న మాటలన్నీ రాసిలేదు. ప్రతి ఒక్కటీ ఆ గుంపులు అన్న మాటల్లో కొన్ని రాసి ఉన్నాయి. యోహాను 19:19 పోల్చి చూడండి. మార్కు 4:1-20 గురించిన నోట్స్ చూడండి.

13. ఖర్జూరపుమట్టలు పట్టుకొని ఆయనను ఎదుర్కొనబోయి జయము, ప్రభువు పేరట వచ్చుచున్న ఇశ్రాయేలు రాజు స్తుతింపబడునుగాక అని కేకలువేసిరి.
కీర్తనల గ్రంథము 118:25-26

14. సీయోను కుమారీ, భయపడకుము, ఇదిగో నీ రాజు గాడిదపిల్లమీద ఆసీనుడై వచ్చుచున్నాడు

మత్తయి 21:1-3.

15. అని వ్రాయబడిన ప్రకారము యేసు ఒక చిన్న గాడిదను కనుగొని దానిమీద కూర్చుండెను.
యెషయా 40:9, జెకర్యా 9:9

16. ఆయన శిష్యులు ఈ మాటలు మొదట గ్రహింపలేదు గాని యేసు మహిమ పరచబడినప్పుడు అవి ఆయనను గూర్చి వ్రాయబడెననియు, వారాయనకు వాటిని చేసిరనియు జ్ఞాపకమునకు తెచ్చు కొనిరి.

యేసు మరణం, పునర్జీవితం తరువాత (“మహిమాస్థితి పొందిన తరువాత”) శిష్యులు చాలావరకు అర్థం చేసుకున్నారు. లూకా 24:45 పోల్చి చూడండి.

17. ఆయన లాజరును సమాధిలోనుండి పిలిచి మృతు లలోనుండి అతని లేపినప్పుడు, ఆయనతో కూడ ఉండిన జనులు సాక్ష్యమిచ్చిరి.

18. అందుచేత ఆయన ఆ సూచక క్రియ చేసెనని జనులు విని ఆయనను ఎదుర్కొన బోయిరి.

“సూచన”– యోహాను 2:11.

19. కావున పరిసయ్యులు ఒకరితో ఒకరు మన ప్రయత్నములెట్లు నిష్‌ప్రయోజనమై పోయినవో చూడుడి. ఇదిగో లోకము ఆయనవెంట పోయినదని చెప్పుకొనిరి.

ఈ సంఘటనతో వారు భయపడుతూ వచ్చినదే నిజమైనట్టు అనిపించింది (యోహాను 11:47-48).

20. ఆ పండుగలో ఆరాధింపవచ్చినవారిలో కొందరు గ్రీసుదేశస్థులు ఉండిరి.

పస్కా యూదుల పండుగ, గ్రీకులు (ఇతర దేశస్థులెవరూ కూడా) యూద మతంలోకి మారితే తప్ప యూద పండుగల్లో ఏవిధంగానైనా పాల్గొనే అవకాశం ఉండదు. గ్రీకుల్లో ఇలాంటివారు ఉన్నారని అపో. కార్యములు 17:4 వంటి వచనాల ద్వారా తెలుస్తున్నది.

21. వారు గలిలయలోని బేత్సయిదా వాడైన ఫిలిప్పునొద్దకు వచ్చి అయ్యా, మేము యేసును చూడగోరుచున్నామని అతనితో చెప్పగా

ముందు కాలంలో ఈ విధంగా ఆశించబోయే అనేకమంది గ్రీకులు, ఇతర జాతీయులందరిలోకి ఈ గుంపు మొదటివారు. వారు క్రీస్తులో నమ్మకం పెట్టుకుంటే వారి కోరిక నెరవేరుతుంది (ప్రకటన గ్రంథం 7:9; ప్రకటన గ్రంథం 22:4).

22. ఫిలిప్పు వచ్చి అంద్రెయతో చెప్పెను, అంద్రెయయు ఫిలిప్పును వచ్చి యేసుతో చెప్పిరి.

