1. నేనీలాగు ప్రకటించితిని యాకోబు సంతతియొక్క ప్రధానులారా, ఇశ్రాయేలీయుల అధిపతులారా, ఆలకించుడి; న్యాయము ఎరిగియుండుట మీ ధర్మమే గదా.

యాకోబు, ఇస్రాయేల్‌ప్రజల నాయకులూ అధిపతులూ అంటే యూదాప్రజల నాయకులు కూడా. వ 9,10 చూడండి. “న్యాయం...తెలుసుకో”– దేవుని ప్రజలుగా, నీతిన్యాయాలు గల పవిత్ర జనంగా ఉండేందుకు వారు పిలవబడ్డారు. అందువల్ల న్యాయం అంటే ఏమిటో తెలిసివుండి దాన్ని అమలు జరపడం అత్యవసరం.

2. అయినను మేలు నసహ్యించుకొని కీడుచేయ నిష్టపడుదురు, నా జనుల చర్మము ఊడదీసి వారి యెముకలమీది మాంసము చీల్చుచుందురు.

“మంచిని అసహ్యించుకొంటారు”– వారు ఎలా ఉండాలో దానికి ఇది సరిగ్గా వ్యతిరేకం. అయితే ప్రతి దేశంలో, ప్రతి కాలంలో కొందరు నాయకులను ఈ మాటలు వర్ణిస్తున్నాయి.

3. నా జనుల మాంసమును భుజించుచు వారి చర్మమును ఒలిచి వారి యెముకలను విరిచి, ఒకడు కుండలో వేయు మాంసమును ముక్కలు చేయు నట్టు బానలో వేయు మాంసముగా వారిని తుత్తునియలుగా పగులగొట్టియున్నారు.

అక్షరాలా ప్రజల్ని భుజించడం లేదు గాని ఎంత క్రూరంగా వారిని పీడిస్తున్నారో ఈ మాటలు తెలియజేస్తున్నాయి.

4. వారు దుర్మార్గత ననుసరించి నడుచుకొనియున్నారు గనుక వారు యెహోవాకు మొఱ్ఱ పెట్టినను ఆయన వారి మనవి అంగీకరింపక ఆ కాలమందు వారికి కనబడకుండ తన్ను మరుగుచేసికొనును.

“వాళ్ళు”అంటే నాయకులు. “జవాబేమీ ఇవ్వడు”– సామెతలు 1:24-31; యెషయా 1:15; యెషయా 59:1-2; యిర్మియా 11:11 పోల్చి చూడండి. “ముఖం...కనిపించకుండా”– ద్వితీయోపదేశకాండము 31:17; యెషయా 45:15; హోషేయ 5:6, హోషేయ 5:15.

5. ఆహారము నమలుచు, సమాధానమని ప్రకటించువారును, ఒకడు తమ నోట ఆహారము పెట్టనియెడల అతనిమీద యుద్ధము ప్రకటించువారునై నా జనులను పొరపెట్టు ప్రవక్తలను గూర్చి యెహోవా సెలవిచ్చునదేమనగా

దేవుని పక్షాన మాట్లాడవలసిన ప్రవక్తలు ఇస్రాయేల్ నాయకుల్లాగానే చెడ్డవారు. ప్రజలను సత్యంలోకి నడిపించడానికి బదులుగా దానికి దూరంగా తీసుకుపోయారు. యెషయా 3:12; యెషయా 9:16; యిర్మియా 6:13-14; మత్తయి 7:15; మత్తయి 24:24; 2 పేతురు 2:1 పోల్చి చూడండి.

6. మీకు దర్శనము కలుగకుండ రాత్రికమ్మును, సోదె చెప్పకుండ మీకు చీకటి కలుగును; ఇట్టి ప్రవక్తలకు సూర్యుడు కనబడకుండ అస్తమించును, పగలు చీకటిపడును

ప్రవక్తలకు దేవుని వెలుగు ఉండాలి. అయితే ఆ వెలుగును వారు కోరుకోలేదు గనుక దేవుడు వారిని చిమ్మ చీకటిలో ముంచివేస్తాడు. వారి నేరానికి తగిన శిక్షే వారికి లభిస్తుందన్నమాట.

7. అప్పుడు ధీర్ఘదర్శులు సిగ్గునొందుదురు, సోదెగాండ్రు తెల్లబోవుదురు. దేవుడు తమకు ప్రత్యుత్తర మియ్యకుండుట చూచి నోరు మూసి కొందురు.

“దీర్ఘదర్శి”– 1 సమూయేలు 9:9 చూడండి.

8. నేనైతే యాకోబు సంతతివారికి తమ దోష మును ఇశ్రాయేలీయులకు తమ పాపమును కనుపరచుటకై, యెహోవా ఆత్మావేశముచేత బలముతోను తీర్పు తీర్చు శక్తితోను ధైర్యముతోను నింపబడినవాడనైయున్నాను.

“అపరాధాలను చాటించడానికి”– దేవుని ప్రవక్తల ముఖ్య విధుల్లో ఇదొకటి. యెషయా 58:1 పోల్చి చూడండి. “యెహోవా ఆత్మ”– నిర్గమకాండము 31:3; యెషయా 48:16; యెహెఙ్కేలు 2:2; జెకర్యా 4:6; ఎఫెసీయులకు 5:18; 1 పేతురు 1:11. యోహాను 14:16-17 నోట్ చూడండి.

9. యాకోబు సంతతివారి ప్రధానులారా, ఇశ్రాయేలీయుల యధిపతులారా, న్యాయమును తృణీకరించుచు దుర్నీతిని నీతిగా ఎంచువారలారా, యీ మాట ఆలకించుడి.

“న్యాయాన్ని ఏవగించుకొంటూ”– వ 1. న్యాయాన్ని తమ స్వలాభంకోసం తారుమారు చేశారు – యెహెఙ్కేలు 22:27 పోల్చి చూడండి.

10. నరహత్య చేయుటచేత సీయోనును మీరు కట్టుదురు. దుష్ట త్వము జరిగించుటచేత యెరూషలేమును మీరు కట్టుదురు.

మీకా 7:2; యిర్మియా 22:13, యిర్మియా 22:17; యెషయా 59:7 పోల్చి చూడండి.

11. జనుల ప్రధానులు లంచము పుచ్చుకొని తీర్పు తీర్చుదురు, వారి యాజకులు కూలికి బోధింతురు, ప్రవక్తలు ద్రవ్యము కొరకు సోదె చెప్పుదురు; అయినను వారు, యెహోవాను ఆధారము చేసికొని యెహోవా మన మధ్యనున్నాడు గదా, యే కీడును మనకు రానేరదని యనుకొందురు.

అధికారులు, యాజులు, ప్రవక్తలు కేవలం ధనాన్నే ఆశించారు. ప్రజలంటే, మంచితనం, న్యాయం అంటే వారికి లెక్కలేదు. అంటే నేడు మనం చూస్తున్న భ్రష్ట పరిస్థితులలాగే అప్పుడూ ఉండేదన్నమాట.

12. కాబట్టి చేనుదున్నబడునట్లు మిమ్మునుబట్టి సీయోను దున్నబడును, యెరూషలేము రాళ్ల కుప్పలగును, మందిరమున్న పర్వతము అరణ్యములోని ఉన్నతస్థలములవలె అగును.