1. యెహోవా యొద్దనుండి యిర్మీయాకు ప్రత్యక్షమైన వాక్కు

మరొక ఉదాహరణ మూలమైన పాఠం – యిర్మియా 1:11-14; యిర్మియా 13:1-11. మట్టికుండ కుమ్మరివాడి చేతిలోనే వంకరటింకరగా అయిందనుకోండి. తప్పు కుమ్మరివానిది కావచ్చు, మట్టిది కావచ్చు. అయితే జాతులు గాని, వ్యక్తులు గాని దేవుని చేతిలో చెడిపోతే అది తప్పకుండా తప్పువారిదే, దేవునిది కాదు (యిర్మియా 7:13, యిర్మియా 7:26; యిర్మియా 17:23; మత్తయి 23:37). జనాలకూ వ్యక్తులకూ తమదంటూ ఒక ఇష్టం, సంకల్పం ఉండి, దేవుని పనిని ఎదిరించగలిగినప్పటికీ వారిని దేవుడు తన వశంలోనే ఉంచుకుంటాడు. వారిపై దీవెనలు గాని, వినాశనం గాని పంపించే తన పనిని కొనసాగించగలడు. తన జీవితాన్ని పాడు చేసుకొని అది ఎలా ఉండాలని తనకు తోస్తుందో అలా సరిదిద్దుకోలేని వ్యక్తికి ఇది శుభవార్త – మన మట్టిని నిపుణుడైన పరమ కుమ్మరి చేతిలో పెట్టి తన ఉపయోగం కోసం ఆయనే ఆ మట్టిని పాత్రగా చేసేందుకు అవకాశమివ్వాలి.

2. నీవు లేచి కుమ్మరి యింటికి పొమ్ము, అక్కడ నా మాటలు నీకు తెలియజేతును.

3. నేను కుమ్మరి యింటికి వెళ్లగా వాడు తన సారెమీద పని చేయుచుండెను.

4. కుమ్మరి జిగటమంటితో చేయుచున్న కుండ వాని చేతిలో విడిపోగా ఆ జిగటమన్ను మరల తీసికొని కుమ్మరి తనకు యుక్తమైనట్టుగా దానితో మరియొక కుండ చేసెను.

5. అంతట యెహోవా వాక్కు నాకు ప్రత్యక్షమై యీలాగు సెలవిచ్చెను

6. ఇశ్రాయేలువారలారా, ఈ కుమ్మరి మంటికి చేసినట్లు నేను మీకు చేయలేనా? యిదే యెహోవా వాక్కుజిగటమన్ను కుమ్మరిచేతిలొ ఉన్నట్టుగా ఇశ్రాయేలువారలారా, మీరు నా చేతిలో ఉన్నారు.
రోమీయులకు 9:21

7. దాని పెల్లగింతుననియు, విరుగగొట్టుదుననియు, నశింపజేయుదుననియు ఏదోయొక జనమును గూర్చి గాని రాజ్యమునుగూర్చి గాని నేను చెప్పి యుండగా

జనాలు లేక వ్యక్తులు దేవుని మాటకు విధేయులు కావడం లేక అవిధేయులు కావడం అనేదాని ప్రకారంగా కొంతవరకు దేవుని చర్యలు ఉంటాయి (యిర్మియా 26:13; యిర్మియా 36:3; నిర్గమకాండము 32:1, నిర్గమకాండము 32:4; యెహెఙ్కేలు 18:30; యోనా 3:1-10). విశ్వానికి అధిపతిగా దేవుడు లోకంలో పనిచేస్తూ రాజ్యాలను స్థాపించడం, పెళ్ళగించివేయడం, వాటికి అభివృద్ధి కలిగించడం, లేక వాటిని నాశనం చేయడం నిర్వహిస్తూ ఉంటాడు.

8. ఏ జనమునుగూర్చి నేను చెప్పితినో ఆ జనము చెడుతనము చేయుట మానినయెడల నేను వారికి చేయనుద్దేశించిన కీడునుగూర్చి సంతాపపడుదును.

