1. మరియు ఆయన నాతో ఈలాగు సెలవిచ్చెను నరపుత్రుడా, నీకు కనబడినదానిని భక్షించుము, ఈ గ్రంథమును భక్షించి ఇశ్రాయేలీయులయొద్దకు పోయి వారికి ప్రకటన చేయుము.
ప్రకటన గ్రంథం 10:9

యిర్మియా 1:9; యిర్మియా 15:16; ప్రకటన గ్రంథం 10:9-10 పోల్చి చూడండి. దేవుని మాటలను ఆయన సేవకులు స్వీకరించి జీర్ణం చేసుకోవాలి. అది వారి జీవితంలో ఒక భాగం కావాలి.

2. నేను నోరు తెరువగా ఆయన ఆ గ్రంథము నాకు తినిపించి

3. నరపుత్రుడా, నేనిచ్చుచున్న యీ గ్రంథమును ఆహారముగా తీసికొని దానితో నీ కడుపు నింపుకొనుమని నాతో సెలవియ్యగా నేను దాని భక్షించితిని; అది నా నోటికి తేనెవలె మధురముగా నుండెను.

“తియ్యగా”– దేవునితో ఈ సహవాసం తియ్యగా ఉంది, ఆయన సందేశంలో విలాపాన్నీ, విపత్తునూ సూచించే మాటలు ఇమిడి ఉన్నా, మొత్తంమీద అది కూడా తియ్యగా ఉంది. అయితే తరువాతి కాలంలో యోహానుకు జరిగినట్టు యెహెజ్కేలు అంతరంగంలో ఈ సందేశం చేదుగా అయి నొప్పించింది. (వ 12-14).

4. మరియు ఆయన నాతో ఈలాగు సెలవిచ్చెను నరపుత్రుడా, నీవు బయలుదేరి ఇశ్రాయేలీయుల యొద్దకు పోయి నా మాటలు వారికి తెలియజెప్పుము.

5. నీవు గ్రహింపలేని ఏసమాటలు పలుకు జనులయొద్దకు కాదు ఇశ్రాయేలీయులయొద్దకే నిన్ను పంపుచున్నాను.

6. నీవు గ్రహింపలేని ఏసమాటలు పలుకు అన్యజనులయొద్దకు నిన్ను పంపుటలేదు, అట్టివారి యొద్దకు నేను నిన్ను పంపిన యెడల వారు నీ మాటలు విందురు.

యెహెఙ్కేలు 2:3-5; మత్తయి 11:20-24 పోల్చి చూడండి.

7. అయితే ఇశ్రాయేలీయులందరు సిగ్గుమాలిన వారును కఠినహృదయులునై, నేను చెప్పిన మాటల నాలకింపనొల్లక యున్నారు గనుక నీ మాటలు విననొల్లరు.

యిర్మియా 7:27. ఎవరికైతే సందేశాన్ని పంపాడో వారు వినకపోయినప్పటికీ దాన్ని పంపడంలో దేవునికి మంచి ఉద్దేశం ఉంది.

8. ఇదిగో వారి ముఖమువలెనే నీ ముఖమును కఠినమైనదిగా నేను చేసెదను, వారి నుదురు వలెనే నీ నుదురును కఠినమైనదిగా చేసెదను.

యెహెజ్కేలు అంటే అర్థం “దేవుడు బలవంతుడు” లేక “దేవుడు బలపరుస్తాడు” లేక “దేవుడు దృఢపరుస్తాడు”. ప్రవక్త తాను ఎవరికి తన సందేశాన్నివ్వబూనుకున్నాడో ఆ ప్రజల ఎదుట నిలవాలంటే అతడు బలమైనవాడుగా, దృఢ చిత్తం గలవాడుగా బెదిరిపోని వాడుగా తయారు కావాలి. అతణ్ణి అలా చెయ్యగలిగినది దేవుడొక్కడే. యెషయా 50:7; యిర్మియా 1:17-19. దేవుడు తాను పిలిచిన తన సేవకులందరికీ వారిని ఏ పనికోసమైతే పిలిచాడో దాన్ని వారు నెరవేర్చగలిగే సమర్థవంతులుగా చేస్తాడు (2 కోరింథీయులకు 3:5-6).

