1. దేవా, నేను మొఱ్ఱపెట్టగా నా మనవి ఆలకింపుము శత్రుభయమునుండి నా ప్రాణమును కాపాడుము.

ఈ కీర్తనలో రెండు భాగాలున్నాయి. శత్రువులనుంచి విడుదల కోసం ప్రార్థన (1-6 వ), దేవుడే ఆ ప్రార్థనకు జవాబిస్తాడన్న నమ్మకం (7-10 వ). మరి కొన్ని కీర్తనల్లో శత్రువుల విషయం చేసిన ప్రార్థనల్లాంటిదే ఇది కూడా (ఉదా।। 57, 58, 59). కీర్తనల గ్రంథము 35:8 నోట్ చూడండి. దేవుని ప్రజలకు వ్యతిరేకంగా పన్నిన కుట్రలన్నీ సైతాను, వాడి అనుచరుల ప్రేరణ వల్ల కలిగినవే అని జ్ఞాపకముంచుకోండి.

2. కీడుచేయువారి కుట్రనుండి దుష్టక్రియలు చేయువారి అల్లరినుండి నన్ను దాచుము

3. ఒకడు కత్తికి పదును పెట్టునట్లు వారు తమ నాలుకలకు పదును పెట్టుదురు.

4. యథార్థవంతులను కొట్టవలెనని చాటైన స్థలములలో చేదుమాటలను బాణములుగా సంధించుదురు. వారు భయమేమియు లేక అకస్మాత్తుగా వారినికొట్టెదరు

వారికి దేవుడంటే భయం లేదు. ఒక వేళ ఉంటే అది వారిని అడ్డగించేది (కీర్తనల గ్రంథము 34:11-14; కీర్తనల గ్రంథము 111:10; ఆదికాండము 20:11; సామెతలు 1:7 నోట్స్ చూడండి).

5. వారు దురాలోచన దృఢపరచుకొందురు చాటుగా ఉరుల నొడ్డుటకు యోచించుకొనుచు మనలను ఎవరు చూచెదరని చెప్పుకొందురు.

6. వారు దుష్టక్రియలను తెలిసికొనుటకు ప్రయత్నింతురు వెదకి వెదకి ఉపాయము సిద్ధపరచుకొందురు ప్రతివాని హృదయాంతరంగము అగాధము.

“హృదయం”– యిర్మియా 17:9; సామెతలు 18:4; సామెతలు 20:5.

7. దేవుడు బాణముతో వారిని కొట్టును వారు ఆకస్మికముగా గాయపరచబడెదరు.

ఇక్కడ మరోసారి పరిపూర్ణమైన దేవుని న్యాయాన్ని చూస్తున్నాం. దుష్టులు దేవుని ప్రజలపై బాణాలు వేస్తారు. అలాగైతే దేవుడు దుష్టుల పై బాణాలు కురిపిస్తాడు. వీరిద్దరిలో ఎక్కువగా ఆరితేరిన విలుకాడు ఎవరో చివరికి వారికి తెలిసివస్తుంది. వారు ఇతరులను గాయపరిచేందుకు తమ నాలుకలను కత్తుల్లాగా వాడతారు. అయితే దేవుడు వారి నాలుకనే వారికి గాయాలు కలిగేలా వాడతాడు. ఇది న్యాయం కాదా?

8. వారు కూలెదరు వారు కూలుటకు వారి నాలుకే కారణము. వారిని చూచువారందరు తల ఊచుదురు

9. మనుష్యులందరు భయముకలిగి దేవుని కార్య ములు తెలియజేయుదురు ఆయన కార్యములు చక్కగా యోచించు కొందురు

దుర్మార్గుల మీదికి దేవుడు పంపే న్యాయమైన తీర్పులు ఈ వచనాల్లో కనిపించే సత్ఫలితాలను ఇస్తాయి. యెషయా 26:9 చూడండి. దేవుడు ప్రేమమూర్తి గనుక ఆయన న్యాయాన్ని విస్మరించి దుర్మార్గులను శిక్షించకుండా వదిలేస్తాడను కోవడం చాల పెద్ద పొరపాటు. న్యాయవంతులు హర్షించేది దుర్మార్గులు దండనకు గురి కావడం బట్టి కాదు గాని దేవుణ్ణి బట్టి, ఆయన న్యాయాన్ని బట్టి ఆనందిస్తారు.

10. నీతిమంతులు యెహోవానుబట్టి సంతోషించుచు ఆయన శరణుజొచ్చెదరు యథార్థ హృదయులందరు అతిశయిల్లుదురు.