1. పదియవ సంవత్సరము పదియవ నెల పండ్రెండవ దినమున యెహోవా వాక్కు నాకు ప్రత్యక్షమై యీలాగు సెలవిచ్చెను

క్రీ.పూ. 587 జనవరి నెల.

2. నరపుత్రుడా, నీ ముఖమును ఐగుప్తురాజైన ఫరోవైపు త్రిప్పుకొని అతనిగూర్చియు ఐగుప్తు దేశ మంతటినిగూర్చియు ఈ సమాచారమెత్తి ప్రవచింపుము ప్రభువగు యెహోవా సెలవిచ్చునదేమనగా

ఈజిప్ట్‌ను గురించి ఇతర భవిష్యద్వాక్కులు యెషయా 19,20 అధ్యాయాల్లో, యిర్మీయా 46వ అధ్యాయంలో ఉన్నాయి.

3. ఐగుప్తు రాజైన ఫరో, నైలునదిలో పండుకొనియున్న పెద్దమొసలీ, నేను నీకు విరోధిని; నైలునది నాది, నేనే దాని కలుగ జేసితిని అని నీవు చెప్పుకొనుచున్నావే;

“మొసలి”– యెహెఙ్కేలు 4:3; యోబు 41:1; యెషయా 27:1. “నీవంటావు”– ఇక్కడ మరో సారి దేవుడెంతగానో అసహ్యించుకునే అహంకారం, గొప్ప చేసుకునే దోరణీ కనిపిస్తున్నాయి. ఈజిప్ట్ రాజులు తమను తాము ఒక విధంగా దేవుళ్ళుగా ఎంచుకున్నారు. ఈ ఫరో అయితే ఈజిప్ట్‌లోని గొప్ప నది నైలును సృష్టించింది తానేనన్న భ్రమను కల్పించుకున్నాడు.

4. నేను నీ దవుడలకు గాలములు తగిలించి, నీ నదులలోనున్న చేపలను నీ పొలుసులకు అంటజేసి, నైలులోనుండి నిన్నును నీ పొలుసులకు అంటిన నైలు చేపలన్నిటిని బయటికి లాగెదను.

“గాలాలు”– లోక పరిపాలకుల్లో ఎవణ్ణయినా పట్టుకొని అతనితోపాటు అతని రాజ్యాన్ని అంతమొందించడం దేవునికి ఏమీ కష్టం కాదు.

5. నిన్నును నైలునది చేపలన్నిటిని అరణ్యములో పారబోసెదను, ఎత్తు వాడును కూర్చువాడును లేక నీవు తెరపనేల మీద పడుదువు, అడవిమృగములకును ఆకాశపక్షులకును ఆహారముగా నిచ్చెదను.
ప్రకటన గ్రంథం 6:8

6. అప్పుడు నేను యెహోవానై యున్నానని ఐగుప్తీయులందరు తెలిసికొందరు. ఐగుప్తు ఇశ్రాయేలీయులకు రెల్లుపుల్లవంటి చేతికఱ్ఱ ఆయెను;

“రెల్లు”– యెషయా 36:6. బబులోనువారి బారినుంచి కాపాడుకునేందుకు ఇస్రాయేల్‌వారు ఈజిప్ట్ సహాయాన్ని కోరితే అది వారికి ఎంత మాత్రం ఉపయోగపడలేదు.

7. వారు నిన్ను చేత పట్టుకొనినప్పుడు నీవు విరిగిపోయి వారి ప్రక్కలలో గుచ్చుకొంటివి, వారు నీమీద ఆనుకొనగా నీవు విరిగిపోయి వారి నడుములు విరిగిపోవుటకు కారణమైతివి.

8. కాబట్టి ప్రభువైన యెహోవా ఈ మాట సెలవిచ్చుచున్నాడు నేను నీమీదికి ఖడ్గము రప్పించి, మనుష్యులను పశువులను నీలోనుండి నిర్మూలము చేసెదను,

“ఖడ్గం”– బబులోను సైన్యాలు.

9. ఐగుప్తుదేశము నిర్మానుష్యమై పాడుగా ఉండును, అప్పుడు నేను యెహోవానై యున్నానని వారు తెలిసికొందురు. నైలునది నాది, నేనే దాని కలుగజేసితినని అతడనుకొను చున్నాడు గనుక

నిజమైన సృష్టికర్త ఎవరో ఫరో తెలుసుకుంటాడు.

10. నేను నీకును నీ నదికిని విరోధినైతిని, ఐగుప్తు దేశమును మిగ్దోలు మొదలుకొని సెవేనేవరకు కూషు సరిహద్దు వరకు బొత్తిగా పాడుచేసి యెడారిగా ఉంచెదను.

“మిగ్‌దోల్‌నుంచి సెవేనే వరకు”– అంటే ఉత్తరం నుంచి దక్షిణంవరకు దేశం మొత్తం అని అర్థం. ఉదాహరణకు భారతదేశం గురించి కాశ్మీరునుంచి కన్యాకుమారివరకు అంటాం కదా.