9. నీ నుదురు చెకుముకి రాతికంటె కఠినముగా ఉండు వజ్రమువలె చేసెదను; వారికి భయపడకుము, వారందరు తిరుగు బాటు చేయువారైనను వారిని చూచి జడియకుము.

10. మరియు నరపుత్రుడా, చెవియొగ్గి నేను నీతో చెప్పుమాటలన్నిటిని చెవులార విని నీ మనస్సులో ఉంచుకొని

దేవుని పక్షంగా వచ్చిన రాయబారి దేవుని వాక్కుకు ముందుగా తాను విధేయుడయ్యే విషయం జాగ్రత్తగా చూసుకోవాలి. ఊరికే మాట్లాడే చిలకలాగానో, మైనాలాగానో, తాను బోధించేది తనకు మాత్రం ఏమీ పట్టనట్టుగా ఉండకూడదు.

11. బయలుదేరి చెరలోనున్న నీ జనుల యొద్దకు పోయి యీ మాటలు ప్రకటింపుము, వారు వినినను వినకపోయినను ప్రభువైన యెహోవా ఈలాగు సెలవిచ్చుచున్నాడని చెప్పుమని ఆయన నాతో సెలవిచ్చెను.

బబులోను చెరలో ఉన్నవారి దగ్గర కపట ప్రవక్తలు ఉండి వారి చెర త్వరలో అంతమౌతుందని చెప్తూ వచ్చారు. వీరి వల్ల ప్రజలు కొంత అయోమయంలో పడ్డారు. జెరుసలం నాశనమౌతుందని గానీ తాము ఇంకా అనేక ఏళ్ళపాటు బబులోనులో ఉండిపోతామని గానీ ఈ ప్రవక్తలు నమ్మలేదు. యిర్మీయా 29 అధ్యాయంలో ఈ ప్రవాసులకు యిర్మీయా రాసిన లేఖ చూడండి.

12. అంతలో ఆత్మ నన్నెత్తికొనిపోగా యెహోవా ప్రభావమునకు స్తోత్రము కలుగునుగాక అను శబ్దమొకటి ఆయన యున్న స్థలమునుండి ఆర్భాటముతో నా వెనుక పలుకుట నేను వింటిని.

యెహెఙ్కేలు 2:1 నుండి యెహెఙ్కేలు 3:11 దాకా కెరూబులు, చక్రాలు, మహిమా ప్రకాశం గురించి రాసి ఉంది. ఇక యెహెజ్కేలు వీటన్నిటినుండీ దూరం తొలగి తాను చెప్పేదాన్ని నిరాకరించే మొండి ప్రజల మధ్య పరిచర్య ఆరంభించాలి. దుఃఖం బాధలతో కూడిన సందేశం గల దేవుని వాక్కు అతని హృదయంలో మండుతూ ఉంది (యెహెఙ్కేలు 2:10). ఆత్మలో నొచ్చుకుంటూ, ఉడుక్కుంటూ వెళ్ళాడంటే ఆశ్చర్యమేమీ లేదు. దేవుడు తన ఉద్దేశాలకు అనుగుణంగా తన సందేశాన్ని ప్రజలకు అందించేందుకు యెహెజ్కేలును ఎలా తయారు చెయ్యాలో ఆ విధంగా ఇప్పటికే అతనిలో పని చేయడం ఆరంభించాడు (వ 8,9). దేవుని ఆత్మ అతణ్ణి ఎత్తి తీసుకుపోయాడని గమనించండి.

13. మరియు ఆ జంతువుల రెక్కలు ఒక దానికొకటి తగులుటవలన కలుగు చప్పుడును వాటి ప్రక్కనున్న చక్రముల ధ్వనియు గొప్ప సందడి జరుగు చున్నట్లుగా నాకు వినబడెను

14. ఆత్మ నన్నెత్తి తోడు కొనిపోగా నా మనస్సునకు కలిగిన రౌద్రాగ్నిచేత బహుగా వ్యాకులపడుచు కొట్టుకొనిపోయినప్పుడు, యెహోవా హస్తము నా మీద బలముగా వచ్చెను.

15. నేను కెబారు నది దగ్గర తేలాబీబు అను స్థలమందు కాపురముండు చెరపట్టబడినవారి యొద్దకు వచ్చి, వారు కూర్చున్న స్థలమందు కూర్చుండి యేమియు చెప్పకయు కదలకయు నున్నవాడనై యేడు దినములు వారి మధ్య నుంటిని.

