1. లాబాను కుమారులు మన తండ్రికి కలిగినది యావత్తును యాకోబు తీసికొని, మన తండ్రికి కలిగిన దానివలన ఈ యావదాస్తి సంపాదించెనని చెప్పుకొనిన మాటలు యాకోబు వినెను.

2. మరియు అతడు లాబాను ముఖము చూచినప్పుడు అది నిన్న మొన్న ఉండినట్లు అతనియెడల ఉండలేదు.

3. అప్పుడు యెహోవా నీ పితరుల దేశమునకు నీ బంధువుల యొద్దకు తిరిగి వెళ్లుము; నేను నీకు తోడైయుండెదనని యాకోబుతో చెప్పగా

“నీకు తోడుగా”– ఆదికాండము 28:15.

4. యాకోబు పొలములో తన మందయొద్దకు రాహేలును లేయాను పిలువనంపి వారితో యిట్లనెను.

5. మీ తండ్రి కటాక్షము నిన్న మొన్న నామీద ఉండినట్లు ఇప్పుడు నామీద నుండలేదని నాకు కనబడుచున్నది; అయితే నా తండ్రియొక్క దేవుడు నాకు తోడైయున్నాడు;

వ 42; ఆదికాండము 30:30. దేవుడు తనతో ఉన్నాడని యాకోబు ఒప్పుకుంటున్నాడు గాని ఇంకా “నా దేవుడు” అనడం లేదు.

6. మీ తండ్రికి నా యావచ్ఛక్తితో కొలువు చేసితినని మీకు తెలిసే యున్నది.

7. మీ తండ్రి నన్ను మోసపుచ్చి పదిమార్లు నా జీతము మార్చెను; అయినను దేవుడు అతని నాకు హానిచేయ నియ్యలేదు.

“పది సార్లు”– పై అధ్యాయాల్లో లాబాను యాకోబును మోసగించిన రెండు సందర్భాలు చూశాం. కాని అంతకన్నా ఎక్కువసార్లే మోసగించాడు. “నష్టం”– ఆదికాండము 50:20 సంఖ్యాకాండము 23:8 యోబు 1:10 కీర్తనల గ్రంథము 105:15 కీర్తనల గ్రంథము 115:9 హెబ్రీయులకు 13:6 1 పేతురు 3:13 పోల్చి చూడండి. దేవుడు అనుమతిస్తేనే తప్ప దేవుని పిల్లలకు ఎవరూ హాని చెయ్యలేరు. ఆయన అనుమతిస్తే అది వారి మేలుకే. రోమీయులకు 8:28 చదివి నమ్మండి.

8. అతడు పొడలు గలవి నీ జీతమగునని చెప్పినయెడల అప్పుడు మందలన్నియు పొడలుగల పిల్లలనీనెను. చారలుగలవి నీ జీతమగునని చెప్పినయెడల అప్పుడు మందలన్నియు చారలుగల పిల్లల నీనెను.

9. అట్లు దేవుడు మీ తండ్రి పశువులను తీసి నాకిచ్చెను.

అదంతా చేసింది దేవుడనీ తన ఉపాయాలు కాదనీ యాకోబు ఒప్పుకుంటున్నాడు (ఆదికాండము 30:37-43).

10. మందలు చూలుకట్టు కాలమున నేను స్వప్న మందు కన్నులెత్తి చూడగా గొఱ్ఱెలను దాటు పొట్టేళ్లు చారలైనను పొడలైనను మచ్చలైనను గలవై యుండెను.

11. మరియు ఆ స్వప్నమందు దేవుని దూత యాకోబూ అని నన్ను పిలువగా చిత్తము ప్రభువా అని చెప్పితిని.

“కల”– వ 24. కలల గురించి నోట్ ఆదికాండము 15:12 సంఖ్యాకాండము 12:6 ద్వితీయోపదేశకాండము 13:1 చూడండి. “దేవుని దూత”– ఆదికాండము 16:7 దగ్గర నోట్.

12. అప్పుడు ఆయన నీ కన్నులెత్తి చూడుము; గొఱ్ఱెలను దాటుచున్న పొట్టేళ్లన్నియు చారలైనను పొడలైనను మచ్చలైనను గలవి; ఏలయనగా లాబాను నీకు చేయుచున్నది యావత్తును చూచితిని

13. నీ వెక్కడ స్తంభముమీద నూనె పోసితివో, యెక్కడ నాకు మ్రొక్కుబడి చేసితివో ఆ బేతేలు దేవుడను నేనే. ఇప్పుడు నీవు లేచి యీ దేశములోనుండి బయలుదేరి నీవు పుట్టిన దేశమునకు తిరిగి వెళ్లుమని నాతో చెప్పెననెను.

