1. ఇస్సాకు వృద్ధుడై అతని కన్నులకు మందదృష్టి కలిగినప్పుడు అతడు తన పెద్ద కుమారుడైన ఏశావుతో నా కుమారుడా, అని అతని పిలువగా అతడు చిత్తము నాయనా అని అతనితో ననెను.

దేవుడు ఏశావును తిరస్కరించి యాకోబును ఎన్నుకున్న సంగతి ఇస్సాకుకు అర్థమయిందా? లేక అర్థమై కూడా దేవుని సంకల్పానికి వ్యతిరేకంగా ప్రధాన దీవెన, అంటే జన్మహక్కు సంబంధమైన దీవెన ఏశావుకే ఇవ్వాలనుకున్నాడా? అతడి మనస్సులో, హృదయంలో ఏముందో రాసి లేదు గాని యాకోబును దీవించాలన్న ఉద్దేశమే అతనికి ఉన్నట్టు లేదు. ఈ పక్షపాతం శరీర స్వభావంలోని ఉద్దేశాలనుంచి పుట్టింది – ఆదికాండము 25:18 చూడండి. మనుషులందరిలాగానే ఇస్సాకుకూ పాత స్వభావం ఉంది. ఆదికాండము 9:21 ఆదికాండము 12:13 రోమీయులకు 3:9-10 చూడండి.

2. అప్పుడు ఇస్సాకు ఇదిగో నేను వృద్ధుడను, నా మరణదినము నాకు తెలియదు.

3. కాబట్టి నీవు దయచేసి నీ ఆయుధములైన నీ అంబుల పొదిని నీ విల్లును తీసికొని అడవికి పోయి నాకొరకు వేటాడి మాంసము తెమ్ము.

4. నేను చావక మునుపు నిన్ను నేను ఆశీర్వదించునట్లు నాకిష్టమైన రుచిగల భోజ్యములను సిద్ధపరచి నేను తినుటకై నాయొద్దకు తెమ్మని చెప్పెను.

5. ఇస్సాకు తన కుమారుడగు ఏశావుతో ఇట్లు చెప్పుచుండగా రిబ్కా వినుచుండెను. ఏశావు వేటాడి మాంసము తెచ్చుటకు అడవికి వెళ్లెను.

ఇస్సాకు దీవెనలు (అంటే ఇస్సాకుద్వారా దేవుని దీవెనలు) యాకోబుకు రావాలని రిబ్కా కృత నిశ్చయంతో ఉంది. ఇందుకు తన భర్తను మోసగించవలసివచ్చినా ఫర్వాలేదనుకొన్నది. దేవుని వాగ్దానాల విలువను ఆమె గుర్తించింది. కానీ రిబ్కా కూడా పక్షపాతం అనే తప్పు చేసినదే (ఆదికాండము 25:28).

6. అప్పుడు రిబ్కా తన కుమారుడగు యాకోబును చూచి ఇదిగో నీ తండ్రి నీ అన్నయైన ఏశావుతో

7. మృతి బొందకమునుపు నేను తిని యెహోవా సన్నిధిని నిన్ను ఆశీర్వదించునట్లు నాకొరకు మాంసము తెచ్చి నాకు రుచిగల భోజ్యములను సిద్ధ పరచుమని చెప్పగా వింటిని.

8. కాబట్టి నా కుమారుడా, నా మాట విని నేను నీకు ఆజ్ఞాపించినట్టు చేయుము.

9. నీవు మందకు వెళ్లి రెండు మంచి మేక పిల్లలను అక్కడనుండి నాయొద్దకు తెమ్ము. వాటితో నీ తండ్రి కిష్టమైన రుచిగల భోజ్యములను అతనికి చేసెదను.

10. నీ తండ్రి మృతిబొందక ముందు అతడు వాటిని తిని నిన్ను ఆశీర్వదించునట్లు నీవు వాటిని నీ తండ్రి యొద్దకు తీసికొనిపోవలెననెను.