9. మరియు కట్టెదననియు, నాటెదననియు ఒక జనమును గూర్చి గాని రాజ్యమునుగూర్చి గాని నేను చెప్పి యుండగా

10. ఆ జనము నా మాట వినకుండ నా దృష్టికి కీడుచేసినయెడల దానికి చేయదలచిన మేలునుగూర్చి నేను సంతాపపడుదును.

11. కాబట్టి నీవు వెళ్లి యూదావారితోను యెరూషలేము నివాసులతోను ఇట్లనుము యెహోవా సెలవిచ్చినమాట ఏదనగా మీమీదికి తెచ్చుటకై నేను కీడును కల్పించుచున్నాను, మీకు విరోధముగా ఒక యోచన చేయుచున్నాను, మీరందరు మీ మీ దుష్టమార్గములను విడిచి మీ మార్గములను మీ క్రియలను చక్కపరచుకొనుడి.

యూదా, దాని ముఖ్య పట్టణమూ పై సత్యాన్ని తమకు అన్వయించుకోవాలని దేవుడు ఆదేశిస్తున్నాడు. తమకు జరగనున్నదాన్ని గురించి వారు కుమ్మరిని తప్పుపట్టకూడదు. అయితే ప్రజలు ఏమి చెపుతారో దేవునికి తెలుసు. ఆ సంగతే తరువాతి వచనంలో యిర్మీయాకు చెపుతున్నాడు.

12. అందుకు వారునీ మాట నిష్‌ ప్రయోజనము; మేము మా ఆలోచనల చొప్పున నడుచు కొందుము, మేమందరము మా మూర్ఖ హృదయము చొప్పున ప్రవర్తించుదుము అని యందురు.

ఒక వ్యక్తిగాని, ఒక జాతిగాని చెప్పగలిగిన అతి భయంకరమైన విషయాలలో ఇది ఒకటి. ఇది వెలుగుకూ, వివేకానికీ, దేవుడు వారికి నచ్చజెపుతున్నదానికీ వ్యతిరేకంగా తమను తాము మనసారా తెలిసి తెలిసి సంపూర్తిగా తమ భ్రష్టస్వభావానికి ఇచ్చివేసుకోవడమే. ఇది అరుదైన విషయమేమీ కాదు. సైతాను చేతనైతే మనందరినీ ఇలాంటి స్థితికి తీసుకువస్తాడు. ఇది అపనమ్మకం, అవిధేయత, నిరాశ హద్దులు దాటిన మానవ భ్రష్టత్వం.

13. కావున యెహోవా ఈలాగు సెలవిచ్చుచున్నాడు అన్యజనులను అడిగి తెలిసికొనుడి; ఇట్టి క్రియలు జరుగుట వారిలో ఎవడైన వినెనా? ఇశ్రాయేలు కన్యక బహు ఘోరమైన కార్యము చేసియున్నది.

యిర్మియా 5:30-31. దేవుని సొంత ప్రజలు చేసే చర్యల కంటే ఆడే మాటలకంటే ఘోరమైనది మరేది ఉంటుంది? దుర్మార్గత నిండిన నీనెవె నగరం కూడా ఇలా ప్రవర్తించలేదు (యోనా 3:6-9).

14. లెబానోను పొలము లోని బండమీద హిమముండుట మానునా? దూరము నుండి పారుచున్న చల్లని జలములు పారకమానునా?

చలిమంచు, శీతల జలం ఎత్తయిన పర్వత శిఖరాలపై ఎప్పుడూ ఉంటాయి. కానీ దేవుని గురించిన తలంపులు, ఆయనిచ్చే జీవజలం గురించిన ఆలోచనలు ఆ ప్రజల మనస్సుల్లో నిలవలేదు.

15. అయితే నా ప్రజలు నన్ను మరిచియున్నారు, మాయకు ధూపము వేయుచున్నారు, మెరకచేయబడని దారిలో తాము నడువవలెనని పురాతన మార్గములైన త్రోవలలో తమ్మును తాము తొట్రిల్ల చేసికొనుచున్నారు.