ఇలాంటి కోరిక గురించి నిర్ణయం తీసుకోవాలంటే సాటి శిష్యుడు మరొకణ్ణి సంప్రదించడం అవసరమని ఫిలిఫ్పు అనుకున్నాడు. ఈ గ్రీకుల కోరిక తీరిందో లేదో రాసి లేదు. కానీ యేసు ఈ సందర్భాన్ని తన మరణం గురించి మాట్లాడేందుకు వాడుకున్నాడు. గ్రీకులు గానీ వేరెవరైనా గానీ పరలోకంలో స్థలం సంపాదించుకోవాలన్నా, దేవుణ్ణి చూడాలన్నా ఇది ముందుగా నెరవేరవలసి ఉందని ఆయనకు తెలుసు.

23. అందుకు యేసు వారితో ఇట్లనెను మనుష్యకుమారుడు మహిమ పొందవలసిన గడియ వచ్చి యున్నది.

వ 16; యోహాను 17:1, యోహాను 17:5 చూడండి.

24. గోధుమగింజ భూమిలో పడి చావకుండిన యెడల అది ఒంటిగానే యుండును; అది చచ్చిన యెడల విస్తారముగా ఫలించును.

“ఖచ్చితంగా”– యోహాను 1:51.

25. తన ప్రాణమును ప్రేమించు వాడు దానిని పోగొట్టుకొనును, ఈ లోకములో తన ప్రాణమును ద్వేషించువాడు నిత్యజీవముకొరకు దానిని కాపాడుకొనునని మీతో నిశ్చయముగా చెప్పుచున్నాను.

ప్రభువు ఇదే సత్యాన్ని కొద్దిగా వేరే మాటల్లో అనేక సందర్భాల్లో చెప్పాడు. దీన్ని బట్టి చూస్తే ఇది ఆయన చెప్పిన అతి ప్రాముఖ్యమైన సత్యాల్లో ఒకటి. దీన్ని నిర్లక్ష్యం చెయ్యడం మనకే హానికరం. మత్తయి 10:39; మత్తయి 16:25; మార్కు 8:35; లూకా 9:24; లూకా 17:33. ఇక్కడ యోహాను శుభవార్తలో ఆయన “ద్వేషం” అనే మాట వాడడం ద్వారా దీన్ని మరింత నొక్కి చెప్తున్నాడు. లూకా 14:26 పోల్చి చూడండి. అంతేగాక “శాశ్వత జీవం” అనేమాట వాడడం ద్వారా నిజంగా మనం క్షణికమైన ఈ లోకాన్నో, దేవుని సన్నిధిలో అనంత జీవితాన్నో ఎంచుకోవలసి ఉందని స్పష్టం చేశాడు. ఈ లోకమా, రాబోయే లోకమా మనం దేనికి విలువ ఇస్తామో, దేనికోసం బ్రతుకుతామో నిర్ణయించుకోవాలి.

26. ఒకడు నన్ను సేవించినయెడల నన్ను వెంబడింపవలెను; అప్పుడు నేను ఎక్కడ ఉందునో అక్కడ నా సేవకుడును ఉండును; ఒకడు నన్ను సేవించినయెడల నా తండ్రి అతని ఘనపరచును.