“బేతేల్”– ఆదికాండము 28:19. “నేనే”– ఇక్కడ యెహోవా దూత (వ 11) తానే దేవుణ్ణి అంటున్నాడు.

14. అందుకు రాహేలును లేయాయు యింక మా తండ్రి యింట మాకు పాలు పంపు లెక్కడివి? అతడు మమ్మును అన్యులుగా చూచుటలేదా?

15. అతడు మమ్మును అమ్మివేసి, మాకు రావలసిన ద్రవ్యమును బొత్తుగా తినివేసెను.

ఆదికాండము 29:20 ఆదికాండము 29:23 ఆదికాండము 29:27

16. దేవుడు మా తండ్రి యొద్దనుండి తీసివేసిన ధనమంతయు మాదియు మా పిల్లలదియునైయున్నది గదా? కాబట్టి దేవుడు నీతో చెప్పినట్లెల్ల చేయుమని అతనికుత్తర మియ్యగా

17. యాకోబు లేచి తన కుమారులను తన భార్యలను ఒంటెలమీద నెక్కించి

18. కనాను దేశమునకు తన తండ్రియైన ఇస్సాకు నొద్దకు వెళ్లుటకు తన పశువులన్నిటిని, తాను సంపాదించిన సంపద యావత్తును, పద్దనరాములో తాను సంపాదించిన ఆస్తి యావత్తును తీసికొని పోయెను.

19. లాబాను తన గొఱ్ఱెలబొచ్చు కత్తిరించుటకు వెళ్లియుండగా రాహేలు తన తండ్రి యింటనున్న గృహ దేవతలను దొంగిలెను.

లాబానుకు ఏకైక నిజ దేవుని గురించి తెలిసినప్పటికీ (వ 53), వారిని దీవించినది ఆయనేనని తెలిసి కూడా (ఆదికాండము 30:27) తన ఇంట్లో విగ్రహాలను ఉంచుకొని వాటిని తన దేవుళ్ళన్నాడు (వ 30). ఎంత అజ్ఞానం! ఇంతకన్నా శోచనీయం ఏమిటంటే రాహేలు వాటినెంతగా కోరిందంటే దొంగతనంగా తెచ్చుకొనేందుకు కూడా వెనుకాడలేదు. దేవుని సత్యాన్ని తన ప్రియ భార్యకే ఉపదేశించడానికి సమయం లేనంతగా డబ్బు సంపాదనలో మునిగిపోయాడా యాకోబు? ఈ విషయం ఖచ్చితంగా చెప్పలేము. కొన్నిసార్లు చక్కగా చెప్పినా కూడా కొందరు సద్బోధను తలకెక్కించుకోరు.

20. యాకోబు తాను పారిపోవు చున్నానని సిరియావాడైన లాబానుకు తెలియచేయక పోవుట వలన అతని మోసపుచ్చినవాడాయెను.

“మోసం”– ఆదికాండము 25:26 ఆదికాండము 27:35-36 యిర్మియా 13:23 యిర్మియా 17:9.

21. అతడు తనకు కలిగిన దంతయు తీసికొని పారిపోయెను. అతడు లేచి నది దాటి గిలాదను కొండతట్టు అభిముఖుడై వెళ్లెను.

“గిలాదు”– కనానుకు తూర్పు సరిహద్దు అవతల ఉన్న ప్రాంతం.

22. యాకోబు పారిపోయెనని మూడవ దినమున లాబానుకు తెలుపబడెను.

23. అతడు తన బంధువులను వెంటబెట్టుకొని, యేడు దినముల ప్రయాణమంత దూరము అతని తరుముకొని పోయి, గిలాదు కొండమీద అతని కలిసికొనెను.

24. ఆ రాత్రి స్వప్నమందు దేవుడు సిరియావాడైన లాబాను నొద్దకు వచ్చినీవు యాకోబుతో మంచిగాని చెడ్డగాని పలుకకుము జాగ్రత్త సుమీ అని అతనితో చెప్పెను.

“కల”– వ 11.

