1. యూదారాజైన సిద్కియా యేలుబడి పదియవ సంవత్సరమున, అనగా నెబుకద్రెజరు ఏలుబడి పదునెనిమిదవ సంవత్సరమున యెహోవాయొద్దనుండి యిర్మీయాకు ప్రత్యక్షమైన వాక్కు.

ఇది బబులోను జెరుసలంను పట్టుకొన్న సంవత్సరానికి ముందు సంవత్సరం.

2. ఆ కాలమున బబులోనురాజు దండు యెరూషలేమునకు ముట్టడి వేయుచుండగా సిద్కియా యిర్మీయాతో చెప్పినదేమనగా యెహోవా ఈలాగు సెలవిచ్చుచున్నాడు ఆలోచించుడి, ఈ పట్టణమును బబులోనురాజు చేతికి నేను అప్పగించుచున్నాను, అతడు దాని పట్టుకొనును,

సిద్కియారాజు యిర్మీయాను బంధించాడు (యిర్మియా 37:21).

3. యూదారాజైన సిద్కియా కల్దీయుల చేతిలోనుండి తప్పించుకొనక బబులోనురాజు చేతికి నిశ్చయముగా అప్పగింపబడును, సిద్కియా అతనితో ముఖాముఖిగా మాటలాడును, కన్నులార అతనిచూచును,

“ఎందుకని” అని అడిగిన సిద్కియా ప్రశ్నకు జవాబు తేటతెల్లమే. దేవుడు తనకేం ఆజ్ఞాపించాడో యిర్మీయా అదే ప్రకటించాడు. అయితే దుష్టుడూ బలహీనుడూ అయిన ఈ రాజుకు సత్యం పట్ల పట్టింపు లేదు. యిర్మీయా పలికిన మాటలు అక్షరం పొల్లుపోకుండా నెరవేరాయి (యిర్మియా 52:7-14).

4. అతడు సిద్కియాను బబులోనునకు కొనిపోవును, నేను అతని దర్శించువరకు అతడక్కడనే యుండును; ఇదే యెహోవా వాక్కు;

5. మీరు కల్దీయులతో యుద్ధము చేసినను మీరు జయము నొందరు, అను మాటలు నీవేల ప్రకటించుచున్నావని యిర్మీయాతో చెప్పి అతనిని చెరలో వేయించి యుండెను; కాగా ప్రవక్తయైన యిర్మీయా యూదా రాజు మందిరములోనున్న చెరసాల ప్రాకారములో ఉంచబడియుండెను.

6. అంతట యిర్మీయా ఇట్లనెను యెహోవా వాక్కు నాకు ప్రత్యక్షమై యీలాగు సెలవిచ్చెను
మత్తయి 27:9-10

ఉదాహరణ పూర్వక పాఠాలు దేవుడు ఇంతకుముందు కూడా యిర్మీయా కోసం ఇచ్చాడు (యిర్మియా 1:11-14; మొ।।). ఇక్కడ ప్రజలకు స్వయంగా యిర్మీయానే ఒక ఉదాహరణగా చూపిస్తున్నాడు. ప్రజలు చెరనుండి తిరిగి వస్తారని దేవుడు చెప్పాడు (యిర్మియా 23:3-4; యిర్మియా 29:14; యిర్మియా 30:10). ఇప్పుడు బబులోను సైన్యాలు జెరుసలంకు దగ్గరలోనే ఉండగా దేవుడు తన ప్రవక్తను ఒక పొలం కొనుక్కోమని ఆదేశిస్తున్నాడు. యిర్మీయా ఈ విధంగా తనమట్టుకు తాను దేవునిపట్ల నమ్మకం, విధేయత చూపిస్తున్నాడు. దేవుని సేవకులంతా తమ క్రియలద్వారా తాము దేవుణ్ణి నమ్ముతున్నామని చూపించాలి. వారలా చెయ్యకపోతే ఇతరులు దేవుణ్ణి నమ్మాలని వారినెలా ఒప్పించగలరు?