యోహాను 10:27. తన సొంత విషయాన్ని తన సొంత విధానంలో చేసేవారెవరూ క్రీస్తును సేవించడం లేదు. క్రీస్తును అనుసరించేవారు ఈ లోకంలో ఆయనెక్కడ ఉంటాడో అక్కడ ఉంటారు. ఎందుకంటే ఆయన వారి కాపరి. వారెక్కడికి వెళ్ళాలో అక్కడికి ఆయనే నడిపిస్తాడు. ఇలా చెయ్యడంలో పరీక్షలు, ప్రమాదాలు, అపాయాలు, బాధలు, క్రీస్తుకోసం చనిపోవడం సంభవించినా దానంతటిలో ఆయన వారితో, వారు ఆయనతో ఉంటారు. ఆయన్ను అనుసరించేవారు రాబోయే లోకంలో కూడా అనంత కాలం ఆయనతో ఉంటారు. వారి గురించి ఆయన చేసిన ప్రార్థన ఇదే (యోహాను 17:24) గనుక వారికి చేకూరబోయేది ఇదే. క్రీస్తు సేవకులకు ఈ లోకంలో ఎంతో అన్యాయం, హింస, అవమానం, అప్రతిష్ఠ ఎదురు కావచ్చు. వారి ప్రభువును చేసినట్టు వారిని కూడా మనుషులు తృణీకరించి నిరాకరించ వచ్చు. వారికి కలగవలసిన గౌరవాలు ముందున్నాయి. శాశ్వతుడైన దేవుడు తానే క్రీస్తు సేవకులను హెచ్చించి, మెచ్చుకుని, గౌరవించి, బహుమతులిస్తాడు (యోహాను 5:44; మత్తయి 25:21; రోమీయులకు 2:6-10; రోమీయులకు 8:18; హెబ్రీయులకు 6:10; 1 పేతురు 5:1, 1 పేతురు 5:4; ప్రకటన గ్రంథం 22:12). వారికిక్కడ జరిగిన నష్టమేదైనా ఉంటే దానంతటికీ ఆయన పుష్కలంగా పరిహారం చెల్లిస్తాడు. అందువల్ల ఏ గౌరవాన్ని మనం ఆశించాలి, ఎవరి మెప్పును కోరాలి – మనుషులవల్ల కలిగేదాన్నా లేక దేవునినుంచి వచ్చేదాన్నా అని ఎన్నుకోవాలి.

27. ఇప్పుడు నా ప్రాణము కలవరపడుచున్నది; నే నేమందును?తండ్రీ, యీ గడియ తటస్థింపకుండనన్ను తప్పించుము; అయి నను ఇందుకోసరమే నేను ఈ గడియకు వచ్చితిని;
కీర్తనల గ్రంథము 6:3, కీర్తనల గ్రంథము 42:5, కీర్తనల గ్రంథము 42:11

“ఘడియ”– అంటే ఆయన బాధలు, మరణం కలిగే సమయం. లోక పాపాలకు బలిగా, మనుషుల దోషాలను భరిస్తూ, వాటికి వ్యతిరేకంగా మండే దేవుని కోపాన్ని అనుభవించాలన్న ఆలోచన క్రీస్తుకు మనోవేదనలు కలిగించింది. మత్తయి 26:37-38; లూకా 22:42-44 పోల్చి చూడండి. అయినా అది దేవుని సంకల్పం అయితే తప్ప, దానినుంచి తప్పించుకోవాలని మాత్రం ఆయన ప్రార్థన చేసేవాడు కాదు. అది దేవుని సంకల్పం కాదని ఆయనకు తెలుసు.

28. తండ్రీ, నీ నామము మహిమపరచు మని చెప్పెను. అంతటనేను దానిని మహిమపరచితిని, మరల మహిమ పరతును అని యొక శబ్దము ఆకాశము నుండి వచ్చెను.

కొన్ని రోజుల తరువాత గెత్‌సేమనే తోటలో ఆయన ప్రార్థించినట్టుగానే ఆయన కోరినదల్లా తండ్రి అయిన దేవునికి మహిమ కలగాలనే, తనకు కాదు; తండ్రి సంకల్పం నెరవేరాలనే, తనది కాదు. తండ్రికి మహిమ కలిగేలా తాను సిలువ బాధలు భరించడానికి ఆయన సిద్ధమే. ఆయన్ను అనుసరించేవారంతా ఇలా ప్రార్థించడం నేర్చుకోవాలి. మత్తయి 6:9-10 చూడండి. శుభవార్త గ్రంథాల్లో ఈ విధంగా పైనుంచి దేవుడు మాట్లాడ్డం ఇది మూడో సారి (మత్తయి 3:17; మత్తయి 17:5). పాత ఒడంబడిక గ్రంథంలో వర్ణించిన సంభవాల మూలంగా, యేసుప్రభువు జీవితమూ, పరిచర్యా అంతటిద్వారా దేవుడు తన పేరును మహిమపరచుకున్నాడు. ఇప్పుడు క్రీస్తు మరణం, పునర్జీవితం ద్వారా ఆయన దాన్ని మహిమపరచుకుంటాడు.

29. కాబట్టి అక్కడ నిలుచుండి వినిన జన సమూహము ఉరిమెను అనిరి. మరికొందరు దేవదూత ఒకడు ఆయనతో మాటలాడెననిరి.