25. లాబాను యాకోబును కలిసికొనెను. యాకోబు తన గుడారము ఆ కొండమీద వేసికొనియుండెను; లాబానును తన బంధువులతో గిలాదు కొండమీద గుడారము వేసి కొనెను.

26. అప్పుడు లాబాను యాకోబుతో నీవేమి చేసితివి? నన్ను మోసపుచ్చి, కత్తితో చెరపట్టబడిన వారిని వలె నా కుమార్తెలను కొనిపోవనేల?

ఇతరుల్ని మోసగించేవారు ఇతరుల చేతుల్లో తామే మోసపోయినప్పుడు ఎందుకు ఆశ్చర్యపడాలి? ఆదికాండము 29:25 నోట్ చూడండి.

27. నీవు నాకు చెప్పక రహస్యముగా పారిపోయి నన్ను మోసపుచ్చితివేల? సంభ్రమముతోను పాటలతోను మద్దెలతోను సితారాలతోను నిన్ను సాగనంపుదునే.

28. అయితే నీవు నా కుమారులను నా కుమార్తెలను నన్ను ముద్దు పెట్టు కొననియ్యక పిచ్చిపట్టి యిట్లు చేసితివి.

29. మీకు హాని చేయుటకు నా చేతనవును; అయితే పోయిన రాత్రి మీ తండ్రియొక్క దేవుడు నీవు యాకోబుతో మంచి గాని చెడ్డగాని పలుకకుము జాగ్రత్త సుమీ అని నాతో చెప్పెను.

“హాని”– ఇందులో లాబాను పొరబడ్డాడు. వ 7 నోట్. యోహాను 19:10-11 పోల్చిచూడండి.

30. నీ తండ్రి యింటిమీద బహు వాంఛగల వాడవై వెళ్లగోరిన యెడల వెళ్లుము, నా దేవతల నేల దొంగిలితివనగా

వ 30; యెహోషువ 24:2. దొంగతనానికి గురి కాగల దేవతలు ఏం దేవతలు? న్యాయాధిపతులు 6:30-31 కీర్తనల గ్రంథము 115:3-8 యెషయా 42:17 యెషయా 44:12-20.

31. యాకోబు నీవు బలవంతముగా నా యొద్దనుండి నీ కుమార్తెలను తీసికొందువేమో అనుకొని భయపడితిని

“భయంచేత”– లాబాను టక్కరితనం గురించి యాకోబు కొంత నేర్చుకొన్నాడు. అందుకని అతడేం చేస్తాడో అని భయపడ్డాడు. తన స్వంత స్వభావం గురించి కూడా అతనికి భయం ఉండవలసింది. ఇతరులగురించి కంటే మన స్వభావంలోని లోటుపాట్లు గురించే మనమెక్కువ భయపడాలి.

32. ఎవరియొద్ద నీ దేవతలు కనబడునో వారు బ్రదుకకూడదు. నీవు నా యొద్దనున్న వాటిని మన బంధువుల యెదుట వెదకి నీ దానిని తీసికొనుమని లాబానుతో చెప్పెను. రాహేలు వాటిని దొంగిలెనని యాకోబునకు తెలియలేదు.

33. లాబాను యాకోబు గుడారములోనికి లేయా గుడారము లోనికి ఇద్దరి దాసీల గుడారములలోనికి వెళ్లెను గాని అతని కేమియు దొరకలేదు. తరువాత అతడు లేయా గుడారములోనుండి బయలుదేరి రాహేలు గుడారములోనికి వెళ్లెను.

34. రాహేలు ఆ విగ్రహములను తీసికొని ఒంటె సామగ్రిలో పెట్టి వాటిమీద కూర్చుండెను. కాగా లాబాను ఆ గుడారమందంతటను తడవి చూచి నప్పటికిని అవి దొరకలేదు.

35. ఆమె తన తండ్రితో తమ యదుట నేను లేవలేనందున తాము కోపపడకూడదు; నేను కడగానున్నానని చెప్పెను. అతడెంత వెదకినను ఆ విగ్రహములు దొరకలేదు.

రాహేలు కూడా మోసగించడానికి వెనుకాడలేదు. అబద్ధాలు ఆడుతూ మోసాలు చేస్తూ ఉండే కుటుంబాలు, ప్రజలు ఎలాంటి తిప్పల పాలౌతారో, కష్టాలు పడతారో వీళ్ళెవరూ గ్రహించినట్టులేదు.