7. నీ తండ్రి తోడబుట్టిన షల్లూము కుమారుడగు హనమేలు నీయొద్దకు వచ్చి అనాతోతులోనున్న నా భూమిని కొనుటకు విమోచకుని ధర్మము నీదే, దాని కొనుక్కొనుమని చెప్పును.

“పినతండ్రి”– లేవీయకాండము 25:25; రూతు 2:20; రూతు 4:3.

8. కావున నా తండ్రి తోడబుట్టినవాని కుమారుడైన హన మేలు యెహోవా మాటచొప్పున చెరసాల ప్రాకారములోనున్న నాయొద్దకు వచ్చిబెన్యామీను దేశమందలి అనాతోతులోనున్న నా భూమిని దయచేసి కొనుము, దానికి వారసుడవు నీవే, దాని విమోచనము నీవలననే జరుగవలెను, దాని కొనుక్కొనుమని నాతో అనగా, అది యెహోవా వాక్కు అని నేను తెలిసికొని

9. నా తండ్రి తోడబుట్టినవాని కుమారుడైన హనమేలు పొలమును కొని, పదియేడు తులముల వెండి తూచి ఆతనికిచ్చితిని.

10. నేను క్రయ పత్రము వ్రాసి ముద్రవేసి సాక్షులను పిలిపించి త్రాసుతో ఆ వెండి తూచి

11. క్రయపత్రమును, అనగా ముద్రగల విడుదల కైకోలును ఒడంబడికను ముద్రలేని విడుదల కైకోలును ఒడంబడికను తీసికొంటిని.

దేవుడు ఈ విధంగా విమోచించే సమీప బంధువు పొలాన్ని కొనుక్కోవడం గురించీ, దానికి సంబంధించిన రాతకోతలున్న క్రయ పత్రాన్ని సంతకం చేసి ముద్రవేయడం గురించీ వివరంగా ఇవ్వడంలో గల కారణాలలో ఒకటి ఇది కావచ్చు – ప్రకటన గ్రంథం 5:1-10 లో ముద్రవేసి చుట్టివున్న పత్రం సంగతి మనకు అర్థమయ్యేలా సహాయం చేసేందుకు. మానవుని సమీప బంధువు యేసుప్రభువు. దానికి సంబంధించిన క్రయ పత్రం ఆయనదే. ఆయన దాన్ని తెరవాలి. భూమి ఆయనదే. ఆయనే దాన్ని చేజిక్కించుకుంటాడు. ప్రకటన 6-22 అధ్యాయాల్లో ఆయన అలా చేయడం కనిపిస్తున్నది.

12. అప్పుడు నా తండ్రి తోడబుట్టినవాని కుమారుడైన హనమేలు ఎదుటను, ఆ క్రయపత్రములో చేవ్రాలు చేసిన సాక్షుల యెదుటను, చెరసాల ప్రాకారములో కూర్చున్న యూదు లందరియెదుటను, నేను మహ సేయా కుమారుడగు నేరీయా కుమారుడైన బారూకునకు ఆ క్రయపత్రమును అప్పగించి వారి కన్నుల యెదుట బారూకునకు ఈలాగు ఆజ్ఞాపించి తిని.

“బారూకు”– యిర్మీయాకు ఆప్తమిత్రుడు. యిర్మియా 36:4-32 చూడండి.

13. ఇశ్రాయేలు దేవుడును సైన్యములకధిపతియునగు యెహోవా సెలవిచ్చునదేమనగా

14. ఈ పత్రములను, అనగా ముద్రగల యీ క్రయపత్రమును ముద్రలేని క్రయపత్రమును, నీవు తీసికొని అవి బహుదినములుండునట్లు మంటికుండలో వాటిని దాచిపెట్టుము.

15. ఇశ్రాయేలు దేవుడును సైన్యములకధిపతియునగు యెహోవా ఈలాగు సెలవిచ్చుచున్నాడు ఇండ్లును పొలములును ద్రాక్షతోటలును ఇంక ఈ దేశములో కొనబడును.