11. అందుకు యాకోబు నా సహోదరుడైన ఏశావు రోమము గలవాడు, నేను నున్ననివాడను గదా.

12. ఒకవేళ నా తండ్రి నన్ను తడవిచూచును, అప్పుడు నేను అతని దృష్టికి వంచకుడనుగా తోచినయెడల నా మీదికి శాపమే గాని ఆశీర్వాదము తెచ్చుకొననని చెప్పెను.

13. అయినను అతని తల్లి నా కుమారుడా, ఆ శాపము నా మీదికి వచ్చును గాక. నీవు నా మాట మాత్రము విని, పోయి వాటిని నాయొద్దకు తీసికొని రమ్మని చెప్పగా

14. అతడు వెళ్లి వాటిని తన తల్లియొద్దకు తీసికొనివచ్చెను. అతని తల్లి అతని తండ్రి కిష్టమైన రుచిగల భోజ్యములను సిద్ధపరచెను.

15. మరియు తన జ్యేష్ఠ కుమారుడగు ఏశావునకు సొగసైన వస్త్రములు ఇంట తన యొద్ద నుండెను గనుక

16. రిబ్కా వాటిని తీసి తన చిన్న కుమారుడగు యాకోబునకు తొడిగించి ఆ మేకపిల్లల చర్మములతో అతని చేతులను అతని మెడమీద నునుపు భాగమును కప్పి

దేవుని దీవెనలు పొందడానికి యాకోబు కూడా అబద్ధమాడేందుకూ మోసగించేందుకూ సిద్ధమే. దీనంతటిలో యాకోబు, అతని తల్లి పాపం చేసినప్పటికీ దేవుని వాగ్దానాల విషయంలో వారు నమ్మకాన్ని ప్రదర్శించారు. మనుషుల పట్ల దేవుని వ్యవహారాల విషయంలో నమ్మకం (బలహీనమైన నమ్మకమైనా సరే) అనేది చాలా ప్రాముఖ్యమైనది (25:34 దగ్గర రిఫరెన్సులు చూడండి). దేవుడు వారి నమ్మకానికి ప్రతిఫలమిచ్చాడు గాని వారి కపటాన్ని శిక్షించాడు. యాకోబు నిజంగానే ఆ దీవెన పొందాడు గాని తరువాత తన మామ చేతుల్లో మోసపోయి చాలా ఇబ్బందులపాలయ్యాడు (ఆదికాండము 29:25 ఆదికాండము 31:7 ఆదికాండము 31:40-41) యాకోబు రిబ్కాదగ్గర నుంచి దూరంగా వెళ్ళిపోయాడు. బహుశా ఆమె అతణ్ణి మరెన్నడూ చూడలేదు. అందుచేత ఆమె తప్పక మనోవేదనలు అనుభవించింది. 27వ అధ్యాయం తరువాత ఆదికాండం గ్రంథంలో రిబ్కా మరి కన్పించదు. అబద్ధాలనూ మోసాన్నీ దేవుడు అసహ్యించుకుంటాడు, తప్పకుండా శిక్షిస్తాడు (సామెతలు 6:16-19 సామెతలు 12:22 సామెతలు 19:5 సామెతలు 19:9 గలతియులకు 6:7 ఎఫెసీయులకు 4:15 ఎఫెసీయులకు 4:25 కొలొస్సయులకు 3:9). యాకోబు తన తండ్రిని మోసం చెయ్యడం పాపమే కాకుండా కేవలం అనవసరం. ఏశావు, యాకోబు పుట్టకమునుపే దేవుడు యాకోబును కోరుకుని, పెద్దవాడు (ఏశావు) చిన్నవాడికి (యాకోబు) దాసుడౌతాడని చెప్పాడు. ఆదికాండము 25:23 రోమీయులకు 9:10-13 చూడండి. యాకోబు, అతని తల్లి చేసిన పన్నాగాలు, పలికిన అబద్ధాలతో అవసరం లేకుండానే దేవుడు తన మాట నెరవేర్చుకునేవాడే. మనుషులు తమపట్ల దేవుని సంకల్పాన్ని నెరవేర్చుకునేందుకు ఎత్తుగడలూ అబద్ధాలూ మోసమూ ఉపయోగించనక్కరలేదు. వారు ఆ విషయాన్ని దేవుని చేతిలోనే వదిలేస్తే తన సమయంలో తన విధానంలో ఆయనే నెరవేరుస్తాడు. ఆదికాండము 12:13 యెహోషువ 2:5 1 సమూయేలు 27:10 2 సమూయేలు 15:34 నోట్స్ చూడండి.

