1. తరువాత దావీదు ఇశ్రాయేలీయులలో ముప్పదివేల మంది శూరులను సమకూర్చుకొని

1 దినవృత్తాంతములు 13:1-14. “బయలా”– అంటే కిర్యత్ యారీం (యెహోషువ 15:9).

2. బయలుదేరి, కెరూబుల మధ్య నివసించు సైన్యములకధిపతియగు యెహోవా అను తన నామము పెట్టబడిన దేవుని మందసమును అచ్చటనుండి తీసికొని వచ్చుటకై తన యొద్దనున్న వారందరితో కూడ బాయిలా యెహూదాలోనుండి ప్రయాణమాయెను.

“ఒడంబడిక పెట్టె”– నిర్గమకాండము 25:10-16 నోట్. సౌలు పరిపాలన కాలంలో ఒడంబడిక పెట్టెను కిర్యత్ యారీంలో ఉంచారు (1 సమూయేలు 7:1).

3. వారు దేవుని మందసమును క్రొత్త బండి మీద ఎక్కించి గిబియాలోనున్న అబీనాదాబుయొక్క యింటిలోనుండి తీసికొనిరాగా అబీనాదాబు కుమారులగు ఉజ్జాయును అహ్యోయును ఆ క్రొత్త బండిని తోలిరి.

ఒడంబడిక పెట్టెను ఎలా తీసుకువెళ్ళాలనే సంగతి గురించి దేవుడు కొన్ని ఆదేశాలిచ్చాడు (సంఖ్యాకాండము 4:4-6 సంఖ్యాకాండము 4:15; సంఖ్యాకాండము 7:9). ఫిలిష్తీయవారు అవలంబించిన పద్ధతినే దావీదు అవలంబిస్తున్నాడు (1 సమూయేలు 6:7-8). శోచనీయమైన ఫలితాల నెదుర్కోవలసివచ్చింది. దేవుని దీవెనలు కావాలంటే దేవుని పనిని దేవుడు చెప్పిన విధంగానే చెయ్యాలి.

4. దేవుని మందసముగల ఆ బండిని గిబియాలోని అబీనాదాబు ఇంటనుండి తీసికొనిరాగా అహ్యో దానిముందర నడిచెను

కీర్తనల గ్రంథము 150:1-6 పోల్చి చూడండి.

5. దావీదును ఇశ్రాయేలీయులందరును సరళవృక్షపు కఱ్ఱతో చేయబడిన నానావిధములైన సితారాలను స్వర మండలములను తంబురలను మృదంగములను పెద్ద తాళము లను వాయించుచు యెహోవా సన్నిధిని నాట్యమాడుచుండిరి.

6. వారు నాకోను కళ్లము దగ్గరకు వచ్చినప్పుడు ఎడ్లకు కాలు జారినందున ఉజ్జా చేయి చాపి దేవుని మందసమును పట్టుకొనగా

“పట్టుకొన్నాడు”– సంఖ్యాకాండము 4:15 సంఖ్యాకాండము 4:19-20 లో దీన్ని దేవుడు స్పష్టంగా నిషేధించాడు.

7. యెహోవా కోపము ఉజ్జా మీద రగులుకొనెను. అతడు చేసిన తప్పునుబట్టి దేవుడు ఆ క్షణమందే అతని మొత్తగా అతడు అక్కడనే దేవుని మందసమునొద్ద పడి చనిపోయెను.

“మొత్తాడు”– 1 సమూయేలు 6:19. ఉజ్జాకు వచ్చిన శిక్ష మరీ విపరీతమని ఎవరికైనా అనిపించవచ్చు. అయితే ఇలాంటి విషయాల్లో నిర్ణయం చేయవలసినది దేవుడే. ఎప్పుడు, ఏమి చేయాలో ఆయనకు బాగా తెలుసు. తన మార్గాల్లో పవిత్రత, తనపట్ల విధేయత చూపడంలోని ప్రాముఖ్యతను స్పష్టీకరించేందుకు ఆయన కొన్ని సార్లు కఠిన చర్యలు తీసుకోవాలి. లేవీయకాండము 10:1-3; సంఖ్యాకాండము 15:30-36; యెహోషువ 7:25-26; అపో. కార్యములు 5:1-11 పోల్చి చూడండి. సంఖ్యాకాండము 25:3; కీర్తనల గ్రంథము 90:7-11 దగ్గర దేవుని కోపం గురించి నోట్స్ చూడండి.

