1. యెహోవా నాకు వెలుగును రక్షణయునైయున్నాడు, నేను ఎవరికి భయపడుదును? యెహోవా నా ప్రాణదుర్గము, ఎవరికి వెరతును?

అది అపాయకరమైన కాలం. కొందరు కొండేలు చెప్తున్న కాలం (12 వ). ఏమి చెయ్యాలో తెలుసుకునేందుకు వెలుగు, శత్రువుల నుంచి సంరక్షణ దావీదుకు అవసరం. తన స్వంత ఆలోచనల్లో నుంచి తనకోసం తానే వెలుగును పుట్టించుకోగలనని గానీ తన బలంలో, తన మంచితనంలోనే తన రక్షణ ఉన్నదని గానీ దావీదు ఎన్నడూ కలలోనైనా ఊహించలేదు. మంచితనం అంతటికీ మూలాధారం దేవుడే అని అతనెప్పుడూ గుర్తించి చెప్పాడు. వెలుగు గురించి కీర్తనల గ్రంథము 18:28 చూడండి. రక్షణ గురించి కీర్తనల గ్రంథము 7:1-2 చూడండి. భయం గురించి కీర్తనల గ్రంథము 23:4 చూడండి.

2. నా శరీరమాంసము తినుటకై దుష్టులు నామీదికి వచ్చినప్పుడు నన్ను బాధించు శత్రువులు నామీదికి వచ్చినప్పుడు వారు తొట్రిల్లికూలిరి

రోమీయులకు 8:37; ఎఫెసీయులకు 6:10-11. దావీదుకు తన లౌకిక శత్రువుల విషయంలో నిబ్బరం ఉన్నట్టుగానే ఇప్పుడు విశ్వాసులకు కూడా ఆత్మ లోకంలోని శత్రువుల విషయంలో నిబ్బరం ఉండాలి.

3. నాతో యుద్ధము చేయుటకు దండు దిగినను నా హృదయము భయపడదు నామీదికి యుద్ధము రేగినను దీనిలో నేను ధైర్యము విడువకుందును.

4. యెహోవాయొద్ద ఒక్క వరము అడిగితిని దానిని నేను వెదకుచున్నాను. యెహోవా ప్రసన్నతను చూచుటకును ఆయన ఆలయములో ధ్యానించుటకును నా జీవితకాలమంతయు నేను యెహోవా మందిరములో నివసింప గోరుచున్నాను.

యుద్ధ కాలాల్లోను శత్రువులనుంచి పారిపోయి దాక్కున్న సమయాల్లోను ఇతర ప్రాంతాలకు వెళ్ళిన సమయాల్లోను దావీదు తరచుగా దేవుని ఆరాధన స్థలానికి దూరంగా ఉండేవాడు. అలాంటి సమయాల్లో అతడు తహతహలాడేది జెరుసలంలోని దేవుని నివాసం కోసం, ధ్యానం, ఆరాధన చేసుకునేందుకు క్షేమకరమైన, శాంతికరమైన ఆ స్థలం కోసం, ఆరాధన గుడారం దగ్గర జరిగే సంగీత వాద్యాల ఆనంద ధ్వనుల కోసం. అనంత యుగాలలో విశ్వాసులకు దక్కే భాగ్యం ఇదే. “ఒకటి”– అతడు కోరినది ధనం, పైస్థానం, పేరుప్రతిష్టలు, ఇతరులపై శక్తి ఇవి కాదు. 1 రాజులు 3:5; లూకా 10:41-42; ఫిలిప్పీయులకు 3:8-10 పోల్చి చూడండి. “యెహోవా మనోజ్ఞత”– హీబ్రూ పదానికి మనోహరత్వం, లేక ఉల్లాసం కలిగించేది అని కూడా అర్థం. కీర్తనల గ్రంథము 90:17 చూడండి. దేవుని ఆరాధన స్థలంలో ఎలాంటి ఆకృతీ లేదు, అందంగా ఉన్నదనుకోవడానికీ ఎలాంటి విగ్రహమూ లేదు. ఇక్కడ దావీదు మాట్లాడుతున్నది విశ్వాస నేత్రంతో మాత్రమే చూడగలిగిన దేవుని ఆధ్మాత్మిక సౌందర్యం.

5. ఆపత్కాలమున ఆయన తన పర్ణశాలలో నన్ను దాచును తన గుడారపు మాటున నన్ను దాచును ఆశ్రయదుర్గముమీద ఆయన నన్ను ఎక్కించును.