దానియేలు 8:27; దానియేలు 10:2. ఏడు రోజులపాటు చేష్టలుడిగి అతడు కూర్చుండిపోయాడంటే ఆశ్చర్యమేమీ లేదు. అతడు పొందిన అలాంటి అనుభవం తరువాత ఇక మరెన్నడూ అతడు మామూలు మనిషి కాలేడు.

16. ఆ యేడు దినములు జరిగిన తరువాత యెహోవా వాక్కు నాకు ప్రత్యక్షమై యీలాగు సెలవిచ్చెను

17. నరపుత్రుడా, ఇశ్రాయేలీయులకు కావలిగా నేను నిన్ను నియమించియున్నాను, కాబట్టి నీవు నా నోటిమాట ఆలకించి నేను చెప్పినదానినిబట్టి వారిని హెచ్చరిక చేయుము.
హెబ్రీయులకు 13:17

“కావలివాడు”– యెషయా 52:8; యెషయా 56:10; యెషయా 62:6; యిర్మియా 6:17; యిర్మియా 31:6; యెహెఙ్కేలు 33:7-9. దేవుని కావలివారు దేవుని వాక్కు కోసం ఎదురు చూస్తూ ప్రజల నడతలను కనిపెడుతూ, దేవుని పక్షంగా మాట్లాడుతూ ఉండాలి. ముఖ్యంగా ముంచుకు వచ్చే ప్రమాదాన్ని గురించి ప్రజలను హెచ్చరించాలి.

18. అవశ్యముగా నీవు మరణ మవుదువని నేను దుర్మార్గుని గూర్చి ఆజ్ఞ ఇయ్యగా నీవు అతనిని హెచ్చరిక చేయకయు, అతడు జీవించునట్లు తన దుర్మార్గతను విడిచి పెట్టవలెనని వానిని హెచ్చరిక చేయకయు నుండినయెడల ఆ దుర్మార్గుడు తాను చేసిన దోషమునుబట్టి మరణమవును గాని అతని రక్తమునకు నిన్ను ఉత్తరవాదిగా ఎంచుదును.

దేవుని ప్రవక్తల మీద ఉన్న ఈ బాధ్యత ఎంత భయం కొలిపేదో చూడండి. దేవునికి తమ సేవను గురించి, ఆయన తమను ఎవరి దగ్గరికైతే పంపాడో ఆ ప్రజల గురించీ సంజాయిషీ ఇచ్చుకోవాలి. తాను హెచ్చరించవలసిన ప్రజలకు యెహెజ్కేలు హెచ్చరించకుండా ఊరుకుంటే దేవుడు అతణ్ణి ఏం చేస్తాడో స్పష్టంగా తెలియదు. అయితే “అతడి రక్తం విషయంలో నిన్ను జవాబుదారిగా ఎంచుతాను” అనే మాటలు చాలా కఠినమైనవి (వ 18,20). ఇవి యెహెజ్కేలు మనసులో, హృదయంలో చెరగని ముద్రవేసి ఉంటాయి.

19. అయితే నీవు దుర్మార్గుని హెచ్చరిక చేయగా అతడు తన దుర్మార్గతనుండి దుష్‌క్రియలనుండియు మరలనియెడల అతడు తన దోషమునుబట్టి మరణమవును గాని నీవు (ఆత్మను) తప్పించుకొందువు.

20. మరియు నీతిగలవాడు తన నీతిని విడిచి దుర్నీతిని అనుసరించినందున నేను అతని ముందర అభ్యంతరము పెట్టగా అతడు మరణమగును నీవు అతనిని హెచ్చరిక చేయని యెడల పూర్వము తాను చేసిన నీతి జ్ఞాపకమునకు రాకుండ అతడు తన దోషమునుబట్టి మరణ మవును, అయితే అతని ప్రాణవిషయములో నిన్ను ఉత్తర వాదిగా ఎంచుదును.

“చస్తాడు”– శాశ్వత జీవాన్ని పోగొట్టుకుంటాడని అర్థం కాదు గానీ శారీరకంగా చచ్చిపోతాడు. యెహెఙ్కేలు 18:1-32 చూడండి.