బబులోను చెర అనంతరం సాధారణ జీవితం తిరిగి నెలకొంటుందన్నమాట.

16. నేరీయా కుమారుడైన బారూకుచేతికి ఆ క్రయ పత్రమును నేనప్పగించిన తరువాత యెహోవాకు ఈలాగున ప్రార్థన చేసితిని

యిర్మీయా ప్రార్థనాపరుడు (యిర్మియా 8:18-19; యిర్మియా 12:1-4; యిర్మియా 14:7-9, యిర్మియా 14:19-22; యిర్మియా 15:15-18; యిర్మియా 16:19-20; యిర్మియా 17:12-18; యిర్మియా 18:19-23; యిర్మియా 20:7-18).

17. యెహోవా, ప్రభువా సైన్య ములకధిపతియగు యెహోవా అను పేరు వహించువాడా, శూరుడా, మహాదేవా, నీ యధికబలముచేతను చాచిన బాహువుచేతను భూమ్యాకాశములను సృజించితివి, నీకు అసాధ్యమైనదేదియు లేదు.

“చేతితో”– యిర్మియా 27:5; 2 రాజులు 19:15; కీర్తనల గ్రంథము 102:25. “మించిన పని ఏదీ లేదు”– వ 27; ఆదికాండము 18:14.

18. నీవు వేవేలమందికి కృపచూపుచు, తండ్రుల దోషమును వారి తరువాత వారి పిల్లల ఒడిలో వేయువాడవు.

నిర్గమకాండము 20:5-6; నిర్గమకాండము 34:7.

19. ఆలోచన విషయములో నీవే గొప్పవాడవు, క్రియలు జరిగించు విషయములో శక్తి సంపన్నుడవు, వారి ప్రవర్తనలనుబట్టియు వారి క్రియాఫలమును బట్టియు అందరికి ప్రతిఫలమిచ్చుటకై నరపుత్రుల మార్గములన్నిటిని నీవు కన్నులార చూచుచున్నావు.

“గొప్పవి”– కీర్తనల గ్రంథము 66:5; యెషయా 28:29; రోమీయులకు 11:33-36.

20. నీవు ఐగుప్తుదేశములో చేసినట్టు నేటివరకు ఇశ్రాయేలు వారి మధ్యను ఇతర మనుష్యుల మధ్యను సూచక క్రియలను మహత్కార్యములను చేయుచు నేటి వలె నీకు కీర్తి తెచ్చుకొనుచున్నావు.

నిర్గమకాండము 3:20; నిర్గమకాండము 7:3; కీర్తనల గ్రంథము 78:4, కీర్తనల గ్రంథము 78:12. దేవుడు కేవలం ఇస్రాయేల్‌వారి మధ్యనే కాక జనాలన్నిటి ఎదుట సూచనలు అద్భుతాలు చేస్తూనే ఉన్నాడు.

21. సూచక క్రియలను మహత్కార్యములను జరిగించుచు మహా బలముకలిగి, చాపిన చేతులు గలవాడవై మహాభయము పుట్టించి, ఐగుప్తు దేశములోనుండి నీ ప్రజలను రప్పించి

ద్వితీయోపదేశకాండము 4:34; ద్వితీయోపదేశకాండము 26:8.

22. మీ కిచ్చెదనని వారి పితరులకు ప్రమాణముచేసి, పాలు తేనెలు ప్రవహించు ఈ దేశమును వారి కిచ్చితివి.

“ఇస్తానని”– యెహోషువ 11:23; కీర్తనల గ్రంథము 44:2; కీర్తనల గ్రంథము 78:54-55.

23. వారు ప్రవేశించి దాని స్వతంత్రించుకొనిరి గాని నీ మాట వినకపోయిరి, నీ ధర్మశాస్త్రము ననుసరింపకపోయిరి. వారు చేయవలె నని నీవాజ్ఞాపించినవాటిలో దేనిని చేయకపోయిరి గనుక ఈ కీడంతయు వారిమీదికి రప్పించియున్నావు.