నిర్గమకాండము 19:16-19; కీర్తనల గ్రంథము 29:3. “దేవదూత”– ఆదికాండము 16:7. ఈ మాటలు కొందరికి అర్థం అయినట్టున్నాయి. కొందరికి అర్థం కాలేదు. కానీ ఏదో అసాధారణమైనది జరిగిందని మాత్రం అందరికీ తెలిసింది.

30. అందుకు యేసు ఈ శబ్దము నాకొరకు రాలేదు, మీకొరకే వచ్చెను.

క్రీస్తుకు అంత బాగా తెలిసిన విషయాన్ని వేరొకరు మళ్ళీ ఆయనకు చెప్పనవసరం లేదు. మనుషులకు మాత్రం చాలా గట్టిగా నొక్కి చెప్పాలి.

31. ఇప్పుడు ఈ లోకమునకు తీర్పు జరుగుచున్నది, ఇప్పుడు ఈ లోకాధికారి బయటకు త్రోసివేయబడును;

దోషులైన మనుషుల స్థానంలో లోక పాపాలను మోసి తీసివేసే దేవుని గొర్రెపిల్లగా క్రీస్తు చనిపోబోతున్నాడు (యోహాను 1:29). అంటే మానవజాతి అంతా మరణానికి పాత్రులని అర్థం. సిలువ మనుషుల పాపాలకు తీర్పు చెప్పినట్టుంది. దేవుడు లోకులతో ఇలా అంటున్నాడన్నమాట: “నీ పాపాల కారణంగా నువ్వు మరణం పొందవలసినవాడివి. నీ స్థానంలో నా కుమారుని మరణం ద్వారా నేను ఈ తీర్పును ప్రకటిస్తున్నాను. నా కుమారుణ్ణి సిలువ వేయడంద్వారా నీకు నువ్వే తీర్పు తీర్చుకుంటావు. ఆ విధంగా నా నిర్ణయం సరైనదేనని రుజువు చేసుకుంటావు” (యోహాను 3:18-19). “లోక పాలకుణ్ణి”– అంటే సైతానును యోహాను 14:30; యోహాను 16:11; 2 కోరింథీయులకు 4:4; ఎఫెసీయులకు 2:2; ఎఫెసీయులకు 6:12 చూడండి. మనుషులకు చాలా ఇష్టమైన చీకటిలో (యోహాను 3:19), ఏకైక నిజ దేవుణ్ణి ఎరుగని పాపుల హృదయాల్లో వాడు రాజ్యమేలుతుంటాడు. సైతాను గురించి నోట్స్ యోహాను 8:44; 1 దినవృత్తాంతములు 21:1; మత్తయి 4:1-10. “బయటికి త్రోసివేయడం” అంటే లోకంలో నుండి వెళ్ళగొట్టడమని కాదు యేసుప్రభువు ఉద్దేశం. ఎందుకంటే సైతాను ఇంకా నిక్షేపంగా ఈ లోకంలోనే ఉన్నాడు (1 పేతురు 5:8). క్రీస్తు మళ్ళీ వచ్చేవరకు వాణ్ణి లోకంలోనుంచి బయటికి వెళ్ళగొట్టడం జరగదు (ప్రకటన గ్రంథం 20:13). కాబట్టి ఇక్కడ దీని అర్థం ఇది కావచ్చు – సిలువ ద్వారా యేసు క్రీస్తు మనుషులకు విముక్తిని సాధిస్తాడు. దీని ఫలితంగా సైతాను చివరికి పూర్తిగా ఓడిపోతాడు. అన్ని దేశాల్లోనూ ఇంతకుముందు సైతాను పరిపాలన కింద ఉన్న మనుషులు దేవునివైపు తిరుగుతారు, చివరికి లోకమంతా దేవుని పరిపాలనకు లోబడి, ఆయన మహిమను ప్రతిబింబిస్తుంది (యెషయా 11 అధ్యాయం; మొ।।). దీనంతటికీ సిలువ ఆధారం. తాత్కాలికంగా సైతాను విజయంగా అనిపించిన సిలువ వాడి సమూల నాశనానికి దారి తీసేది.

32. నేను భూమిమీదనుండి పైకెత్తబడినయెడల అందరిని నాయొద్దకు ఆకర్షించుకొందునని చెప్పెను.