17. తాను సిద్ధపరచిన రుచిగల భోజ్యములను రొట్టెను తన కుమారుడగు యాకోబు చేతి కియ్యగా

18. అతడు తన తండ్రి యొద్దకు వచ్చి - నా తండ్రీ, అని పిలువగా అతడు ఏమి నా కుమారుడా, నీ వెవరవని అడిగెను

19. అందుకు యాకోబు నేను ఏశావు అను నీ జ్యేష్ఠ కుమారుడను, నీవు నాతో చెప్పిన ప్రకారము చేసియున్నాను. నీవు నన్ను దీవించుటకై దయచేసి లేచి కూర్చుండి, నేను వేటాడి తెచ్చినదానిని తినుమనెను.

20. అప్పుడు ఇస్సాకు నా కుమారుడా, ఇంత శీఘ్రముగా అది నీ కెట్లు దొరికెనని అడుగగా అతడు నీ దేవుడైన యెహోవా నా యెదుటికి దాని రప్పించుట చేతనే అని చెప్పెను.

“నీ దేవుడు”– “నా దేవుడు” అనలేదు యాకోబు (ఆదికాండము 28:21 ఆదికాండము 31:54 ఆదికాండము 35:3). దేవుని పేరున అబద్ధమాడేందుకు కూడా సిద్ధమే.

21. అప్పుడు ఇస్సాకు నా కుమారుడా, నీవు ఏశావను నా కుమారుడవో కావో నేను నిన్ను తడవి చూచెదను దగ్గరకు రమ్మని చెప్పెను.

22. యాకోబు తన తండ్రియైన ఇస్సాకు దగ్గరకు వచ్చినప్పుడు అతడు అతని తడవిచూచి - స్వరము యాకోబు స్వరము గాని చేతులు ఏశావు చేతులే అనెను.

23. యాకోబు చేతులు అతని అన్నయైన ఏశావు చేతులవలె రోమము గలవైనందున ఇస్సాకు అతనిని గురుతు పట్టలేక అతనిని దీవించి

24. ఏశావు అను నా కుమారుడవు నీవేనా అని అడుగగా యాకోబు - నేనే అనెను.

25. అంతట అతడు అది నాయొద్దకు తెమ్ము; నేను నిన్ను దీవించునట్లు నా కుమారుడు వేటాడి తెచ్చినది తిందు ననెను; అతడు తెచ్చినప్పుడు అతడు తినెను; ద్రాక్షారసము తేగా అతడు త్రాగెను.

26. తరువాత అతని తండ్రియైన ఇస్సాకు నా కుమారుడా, దగ్గరకువచ్చి నన్ను ముద్దు పెట్టుకొమ్మని అతనితో చెప్పెను.

27. అతడు దగ్గరకు వచ్చి అతని ముద్దుపెట్టుకొనెను. అప్పుడతడు అతని వస్త్రములను వాసన చూచి అతని దీవించి యిట్లనెను. ఇదిగో నా కుమారుని సువాసన యెహోవా దీవించిన చేని సువాసనవలె నున్నది.
హెబ్రీయులకు 11:20

దేవుడు అబ్రాహాముకు ఇచ్చిన దీవెన ఇదే గాని పదజాలం వేరు (ఆదికాండము 12:1-3). ఆదికాండము 25:23 లో రిబ్కాకు ఇంతకుముందే యెహోవా చెప్పినది ఇదే.