“అయితే”– యిర్మియా 11:8.

24. ముట్టడి దిబ్బలను చూడుము, పట్టణమును పట్టుకొనుటకు అవి దానికి సమీపించుచున్నవి, ఖడ్గము క్షామము తెగులు వచ్చుటవలన దానిమీద యుద్ధముచేయుచుండు కల్దీయుల చేతికి ఈ పట్టణము అప్పగింపబడును; నీవు సెలవిచ్చినది సంభవించెను, నీవే దాని చూచుచున్నావు గదా?

యిర్మియా 14:12.

25. యెహోవా ప్రభువాధనమిచ్చి యీ పొలమును కొను క్కొని సాక్షులను పిలుచుకొనుమని నీవే నాతో సెల విచ్చితివి, అయితే ఈ పట్టణము కల్దీయుల చేతికి అప్పగింప బడుచున్నది.

ఆ పొలం కొనాలని దేవుడు తననెందుకు ఆదేశించాడో యిర్మీయాకు అర్థం కాలేదు. బబులోను చెర 70 ఏళ్ళు ఉంటుందని అతనికి తెలుసు (యిర్మియా 25:11-12). తానేమో అప్పటికే వృద్ధుడు. ఇస్రాయేల్ తిరిగి వచ్చే రోజును చూచే అవకాశం లేదు. అలాంటప్పుడు ఆ పొలం వల్ల తనకు లాభం ఏమిటి? దాన్ని స్వాధీనం చేసుకునేందుకు అతనికి సంతానం కూడా లేరు (యిర్మియా 16:1-2). అయితే తాను చేసిన పని ఒక పాఠాన్ని చెప్పేందుకు ఉదాహరణ సూచకమైన చర్య అని ఇతడు స్పష్టంగా గుర్తించినట్టు లేదు (వ 42-44).

26. అంతట యెహోవావాక్కు యిర్మీయాకు ప్రత్యక్షమై యీలాగు సెలవిచ్చెను

27. నేను యెహోవాను, సర్వశరీ రులకు దేవుడను, నాకు అసాధ్యమైనదేదైన నుండునా?

“మానవకోటి”– సంఖ్యాకాండము 16:22; సంఖ్యాకాండము 27:16; యోబు 12:10; యెహెఙ్కేలు 18:14; అపో. కార్యములు 17:28.

28. కావున యెహోవా ఈమాట సెలవిచ్చుచున్నాడు ఇదిగో నేను ఈ పట్టణమును కల్దీయుల చేతికిని బబులోను రాజైన నెబుకద్రెజరు చేతికిని అప్పగింపబోవు చున్నాను; అతడు దాని పట్టుకొనగా

29. ఈ పట్టణము మీద యుద్ధముచేయు కల్దీయులు వచ్చి, యీ పట్టణమునకు అగ్ని ముట్టించి, యే మిద్దెలమీద జనులు బయలునకు ధూపార్పణచేసి అన్యదేవతలకు పానార్పణములనర్పించి నాకు కోపము పుట్టించిరో ఆ మిద్దెలన్నిటిని కాల్చివేసె దరు.

“దేవుళ్ళు”– యిర్మియా 7:9-10.

30. ఏలయనగా ఇశ్రాయేలువారును యూదావారును తమ బాల్యము మొదలుకొని నాయెదుట చెడుతనమే చేయుచు వచ్చుచున్నారు, తమ చేతుల క్రియవలన వారు నాకు కోపమే పుట్టించువారు; ఇదే యెహోవా వాక్కు.