యోహాను 3:14; యోహాను 8:28 పోల్చి చూడండి. “పైకెత్తడం”– సిలువను సూచించే మాట. మనుషులందరినీ తనవైపుకు ఆకర్షించుకోవడం అంటే మనుషులంతా పాపవిముక్తి పొందుతారని కాదు (యోహాను 8:24; మత్తయి 7:13-14; మత్తయి 25:46; ప్రకటన గ్రంథం 21:8 చూడండి) యేసు యూద జాతినుంచి మాత్రమే గాక అన్ని జాతులు, జనాలు, వంశాలనుంచి మనుషులను తనవైపుకు ఆకర్షించుకుంటాడని అర్థం (ప్రకటన గ్రంథం 7:9).

33. తాను ఏవిధముగా మరణము పొందవలసి యుండెనో సూచించుచు ఆయన ఈ మాట చెప్పెను.

మొదటినుంచీ కూడా తాను సిలువపై మరణిస్తానని ఆయనకు తెలుసు.

34. జనసమూహము క్రీస్తు ఎల్లప్పుడు ఉండునని ధర్మశాస్త్రము చెప్పుట వింటిమి. మనుష్యకుమారుడు పైకెత్తబడవలెనని నీవు చెప్పుచున్న సంగతి ఏమిటి? మనుష్య కుమారుడగు ఈయన ఎవరని ఆయన నడిగిరి.
కీర్తనల గ్రంథము 89:4, కీర్తనల గ్రంథము 89:36, కీర్తనల గ్రంథము 110:4, యెషయా 9:7, దానియేలు 7:14

వారు బహుశా కీర్తనల గ్రంథము 89:36; కీర్తనల గ్రంథము 110:4; యెషయా 9:7; దానియేలు 7:14 వంటి వచనాల గురించి అడుగుతున్నారు. యేసు తనను తాను తరచుగా “మానవ పుత్రుడు” అంటున్నాడని వారికి తెలుసు. ఈ పేరుకు అర్థమేమిటో అనీ పాత ఒడంబడిక గ్రంథంలో చెప్పిన అభిషిక్తుడే ఈ మానవ పుత్రుడా అనీ సందేహించారు. “మానవ పుత్రుడు” గురించి నోట్ మత్తయి 8:20.

35. అందుకు యేసుఇంక కొంతకాలము వెలుగు మీ మధ్య ఉండును; చీకటి మిమ్మును కమ్ముకొనకుండునట్లు మీకు వెలుగు ఉండగనే నడవుడి; చీకటిలో నడుచువాడు తాను ఎక్కడికి పోవుచున్నాడో యెరుగడు.

“వెలుగు”– అంటే తానే అని ప్రభువు ఉద్దేశం. వ 46; యోహాను 8:12; యోహాను 9:5. అంతటా చాలామంది ప్రజల విచారకరమైన పరిస్థితి ఇక్కడ కనిపిస్తున్నది – వారు ఎక్కడికి వెళ్తున్నారో వారికి తెలియదు.

36. మీరు వెలుగు సంబంధులగునట్లు మీకు వెలుగుండగనే వెలుగునందు విశ్వాసముంచుడని వారితో చెప్పెను.

అంటే క్రీస్తుపై నమ్మకం ఉంచి “వెలుగు” అయి ఉన్న దేవుని పిల్లలుగా మారాలని దీని అర్థం (1 యోహాను 1:5). వెలుగు అయి ఉన్న క్రీస్తును స్వీకరించి ఆయన పేరుమీద నమ్మకం పెట్టుకోవడం ద్వారా మాత్రమే ఎవరైనా దేవుని పిల్లలు కాగలరు (యోహాను 1:12-13). “వెలుగు సంతానం” అనేమాట వెలుగు లక్షణం ఉన్నవారినీ, వెలుగులోకి వచ్చి వెలుగును అమూల్యమైనదిగా భావించేవారనీ, వెలుగును ఇతరులకు అందించేవారినీ సూచిస్తున్నది. మత్తయి 5:14-16; ఎఫెసీయులకు 5:8; 1 థెస్సలొనీకయులకు 5:5 పోల్చి చూడండి.