8. యెహోవా ఉజ్జాకు ప్రాణోపద్రవము కలుగజేయగా దావీదు వ్యాకులపడి ఆ స్థలమునకు పెరెజ్‌ ఉజ్జా అను పేరు పెట్టెను.

దేవుడు చేసిన పనులకు దావీదుకు కోపం, తత్తరపాటు కలిగాయి (కొన్ని సార్లు మనందరికీ ఇలాంటి పరీక్ష వస్తుంది). ఆనందం (వ 5) దిగులుగా మారిపోయింది. దేవుణ్ణి అతడు సన్మానించాలనుకున్నాడు గాని దేవుని పద్ధతిలో చెయ్యలేదు. ఆ విషయంలో దేవుణ్ణి తాను సంప్రదించలేదని తరువాత అతడు ఒప్పుకున్నాడు (1 దినవృత్తాంతములు 15:13). విధేయతా మార్గం సులభం కాదు. అయితే దేవునికి అంగీకారమైన మార్గం అదొక్కటే. “పెరెజ్ ఉజ్జా”– అంటే “ఉజ్జా మీదికి దాడి”.

9. నేటికిని దానికి అదేపేరు. ఆ దినమునయెహోవా మందసము నాయొద్ద ఏలాగుండుననుకొని, దావీదు యెహోవాకు భయపడి

ఒడంబడిక పెట్టె ఎక్కడికి వెళ్తుందో అక్కడ ప్రమాదం, కష్టం ఉంటాయేమోనని దావీదు భయపడ్డాడు. ఓబేద్ ఎదోం ఇంటిపై దేవుని దీవెనలు రావడంవల్ల అతని భయాలు నిజం కాదని తేలింది. అందువల్ల దావీదు వెళ్ళి ఒడంబడిక పెట్టెను తీసుకువచ్చాడు. దాన్ని తీసుకువచ్చే విధానంలో తాను చేసిన పొరపాటును అతడు గ్రహించి, దేవుడు చెప్పిన విధానాన్నే అనుసరించాడు. 1 దినవృత్తాంతములు 15:1-2 1 దినవృత్తాంతములు 15:11-15 చూడండి.

10. యెహోవా మందసమును దావీదు పురములోనికి తనయొద్దకు తెప్పింపనొల్లక గిత్తీయు డగు ఓబేదెదోము ఇంటివరకు తీసికొని అచ్చట ఉంచెను.

11. యెహోవా మందసము మూడునెలలు గిత్తీయుడగు ఓబేదె దోము ఇంటిలో ఉండగా యెహోవా ఓబేదెదోమును అతని ఇంటివారినందరిని ఆశీర్వదించెను.

12. దేవుని మందసము ఉండుటవలన యెహోవా ఓబేదెదోము ఇంటివారిని అతనికి కలిగిన దానినంతటిని ఆశీర్వదించుచున్నాడను సంగతి దావీదునకు వినబడగా, దావీదు పోయి దేవుని మందసమును ఓబేదెదోము ఇంటిలోనుండి దావీదు పురమునకు ఉత్సవముతో తీసికొని వచ్చెను.

“దావీదు నగరానికి”– 2 సమూయేలు 5:7.

13. ఎట్లనగా యెహోవా మందసమును మోయువారు ఆరేసి యడుగులు సాగగా ఎద్దు ఒకటియు క్రొవ్విన దూడ ఒకటియు వధింపబడెను,

14. దావీదు నారతో నేయబడిన ఏఫోదును ధరించినవాడై శక్తికొలది యెహోవా సన్నిధిని నాట్య మాడుచుండెను.

దేవుని ఆదేశాలపట్ల విధేయత తిరిగి ఆనందాన్ని తెచ్చింది.