21. అయితేపాపము చేయవలదని నీతిగల వానిని నీవు హెచ్చరికచేయగా అతడు హెచ్చరింపబడి పాపముచేయక మానినయెడల అతడు అవశ్యముగా బ్రదుకును, నీ మట్టుకు నీవును (ఆత్మను) తప్పించు కొందువు.

22. అక్కడ యెహోవా హస్తము నామీదికి వచ్చి, నీవు లేచి మైదానపు భూమికి వెళ్లుము, అక్కడ నేను నీతో మాటలాడుదునని ఆయన నాకు సెలవిచ్చెను.

“యెహోవా చెయ్యి”– యెహెఙ్కేలు 1:3. “వెళ్ళు”– దేవునితో ఒంటరిగా ఉండేందుకు. యెహెజ్కేలు ఇప్పటికే నివ్వెరపోయి ఉన్నాడు (వ 15); 16-21 వచనాల్లోని సందేశం అతణ్ణి మరింత తత్తరపాటుకు గురి చేసి ఉండవచ్చు. ఏది ఏమైనా దేవుడు తన మహిమను అతడు మరో సారి చూడాలని కోరాడు. దేవునితో ఒంటరిగా మోషే (నిర్గమకాండము 3:1-2), ఏలీయా (1 రాజులు 19:9-13), బాప్తిసమిచ్చే యోహాను (లూకా 1:80), యోహాను (ప్రకటన గ్రంథం 1:9-10) ఉన్న సన్నివేశాలను పోల్చిచూడండి.

23. నేను లేచి మైదానపు భూమికి వెళ్లగా, కెబారునది దగ్గర యెహోవా ప్రభావము నాకు ప్రత్యక్షమైనట్టు ఆయన ప్రభావము నిలువబడి నాకు ప్రత్యక్ష మాయెను.

విధేయుడైన తన సేవకుని కోసం దేవుని మహిమాన్వితమైన సన్నిధి సమీపంలో ఉంది. ఇది ఎప్పుడూ ఇంతే.

24. నేను నేలను సాగిల పడగా ఆత్మ నాలో ప్రవేశించి నన్ను చక్కగా నిలువ బెట్టిన తరువాత యెహోవా నాతో మాటలాడి ఈలాగు సెలవిచ్చెను నరపుత్రుడా, వారు నీ మీద పాశములువేసి వాటితో నిన్ను బంధింపబోవుదురు గనుక వారి యొద్దకు వెళ్లక యింటికిపోయి దాగియుండుము.

యెహెజ్కేలు ఎదుర్కోవలసిన ఇబ్బందుల గురించి అతణ్ణి సిద్ధపరిచేందుకు ఇవి కొత్త ఆదేశాలు.

25. వారు బహుగా తిరుగుబాటు చేయువారు గనుక నీవు మౌనివై వారిని గద్దింపక యుండునట్లు

26. నేను నీ నాలుక నీ అంగిటికి అంటుకొన జేసెదను.

దేవుడు అతనికి మాట్లాడేందుకు శక్తినిచ్చేవరకు యెహెజ్కేలు నోరు విప్పలేకపోయాడు. కొన్ని సార్లు దైవ సేవకుల పై దేవుడు ఖచ్చితమైన నిర్బంధాలు కొన్ని విధిస్తాడు. ఇతరులకు ఉన్నంత స్వేచ్ఛ దైవసేవకులకు ఉండకపోవచ్చు. కొంతకాలంపాటు యెహెజ్కేలు పరిచర్య అతని ఇంటిలోనే, ఆ ఇంటికి వచ్చేవారికే పరిమితం అయివుంది. అయితే అలా వచ్చి వినేవారి మూలంగా అతని మాటలు, చర్యలు, ప్రవాసంలో ఉన్నవారందరికీ ప్రాకడం తప్పనిసరి. బందీగా ఉన్న పౌలు విషయం పోల్చిచూడండి (ఫిలిప్పీయులకు 1:12-14; 2 తిమోతికి 2:9).

27. అయితే నేను నీతో మాటలాడి నీ నోరు తెరచెదను, వారు తిరుగుబాటు చేయువారు గనుక నీవు వారియొద్దకు పోయివినువాడు వినునుగాక విననొల్లనివాడు విననొల్లకయుండును గాక అని ప్రభువగు యెహోవా సెలవిచ్చుచున్నాడని వారితో చెప్పవలెను.