1. కడవరి గడ్డి మొలుచునప్పుడు ప్రభువైన యెహోవా మిడుతలను పుట్టించి దర్శనరీతిగా దానిని నాకు కనుపర చెను; ఆ గడ్డి రాజునకు రావలసిన కోత అయిన తరువాత మొలిచినది.

“కనుపరచినది”– దర్శనంలో. “మిడతల గుంపు”– దేవుడు ఇస్రాయేల్‌వారి శిక్ష నిమిత్తం వారిపైకి పంపేందుకు మిడతల గుంపును సిద్ధం చేస్తున్నాడు. యోవేలు 1వ అధ్యాయం పోల్చి చూడండి.

2. నేలను మొలిచిన పచ్చికయంతయు ఆ మిడుతలు తినివేసినప్పుడు ప్రభువైన యెహోవా, నీవు దయచేసి క్షమించుము, యాకోబు కొద్ది జనముగల వాడు, అతడేలాగు నిలుచును? అని నేను మనవిచేయగా

“యాకోబు”– ఇస్రాయేల్ ప్రజ. “మనవి చేశాను”– ఆదికాండము 18:23-33; నిర్గమకాండము 32:11-13, నిర్గమకాండము 32:31-32 పోల్చి చూడండి.

3. యెహోవా పశ్చాత్తాపపడి అది జరుగదని సెలవిచ్చెను.

“మనసు కరిగింది”– నిర్గమకాండము 32:14; ద్వితీయోపదేశకాండము 32:36; యిర్మియా 18:8; యిర్మియా 26:19; హోషేయ 11:8. “అలా జరగదు”– యోవేలులో వర్ణించబడిన మిడతల తెగులు వేరే కాలంలో వచ్చింది.

4. మరియు అగ్నిచేత దండింపవలెనని అగ్ని రప్పించి ప్రభువైన యెహోవా దానిని దర్శనరీతిగా నాకు కను పరచెను. అది వచ్చి అగాధమైన మహా జలమును మింగివేసి, స్వాస్థ్యమును మింగ మొదలుపెట్టినప్పుడు

“మంటలను”– బహుశా సొదొమ మీదికి వచ్చిన తీర్పులాంటిది కావచ్చు (ఆదికాండము 19:23-28).

5. ప్రభువైన యెహోవా, యాకోబు కొద్ది జనముగల వాడు, అతడేలాగు నిలుచును? మాని వేయుమని నేను మనవిచేయగా

6. ప్రభువైన యెహోవా పశ్చాత్తాపపడి అదియు జరుగదని సెలవిచ్చెను.

7. మరియు యెహోవా తాను మట్టపుగుండు చేత పట్టు కొని గుండు పెట్టి చక్కగా కట్టబడిన యొక గోడమీద నిలువబడి ఇట్లు దర్శనరీతిగా నాకు కనుపరచెను.

ఇక్కడ దేవుడు ఇస్రాయేల్‌ను గోడతో పోలుస్తున్నాడు. వారు నిటారుగా ఉండాలని కోరుతున్నాడు. వారిని పరీక్షించి నప్పుడు వంకరటింకరగా ఉన్నట్టు చూశాడు. అందువల్ల ఆ గోడను పడగొట్టాలి.

8. యెహోవాఆమోసూ, నీకు కనబడుచున్నదేమని నన్నడుగగానాకు మట్టపుగుండు కనబడుచున్నదని నేనంటిని. అప్పుడు యెహోవా సెలవిచ్చినదేమనగా నా జనులగు ఇశ్రాయేలీయుల మధ్యను మట్టపుగుండు వేయ బోవుచున్నాను. నేనికను వారిని దాటిపోను

9. ఇస్సాకు సంతతివారు ఏర్పరచిన ఉన్నతస్థలములు పాడైపోవును, ఇశ్రాయేలీయుల ప్రతిష్ఠితస్థలములు నాశమగును. నేను ఖడ్గము చేత పట్టుకొని యరొబాము ఇంటివారిమీద పడుదును.

సర్వనాశనం చేసే మిడతల తెగులును గానీ దహించివేసే మంటలను గానీ ఆయన వారిపైకి పంపడు. కానీ వారి విగ్రహ పూజాస్థలాలనూ వారిలో అనేకమందినీ నాశనం చేసేందుకు శత్రుసైన్యాలను పంపుతాడు. “ఇస్సాకు”– యాకోబు తండ్రి, ఇక్కడ ఇస్రాయేల్ ప్రజలను సూచించేందుకు వాడిన పేరు. “యరొబాం”– ఆమోసు 1:1; హోషేయ 1:1.