28. ఆకాశపుమంచును భూసారమును విస్తారమైన ధాన్యమును ద్రాక్షారసమును దేవుడు నీ కనుగ్రహించుగాక

29. జనములు నీకు దాసులగుదురు జనములు నీకు సాగిలపడుదురు నీ బంధు జనులకు నీవు ఏలికవై యుండుము నీ తల్లి పుత్రులు నీకు సాగిలపడుదురు నిన్ను శపించువారు శపింపబడుదురు నిన్ను దీవించువారు దీవింపబడుదురుగాక

30. ఇస్సాకు యాకోబును దీవించుటయైన తరువాత యాకోబు తన తండ్రియైన ఇస్సాకు ఎదుటనుండి బయలు దేరి వెళ్లిన తక్షణమే అతని సహోదరుడైన ఏశావు వేటాడి వచ్చెను.
హెబ్రీయులకు 11:20

31. అతడును రుచిగల భోజ్యములను సిద్ధపరచి తన తండ్రియొద్దకు తెచ్చినా తండ్రీ నన్ను దీవించునట్లు లేచి నీ కుమారుడు వేటాడి తెచ్చినదాని తినుమని తన తండ్రితోననెను.

వ 4. మంచి భోజనం తింటేనే గాని ఇస్సాకు దీవెనలు ఇవ్వలేకపోయాడా? నిస్సందేహంగా అతడి గుణం లోపం గలది.

32. అతని తండ్రియైన ఇస్సాకు - నీ వెవరవని అతని నడిగినప్పుడు అతడునేను నీ కుమారుడను ఏశావు అను నీ జ్యేష్ఠకుమారుడననగా

33. ఇస్సాకు మిక్కుటముగా గడగడ వణకుచు అట్లయితే వేటాడిన భోజ్యమును నాయొద్దకు తెచ్చినవారెవరు? నీవు రాకమునుపు నేను వాటన్నిటిలో తిని అతనిని నిజముగా దీవించితిని, అతడు దీవింపబడినవాడే యనెను.

“అతణ్ణి...దీవిస్తాడు”– యాకోబుకు దేవుని దీవెనలు ఇచ్చాననీ, దీన్ని మార్చడం అసాధ్యం అనీ ఇస్సాకు నమ్మాడు (హెబ్రీయులకు 11:20 సంఖ్యాకాండము 23:19-20). నిజంగానే దీన్ని ఏదీ మార్చలేకపోయింది ఆదికాండము 9:25-27 ఆదికాండము 49:1 పోల్చి చూడండి.

34. ఏశావు తన తండ్రి మాటలు వినినప్పుడు దుఃఖాక్రాంతుడై పెద్దకేక వేసి - ఓ నా తండ్రీ, నన్నును దీవించుమని తన తండ్రితో చెప్పెను.

తాను పోగొట్టుకున్నదేదో ఏశావుకు తెలిసివచ్చేసరికి సమయం మించిపోయింది (ఆదికాండము 25:33-34). తన తండ్రి మనస్సును ఇక మార్చలేకపోయాడు (హెబ్రీయులకు 12:15-17).

35. అతడు - నీ సహోదరుడు కపటోపాయముతో వచ్చి నీకు రావలసిన దీవెన తీసికొనిపోయెను.

36. ఏశావు యాకోబు అను పేరు అతనికి సరిగానే చెల్లినది; అతడు నన్ను ఈ రెండు మారులు మోసపుచ్చెను. నా జ్యేష్ఠత్వము తీసికొనెను, ఇదిగో ఇప్పుడు వచ్చి నాకు రావలసిన దీవెనను తీసికొనెనని చెప్పి - నా కొరకు మరి యే దీవెనయు మిగిల్చి యుంచలేదా అని అడిగెను.

ఆదికాండము 25:26.

