1. నా కుమారుడా, నీవు నా మాటల నంగీకరించి నా ఆజ్ఞలను నీయొద్ద దాచుకొనినయెడల

నిర్లక్ష్యంగానూ సోమరితనంగానూ ఇహలోక సంబంధమైన ఆశలతోనూ ఉండేవారికి జ్ఞాన వివేకాలు లభించవు. అవి లభించాలంటే వాటి విలువలను గ్రహించి ధనరాసులను వెదికినట్టు పట్టుదలగా వాటిని వెదకాలి (సామెతలు 8:10; యోబు 28:12-28; కీర్తనల గ్రంథము 19:9-10; కీర్తనల గ్రంథము 119:72; 1 కోరింథీయులకు 1:30). కొందరు మనుషులు తమ జీవిత కాలమంతా ధనం కావాలని పరుగులు పెడతారు. తమ మూర్ఖత్వంలోనే చనిపోతారు. జ్ఞానాన్ని వెదికితే అది లభిస్తుంది. అయితే శోచనీయమైన సంగతి ఏమంటే, చాలామంది తమ జీవిత కాలమంతా ధనాన్ని వెదకడంలో గడుపుతారు. వెదికితే దొరికే వెలలేని జ్ఞానం లేకుండా చనిపోతారు. కాబట్టి మన జీవితమంతటిలో శ్రద్ధతో విశేషాసక్తితో జ్ఞానం కోసం వెతుకుదాం.

2. జ్ఞానమునకు నీ చెవియొగ్గి హృదయపూర్వకముగా వివేచన నభ్యసించినయెడల
ఎఫెసీయులకు 6:4

3. తెలివికై మొఱ్ఱపెట్టిన యెడల వివేచనకై మనవి చేసినయెడల
కొలొస్సయులకు 2:3, యాకోబు 1:5

4. వెండిని వెదకినట్లు దాని వెదకిన యెడల దాచబడిన ధనమును వెదకినట్లు దాని వెదకిన యెడల
మత్తయి 13:44, కొలొస్సయులకు 2:3

5. యెహోవాయందు భయభక్తులు కలిగియుండుట యెట్టిదో నీవు గ్రహించెదవు దేవునిగూర్చిన విజ్ఞానము నీకు లభించును.

జ్ఞానం కోసం మనసారా వెతికేవారికి కలిగే ప్రతిఫలం ఇదుగో. మానవులకు దొరకగల ప్రతిఫలాల్లో అత్యున్నతమైనది, అతి శ్రేష్ఠమైనది, ధన్యకరమైనది అయిన నిధి – దేవుని గురించిన గ్రహింపు.

6. యెహోవాయే జ్ఞానమిచ్చువాడు తెలివియు వివేచనయు ఆయన నోటనుండి వచ్చును.

అయితే జ్ఞానం ఉన్నచోటనే వెదకాలి. వేదాంతులు రాసిన గ్రంథాల్లో కాదు, ఎవరి దేవుళ్ళను గురించి వారు రాసుకొన్న పురాణాల్లోనూ కాదు గాని సజీవుడైన ఏకైక నిజ దేవుడు, బైబిల్లో కనిపించే యెహోవా దేవునిలోనే. జ్ఞానాన్ని ఇవ్వగలిగేది ఆయనొక్కడే (యోబు 12:13; కొలొస్సయులకు 2:2-3, కొలొస్సయులకు 2:8-9).

7. ఆయన యథార్థవంతులను వర్ధిల్లజేయును యుక్తమార్గము తప్పక నడుచుకొనువారికి ఆయన కేడెముగా నున్నాడు.

ఆదికాండము 15:1; ద్వితీయోపదేశకాండము 33:29; 2 సమూయేలు 22:3, 2 సమూయేలు 22:31; కీర్తనల గ్రంథము 3:3; కీర్తనల గ్రంథము 7:1; కీర్తనల గ్రంథము 18:25; కీర్తనల గ్రంథము 97:10.

8. న్యాయము తప్పిపోకుండ ఆయన కనిపెట్టును తన భక్తుల ప్రవర్తనను ఆయన కాచును.

9. అప్పుడు నీతి న్యాయములను యథార్థతను ప్రతి సన్మార్గమును నీవు తెలిసికొందువు.

10. జ్ఞానము నీ హృదయమున జొచ్చును తెలివి నీకు మనోహరముగా నుండును

సామెతలు 14:33.

11. బుద్ధి నిన్ను కాపాడును వివేచన నీకు కావలి కాయును.

