1. ఆయన పట్టణపు పునాది పరిశుద్ధ పర్వతములమీద వేయబడియున్నది

ఇది చాలా ప్రత్యేకమైన కీర్తన. పాత ఒడంబడిక గ్రంథంలోకెల్లా ప్రత్యేకమైన అధ్యాయాల్లో ఒకటి. ఇందులో ఇస్రాయేల్ చుట్టూ ఉన్న దేశాలు, ఇస్రాయేల్‌వారి పురాతన శత్రు దేశాలు ఇస్రాయేల్‌తో ఐక్యమై నూతన జన్మమూలంగా జెరుసలంకు “పిల్లలు” కావటం కనిపిస్తున్నాయి. ఈ కీర్తనల గ్రంథము 86:10 ను పెంచి రాసినది. పవిత్ర పర్వతమంటే సీయోను. దేవుని ఆలయం, ఆయన సన్నిధి మూలంగా అది ప్రత్యేకించబడినది. కాబట్టి అది పవిత్ర పర్వతం.

2. యాకోబు నివాసములన్నిటికంటె సీయోను గుమ్మ ములు యెహోవాకు ప్రియములై యున్నవి

ఇస్రాయేల్ పట్టణాలన్నిటిలోనుండీ ప్రపంచ నగరాలన్నిటిలో నుంచీ దేవుడు జెరుసలంను ఎన్నుకొని తన రాజధానిగా చేసుకున్నాడు. అది అన్నిటికన్నా పెద్దదీ అందమైనదీ అని దాన్ని ప్రేమించలేదు. మిగతా నగరాలకంటే అది పెద్దది కాదు, అందమైనదీ కాదు. దాని ఆధ్యాత్మిక బంధాలను బట్టి దాన్ని ఆయన ప్రేమించాడు. అందులో ఆయన ఆలయం ఉంది. ఆయన ఎన్నుకొన్న ప్రజలకు అది ప్రతినిధి. పరలోకంలో ఉన్న జెరుసలంకు అది చిహ్నం. మనుషుల పట్ల దేవుని పట్ల క్రీస్తు తన శాశ్వత ప్రేమను చూపించేది అక్కడే.

3. దేవుని పట్టణమా, మనుష్యులు నిన్నుగూర్చి మిక్కిలి గొప్ప సంగతులు చెప్పుకొందురు. (సెలా. )

ఈ గొప్ప విషయాలు కొన్ని తరువాతి వచనాలలో ఉన్నాయి.

4. రహబును ఐగుప్తు బబులోనును నాకు పరిచయులని నేను తెలియజెప్పుచున్నాను ఫిలిష్తీయ తూరు కూషులను చూడుము వీరు అచ్చట జన్మించిరని యందురు.

బహుశా రాహాబు ఇస్రాయేల్‌ను ఘోరంగా పీడించిన ఈజిప్ట్ అని అర్థం (కీర్తనల గ్రంథము 89:10; యెషయా 51:9). ఆ తరువాతి కాలంలో బబులోను జెరుసలంను ధ్వంసం చేసి దేవుని ప్రజలను బందీలుగా తీసుకుపోనుంది. ఫిలిష్తీయవారు తరచుగా ఇస్రాయేల్‌తో యుద్ధాలు చేశారు. తూరు గర్వం గల గొప్ప నగరంగా మారి దేవుణ్ణి వ్యతిరేకించింది. కూషు (ఇక్కడ బహుశా ఇతియోపియా) లోకంలో మరింత దూరంగా ఉన్న ప్రజలకు ప్రతినిధిగా ఉండవచ్చు. ఈ వచనంలో రాబోయే కాలంలో జరగబోయే గొప్ప మార్పును గురించిన భవిష్యద్వాక్కు ఉంది. ఈ జాతులు దేవుణ్ణి తెలుసుకుంటాయి. అవి సీయోనులో జన్మిస్తాయి. వ 5,6లో ఈ మాటే మళ్ళీ ఉంది. దీని అర్థం ఏమిటంటే – ప్రపంచ జాతులన్నిటికీ జెరుసలం ఆధ్యాత్మిక జీవానికి మూలస్థానం అవుతుంది. వ్యక్తులకు, జనాలకు కలిగే కొత్త జన్మ అక్కడ జరగబోయే సంఘటనలతో ముడిపడి ఉంటుంది. ఆధ్యాత్మిక జీవం, శాశ్వతానందం, ఉల్లాసాల ఊటలు అక్కడున్నాయి. నేటికీ రెండు వేల సంవత్సరాల క్రితం అక్కడ జరిగిన యేసుక్రీస్తు సిలువ మరణం, ఆయన తిరిగి లేవడం గురించే గదా ఈ మాటలు చెప్తున్నది. ఈ సంఘటనల మూలంగా, కేవలం ఈ సంఘటనల మూలంగానే మనం తిరిగి జన్మించగలం, లోకంలోని జాతులన్నీ దేవుని చెంతకు చేరగలవు. శాశ్వత జీవం ఊటలు వేదాంతం, తత్వ శాస్త్రాలకు కేంద్రమైన ఏథెన్సులో గానీ రాజ్యాధికార కేంద్రమైన రోమ్‌లో గానీ విగ్రహపూజ కేంద్రమైన బబులోనులో గానీ లేవు. పరలోక దేవుని నగరమైన జెరుసలంలోనే అవి కనిపిస్తాయి.

5. ప్రతి జనము దానిలోనే జన్మించెననియు సర్వోన్నతుడు తానే దాని స్థిరపరచెననియు సీయోనునుగూర్చి చెప్పుకొందురు.

6. యెహోవా జనముల సంఖ్య వ్రాయించునప్పుడు ఈ జనము అక్కడ జన్మించెనని సెలవిచ్చును. (సెలా. )

7. పాటలు పాడుచు వాద్యములు వాయించుచు మా ఊటలన్నియు నీయందే యున్నవని వారందురు.