11. దానిలో మనుష్యులు సంచరించరు, పశువులు తిరుగవు; నలువది సంవత్సరములు అది నిర్నివాసముగా ఉండును.

12. నిర్మానుష్యముగానున్న దేశముల మధ్యను ఐగుప్తుదేశమును పాడగునట్టుగా చేసెదను, పాడై పోయిన పట్టణములమధ్యను దాని పట్టణములు నలువది సంవత్సరములు పాడైయుండును, ఐగుప్తీయులను జనముల లోనికి చెదరగొట్టుదును, ఆ యా దేశములకు వారిని వెళ్ల గొట్టుదును.

13. ప్రభువైన యెహోవా ఈ మాట సెల విచ్చుచున్నాడు నలువది సంవత్సరములు జరిగిన తరువాత ఐగుప్తీయులు చెదరిపోయిన జనులలోనుండి నేను వారిని సమకూర్చెదను.

14. చెరలోనుండి వారిని తోడుకొని పత్రోసు అను వారి స్వదేశములోనికి వారిని మరల రప్పించెదను, అక్కడ వారు హీనమైన యొక రాజ్యముగా ఉందురు,

15. వారికను జనములమీద అతిశయపడకుండు నట్లు రాజ్యము లన్నిటిలో వారు హీనమైన రాజ్యముగా ఉందురు; వారు ఇక రాష్ట్రములమీద ప్రభుత్వము చేయ కుండునట్లు నేను వారిని తగ్గించెదను.

పురాతన ఫరోల కాలంలో ఈజిప్ట్ అనుభవించిన బలప్రభావాలు దానికి మరెన్నడూ తిరిగి చేకూరలేదు.

16. ఇశ్రాయేలీయులు తాము చేసిన దోషము మనస్సునకు తెచ్చుకొని వారి తట్టు తిరిగినయెడల ఐగుప్తీయులు ఇక వారికి ఆధారముగా ఉండరు, అప్పుడు నేను ప్రభువైన యెహోవానై యున్నానని వారు తెలిసికొందురు.

“దోషం”– యెషయా 31:1; యిర్మియా 17:5 లో ఈ దోషం ఖండించబడింది.

17. ఇరువదియేడవ సంవత్సరము మొదటినెల మొదటి దినమున యెహోవా వాక్కు నాకు ప్రత్యక్షమై యీలాగు సెలవిచ్చెను.

18. నరపుత్రుడా, తూరు పట్టణముమీద బబులోనురాజైన నెబుకద్రెజరు తన సైన్యముచేత బహు ఆయాసకరమైన పని చేయించెను, వారందరి తలలు బోడి వాయెను, అందరి భుజములు కొట్టుకొని పోయెను; అయినను తూరుపట్టణముమీద అతడు చేసిన కష్టమునుబట్టి అతనికైనను, అతని సైన్యమునకైనను కూలి యెంత మాత్రమును దొరకకపోయెను.

నెబుకద్‌నెజరు తూరును దాదాపు పదిహేనేళ్ళు ముట్టడించాడు గాని ఆ నగరంలోని ముఖ్య భాగాన్ని అంటే సముద్రంలో ఉన్న ద్వీపం పై కట్టబడిన నగర భాగాన్ని పట్టుకోలేకపోయాడు (యెహెఙ్కేలు 26:7-8).

19. కాబట్టి ప్రభువైన యెహోవా సెలవిచ్చునదేమనగా ఐగుప్తుదేశమును బబులోను రాజైన నెబుకద్రెజరునకు నేను అప్పగించు చున్నాను, అతడు దాని ఆస్తిని పట్టుకొని దాని సొమ్మును దోచుకొని కొల్లపెట్టును, అది అతని సైన్యమునకు జీతమగును.

అన్ని దేశాలపైనా సర్వాధికారి దేవుడే (యెషయా 40:15, యెషయా 40:17; దానియేలు 4:34-35; కీర్తనల గ్రంథము 47:2).

20. తూరుపట్టణముమీద అతడు చేసినది నా నిమిత్తమే చేసెను గనుక అందుకు బహుమానముగా దానిని అప్పగించుచున్నాను; ఇదే యెహోవా వాక్కు.

“నా కోసమే”– బబులోను సైన్యాలు తమకు తెలియకుండానే దేవుని ఉద్దేశాలను నెరవేరుస్తున్నాయి.

21. ఆ దినమందు నేను ఇశ్రాయేలీయుల కొమ్ము చిగిరింప జేసి వారిలో మాటలాడుటకు నీకు ధైర్యము కలుగజేసెదను, అప్పుడు నేను యెహోవానైయున్నానని వారు తెలిసికొందురు.

కొమ్ము అధికారానికీ బలప్రభావాలకూ గుర్తు.