15. ఈలాగున దావీదును ఇశ్రాయేలీయు లందరును ఆర్భాటముతోను బాకా నాదములతోను యెహోవా మందసమును తీసికొని వచ్చిరి.

16. యెహోవా మందసము దావీదు పురమునకు రాగా, సౌలు కుమార్తె యగు మీకాలు కిటికీలోనుండి చూచి, యెహోవా సన్నిధిని గంతులు వేయుచు నాట్య మాడుచు నున్న దావీదును కనుగొని, తన మనస్సులో అతని హీనపరచెను.

“మీకాల్”– ఇతరులు దేవుని విషయంలో తీవ్రత, ఆసక్తి కలిగి ఉంటే శరీర సంబంధులు, లోక సంబంధులు చూచి సహించలేరు.

17. వారు యెహోవా మందసమును తీసికొని వచ్చి గుడారము మధ్యను దావీదు దానికొరకు ఏర్పరచిన స్థలమున నుంచగా, దావీదు దహనబలులను సమాధానబలులను యెహోవా సన్నిధిని అర్పించెను.

“బలులు”– లేవీ 1,3 అధ్యాయాల్లో నోట్స్.

18. దహనబలులను సమాధానబలులను అర్పించుట చాలించిన తరువాత సైన్యములకధిపతియగు యెహోవా నామమున దావీదు జనులను ఆశీర్వదించి,

1 రాజులు 8:14-15.

19. సమూహముగా కూడిన ఇశ్రాయేలీయులగు స్త్రీపురుషుల కందరికి ఒక్కొక రొట్టెయు ఒక్కొక భక్ష్యమును ఒక్కొక ద్రాక్షపండ్ల అడయు పంచిపెట్టిన తరువాత జనులందరును తమ తమ యిండ్లకు వెళ్లిపోయిరి.

20. తన యింటివారిని దీవించుటకు దావీదు తిరిగి రాగా సౌలు కుమార్తెయగు మీకాలు దావీదును ఎదుర్కొన బయలుదేరి వచ్చిహీనస్థితి గల పనికత్తెలు చూచు చుండగా వ్యర్థుడొకడు తన బట్టలను విప్పివేసినట్టుగా ఇశ్రాయేలీయులకు రాజువైన నీవు నేడు బట్టలను తీసివేసియెంత ఘనముగా కనబడితివని అపహాస్యము చేసినందున దావీదు

“బట్టలు”– దావీదు తన రాజ వస్త్రాలను ధరించలేదు (వ 14). దేవుని కోసం తన తీవ్రమైన ఆసక్తినీ ఆనందాన్నీ ప్రదర్శించడంలో అతడు ఇలా చెయ్యడం గౌరవహీనతగా మీకాల్ భావించింది. మనుషుల మర్యాదల కంటే ఎక్కువ ప్రాముఖ్యమైన విషయాలున్నాయని ఆమె గ్రహించలేదు.

21. నీ తండ్రిని అతని సంతతిని విసర్జించి ఇశ్రా యేలీయులను తన జనులమీద నన్ను అధిపతిగా నిర్ణయించు టకై నన్ను యేర్పరచుకొనిన యెహోవా సన్నిధిని నేనాలాగు చేసితిని; యెహోవా సన్నిధిని నేను ఆట ఆడితిని.

“యెహోవా సన్నిధానంలో”– దావీదు ఆలోచనంతా దేవుణ్ణి గురించే గాని తన విషయం ప్రజలు ఏమనుకుంటారో అనే దాని గురించి కాదు. దేవుని విషయంలో వినయంగా ఆనందించడమే అతని హృదయాభిలాష గాని తన రాచపదవి మర్యాదల గురించి పట్టించుకోలేదు.

22. ఇంతకంటె మరి యెక్కువగా నేను తృణీకరింపబడి నా దృష్టికి నేను అల్పుడనై నీవు చెప్పిన పనికత్తెల దృష్టికి ఘనుడనగుదునని మీకాలుతో అనెను.

23. మరణమువరకు సౌలు కుమార్తెయగు మీకాలు పిల్లలను కనకయుండెను.