37. యేసు ఈ మాటలు చెప్పి వెళ్లి వారికి కనబడకుండ దాగియుండెను. ఆయన వారి యెదుట యిన్ని సూచక క్రియలు చేసినను వారాయనయందు విశ్వాసముంచరైరి.

శుభవార్త పుస్తకాలన్నిటిలో అనేకమంది యూదుల అపనమ్మకం కనబడుతున్నది. క్రీస్తు వారికి చూపిన సాక్ష్యాధారాలూ రుజువులూ ఏవీ వారిని నమ్మించలేకపోయాయి. వారి అపనమ్మకానికి అర్థం లేదు. ఇది చాలా వింతగా విపరీతంగా ఉంది. అయితే ఇక్కడ దానికొక కారణం కనిపిస్తున్నది. వారు పాత ఒడంబడికలోని భవిష్యద్వాక్కులను నెరవేరుస్తున్నారు. యెషయా 53:1; యెషయా 6:10 చూడండి. వారి అపనమ్మకం వారి పాపాలకు దేవుని తీర్పు. ఆ జాతి ఇంతకుముందు ఎప్పుడో అపనమ్మకం మార్గాన్ని ఎన్నుకున్నది. దేవుడిప్పుడు వారిని ఆ మార్గంలో విడిచిపెట్టాడు. మత్తయి 13:14-15 నోట్ చూడండి.

38. ప్రభువా, మా వర్తమానము నమ్మినవాడెవడు? ప్రభువుయొక్క బాహువు ఎవనికి బయలుపరచ బడెను? అని ప్రవక్తయైన యెషయా చెప్పిన వాక్యము నెరవేరునట్లు ఇది జరిగెను.
యెషయా 53:1

39. ఇందుచేత వారు నమ్మలేక పోయిరి, ఏలయనగా

40. వారు కన్నులతో చూచి హృదయముతో గ్రహించి మనస్సు మార్చుకొని నావలన స్వస్థపరచబడకుండు నట్లు ఆయన వారి కన్నులకు అంధత్వము కలుగజేసి వారి హృదయము కఠినపరచెను అని యెషయా మరియొక చోట చెప్పెను.
యెషయా 6:9-10

41. యెషయా ఆయన మహిమను చూచినందున ఆయననుగూర్చి ఈ మాటలు చెప్పెను.

యెషయా 6:1-3 లో తాను ప్రభువును (హీబ్రూలో “యెహోవా”) చూశాననీ, భూమి అంతా ప్రభువు (“యెహోవా”) మహిమతో నిండి ఉందనీ యెషయా రాశాడు. ఇక్కడ యెషయా యేసు మహిమను చూశాడని యోహాను రాస్తున్నాడు. అంటే యేసు యెహోవాదేవుని అవతారం అన్నమాట. యోహాను 8:24, యోహాను 8:58; యోహాను 10:11; లూకా 2:11 మొ।। కూడా చూడండి.

42. అయినను అధికారులలో కూడ అనేకులు ఆయనయందు విశ్వాసముంచిరిగాని, సమాజములో నుండి వెలివేయబడుదుమేమో యని పరిసయ్యులకు భయపడి వారు ఒప్పుకొనలేదు.

వీరి నమ్మకం నిజమైనదేనా? బహుశా నిజ విశ్వాసం అంకురం వారిలో ఉందేమో. అది తరువాత మొలకెత్తి వారిని మరింత ధైర్యవంతులుగా చేసిందేమో. అయితే నమ్మకం ఉంచామని చెప్పుకుంటూ భయానికి లొంగిపోతూ, మనుషుల మెప్పుదల కోసం ఆశించేవారిని చూచి వారి గురించి సందేహించకుండా ఉండలేము.

43. వారు దేవుని మెప్పుకంటె మనుష్యుల మెప్పును ఎక్కువగా అపేక్షించిరి.

44. అంతట యేసు బిగ్గరగా ఇట్లనెనునాయందు విశ్వాస ముంచువాడు నాయందు కాదు నన్ను పంపినవానియందే విశ్వాసముంచుచున్నాడు.