10. అప్పుడు బేతేలులోని యాజకుడైన అమజ్యా ఇశ్రాయేలురాజైన యరొబామునకు వర్తమానము పంపిఇశ్రా యేలీయులమధ్య ఆమోసు నీ మీద కుట్ర చేయు చున్నాడు;

బేతేల్ విగ్రహ పూజాస్థానం – ఆమోసు 4:4; ఆమోసు 5:5-6; 1 రాజులు 12:28-30. అందువల్ల ఈ అమజయా విగ్రహ పూజారే గాని నిజమైన యాజి కాదు. దేవుని ప్రవక్త అయిన ఆమోసును వదిలించుకునేందుకు అతడు శాయశక్తులా ప్రయత్నించాడు.

11. యరొబాము ఖడ్గముచేత చచ్చుననియు, ఇశ్రాయేలీయులు తమ దేశమును విడిచి చెరలోనికి పోవుదురనియు ప్రకటించుచున్నాడు; అతని మాటలు దేశము సహింపజాలదు అని తెలియజేసెను.

యరొబాం కత్తివాతకు కూలుతాడని ఆమోసు చెప్పలేదు. అలా జరగలేదు కూడా (2 రాజులు 14:29). అయితే యరొబాం ఇంటివారి పైకి ఖడ్గం వచ్చింది – వ 9; 2 రాజులు 15:8-10. “అతడి మాటలు... అసాధ్యం”– అంటే వారు నిజాన్ని భరించలేరన్నమాట. ఆమోసు 5:10 పోల్చి చూడండి.

12. మరియు అమజ్యా ఆమోసుతో ఇట్లనెను దీర్ఘదర్శీ, తప్పించుకొని యూదాదేశమునకు పారి పొమ్ము; అచ్చటనే బత్తెము సంపాదించుకొనుము అచ్చటనే నీ వార్త ప్రకటించుము;

“దీర్ఘదర్శి”– 1 సమూయేలు 9:9; ఆమోసు తన దర్శనాల్లో ఏం చూశాడో ఇస్రాయేల్‌వారికి చెప్పాడు. అందువల్ల అమజయా అతణ్ణి వ్యంగ్యంగా దీర్ఘదర్శి అని సంబోధిస్తున్నాడు (దీర్ఘదర్శి అంటే భవిష్యత్తులోని విషయాలను చూచేవాడు).

13. బేతేలు, రాజుయొక్క ప్రతిష్ఠిత స్థలము రాజధాని పట్టణమై యున్నందున నీ వికను దానిలో నీ వార్త ప్రకటనచేయ కూడదు.

బేతేల్ దుష్ట పాలకుడి ఆలయం. పరలోక రాజు యొక్క ఆలయం జెరుసలంలో ఉంది.

14. అందుకు ఆమోసు అమజ్యాతో ఇట్లనెను నేను ప్రవక్తనైనను కాను, ప్రవక్త యొక్క శిష్యుడనైనను కాను, కాని పసులకాపరినై మేడి పండ్లు ఏరుకొనువాడను.

ఆమోసును గురించి పూర్తిగా పొరపాటు అభిప్రాయంలో ఉన్నాడు అమజయా. అందువల్ల తాను వృత్తి రీత్యా ప్రవక్తను కానని ఆమోసు అతనికి వివరిస్తున్నాడు. ప్రవక్త పని తన జీవనోపాధి కాదని చెప్తున్నాడు (వ 12). ఇస్రాయేల్‌లో తిరుగుబాటు రేకెత్తించేందుకు యూదా రాజు తనను పంపలేదు (వ 10). దేవుడు పంపాడు గనుకనే తాను ఇస్రాయేల్‌కు వచ్చాడు.

15. నా మందలను నేను కాచుకొనుచుండగా యెహోవా నన్ను పిలిచినీవు పోయి నా జనులగు ఇశ్రాయేలువారికి ప్రవచనము చెప్పుమని నాతో సెల విచ్చెను.

16. యెహోవా మాట ఆలకించుముఇశ్రాయేలీ యులను గూర్చి ప్రవచింపకూడదనియు ఇస్సాకు సంతతి వారిని గూర్చి మాట జారవిడువకూడదనియు నీవు ఆజ్ఞ ఇచ్చుచున్నావే.

“నీవు విను”– దేవుని మూలంగా పలికేందుకు దేవుడు తనను పంపాడు గనుక అమజయాకు, లేక ఇస్రాయేల్‌వారికి నచ్చినా నచ్చకపోయినా అలా చేస్తూనే ఉంటాడు.

17. యెహోవా సెలవిచ్చునదేమన గానీ భార్య పట్టణమందు వేశ్యయగును, నీ కూమారులును కుమార్తెలును ఖడ్గముచేత కూలుదురు, నీ భూమి నూలుచేత విభాగింపబడును, నీవు అపవిత్రమైన దేశమందు చత్తువు; అవశ్యముగా ఇశ్రాయేలీయులు తమ దేశము విడిచి చెరగొనబడుదురు.

ఇస్రాయేల్‌వారు బందీలుగా పోతారన్న భవిష్యద్వాక్కును ఆమోసు మళ్ళీ పలుకుతున్నాడు (ఆమోసు 5:27). అమజయాకు ఏం జరుగుతుందో కూడా చెప్తున్నాడు.