31. నా కోపము రేపుటకు ఇశ్రాయేలువారును యూదా వారును వారి రాజులును వారి ప్రధానులును వారి యాజకులును వారి ప్రవక్తలును యూదా జనులును యెరూషలేము నివాసులును చూపిన దుష్‌ప్రవర్తన అంతటినిబట్టి,

దావీదు జెరుసలంను జయించి తన ముఖ్యపట్టణంగా చేసుకొనేంతవరకు అది విగ్రహారాధకులైన యెబూసివాళ్ళ చేతుల్లో ఉండేది (2 సమూయేలు 5:6-9). దావీదు కొడుకు సొలొమోను ఆ నగరాన్ని విగ్రహాలతో అపవిత్రం చేశాడు (1 రాజులు 11:7-8). అతని తరువాత చాలామంది రాజులు ఆ విధంగా చేశారు. దీనంతటి మూలంగా దేవుని కోపం క్రమంగా హెచ్చుతూ వచ్చింది. ఇక దాన్ని అణచుకోలేని స్థితి వచ్చింది. దేవుని కోపం గురించి నోట్స్ సంఖ్యాకాండము 25:3; కీర్తనల గ్రంథము 90:7-11.

32. నా యెదుటనుండి వారి దుష్‌ప్రవర్తనను నేను నివారణచేయ ఉద్దేశించునట్లు, వారు ఈ పట్టణమును కట్టిన దినము మొదలుకొని ఇదివరకును అది నాకు కోపము పుట్టించుటకు కారణమాయెను.

యిర్మియా 2:8, యిర్మియా 2:26-28.

33. నేను పెందలకడ లేచి వారికి బోధించినను వారు నా బోధ నంగీకరింపక పోయిరి, వారు నా తట్టు ముఖము త్రిప్పుకొనక వీపునే త్రిప్పుకొనిరి.

యిర్మియా 2:27; యిర్మియా 7:13; యిర్మియా 18:17.

34. మరియు నా పేరు పెట్టబడిన మందిరమును అపవిత్రపరచుటకు దానిలో హేయమైనవాటిని పెట్టిరి.

యిర్మియా 7:30-31; 2 రాజులు 21:4-5; యెహెఙ్కేలు 8:3-16.

35. వారు తమ కుమారులను కుమార్తెలను ప్రతిష్టింపవలెనని బెన్‌ హిన్నోము లోయలోనున్న బయలునకు బలిపీఠము లను కట్టించిరి, ఆలాగు చేయుటకు నేను వారి కాజ్ఞాపింప లేదు, యూదావారు పాపములో పడి, యెవరైన నిట్టి హేయక్రియలు చేయుదురన్నమాట నా కెన్నడును తోచలేదు.

36. కావున ఇశ్రాయేలు దేవుడగు యెహోవా ఈ పట్టణ మునుగూర్చి యీ మాట సెలవిచ్చుచున్నాడు అది ఖడ్గముచేతను క్షామముచేతను తెగులుచేతను పీడింపబడినదై బబులోనురాజు చేతికి అప్పగింపబడునని మీరీ పట్టణమును గూర్చి చెప్పుచున్నారు గదా.

ఇస్రాయేల్‌వారి పాపాన్ని ఖండిస్తూ ఉన్న సందర్భంలోనే దేవుడు వారికి పూర్వ క్షేమస్థితి కల్పిస్తానన్న చల్లని వాగ్దానాన్ని మళ్ళీ చేస్తున్నాడు.

37. ఇదిగో నాకు కలిగిన కోపోద్రేకముచేతను మహా రౌద్రముచేతను నేను వారిని వెళ్లగొట్టిన దేశములన్నిటిలోనుండి వారిని సమకూర్చి యీ స్థలమునకు తిరిగి రప్పించి వారిని నిర్భయముగా నివసింపజేసెదను.

38. వారు నాకు ప్రజలైయుందురు నేను వారికి దేవుడనై యుందును.
2 కోరింథీయులకు 6:16

39. మరియు వారికిని వారి కుమారులకును మేలు కలుగుటకై వారు నిత్యము నాకు భయపడునట్లు నేను వారికి ఏకహృదయమును ఏక మార్గమును దయచేయుదును.