దేవుడు మనలను కాపాడుతూ, తన ఆశ్రయంలో ఉంచి ఎత్తయిన బండ పైకి ఎక్కిస్తే (ఆ బండ ఆయనే – ద్వితీయోపదేశకాండము 32:4) మనం నిజంగా క్షేమంగా ఉంటాం. సంతోషంతో గంతులు వేస్తూ ఆయన నామ సంకీర్తన చేస్తూ ఉండేందుకు కారణాలు ఉంటాయి.

6. ఇప్పుడు నన్ను చుట్టుకొనియున్న నా శత్రువుల కంటె ఎత్తుగా నా తలయెత్తబడును. ఆయన గుడారములో నేను ఉత్సాహధ్వని చేయుచు బలులు అర్పించెదను. నేను పాడెదను, యెహోవానుగూర్చి స్తుతిగానము చేసెదను.

7. యెహోవా, నేను కంఠధ్వని యెత్తి నిన్ను ప్రార్థించునప్పుడు నా మనవి ఆలకింపుము కరుణతో నాకుత్తరమిమ్ము.

8. నా సన్నిధి వెదకుడని నీవు సెలవియ్యగా యెహోవా, నీ సన్నిధి నేను వెదకెదనని నా హృదయము నీతో అనెను.

బైబిలంతటిలో దేవుని ముఖాన్ని వెతకడానికి ఉన్న ప్రాముఖ్యత గురించి పదే పదే కనిపిస్తుంది (కీర్తనల గ్రంథము 105:4; యెషయా 45:19; యెషయా 55:6-7; హోషేయ 10:12; ఆమోసు 5:6; జెఫన్యా 2:3; మత్తయి 7:7; హెబ్రీయులకు 11:6). తనను వెదికేవారికి తన్ను తాను వెల్లడి చేసుకోవడం దేవునికి ఇష్టం గనుక అందరూ తనను వెదకాలని ఆయన కోరుతున్నాడు. అన్ని మంచి వాటికి మూలాధారం తానే అని వారు తెలుసుకోవాలని ఆయన ఉద్దేశం.

9. నీ ముఖమును నాకు దాచకుము కోపముచేత నీ సేవకుని తోలివేయకుము. నా సహాయుడవు నీవే రక్షణకర్తవగు నా దేవా, నన్ను దిగనాడకుము నన్ను విడువకుము

కీర్తనల గ్రంథము 13:1.

10. నా తలిదండ్రులు నన్ను విడిచినను యెహోవా నన్ను చేరదీయును.

కీర్తనల గ్రంథము 68:5; యెషయా 49:15; హోషేయ 14:3. తల్లిదండ్రులు విడిచిపెట్టిపోయిన విశ్వాసులకు యెహోవాయే తల్లిగా తండ్రిగా ఉంటాడు. మానవ మాత్రుడెవరికీ సాధ్యపడని విధంగా ఆయన వారిని ప్రేమించి పోషిస్తాడు.

11. యెహోవా, నీ మార్గమును నాకు బోధింపుము. నాకొరకు పొంచియున్నవారిని చూచి సరాళమైన మార్గమున నన్ను నడిపింపుము.

కీర్తనల గ్రంథము 25:5.

12. అబద్ధసాక్షులును క్రూరత్వము వెళ్లగ్రక్కువారును నా మీదికి లేచియున్నారు. నా విరోధుల యిచ్ఛకు నన్ను అప్పగింపకుము

ఒక విశ్వాసికి వ్యతిరేకంగా ఎవరన్నా అబద్ధాలు, చాడీలు చెప్తే ఏం చెయ్యాలి? ప్రార్థన చేయాలి (12 వ), దేవునిలో నమ్మకం ఉంచాలి (13 వ), భవిష్యత్తును గురించి దేవునిలో ఆశాభావం ఉంచాలి (14 వ). ఇవి లేకుండా మనకు ఆందోళనే మిగులుతుంది.

13. సజీవుల దేశమున నేను యెహోవా దయను పొందుదునన్న నమ్మకము నాకు లేనియెడల నేనేమవుదును? యెహోవా కొరకు కనిపెట్టుకొని యుండుము

14. ధైర్యము తెచ్చుకొని నీ హృదయమును నిబ్బరముగా నుంచుకొనుము యెహోవాకొరకు కనిపెట్టుకొని యుండుము.