36. యాకోబు కోపపడి లాబానుతో వాదించి అతనితో నీవిట్లు మండిపడి నన్ను తరుమ నేల? నేను చేసిన ద్రోహమేమి? పాపమేమి?

37. నీవు నా సమస్త సామగ్రి తడివి చూచిన తరువాత నీ యింటి వస్తువులన్నిటిలో ఏది దొరికెను? నా వారి యెదుటను నీ వారియెదుటను అది యిట్లు తెచ్చిపెట్టుము; వారు మన ఉభయుల మధ్య తీర్పు తీర్చుదురు.

38. ఈ యిరువది యేండ్లు నేను నీయొద్దనుంటిని. నీ గొఱ్ఱెలైనను మేకలైనను ఈచుకొని పోలేదు, నీ మంద పొట్టేళ్లను నేను తినలేదు.

39. దుష్ట మృగములచేత చీల్చబడినదానిని నీ యొద్దకు తేక ఆ నష్టము నేనే పెట్టుకొంటిని. పగటియందు దొంగిలింపబడిన దాని నేమి రాత్రియందు దొంగి లింపబడినదాని నేమి నాయొద్ద పుచ్చుకొంటివి; నేను ఈలాగుంటిని.

40. పగటి యెండకును రాత్రి మంచుకును నేను క్షీణించిపోతిని; నిద్ర నా కన్నులకు దూరమాయెను.

41. ఇదివరకు నీ యింటిలో ఇరువది యేండ్లు ఉంటిని. నీ యిద్దరి కుమార్తెల నిమిత్తము పదునాలు గేండ్లును, నీ మంద నిమిత్తము ఆరేండ్లును నీకు కొలువు చేసితిని. అయినను నీవు నా జీతము పదిమారులు మార్చితివి.

“పదిసార్లు”– వ 7.

42. నా తండ్రి దేవుడు, అబ్రాహాము దేవుడు, ఇస్సాకు భయపడిన దేవుడు నాకు తోడైయుండనియెడల నిశ్చయముగా నీవు నన్ను వట్టి చేతులతోనే పంపివేసి యుందువు. దేవుడు నా ప్రయాసమును నా చేతుల కష్టమును చూచి, పోయిన రాత్రి నిన్ను గద్దించెనని లాబానుతో చెప్పెను.

43. అందుకు లాబాను ఈ కుమార్తెలు నా కుమార్తెలు, ఈ కుమారులు నా కుమారులు, ఈ మంద నా మంద, నీకు కనబడుచున్నది అంతయు నాది, ఈ నా కుమార్తెలనైనను వీరు కనిన కుమారుల నైనను నేనేమి చేయగలను.

44. కావున నేనును నీవును నిబంధన చేసికొందము రమ్ము, అది నాకును నీకును మధ్య సాక్షిగా ఉండునని యాకోబుతో ఉత్తరమియ్యగా

ఆదికాండము 21:27 ఆదికాండము 21:32 ఆదికాండము 26:28 యెహోషువ 24:27.

45. యాకోబు ఒక రాయి తీసికొని దానిని స్తంభముగా నిలువబెట్టెను.

“స్తంభం”– ఆదికాండము 28:18.

46. మరియు యాకోబు రాళ్లు కూర్చుడని తన బంధువులతో చెప్పెను. వారు రాళ్లు తెచ్చి కుప్ప వేసిరి; అక్కడ వారు ఆ కుప్ప యొద్ద భోజనము చేసిరి.

47. లాబాను దానికి యగర్‌ శాహదూతా అను పేరు పెట్టెను. అయితే యాకోబు దానికి గలేదు అను పేరు పెట్టెను.

ఈ రెండు పదాలకూ “సాక్ష్యం కుప్ప” అని అర్థం.

48. లాబాను నేడు ఈ కుప్ప నాకును నీకును మధ్య సాక్షిగా ఉండునని చెప్పెను. కాబట్టి దానికి గలేదను పేరుపెట్టెను. మరియు మనము ఒకరికొకరము దూరముగా నుండగా యెహోవా నాకును నీకును మధ్య జరుగునది కనిపెట్టునని చెప్పెను గనుక దానికి మిస్పా అను పేరు పెట్టబడెను.

49. అంతట లాబాను నీవు నా కుమార్తెలను బాధ పెట్టినను, నా కుమార్తెలను గాక యితర స్త్రీలను పెండ్లి చేసికొనినను, చూడుము,

“మిస్పా”– అంటే “కావలి గోపురం”.