తండ్రి అయిన దేవునితో తన ఐక్యతను ఇంతకన్నా స్పష్టంగా యేసు వెల్లడించగలడా? యోహాను 10:30; యోహాను 14:9 పోల్చి చూడండి. యేసును నమ్మడమంటే దేవుణ్ణి నమ్మడమే. ఆయన్ను చూస్తే దేవుణ్ణి చూచినట్టే.

45. నన్ను చూచువాడు నన్ను పంపినవానినే చూచుచున్నాడు.

46. నాయందు విశ్వాసముంచు ప్రతివాడు చీకటిలో నిలిచి యుండకుండునట్లు నేను ఈ లోకమునకు వెలుగుగా వచ్చియున్నాను.

వ 35,36; యోహాను 8:12; యోహాను 9:5. క్రీస్తు ఈ లోకానికి ఎందుకు వచ్చాడో మత్తయి 5:17 నోట్ చూడండి.

47. ఎవడైనను నా మాటలు వినియు వాటిని గైకొనకుండిన యెడల నే నతనికి తీర్పుతీర్చను; నేను లోకమునకు తీర్పు తీర్చుటకు రాలేదు గాని లోకమును రక్షించుటకే వచ్చి తిని.

యోహాను 3:17.

48. నన్ను నిరాకరించి నా మాటలను అంగీకరింపని వానికి తీర్పు తీర్చువాడొకడు కలడు; నేను చెప్పినమాటయే అంత్యదినమందు వానికి తీర్పు తీర్చును.

చివరి రోజు అంటే దేవుడు నియమించిన తీర్పు రోజు. మత్తయి 10:15 నోట్‌లో రిఫరెన్సులు చూడండి. ఆ సమయంలో తెరిచే పుస్తకాల్లో (ప్రకటన గ్రంథం 20:12) ఒకదానిలో క్రీస్తు చెప్పిన మాటలు ఉంటాయన్నమాట. అంటే ఈ నాలుగు శుభవార్తల్లో మనం చూస్తున్న మాటలు, వాటి ప్రకారం మనం ప్రవర్తించకపోతే మనమీదికి మనమే శిక్ష తెచ్చిపెట్టుకున్న వారమౌతాం. యోహాను 7:21-23 పోల్చి చూడండి.

49. ఏలయనగా నా అంతట నేనే మాటలాడలేదు; నేను ఏమనవలెనో యేమి మాటలాడవలెనో దానినిగూర్చి నన్ను పంపిన తండ్రియే నాకాజ్ఞ యిచ్చియున్నాడు.

యోహాను 5:19; యోహాను 4:34 పోల్చి చూడండి. యేసుప్రభువు ఉపదేశాలన్నీ దేవుడు నియమించిన ఖచ్చితమైన మాటల్లో, భాష తీరులో, వ్యక్తీకరణలో ఉన్నాయి. వాటిని ఎదిరించబూనుకునే వాడు వాటిని ఇచ్చిన ఏకైక నిజ దేవునితోనే పోరాడుతున్నాడన్న మాట.

50. మరియు ఆయన ఆజ్ఞ నిత్యజీవమని నేనెరుగుదును గనుక నేను చెప్పు సంగతులను తండ్రి నాతో చెప్పిన ప్రకారము చెప్పుచున్నాననెను.

“శాశ్వత జీవం”– ఈ శుభవార్త అంతటా కొనసాగే ముఖ్యాంశం జీవం (యోహాను 1:4; యోహాను 3:16, యోహాను 3:36; యోహాను 4:14; యోహాను 5:24; యోహాను 6:47; యోహాను 10:10). తండ్రి అయిన దేవుడు తనకిచ్చిన మాటలనే అక్షరాలా మాట్లాడేందుకు క్రీస్తు జాగ్రత్త వహించాడు. ఆ మాటల్లో వెలిబుచ్చిన అంశాలు చాలా ప్రాముఖ్యమైనవి. క్రీస్తు బహిరంగ పరిచర్యలో ఆయన పలికిన ఆఖరు పలుకులివి. ఆయన చెప్పిన మాటలన్నిటిపై ఇవి దేవుని అధికార ముద్ర వేస్తున్నాయి. దేవుని వాక్కు ఆయనే (యోహాను 1:1), ఆయన దేవుని వాక్కులనే పలికాడు.