37. అందుకు ఇస్సాకు - ఇదిగో అతని నీకు ఏలికనుగా నియమించి అతని బంధుజనులందరిని అతనికి దాసులుగా ఇచ్చితిని; ధాన్యమును ద్రాక్షారసమును ఇచ్చి అతని పోషించితిని గనుక నా కుమారుడా, నీకేమి చేయవలెనని ఏశావుతో ప్రత్యుత్తరమియ్యగా¸

38. ఏశావు నా తండ్రీ, నీయొద్ద ఒక దీవెనయే ఉన్నదా? నా తండ్రీ, నన్ను, నన్ను కూడ దీవించుమని తన తండ్రితో చెప్పి ఏశావు ఎలుగెత్తి యేడ్వగా అతని తండ్రియైన ఇస్సాకు -

39. నీ నివాసము భూసారము లేకయు పైనుండిపడు ఆకాశపుమంచు లేకయు నుండును.

ఎదోంవారి దేశం రాళ్ళమయంగా నిస్సారంగా ఉంది. ఇది మృత సముద్రానికి దక్షిణంగా ఉంది.

40. నీవు నీకత్తిచేత బ్రదుకుదువు నీ సహోదరునికి దాసుడవగుదువు నీవు తిరుగులాడు చుండగా నీ మెడ మీదనుండి అతని కాడి విరిచివేయుదువు అని అతని కుత్తరమిచ్చెను.

“మెడ”– 2 రాజులు 8:20-22.

41. తన తండ్రి యాకోబుకిచ్చిన దీవెన నిమిత్తము ఏశావు అతనిమీద పగపట్టెను. మరియు ఏశావు నా తండ్రిని గూర్చిన దుఃఖదినములు సమీపముగా నున్నవి; అప్పుడు నా తమ్ముడైన యాకోబును చంపెదననుకొనెను.

“చంపేస్తాను”– ఇంతకుముందే అతని స్వభావం భ్రష్టమైనదని చూశాం. ఇప్పుడు అది మరింత భ్రష్టమైపోయింది (ఆదికాండము 25:34. ఆదికాండము 4:8 పోల్చి చూడండి). మోసం తెచ్చిపెట్టే కష్టాలు అనేకం.

42. రిబ్కా తన పెద్దకుమారుడైన ఏశావు మాటలనుగూర్చి వినినప్పుడు ఆమె తన చిన్న కుమారుడైన యాకోబును పిలువనంపి అతనితో ఇట్లనెను - ఇదిగో నీ అన్నయైన ఏశావు నిన్ను చంపెదనని చెప్పి నిన్ను గూర్చి తన్నుతాను ఓదార్చుకొను చున్నాడు.

43. కాబట్టి నా కుమారుడా, నీవు నా మాట విని లేచి హారానులోనున్న నా సహోదరుడగు లాబాను నొద్దకు పారిపోయి నీ అన్నకోపము చల్లారువరకు

44. నీ అన్న కోపము నీమీదనుండి తొలగి నీవు అతనికి చేసిన వాటిని అతడు మరచు వరకు లాబానునొద్ద కొన్నాళ్లు ఉండుము;

45. అప్పుడు నేను అక్కడనుండి నిన్ను పిలిపించెదను. ఒక్కనాడే మీ యిద్దరిని నేను పోగొట్టుకొననేల అనెను.

46. మరియు రిబ్కా ఇస్సాకుతో - హేతు కుమార్తెలవలన నా ప్రాణము విసికినది. ఈ దేశస్థురాండ్రయిన హేతు కుమార్తెలలో వీరివంటి ఒకదానిని యాకోబు పెండ్లి చేసి కొనినయెడల నా బ్రదుకువలన నాకేమి ప్రయోజనమనెను.

వ 26,34,35. ఇస్సాకు యాకోబును ప్రమాదానికి దూరంగా పంపివేసేలా చెయ్యడానికి రిబ్కా ఉపాయం ఇది.