50. మనయొద్ద ఎవరును లేరు గదా, నాకును నీకును దేవుడే సాక్షి అని చెప్పెను.

“దేవుడే సాక్షి”– న్యాయాధిపతులు 11:10 కీర్తనల గ్రంథము 139:3 కీర్తనల గ్రంథము 139:7-12 యిర్మియా 42:5 మీకా 1:2 మలాకీ 2:14 మలాకీ 3:5 1 థెస్సలొనీకయులకు 2:10 హెబ్రీయులకు 4:13.

51. మరియు లాబాను నాకును నీకును మధ్య నేను నిలిపిన యీ స్తంభమును చూడుము ఈ కుప్ప చూడుము.

52. హానిచేయవలెనని నేను ఈ కుప్ప దాటి నీ యొద్దకు రాకను, నీవు ఈ కుప్పను ఈ స్తంభమును దాటి నా యొద్దకు రాకను ఉండుటకు ఈ కుప్ప సాక్షి యీ స్తంభమును సాక్షి.

53. అబ్రాహాము దేవుడు నాహోరు దేవుడు వారి తండ్రి దేవుడు మన మధ్య న్యాయము తీర్చునని చెప్పెను. అప్పుడు యాకోబు తన తండ్రియైన ఇస్సాకు భయపడిన దేవునితోడని ప్రమాణము చేసెను.

ఒకవేళ లాబానుకు ఏకైక నిజ దేవుడు గనుక ఉంటే గృహ దేవతలు అవసరం లేదు (వ 30) కానీ అతడు కూడా యాకోబు లాగా దేవుణ్ణి వేరొకరి దేవుడుగా మాట్లాడాడు. “నా దేవుడు” అనలేదు. దేవుణ్ణి తన దేవుడుగా చెప్పగలిగినవారు ధన్యులు (కీర్తనల గ్రంథము 3:7 కీర్తనల గ్రంథము 5:2 కీర్తనల గ్రంథము 7:1 కీర్తనల గ్రంథము 23:1 దానియేలు 9:19 యోహాను 20:28 ఫిలిప్పీయులకు 4:19).

54. యాకోబు ఆ కొండమీద బలియర్పించి భోజనము చేయుటకు తన బంధువులను పిలువగా వారు భోజనముచేసి కొండమీద ఆ రాత్రి వెళ్లబుచ్చిరి.

“బల్యర్పణ”– మొట్టమొదటి సారిగా యాకోబు దేవునికి బలి అర్పించడం చూస్తున్నాం. దేవుణ్ణి అనుసరించడంలోని కొన్ని ప్రాథమికమైన అంశాలను అర్థం చేసుకుని ఆచరించేందుకు యాకోబుకు చాలా కాలం పట్టినట్టుంది.

55. తెల్లవారినప్పుడు లాబాను లేచి తన కుమారులను తన కుమార్తెలను ముద్దు పెట్టుకొని వారిని దీవించి బయలుదేరి తన ఊరికి వెళ్లి పోయెను.

ఈ విధంగా 20 సంవత్సరాల అనంతరం యాకోబు లాబాన్ను విడిచివెళ్తున్నాడు. నలుగురు భార్యలు, పన్నెండుమంది సంతానం (బెన్యామీను ఇంకా పుట్టలేదు), గొప్ప మందలు సంపాదించుకున్నాడు. చాలా బాధలూ కష్టాలూ వైఫల్యాలూ పొరపాట్లూ ఎదురైనా దేవునిపై నమ్మకం ఉంచుతూ వచ్చాడు. అతని పనులు అనేకాలను దేవుడు అంగీకరించలేదు గాని అతడిపట్ల కరుణ చూపి 28:15లో వాగ్దానం చేసినట్టుగానే అతణ్ణి క్షేమంగా స్వదేశానికి తీసుకువచ్చాడు. మరోసారి యెహోవా తాను నమ్మకం పెట్టుకోదగిన, ప్రేమమూర్తి అయిన దేవుణ్ణని ఋజువు చేసుకొన్నాడు. నిర్గమకాండము 34:6-7 కీర్తనల గ్రంథము 86:15 కీర్తనల గ్రంథము 103:8-14 కీర్తనల గ్రంథము 108:4 కీర్తనల గ్రంథము 145:8 యోవేలు 2:12-13 మీకా 7:18-20 రోమీయులకు 2:4 పోల్చి చూడండి.