“పురాతన మార్గాల్లో”– యిర్మియా 6:16. “డొంకబాట”– అంటే ఆత్మద్వారా, సత్యంతో దేవుణ్ణి ఆరాధించాలన్న సనాతన మార్గం నుండి ప్రజలను మళ్ళించే కపట దేవతల పూజ, విగ్రహ పూజ (యోహాను 4:24).

16. వారు ఎల్లప్పుడును అపహాస్యాస్పదముగా నుండుటకై తమ దేశమును పాడుగా చేసికొనియున్నారు, దాని మార్గమున నడుచు ప్రతివాడును ఆశ్చర్యపడి తల ఊచును.

యిర్మియా 4:11-12; యిర్మియా 25:9-10.

17. తూర్పు గాలి చెదరగొట్టునట్లు వారి శత్రువులయెదుట నిలువ కుండ వారిని నేను చెదరగొట్టెదను; వారి ఆపద్దినమందు వారికి విముఖుడనై వారిని చూడకపోదును.

18. అప్పుడు జనులు యిర్మీయా విషయమై యుక్తిగల యోచన చేతము రండి, యాజకుడు ధర్మశాస్త్రము విని పించక మానడు, జ్ఞాని యోచనలేకుండ నుండడు, ప్రవక్త వాక్యము చెప్పక మానడు, వాని మాటలలో దేనిని విన కుండ మాటలతో వాని కొట్టుదము రండి అని చెప్పు కొనుచుండిరి.

యిర్మీయా నోరు మూయిస్తే నష్టమేమీ లేదనుకున్నారు అతని శత్రువులు. అయితే జెరుసలంలో అప్పటి రోజుల్లో ఉన్న నిజమైన దైవ ప్రవక్త యిర్మీయా ఒక్కడే అని వారు గ్రహించలేదు.

19. యెహోవా, నా మొఱ్ఱ నాలకించుము, నాతో వాదించువారి మాటను వినుము.

20. వారు నా ప్రాణము తీయవలెనని గుంట త్రవ్వియున్నారు; చేసిన మేలునకు ప్రతిగా కీడు చేయవలెనా? వారికి మేలు కలుగవలెనని వారిమీదనుండి నీ కోపము తప్పించుటకై నీ సన్నిధిని నిలిచి నేను వారిపక్షముగా మాటలాడిన సంగతి జ్ఞాపకము చేసికొనుము.

21. వారి కుమారులను క్షామమునకు అప్ప గింపుము, ఖడ్గబలమునకు వారిని అప్పగింపుము, వారి భార్యలు పిల్లలు లేనివారై విధవ రాండ్రగుదురు గాక, వారి పురుషులు మరణహతులగుదురు గాక, వారి ¸యవ నులు యుద్ధములో ఖడ్గముచేత హతులగుదురు గాక.

22. నన్ను పట్టుకొనుటకు వారు గొయ్యి త్రవ్విరి, నా కాళ్లకు ఉరులనొగ్గిరి; వారిమీదికి నీవు ఆకస్మికముగా దండును రప్పించుటవలన వారి యిండ్లలోనుండి కేకలు వినబడును గాక.

23. యెహోవా, నాకు మరణము రావలెనని వారు నా మీద చేసిన ఆలోచన అంతయు నీకు తెలిసేయున్నది, వారి దోషమునకు ప్రాయశ్చిత్తము కలుగనియ్యకుము, నీ సన్నిధినుండి వారి పాపమును తుడిచివేయకుము; వారు నీ సన్నిధిని తొట్రిల్లుదురు గాక, నీకు కోపము పుట్టు కాలమున వారికి తగినపని చేయుము.

ఈ భాగం కొన్ని కీర్తనలలాగా ధ్వనిస్తుంది – కీర్తనల గ్రంథము 35:12; కీర్తనల గ్రంథము 57:6; కీర్తనల గ్రంథము 63:10; కీర్తనల గ్రంథము 141:8-10; కీర్తనల గ్రంథము 142:3. ఇలాంటి ప్రార్థనలపై నోట్స్‌కు కీర్తనల గ్రంథము 35:8; కీర్తనల గ్రంథము 58:6-8; కీర్తనల గ్రంథము 69:22-28 చూడండి.