నిజమైన జ్ఞానం దుష్టత్వం అంతటినుంచీ అంటే కీడుకు కారణమైన చెడ్డ మాటలనుంచీ (12 వ), చెడ్డ బాటలనుంచీ (13 వ) చెడ్డ చర్యల నుంచీ (14 వ) చెడ్డ ప్రేరేపణలనుంచీ (16 వ) కాపాడుతుంది.

12. అది దుష్టుల మార్గమునుండియు మూర్ఖముగా మాటలాడువారి చేతిలోనుండియు నిన్ను రక్షించును.

13. అట్టివారు చీకటి త్రోవలలో నడువవలెనని యథార్థ మార్గములను విడిచిపెట్టెదరు

సామెతలు 4:19; యోహాను 3:19.

14. కీడుచేయ సంతోషించుదురు అతిమూర్ఖుల ప్రవర్తనయందు ఉల్లసించుదురు.

సామెతలు 10:23; సామెతలు 15:21; రోమీయులకు 1:32; 2 థెస్సలొనీకయులకు 2:12.

15. వారు నడుచుకొను త్రోవలు వంకరవి వారు కుటిలవర్తనులు

సామెతలు 21:8; కీర్తనల గ్రంథము 125:5; యెషయా 59:8; మత్తయి 7:13.

16. మరియు అది జారస్త్రీనుండి మృదువుగా మాటలాడు పరస్త్రీనుండి నిన్ను రక్షిం చును.

అతి ఘోరమైన పాపాలలో వ్యభిచారం ఒకటి. దేవుడు తన వాక్కులో దీన్ని గురించి పదేపదే హెచ్చరించాడు (సామెతలు 6:29, సామెతలు 6:32; నిర్గమకాండము 20:14; లేవీయకాండము 18:20; లేవీయకాండము 20:10; సంఖ్యాకాండము 5:12-13, సంఖ్యాకాండము 5:29; 1 కోరింథీయులకు 6:9-10, 1 కోరింథీయులకు 6:18; ఎఫెసీయులకు 5:3; కొలొస్సయులకు 3:5-6; ప్రకటన గ్రంథం 21:8). అందువల్లే జ్ఞాని అయిన ఈ తండ్రి దానిలో పడవద్దని తన కుమారునికి బుద్ధి చెప్తున్నాడు. ఇది తండ్రులందరి బాధ్యత.

17. అట్టి స్త్రీ తన ¸యౌవనకాలపు ప్రియుని విడుచునది తన దేవుని నిబంధనను మరచునది.

18. దాని యిల్లు మృత్యువునొద్దకు దారితీయును అది నడచు త్రోవలు ప్రేతలయొద్దకు చేరును

సామెతలు 5:5; సామెతలు 7:27; సామెతలు 9:18; ప్రసంగి 7:26; రోమీయులకు 6:23; 1 తిమోతికి 5:6.

19. దానియొద్దకు పోవువారిలో ఎవరును తిరిగి రారు జీవమార్గములు వారికి దక్కవు. నా మాటలు వినినయెడల

వ్యభిచారంలో చిక్కుకున్నవాళ్ళను ఆ పాపం ఎంతో దృఢంగా బంధించి వశపరచుకుంటుంది. వారి బుద్ధినీ అంతరంగాన్నీ ఎంతగానో చీకటి కమ్మేస్తుంది గనుక అందులోనుండి బయట పడడం అన్నది ఎంతో దుర్లభం. దాన్ని అవలంబించినవారు తమ స్వశక్తితో శాశ్వత జీవం, పవిత్రత ఉన్న మార్గంలోకి రాలేరు. అయితే వారు పశ్చాత్తాపపడి ఆయనవైపు తిరిగితే దేవుడు తన కరుణ చొప్పున వారిని ఆ మార్గంలోకి తేగలడు (1 కోరింథీయులకు 6:9, 1 కోరింథీయులకు 6:11).

20. నీవు సజ్జనుల మార్గమందు నడుచుకొందువు నీతిమంతుల ప్రవర్తనల ననుసరించుదువు.

కీర్తనల గ్రంథము 37:9-11, కీర్తనల గ్రంథము 37:20, కీర్తనల గ్రంథము 37:27-29, కీర్తనల గ్రంథము 37:35-38 తో పోల్చి చూడండి.

21. యథార్థవంతులు దేశమందు నివసించుదురు లోపములేనివారు దానిలో నిలిచియుందురు.

22. భక్తిహీనులు దేశములో నుండకుండ నిర్మూలమగుదురు. విశ్వాసఘాతకులు దానిలోనుండి పెరికివేయబడుదురు.