“ఎప్పటికీ”– ప్రస్తుతం ఇది ఇస్రాయేల్‌వారి విషయంలో ఇంకా నెరవేరలేదు కాబట్టి ఈ యుగాంతంలో ఇస్రాయేల్ దేవునివైపు తిరిగే సమయంలో దీని నెరవేర్పు జరగవలసి ఉంది. “భయభక్తులు”– ఆదికాండము 20:11; కీర్తనల గ్రంథము 34:11-14 నోట్స్ చూడండి. “ఒకే మనసు”– కీర్తనల గ్రంథము 86:11; అపో. కార్యములు 4:32.

40. నేను వారికి మేలు చేయుట మానకుండునట్లు నిత్యమైన నిబంధనను వారితో చేయు చున్నాను; వారు నన్ను విడువకుండునట్లు వారి హృదయములలో నా యెడల భయభక్తులు పుట్టించెదను.
లూకా 22:20, 1 కోరింథీయులకు 11:25, 2 కోరింథీయులకు 3:6, హెబ్రీయులకు 13:20

యిర్మియా 31:31-34 లోని క్రొత్త ఒడంబడిక ఎన్నటికీ సమసిపోదు. దాని ఉద్దేశాలు ఎన్నటికీ విఫలం కావు. మోషే ద్వారా చేసిన ఒడంబడికలా కాక ఇది శాశ్వతమైనది (యెషయా 55:3; యెహెఙ్కేలు 16:60; యెహెఙ్కేలు 37:26; హెబ్రీయులకు 8:7-8, హెబ్రీయులకు 8:13). “తొలగిపోకుండా” అనే మాటను గమనించండి. ఇస్రాయేల్ జాతి విషయంలో ఇది ఇంతవరకూ నెరవేరలేదనడానికి మరో రుజువు. 37-42 వచనాల్లో ఒకే ప్రజను గురించి ఉంది. అది ఇస్రాయేల్‌ప్రజ. క్రొత్త ఒడంబడికలోని సంఘం కాదు.

41. వారికి మేలుచేయుటకు వారియందు ఆనందించుచున్నాను, నా పూర్ణహృదయముతోను నా పూర్ణాత్మతోను ఈ దేశములో నిశ్చయముగా వారిని నాటెదను.

మేలు చేయడం దేవునికెంత ఇష్టమో చూడండి. అది ఆయనకెంతో ఆనందం. ఎవరికైనా సరే న్యాయంగా చేయగలిగిన మేలంతా ఆయనెప్పుడూ చేస్తూనే ఉంటాడు (కీర్తనల గ్రంథము 78:41 నోట్‌). తాను ఎవరికైనా సరే హాని చెయ్యడం ఆయనకు ఇష్టమేమీ ఉండదు. ఎవరినైనా శిక్షించడం, నాశనం చెయ్యడం ఆయనకు దుఃఖకారణం. అలా చేస్తాడంటే, న్యాయవిధి ప్రకారం అలా చెయ్యాలి గనుక చేస్తాడు.

42. యెహోవా ఈలాగు సెలవిచ్చుచున్నాడునేెెను ఈ ప్రజలమీదికి ఇంత గొప్ప కీడు రప్పించిన రీతినే నేను వారినిగూర్చి చెప్పిన మేలంత టిని వారిమీదికి రప్పింపబోవుచున్నాను.

15వ వచనాన్నే విస్తరించి రాసిన భాగం.

43. ఇది పాడై పోయెను, దానిలో నరులు లేరు, పశువులు లేవు, ఇది కల్దీయులచేతికి ఇయ్యబడియున్నదని మీరు చెప్పుచున్న ఈ దేశమున పొలములు విక్రయింపబడును.

44. నేను వారిలో చెరపోయినవారిని రప్పింపబోవుచున్నాను గనుక బెన్యామీను దేశములోను యెరూషలేము ప్రాంతములలోను యూదా పట్టణములలోను మన్యములోని పట్టణములలోను దక్షిణదేశపు పట్టణములలోను మనుష్యులు క్రయమిచ్చి పొలములు కొందురు, క్రయపత్రములు వ్రాయించుకొందురు, ముద్రవేయుదురు, సాక్షులను పెట్టుదురు; ఇదే యెహోవా వాక్కు.